KENGGIN E RE KE BABYOR NEY

Uw Rogon e Mahl u Wan’ Got?

Uw rogon ni ga ra fulweg e re deer ney? Boor e girdi’ ni yad ma lemnag nib m’agan’ Got ko mahl ni yima tay. Yad ma lemnag nib m’agan’ ngay ni bochan e i l’og boch e tapigpig rok kakrom ni nga ranod ko mahl; maku aray rogon ni be yog e Bible. Machane, bay boch e girdi’ ni kar nanged ni i fil Jesus ni Fak Got ko girdi’ ni ngaur t’ufeged e pi toogor rorad. (Matthew 5:43, 44) Ere, yad ma lemnag ni bay ba ngiyal’ ni yan i taw ngay me thil rogon e lem rok Got u murung’agen e mahl, ma chiney e daki m’agan’ ngay ni ngan mahl.

Me gur, uw rogon ni ga be lemnag? Ga be lemnag nib m’agan’ Got ngay ni ngaun mahl, fa? Faanra ga be lemnag nib m’agan’ ngay, me ere kun raba’ i salthaw e ba mang ngorad e ngiyal’ ney? Ga ra nang e fulweg ko pi deer ney, ma rayog ni nge ayuwegem ni ngam nang ko ba puluw rogon ni ga ma lemnag murung’agen e mahl fa danga’. Bod ni, faanra ga manang nib m’agan’ Got ko mahl ni yima tay maku be ayuweg e piin ni gab mang ngorad, ma dabisiy ni ga ra felfelan’ ni bochan e ba pagan’um ni ba’ rom e girdi’ e yad ra gel. Maku reb e, uw rogon ni faanra kam nang nib mang Got ko toogor rom? Dabisiy ni ga ra guy rogon ni ngam thilyeg e baan ni gab muun ngay.

Machane, bay ban’en ni ir e kab ga’ fan. Faan ga ra nang rogon ni ma lemnag Got e mahl, ma rayog ni nge thil rogon ni ga ma lemnag Got. Faanra gab muun ko fa in milyon i girdi’ ni yad be gafgow e chiney ni bochan e mahl, ma dariy e maruwar riy nib t’uf ni ngam nang e fulweg ko re deer ni baaray ni gaar, Gur, Got e ir be’ nib kireb ni ma pag ara ma k’aring e girdi’ ni ngaur gafgowgad u nap’an e mahl, ara ma pag e girdi’ ni ngaur gafgowgad ni bochan e der lemnagrad?

Dabisiy ni ga ra gin u nap’an ni ga ra nang nib thil e n’en ni be yog e Bible ko n’en ni ma lemnag e girdi’ u murung’agen e mahl. Maku reb e, kab kakrom i yib ndawori thil rogon ni ma lemnag Got murung’agen e mahl. Ere, chiney e ngad weliyed e n’en ni be yog e Bible u murung’agen rogon ni i lemnag Got e mahl ni un tay u nap’an e tin som’on e tapigpig rok ngu nap’an e bin som’on e chibog ko ngiyal’ ni immoy Jesus u fayleng. Re n’ey e ra ayuwegdad ni ngad nanged rogon ni ma lemnag Got e pi mahl ni yibe tay e chiney. Ku ra ayuwegdad ni ngad nanged ko ku yira mahl boch nga m’on fa danga’.