Tin Riyul’ u Murung’agen Got nge Kristus

Mini’ Got?

Mini’ Fithingan Got? Ke gaar Got: “Gag Jehovah. Ireray fithingag.” (Isaiah 42:8, NW) Sogonap’an 7,000 yay ni ke m’ug fithingan u lan e Bible. Machane, boor ken e Bible ni kan chuweg fithingan Got riy kan tay e liw rok ngay ni bod rogon e “Somol.” De puluw e re n’ey ni kan rin’. Baadag Got ni ngam mang fager rok, ere aram fan ni be pi’ e athamgil nga lanin’um ni ngam “pining fithingan.”​—Roma 10:13.

Pi Liw rok Jehovah. Nap’an nra weliy e Bible murung’agen Jehovah maku ma fanay e liw rok ni bod rogon e “Got,” “En Gubin Ma Rayog Rok,” “En Tasunmiy,” “En Chitamangiy,” “Somol,” nge “En Th’abi Tolang.” Boor e girdi’ ni bay e meybil rorad u lan e Bible ni ur nonad ngak Jehovah ni yad be fanay e liw rok.​—Daniel 9:4.

Rarogon Got. Got e ir reb e kan ndabin guy. (John 4:24) Be yog e Bible ni “dariy be’ ni kaa guy owchen Got.” (John 1:18) Ku be tamilangnag e Bible rarogon laniyan’ Got. Rayog ni nge k’aring e girdi’ e kireban’ ngak, ara ra k’aringed e “felfelan’” ngak.​—Proverbs 27:11; Psalm 78:40, 41.

Pi Fel’ngin Got nrib Manigil. Der ma laniyan’ Got ngak e girdi’ nib thilthil e nam rorad nge rarogon e gin kar bad riy. (Acts 10:34, 35) Ku ir ba Got ni “ma runguy e girdi’ ma ma kireban’ ngorad, ni gathi mmachreg ni ma yib e puwan’ ngak, ma ma t’ufeg e girdi’ ma ma yul’yul’ ngorad.” (Exodus 34:6, 7) Machane, bay aningeg i fel’ngin Got nrib lingagil.

Gelngin. Bochan ni ir ‘Got ni Gubin ma Rayog Rok,’ ma dariy e gin nra mus gelngin riy ni nge lebguy urngin e tin ke micheg.​—Genesis 17:1.

Gonop. Dariy be’ nib gonop ni bod feni gonop Got. Aram e n’en ni be yip’ e Bible fan u nap’an ni ke yog ni “ke mus ni ir e ba gonop.”​—Roma 16:27.

Mat’aw. Gubin ban’en ni ma rin’ Got mab fel’. Ir e “ba yal’uw ma mmat’aw urngin e tin ni ma rin’.”​—Deuteronomy 32:4.

T’ufeg. Be yog e Bible ni “Got e t’ufeg.” (1 John 4:16) Gathi kemus ni ma dag Got e t’ufeg, ya ku ir e t’ufeg. T’ufeg rok e aram e n’en ni ma gagiyegnag urngin ban’en ni ma rin’, ma boor e kanawo’ ni ma yib angin e re t’ufeg ney riy ngodad.

Fager u Thilin Got nge Girdi’. Got e ir e Chitamangidad ni bay u tharmiy ni gad ba t’uf rok. (Matthew 6:9) Faanra mich u wan’dad, ma aram e rayog ni ngad manged fager rok. (Psalm 25:14) Bin riyul’ riy e, be piningem Got ni ngam chugur ngak u daken e meybil, mag ‘pag fan urngin e magafan’ rom ngak, ya be lemnag rarogom.’​—1 Peter 5:7; James 4:8.

Mang e Ba Thil rok Got nge Kristus?

Jesus e Gathi Ir Got. Ba thil Jesus ni bochan e yigoo ir e Got e sunmiy. Aram fan ni be yog e Bible ni ir Fak Got. (John 1:14) Tomuren ni sunmiy Jehovah Jesus ni ir e bin nganni’ i fak, me tay ni nge mang e en “nib salap i muruwliy ban’en” me fanay ni nge sunmiy urngin ban’en nib muun e girdi’ ngay.​—Proverbs 8:30, 31; Kolose 1:15, 16.

Dariy ba ngiyal’ ni yog Jesus Kristus ni ir Got. Ya yog ni gaar: “Gub rok [Got] me ir e ke l’ugeg ku gub.” (John 7:29) Nap’an ni be non Jesus ngak reb i gachalpen, me weliy murung’agen Jehovah ni gaar, “ir e Chitamag me ir e Chitamangimed,” ma “ir e Got rog me ir e Got romed.” (John 20:17) Tomuren ni yim’ Jesus, me faseg Jehovah nge yan nga tharmiy, ma aram me par nga ba’ ni mat’aw rok min pag fan boor ban’en ngak.​—Matthew 28:18; Acts 2:32, 33.

Rayog ni Nge Ayuwegem Jesus Kristus ni Ngam Chugur ngak Got

I yib Jesus nga fayleng ni nge fil murung’agen e Chitamangin ngodad. I weliy Jehovah murung’agen Jesus ni gaar: “Ereray Fakag nrib t’uf rog, ere mu telmed ngak!” (Mark 9:7) Dariy be’ nri manang Got nib fel’ rogon ni bod rogon Jesus. I gaar: “Dariy be’ ni manang ko mini’ e en ni Chitamangiy, ya ke mus ni en ni Fak e manang, nge piin ni ba adag e en ni Fak nem ni ngar nanged e Chitamangin.”​—Luke 10:22.

Jesus e ir e en ni m’ug pi fel’ngin Got rok nrib fel’ rogon. Bochan ni i m’ug pi fel’ngin e Chitamangin Jesus rok nib fel’ rogon, ma aram fan nrayog ni nge gaar: “Cha’ ni ke guyeg e ke guy e en ni Chitamangiy.” (John 14:9) Bochan ni i folwok Jesus ko t’ufeg rok e Chitamangin u daken e thin nge ngongol rok, ma aram e n’en ni k’aring e girdi’ ni ngar adaged ni ngar chugurgad ngak Got. I gaar Jesus: “I gag e kanawo’, me gag e tin riyul’, me gag e yafos; dariy be’ nrayog ni nge yan ngak e en ni Chitamangiy ya ke mus ni gag e ra yan rog ngak.” (John 14:6) Ki gaar: “Piin nriyul’ ni yad be meybil e bay ra meybilgad ngak e en ni Chitamangiy u daken e ayuw ko Kan ni Thothup ngu fithik’ e yul’yul’. Ereray e piin ni yad ma meybil ni ba adag e Chitamangiy ni ngar meybilgad ngak.” (John 4:23) Aygum lemnag e re n’ey! Be gay Jehovah e girdi’ ni bod gur ni baadag ni nge nang e tin riyul’ u murung’agen.