Fare Machib ni Ma K’aring e Girdi’ Ngar Lemnaged ni Got e Der Ma Runguyey

N’EN NIB MICH U WAN’ BOOR E GIRDI’

Thin u reb e babyor e be yog ni “piin ni ta denen ni kar m’ad e yad ra yan nga infierno, ni aram e gin ni yad ra gafgow riy min gechignagrad u fithik’ e ‘nifiy ndabi math biid.’” (Catechism of the Catholic Church) Ma boch e tayugang’ ko teliw e yad ma yog ni infierno e be yip’ fan ni kan par ni yib dar ku Got.

TIN RIYUL’ U BIBLE

“En nra denen e aram e cha’ ni nge yim’.” (Ezekiel 18:4) Piin nib yam’ e “dariy ban’en ni manang.” (Eklesiastes 9:5) Faanra yim’ be’ ma dakuriy ban’en ni manang, ere uw rogon ni ngan gafgownag u fithik’ e “nifiy” ara nge par nib dar ku Got ni manemus?

U lan e Bible, ma fare bugithin ni “infierno” ni kan piliyeg ni thin ni Hebrew nge Greek e be yip’ fan e low ko yam’. Bod nnap’an ni yib e m’ar ngak Job nib gel ma aram me meybil ni gaar: “Dabiyog ni ngam n’igeg nggu par u tafen e yam’.” (Acts 2:27) Der lemnag Job ni nge toffan u bang ni bay e nifiy riy ara nge par nib dar ku Got, ya i lemnag ni nge par u lan e low ko yam’.

FAN NIB GA’ FAN

Dabiyog ni ngad chugurgad ngak Got ni faanra der ma runguy e girdi’. I yog Rocio ni be’ ni ma par u Mexico ni gaar: “Nap’an ni ku gub bitir min fil fare machib ngog ni murung’agen e nifiy ni dabi math biid ara infierno. Kug rus ya kug lemnag ni Got e dariy pi fel’ngin, ma kug lemnag ni ir be’ nib ta damumuw ma der ma gum’an’.”

Thin ko Bible ni be tamilangnag murung’agen e pufthin nra tay Got nge rarogon e piin ni kar m’ad e ke thilyeg rogon ni ma lemnag Rocio murung’agen Got. Me yog ni gaar: “Kug thamiy ni ke puf rogog, ya ke chuw fare n’en nib ga’ ni i magawonnag lanin’ug. Aram e ngiyal’ ni ke tabab ni nge mich u wan’ug nri baadag Got ni nge pi’ e tin th’abi fel’ ngodad, ma gadad ba t’uf rok, maku rayog ni nggu dag nib t’uf rog. Bod ba matam ni ma chugumiy pi fak ngak ma baadag ni nge pi’ e tin th’abi fel’ ngorad.”​—Isaiah 41:13.

Boor e girdi’ ni yad be athamgil ni ngar folgad ko machib ko teliw rorad ya bochan ni yad be rus ni ngan gechignagrad u fithik’ e nifiy ndabi math biid, machane Got e dabun ni ngam pigpig ngak ni bochan ni ga be rus ngak. Yog Jesus ni gaar: “Thingari t’uf rom Somol, ni ir e Got rom.” (Mark 12:29, 30) Maku, faanra kad nanged ndabi rin’ Got ban’en nde mat’aw e ngiyal’ ney, ma rayog ni nge pagan’dad ko pufthin nra tay boch nga m’on. Rayog ni ngad boded Elihu ni fager rok Job ni gaar: “Gur, Got ni gubin ma Rayog Rok e ra rin’ e kireb?”​—Job 34:10.