Tin Riyul’ e Ra Ayuwegdad nge Dab Kud Pared ni Gad e Sib

Reb e rran u Jerusalem, e i weliy Jesus murung’agen Jehovah ni Chitamangin, ma be tamilangnag e pi n’en ni be rin’ e pi tayugang’ ko pi yurba’ i teliw nde puluw e ngiyal’ nem. (John 8:12-30) N’en ni i weliy e rofen nem e ra ayuwegdad ni ngad fal’eged i yaliy boch e machib u murung’agen Got nib mich u wan’ e girdi’ e ngiyal’ ney. I gaar Jesus: “Faan gimed ra fol ko thin ni gu be machibnag ngomed ma aram e kari mudugil ni kam manged pi gachalpeg; ma bay mu nanged e tin nriyul’, ma tin riyul’ e ir e bay i ayuwegmed nge dab kum pired ni gimed e sib.”​—John 8:31, 32.

Nguum ‘folgad ko thin ni gu be machibnag.’ Pi thin rok Jesus nem e ra ayuwegey ni ngan nang ko “riyul’” e n’en ni be machibnag e pi yurba’ i teliw fa. Nap’an ni ga ra rung’ag reb e machib u murung’agen Got, mag fithem ni nge lungum: ‘Gur, re thin ney e ba puluw ko thin rok Jesus, nge tin ni ka bay e thin nu Bible?’ Ngan folwok rok e piin nrung’aged e n’en ni yog apostal Paul ni ur “gayed u lan e babyor nib thothup ni ngar guyed ko riyul’ e tin ni ke yog fa.”​—Acts 17:11.

Marco nge Rosa nge Raymonde ni kan tay e thin rorad ko tin nsom’on e article e kar fal’eged i yaliy e pi n’en nib michan’rad ngay u daken e fol Bible ni kar ted e Pi Mich Rok Jehovah. Ere mang e kar filed?

Marco: “En ni ke fil e Bible ngomow e ppin rog e ke fanay e thin nu Bible ni nge pi’ e fulweg ko deer romow. T’ufeg romow ngak Jehovah e tabab ni nge gel i yan, ma ke yag ni nge chugur e tha’ u thilmow e ppin rog.”

Rosa: “Som’on e ug lemnag ni Bible e ba ke babyor ni bay e llowan’ ko girdi’ riy ni yad be gay rogon ni ngar tamilangnaged murung’agen Got ngan nang. Machane munmun mug pirieg e fulweg ko pi deer rog u Bible. Ere chiney e kug nang nib riyul’ Jehovah, ma rayog ni ngari pagan’ug ngak.”

Raymonde: “Ug meybil ngak Got ni nge ayuwegeg ni nggu fil murung’agen. De n’uw nap’an nga tomuren mug tababgow e pumoon rog i fil e Bible, ma aram e ngiyal’ ni kug nangew e tin riyul’ u murung’agen Jehovah, ma kar gu felfelan’gow.”

Fare Bible e gathi kemus ni be tamilangnag e machib nde riyul’ u murung’agen Got, ya ku be tamilangnag e tin riyul’ u murung’agen pi fel’ngin Got. Bible e thin rok Got, ma ma ayuwegdad ni ngad “nanged urngin e tin ni ke pi’ Got ngodad.” (1 Korinth 2:12) Mang ndab mu guy ko uw rogon nrayog ni nge pi’ e Bible e fulweg ko pi deer nib ga’ fan u murung’agen Got, nge n’en nib m’agan’ ngay, nge pi n’en ni bay nga m’on ni fan ngodad? Mu beeg e fulweg ko pi deer ney ni bay ko “Bible Teachings > Bible Questions Answered” ko www.jw.org. Ku rayog ni ngam man ko online nga mog ni ga baadag ni ngam fil e Bible ara nga mog ngak reb e Pi Mich Rok Jehovah. Ba mich u wan’mad ni faanra mu rin’ e re n’ey ma ga ra pirieg ni Got e be’ nib mom ni ngan t’ufeg.