Pi Gallibthir—Be Fil e Bitir Romed Rogon ni Ngar Lemgad ni Bod Got, Fa?
1. Mang e ma k’aring e felfelan’ nga gum’erchaen e pi gallibthir ni Kristiano?
1 Rib tow’ath ni bay e pi bitir rodad nib t’uf Jehovah rorad! Re n’ey e ri ma k’aring e felfelan’ nga gum’erchaen e pi gallibthir. I tamilangnag apostal John ni aram rogon e lem rok ni fan ko girdi’ ni i ayuweg ya gaar: “Dariy ban’en nrib gel e felfelan’ nra pi’ ngog ko bin ni nggu rung’ag murung’agen pi fakag ni yad be fol ko tin riyul’.”—3 John 4.
2. (a) Mang reb e deer ni ke fith boch e gallibthir? (b) Uw rogon ni fulweg reb e matam e re deer nem?
2 Boor e gallibthir e yad ma fith ko, “uw rogon ni ngam ayuweg e bitir rom ni nge lem ni bod Got?” Faan gad ra lemnag rogon e togopuluw ni be tay Satan nge wawliy e piin bitir e ngiyal’ ney ma ba tamilang ni ba puluw e re deer ney. Fulweg rok e pi gallibthir ni ke yog ni ngar ayuweged pi fakrad e rayog ni nge ayuwegey. Ke yog reb e matam ni gaar, “N’en nib t’uf e ngam dag nib taareban’mew Jehovah.” Re walag nem e ir reb e piilal ni bay aningeg e bitir rok e ma dugliy e ngiyal’ ni ngaur chaggad e bitir rok. Gubin ngiyal’ ni yad ma tay ni nge m’on u wan’rad e tirok Got ban’en. Yad ma weliy murung’agen e tirok Got ban’en u taabang. Faanra ngan yan ko chur, ma ra dugliy fare matam ni nga ranod ni yad gubin ma yad ma un ko muulung u Kingdom Hall ko gin’en ni ka ranod ngay.
3. Uw rogon ni ke ayuweg reb e matin pifak ni ngar felfelan’gad ko machib u mit e tabinaw?
3 Ku reb ni ba ga’ fan e ngam n’igin ni nge felfelan’ girdien e tabinaw ko machib ni yad ma tay u mit e tabinaw. Reb e matin e yog ni ma fek pifak ko machib u mit e tabinaw u nap’an ni ka yad ba madway. Gubin ngiyal’ ni yad ma felfelan’ ko pigpig ni yad ma tay ma gathi kemus ni yad ma un ko machib ni bochan e ka nog ni ngan rin’.
4. Mang e ra ayuweg e gallibthir nge bitir ni nge pufpuf e thin u thilrow?
4 Nge Puf e Thin u Thiliy: Uw rogon ni ngam nang ni lem ko bitir rom e ba puluw nga rogon ni am lem Got ni faanra dab mu non ngak? Dabi siy ni ba mo’maw’ ni ngam nang. Ar fan ni pi gallibthir ni ke yib angin e re n’ey ngorad e e kar pirieged ni bay e gonop riy ni ngaur nonad e bitir rorad nib pufpuf e thin u thilrad. Yad ma rin’ boch ban’en u taabang. Yow manang nib ga’ fan ni nga i un pi fakrow ngorow ni gubin ngiyal’ ni ki mada’ ko ngiyal’ ni yow ra yan ni ngar guyew boch e girdi’ ni kar ilalgad. Re n’ey e ke ayuweg e bitir rorow nge par nib fel’ e tha’ u thilrad gubin e girdi’. Maku pi gallibthir nib gonop e yad ma lemnag e pi n’en ni be rin’ e bitir ndemtrug ko skul ara yugu bang. Faanra i gol e pi gallibthir ngak pifakrad ma ra mom ko bitir rorad ni ngar nonad ngorad ko ngiyal’ ni kar mada’naged e magawon, ya yad manang nra motoyil e gallibthir rorad ngorad ni mus ko ngiyal’ ni kar rin’ed ban’en nde mat’aw.—Prov. 15:14.
5. (a) Mang ni ba ga’ fan ni nga i motoyil e gallibthir ngak pifakrad? (b) Mang e ra rin’ e gallibthir ko ngiyal’ ko ngiyal’ ni ke yog e bitir rorow ban’en nde puluw?
5 Ke tamilang u wan’ boch e gallibthir ni ba ga’ fan ni ngar tedan’rad mar motoyilgad ko pi n’en ni be weliy e bitir murung’agen. Yow ra guy rogon ni ngar nangew e pi n’en ni be fil e bitir u tabinaw ngu yugu bang, mar yal’uwegew e lem nde puluw u m’on ni nge ga’ u gum’erchaen nge laniyan’ e bitir. Gallibthir nib gonop e dab ra dariy fannagew e thin rok e bitir, ya yow ra guy rogon ni ngar piew e athamgil nga laniyan’ ni ngii lem ni bod Jehovah u fithik’ e girdi’ ko re fayleng ney nib chogow. (Efe. 6:10-13) Faan ra lemnag e gallibthir e bitir u fithik’ e t’ufeg ma ra k’aringrad ni ngar chugurgad nga taabang.—Prov. 24:5.
6. (a) Uw rogon nra fel’ rogon e bitir ko fol Bible u tabinaw u gubin e wik? (b) Mang e ra ayuweg e fol Bible u tabinaw nge yib angin?
6 Ngan Fil e Thin Rok Got u Taabang: Yugu reb e n’en nra ayuweg e bitir ni nge taareb lanin’rad Got e nge fil girdien e tabinaw e Bible u taabang u gubin e wik. Faan ra guy e bitir ni ba adag e gallibthir ni nge yog e tamilang nu Bible ngorow ma kar dugliyew e tayim ni fan ko fol Bible, ma ra ayuweg e bitir ni nge folwok rorow. Yow ra dugliy e tayim ni nge weliy girdien e tabinaw ban’en u reb e babyor ara magazine u gubin e wik, machane ngiyal’ ni ke sum reb e magawon ma gallibthir nib gonop e yow ra fil ngorad ban’en nib puluw ko tin nib t’uf ko tabinaw rorow. Pi n’en ni be buch u skul ara u lan e binaw e rayog ni nge m’ug riy nib t’uf ni nge fil fare tabinaw boch e thin nib l’ag rogon ko fare magawon ni fan e nge ayuweg e bitir ni nge rin’ e n’en nib mat’aw. Ereray reb e kanawo’ ni gad be yan nga laniyan’ Jehovah.
7, 8. (a) Mang e n’en ni th’abi fel’ nrayog ni nge rin’ e gallibthir ko bitir rorow? (b) Uw rogon nra ayuweg e gallibthir e bitir rorow nge yog ni ngar chugurgad ku Jehovah?
7 Ngam Pi’ e Bin Riyul’ e Flaab: Boch e galllabthir e kar olobochgad ya kar lemnaged ni bin th’abi fel’ e n’en ni ngar rin’ed e ngar pied e chugum ngak e bitir rorad. Kan guy ni faanra m’on’eg e gallibthir e salpiy nge chugum u wan’rad, ma ba ga’ ni ngar paged talin ni ngar ayuweged e tha’ u thilin e bitir rorad nge Jehovah. (Mark 8:36) Yugu aram rogon ni ke yoor e salpiy nge chugum rorad, machane gur, gathi ka ba ga’ fan ni nge fel’ e tha’ u thilrad Jehovah? Yugu boch e tabinaw e kar dugliyed ni ngar lichnaged e chugum rorad ma ra dab ra paged e tirok Got ban’en. (John 6:27) Kar mechamgad ko par ni kemus buchuuw e salpiy nge chugum rorad, machane kar chugurgad ngak Jehovah nge yog e flaab ngorad nge bitir rorad.
8 Ga be nameg ni nge par girdien e tabinaw rom ni yad ba fager ku Jehovah fa? Faanra er rogon, mang ndab mu maruweliyed ni ngam kunuyed e bin riyul’ e flaab u taabang? (Matt. 6:19-21) Mu ayuweg e bitir rom ni nge chugur ku Jehovah, ma ra felfelan’um ngay ni “be par boch pi fakam ni yad ba yul’yul’ ko tin riyul’.”