Gad Ra Un ko Pioneer Ma Aram e Gad Be Maruwel ko Tayim Rodad nib Fel’ Rogon!
1, 2. Mang boch e magawon ni ke athamgil boch e walag u fithik’ ya nge yag nra uned ko pioneer?
1 ‘Kaygi yoor pa’ nga puluwog! Gur, ba fel’ ni nggu un ko pioneer e chiney?’ Ireray e n’en ni lemnag reb e walag nib pin u nap’an ni be motoyil nga reb e welthin ni be pi’ reb e piilal u nap’an reb e circuit assembly. Kenggin e re welthin nem e “Mu Ulul ko Machib ni Gur Reb e Pioneer.” Nap’an ni yibe pi’ e re welthin nem, ma ku bay reb e walag ni kab pagel ni ki gaar u wan’, ‘Uw rogon ni ke yag ko re walag ney ni nge un ko pioneer ni aray rogon ni boor pa’ u puluwon? Gathi gag reb e piilal, machane, ri ku boor pa’ u puluwog!’
2 Nap’an ni be weliy fare piilal murung’agen e pi tow’ath nra yag ngak be’ ni faanra un ko pioneer, ma aram me pining in e pioneer nga lang nge fith boch e deer ngorad. Ma aram me weliy e pi walag nem boch ban’en ni kar thilyeged u rogon e par rorad ya nge yag nra uned ko pioneer nge rogon ni ke tow’athnagrad Jehovah ni bochan e athamgil ni kar ted. Bagayad e pi walag nem e ba marwoth, ma bagayad e der ma un e en mabgol rok ko tin riyul’, ma bagayad e ke digey reb e maruwel nib tolang machane ka be yag ni nge ayuweg ir. Nap’an ni rung’ag e gal walag nem e n’en ni ke weliy e pi pioneer nem, ma aram mi yow fal’eg i lemnag rarogorow nge rogon e lem rorow. Ma ka aram e n’en ni gamad be pi’ e athamgil nga lanin’um ni ngam rin’.
3. Faanra gad baadag ni ngad uned ko pioneer, ma mang boch ban’en nsusun e ngad lemnaged?
3 Gad manang ni Jehovah e Ir e Ke Sunmiy urngin ban’en, ma ir e Th’abi Tolang u Ga’ngin e Palpalth’ib, ma bay rogon ni ngad pigpiggad ngak. (Dan. 4:17; Acts 17:28) Ba tamilang ni kemus ni taareb e ulung e be fanay Jehovah ni nge rin’ e tin nib m’agan’ ngay. Ma gad ba tow’ath ni gad ba muun ko re ulung ney ma gad be ayuweg “fare tapigpig nib yul’yul’ ma ba gonop” i machibnag murung’agen Gil’ilungun Got u m’on ni nge taw ko tomur. (Matt. 24:45; 25:40; 1 Pet. 2:9) Bochan ni gad be par u tungun e “tin tomren e rran” ma gad manang ndaki n’uw nap’an ni ngad machibgad. (2 Tim. 3:1) Yugu aram rogon, mab t’uf ni ngad pied e tin nib t’uf ko tabinaw rodad ni fan ko par rorad. (1 Tim. 5:8) Sana rayog nda ki yoor e salpiy ni be yag ngak be’ ko maruwel ni be tay ni bod rogon kafram. Maku reb e sana ke meewar fithik’ i dowdad. Maku reb e gad gubin ni gad baadag ni nge yib e tayim rodad ara nge yag e tin nib t’uf rodad ya nge yag ni ud rin’ed boch ban’en ni ngad felfelan’gad ngay. (Ekl. 3:12, 13) Ere, dabisiy ni gad ra lemnag ko ba fel’ ni ngad uned ko pioneer fa danga’.
4. Mang fan nsusun e nge bagadad me fal’eg i yaliy rarogon?
4 Ra bagadad ma thingari fal’eg i lemnag rarogon, ngemu’ mfini dugliy ko rayog ni nge un ko pioneer fa dabiyog. (Rom. 14:12; Gal. 6:5) Ri gad be felfelan’ ni ke yoor e walag ni kar uned ko pioneer. Yugu aram rogon nri boor e magawon nge skeng ni gad be mada’nag e ngiyal’ ney ko tin tomuren e rran, machane ke m’ug ko service report ko fare 2014 Yearbook nib chugur ko 1,500,000 e pi tapigpig rok Jehovah u ga’ngin yang e fayleng ni yad be ulul ko machib ni yad boch e pioneer. Pi walag ney e der chalbarad i ngongliy e tin nib fel’ ni yugu aram rogon ni bay boch i yad ni be par u boch e nam nib gel e magawon ko salpiy riy, ara dariy e karrow rorad, ara kar m’argad, ara yad be mada’nag boch e magawon nib gel. Rib manigil e n’en ni be rin’ e pi walag ney. (Gal. 6:9) Pi walag ney e yad be fol ko fare thin ni be yog ni ngad skengnaged Jehovah. (Mal. 3:10) Ku manang e pi walag ney ni pioneer ni kar uned ngay e aram e bin th’abi fel’ e kanawo’ ni yad be maruwel ko tayim rorad riy nge pi n’en ni bay rorad, ma ri be tow’athnagrad Jehovah ni bochan e pi n’en ni kar digeyed ni fan e ngar uned ko pioneer.
5. Uw rogon ni ke ayuweg reb e walag nib pin bochi buliyel ni fak?
5 Yima Tow’athnag e Piin Pioneer: Bay reb e walag nib pin u Cameroon ni bay bochi buliyel ni fak ni gaar: “Nap’an ni kab madway e bitir rog, ma gu ma fek nge un ngog ko machib. Nap’an ndawori nang e yan, ma gu ma fek nggu tay nga keru’ug ni bay u lan bangi mad ni kug m’ag nga lukngug. Nap’an ni be dol’nag e yan, ma bay bayay ni gamow be yan ko machib mug wan gu talgow nga tooben nochi naun u tooben e kanawo’ ni yima pi’ boch ban’en riy ni chuway’. Ma aram me yan fachi tir rog ko kabang rog nda gur tiyan’ug ngak nge fek boch e magazine, me yan ko bin migid e nochi naun nem ni bay u tooben e kanawo’. Yugu aram rogon ni gathi ri kari nang e thin, ma ke yag ni nge pi’ reb e magazine ngak be’ nib pin ni bay u rom. Kari gin e re ppin nem ni ke guy reb e bitir ni aram chi yangaren ni be un i rin’ e re maruwel ney. Ere, ke fek fare pin fare magazine me m’agan’ ngay ni nge un ko fol Bible!”
6. Mang e ke yag ni nge rin’ reb e piilal ni yugu aram rogon ni boor pa’ u puluwon?
6 Ku bay reb e piilal u Zambia ni ma un ko maruwel u polo’ e tayim rok maku bay e tabinaw rok ni dugliy ni nge un ko auxiliary pioneer ara pioneer ni ayuw ni yugu aram rogon ni boor pa’ u puluwon. Baadag ni nge dag e kanawo’ nib fel’ ni nge folwok e ulung nge chon e tabinaw rok riy. Ere, bay yu ngiyal’ ni ma yan i taleg e karrow rok nga tooben e kanawo’ me cheleg fare The Secret of Family Happiness (N’en Nra Yibnag e Felfelan’ ko Tabinaw) ni kan recordnag, me pining e girdi’ ni be yan u kanawo’ ni ngar bad ngar motoyilgad ngay. Bochan e re n’ey, me yag ni nge pi’ 29 ken e babyor me tabab i fil e Bible ngak l’agruw ni’.
7. Uw rogon ni nge dag e pi walag u lan e ulung ni yad ba pasig ko machib?
7 Ku bay reb e binaw u Zimbabwe ni ki dag e pi walag riy ni yad ba pasig ko machib. Bay reb e ulung u rom ni 117 e publisher riy ma 9 e regular pioneer, ni ke un 70 e walag riy ko auxiliary pioneer. Ku bay reb e ulung ni 94 e publisher riy ma 58 e walag riy ni ke un ko auxiliary pioneer. Ku bay reb ni 126 e publisher riy ma 4 e regular pioneer, ni ki un 58 e walag riy ko auxiliary pioneer. Yugu aram rogon ni boor e maruwel ni ma rin’ e pi walag nem ni fan ko tabinaw rorad, nge boch e maruwel u lan e ulung, nge dimow naun ni yad be tay ko branch rorad, ma kar guyed rogon ni ngar yoornaged e tayim rorad ni fan ko machib.
8. Faan gad ra m’oneg e tirok Got ban’en, ma uw rogon nra ayuwegdad Jehovah?
8 Piin ni yad ma pioneer e yad manang ndabiyog ni ngar rin’ed e re maruwel ney u gelngirad. Yad ma yog ni fan ni ke yag ni ngar rin’ed e re maruwel ney e bochan ‘gelngirad ni ke pi’ Got.’ (1 Pet. 4:11) Bochan nib gel e michan’ rorad ma aram fan ni be yag ni ngar ululgad ko machib ni gubin e rran. Manang e piin pioneer nib ‘gel e togopluw’ ni yad ra mada’nag, machane boor e tow’ath nra yag ngorad nga tomuren. Ere, aram fan ndarur guyed rogon ni ngaur rin’ed boch ban’en ni yad e nga i fel’ rogorad riy.—1 Thess. 2:2.
9. Uw rogon nrayog ni nge yib angin ngodad e n’en ni rin’ apostal Paul?
9 Ba Fel’ ni Ngad Folwokgad rok Paul: Be weliy e Bible murung’agen e pi n’en ni yag ni nge rin’ apostal Paul ko machib ni i tay nge ayuw ni pi’ ko girdi’. Ma gad manang nri boor e magawon ni i mada’nag Paul, ya ba gel e togopuluw ni un tay ngak, ma ku ba gel e magawon ni i mada’nag ni fan e nge yag ni machibnag fare thin nib fel’ me pi’ e athamgil nga laniyan’ e pi walag u lan e ulung. Kub gel e gafgow ni tay ni bochan e ki yib e m’ar ngak. (2 Kor. 11:21-29; 12:7-10) Machane, ri dugliy u wan’ ni nge maruwel ko tayim rok nib fel’ rogon. Ma rogon ni yog, e gubin e pi maruwel nem e ke yag ni nge rin’ ni bochan e ayuw rok Jehovah. (Fil. 4:13) Dariy bagayad e piin ni ayuweg Paul ni bay rogon ni nge yog nib m’ay fan e tayim nge athamgil ni ke tay ni fan ko pigpig ni i tay ngak Jehovah. Ki mada’ ko ngiyal’ ney ni ka be yib angin e n’en ni rin’ Paul ngodad! Ri gad be felfelan’ ni be ayuwegdad e fonow ni pi’ Paul ni ngad nanged e n’en nib t’uf ni ngad m’oneged ma gad athamgil ni ngad pared ko tin riyul’ ko ngiyal’ ney ni ke mo’maw’ e par!
10. Mang nib ga’ fan ni ngad maruwelgad ko tayim rodad nib fel’ rogon?
10 Chiney e ‘daki yoor e tayim ni ke magey.’ (1 Kor. 7:29; Matt. 24:14) Ere, ba fel’ ni ngad fithed gadad ni nge lungudad, ‘Faanra gabul e gu ra yim’, ma gur, rayog ni nggog ngak Jehovah nib fel’ rogon ni kug maruwel ko tayim rog?’ (Jas. 4:14) Mang ndab mu meybil ngak Jehovah e chiney, nga mog ngak ni bochan ni gur reb e Pi Mich rok, ma ga baadag ni ngam maruwel ko tayim rom nib fel’ rogon? (Ps. 90:12) Mu meybil ngak Jehovah ni nge ayuwegem ni ngam lichnag pa’ nga puluwom. Mus ni faanra kam lemnag kafram ndabiyog ni ngam un ko pioneer, machane chiney e sana rayog ni ngam un ngay.
11. Mang e rayog ni nge pagan’ e pi tapigpig rok Got ngay ni yugu aram rogon ni bay boch i yad ndabiyog ni nge un ko pioneer?
11 Mu Rin’ e Tin Nrayog Rom: Ba thilthil rarogodad, ere gathi gad gubin nrayog ni ngad uned ko pioneer ni ngad machibgad u lan 70 e awa u gubin e pul. Machane, boor e walag ni kar pithiged pa’ u puluwrad ya nge yag nra uned ko pioneer ni ayuw ni ngar thognaged 50 e awa. Ma yad ma athamgil ni ngar uned ko re n’ey u gubin e pul ara u rogon nrayog rorad. Dabi mulan’um ni faanra dabiyog ni ngam un ko regular ara auxiliary pioneer ni bochan rarogom. Mu ulul ko meybil ya nge yag ni puf e magawon rom. Maku reb e faanra ri dabiyog ni ngam rin’ e re n’ey ni bochan e rib gel e magawon rom, ma dabi kireban’um ya ba ga’ fan u wan’ Jehovah e chuuw i n’en ni be yag ni ngam rin’ ni fan ko pigpig ni ga be tay ngak. (Matt. 13:23) Manang ni gab muun nga ba’ rok ma ga be athamgil ni ngam pigpig u fithik’ e yul’yul’, ma damur pag reb e pul ni nge yan nda mur machibnag e thin rok. Sana rayog ni ngam guy rogon ni ngam mon’og ko machib, ni gur reb e tamachib ko fare thin nib fel’.—1 Tim. 4:16.
12. Mang e susun ndab da lemnaged?
12 Bochan ni ke chugur fare “Rran rok” Jehovah, mab t’uf ni ngad maruwelgad ko tayim rodad nib fel’ rogon ya nge yag nda mu’naged e maruwel ni kan tay chilen ngodad ni ngad rin’ed. (Joel 2:31) Manang Satan ni ke ngoch nap’an ni nge par, ere aram fan nri be athamgil u rogon nrayog rok ni nge mo’maw’nag gubin ban’en ngodad miki mo’maw’nag ngodad ni ngad tedan’dad ko tin nib ga’ fan ban’en. (Fil. 1:10; Rev. 12:12) Dab mu lemnag ndariy fam u wan’ Got. Rayog ni nge ayuwegem Jehovah ni ngam lichnag pa’ nga puluwom mag mon’og ko machib. (Ps. 145:16) Gad be felfelan’ ya boor e girdi’ ni kar fal’eged i lemnag rarogorad nge magawon rorad, ma kar guyed nrayog ni ngar uned ko auxiliary ara regular pioneer. Rib gel e felfelan’ ni ma tay e piin pioneer ni bochan e yad ma maruwel ko tayim rorad nib fel’ rogon. Ere, ga ra un ko pioneer fa danga’?