KENGGIN E RE KE BABYOR NEY | UW ROGON E MAHL U WAN’ GOT?

Rogon e Mahl u Wan’ Got e Ngiyal’ Ney

Yibe gafgownag e girdi’ e ngiyal’ ney. Boor i yad e ma wenig ngak Got ni nge ayuwegrad maku yad ma lemnag ko wuin e yad ra chuw u fithik’ e gafgow. Gur, ma rung’ag Got lungun e pi girdi’ ney, fa? Ma uw rogon e piin ni yad ma un ko mahl ni bochan e yad be lemnag ni aram rogon nrayog ni ngar chuwgad u fithik’ e gafgow? Gur, ma ayuwegrad Got? Ma gur, ba m’agan’ ko pi mahl nem ni yad ma un ngay, fa?

Som’on e thingar mu nang ni be guy Got e gafgow ni be tay e girdi’ u fayleng e ngiyal’ ney, ma ke dugliy nra chuweg e pi n’ey. (Psalm 72:13, 14) Ke micheg Got ko Thin rok u Bible nra taw nga ba ngiyal’ ma ra pogofan e ‘piin ni yad be gafgow.’ Wuin e ra buch e re n’ey? “Ra rin’ e re n’ey ko ngiyal’ nra m’ug Somol Jesus u lan e lang ni ke yib u tharmiy ni yad e pi engel rok nib yargel, . . . ni nge gechignag e piin nde t’uf rorad ni ngar nanged murung’agen Got nge piin ndarir folgad ko Thin nib Fel’ ni yib rok Got ni murung’agen e Somol rodad i Jesus.” (2 Thessalonika 1:7, 8) Nap’an nra yib fare “mahl ni fan ko fare rran ni ba ga’ fan, ni Rran rok Got ni Gubin ma Rayog Rok” ara Armageddon, ma aram e ngiyal’ nra m’ug Jesus riy.​—Revelation 16:14, 16.

Nap’an ni yira tay e re mahl nem, ma dabi fanay Got e girdi’ ni ngar mahlgad ni pa’, ya ra fanay Jesus Kristus ni Fak nge boch e engel rok nib gel gelngirad ni ngar chamgad ngak e piin ni yad ba kireb. Ma aram e piin ni yad ra taleg e gafgow ni yibe tay ko girdi’.​—Isaiah 11:4; Revelation 19:11-16.

Ka rogon e lem rok Got u murung’agen e mahl. Ka ma tay ni mahl e aram kanawoen nrayog ni nge tal e gafgow ni be tay e girdi’ nge ngongol nib kireb ni yibe rin’. Machane, kemus ni yigoo ir e bay mat’awun ni nge dugliy e ngiyal’ ni ngan mahl riy nge piin ni ngar mahlgad ni bod rogon ni i rin’ ni kab kafram i yib. Kad filed ni ke mu’ Got i dugliy rogon e mahl ni yira tay boch nga m’on ni ngan taleg e kireb nge gafgow ni yibe tay ko girdi’. Machane, Jesus Kristus ni Fak e aram e en ni ke dugliy ni nge un ko re cham nem. Ere, re n’ey e be dag nde m’agan’ Got ko pi mahl ni yibe tay u fayleng e ngiyal’ ney ni yugu aram rogon ni bay boch e girdi’ ni yad be lemnag ni aram kanawoen nrayog ni ngan ayuweg e girdi’ riy.

Baaray rogon nrayog ni ngan susunnag: Am lemnag l’agruw i walag ni yow be cham u nap’an nde moy e chitamangirow u tabinaw. Boch nga tomuren mar callnagew e chitamangirow, me yog bagayow fa gal walag ngak e chitamangin ni fa bin baaram e pagel ni walagen e ir e ke k’aring e cham, ma bagayow e yog ni fan ni kar chamgow e bochan ni be rin’ fare pagel ni walagen boch ban’en ngak ni dabun. Ere, yow l’agruw ni kar weliyew salaprow ko chitamangirow, ya ra bagayow ma be lemnag ni ir e yira fol ngak. Machane, me yog e chitamangirow ngorow ni ngar talgow ko cham ya bayi taw nga tabinaw mi yad weliy e n’en ni ke buch. Ma aram me tal fa gal pagel nda kur chamgow. Machane, ku de n’uw nap’an nga tomuren mu kur chamgow bayay. Ere, nap’an ni taw e chitamangirow nga tabinaw me puwan’ ngorow ni yow l’agruw me gechignagrow ni bochan e dar folgow.

Ngiyal’ ney e pi nam ni yad be mahl ngorad e ba ga’ ni yad ma sap ngak Got ni nge ayuwegrad. Machane, dariy reb e pi nam ney nib mang Got ngorad. Ya be gaar e Thin rok u Bible: “Faanra rin’ be’ ban’en nib kireb ngomed, ma dab mu sulweged taban ngak nib kireb,” ma “Dab mu fulweged ngak be’ taban e kireb ni rin’ ngomed.” (Roma 12:17, 19) Maku reb e, ke yog ni susun ni nge ‘gum’an’nag’ e girdi’ yad ngar sonnaged ni nge rin’ ban’en. Ma gad manang ni ireray e n’en nra rin’ u nap’an e Armageddon. (Psalm 37:7) Machane, faanra dabi son e pi nam ni nge chuweg Got e kireb ma ranod ko mahl ni yad be guy rogon ni ngar taleged e kireb, ma aram e dabi m’agan’ Got ngay, ya bod ni yad be guy rogon ni ngar fulweged taban e kireb. Machane, nap’an fare mahl ni Armageddon ma aram e ngiyal’ nra taleg Got e pi magawon ni be sum u thilin e pi nam me “taleg e pi mahl ni yibe tay u fayleng i yan.” (Psalm 46:9; Isaiah 34:2) Ere, Armageddon e aram e re mahl nra taleg e pi mahl ni yibe tay.

Boor e tow’ath nra fek Gil’ilungun Got i yib nga fayleng, ma pi mahl nra taleg e aram reb ko pi tow’ath nem. I weliy Jesus murung’agen e re am nem u lan fare kenggin e meybil ni fil ngak pi gachalpen ni gaar: “Ma ga par ni gur e ga be gagiyegnagmad, min rin’ e tin nib m’agan’um ngay u roy u but’ ni bod rogon ni yibe rin’ u tharmiy.” (Matthew 6:10) Ere, gathi kemus nra taleg Gil’ilungun Got e mahl ni yibe tay, ya ku ra chuweg e kireb ni yibe rin’, ya aram tapgin ma be mahl e girdi’ e ngiyal’ ney.a (Psalm 37:9, 10, 14, 15) Aram fan ni be sonnag pi gachalpen Jesus e pi flaab nra fek Gil’ilungun Got i yib nga fayleng.​—2 Peter 3:13.

Ere, uw n’umngin nap’an ni ngad sonnaged Gil’ilungun Got ni nge chuweg e kireb, nge gafgow ni yibe tay ko girdi’? Pi yiiy u Bible ni be lebug e chiney e be dag ni gad be par ko “tin tomren e rran” ko re m’ag nib kireb ney. (2 Timothy 3:1-5)b Ma dabki n’uw nap’an ma ra fek Gil’ilungun Got fare mahl i yib ni ka nog e Armageddon ngay.

Kad weliyed faram ni “piin ndarir folgad ko Thin nib Fel’ ni yib rok Got ni murung’agen e Somol rodad i Jesus” e aram e piin ni yad ra yim’ u nap’an e re mahl nem. (2 Thessalonika 1:8) Machane, dab mu pagtalin ni dabun Got ni nge yim’ be’ ni kub muun ngay e piin ni yad ba kireb. (Ezekiel 33:11) Ma bochan ni “dabun” ni nge thang be’ u nap’an e re mahl rok nem, ma aram fan ni ke yarmiy ni ngan “machibnag” fare thin nib fel’ ni murung’agen Jesus ni ir e Somol rodad “u gubin yang u fayleng ni nge urngin e girdi’ me nang,” ma aram mfini yib e tomur. (2 Peter 3:8, 9; Matthew 24:14; 1 Timothy 2:3, 4) Arrogon, bochan fare maruwel ni machib ni be rin’ e Pi Mich Rok Jehovah u ga’ngin yang u fayleng, ma aram fan nrayog ni nge nang e girdi’ murung’agen Got, mar folgad ko fare thin nib fel’ ni murung’agen Jesus, me yag ni ngar guyed e ngiyal’ ni yira taleg e mahl u fayleng.

[Boch e thin nra tamilangnag murung’agen]