Ngad Maruwelgad ni Nge Fel’ e Tha’ u Thildad Jehovah
1. Mang fan nib ga’ fan ni ngad maruwelgad ya nge yog ni nge par nib fel’ e tha’ u thildad Jehovah?
1 Ba t’uf ni ngad maruwelgad ya nge yog ni nge fel’ e tha’ u thildad Jehovah. Ere gathi kemus ni ngad rin’ed e tin ni kad yarmiyed ni ngad rin’ed u gubin ngiyal’ ya ka bay boch ban’en ni thingar da rin’ed. Faanra dabiyog ni ngad nonad ngak Jehovah ni gubin ngiyal’ ma ra munmun ma rayog ni ngad paged talin ni bod e fager rodad ni ke n’uw nap’an nde yog ni ngad nonad ngorad. (Rev. 2:4) Gad ra weliy ko uw rogon ni nge ayuwegdad e fol Bible ni goo gadad nge meybil ya nge yog ni nge par nib fel’ e tha’ u thildad Jehovah.—Ps. 25:14.
2. Mang boch ban’en ni bay rogon ko fol Bible ni goo gadad e ba t’uf ni ngad rin’ed ya nge fel’ e tha’ u thildad Got?
2 Meybil min Fal’eg i Lemnag e Ba Ga’ Fan: Fol Bible ni goo gadad nra taw nga gum’ircha’dad e gathi kemus ni ngad yoloyed e line ko pi thin nib ga’ fan u lan e babyor ma ngad beeged e thin nu Bible ni bay riy. Ya ba t’uf ni ngad fal’eged i lemnag e thin ni be weliy murung’agen kanawoen, nge motochiyel, nge rarogon Jehovah. (Ex. 33:13) Gad ra nang fan boch ban’en ni bay rogon ngak Got ma ra k’aringdad ni ngad lemnaged rarogodad. (Ps. 119:35, 111) Fol Bible ni goo gadad e thingar da rin’ed ni gad be nameg ni ngad chugurgad ngak Jehovah. (Jas. 4:8) Ma kub t’uf ni ngan tay e tayim ni fan ko fol Bible ma ngad mel’eged bang ni ngad rin’ed e re n’ey riy, ma ngad guyed rogon ni ngad folgad u ngal’an ni kan yarmiy. (Dan. 6:10) Ere yugu aram rogon ni boor pa’ u puluwom, ga ma tay e tayim ni ngam fal’eg i lemnag e pi fel’ngin Jehovah u gubin e rran?—Ps. 119:147, 148; 143:5.
3. Uw rogon ni nge ayuwegdad e meybil u nap’an e fol Bible ni goo gadad ni nge fel’ thildad Jehovah?
3 Meybil ni ke yib u gum’irchaey e ku bang ko fol Bible ni goo gadad nib ga’ fan. Ba t’uf rodad gelngin Got nib thothup ya nge yog ni nge k’aringdad e thin riyul’ u Bible ni ngad ‘pigpiggad ngak ma gadad meybil ngak u fithik’ e ta’fan nge madugdag nrogon kanawoen nra m’agan’ ngay.’ (Heb. 12:28) Ere gubin ngiyal’ ni ngad filed e Bible ni goo gadad ma thingar da ninged ngak Jehovah gelngin nib thothup. (Matt. 5:3.) Nap’an ni gad be fal’eg i lemnag e Thin nu Bible ma ngad fanayed boch e babyor ni ke pi’ Jehovah u daken e ulung rok, ma aram e gad be dag ni be pagan’dad ngak ma ra ayuwegdad. (Ps. 62:8) Ma aram reb e kanawo’ ni ngad liyorgad ngak, ma gad be dag ni gadad ba yul’yul’ ngak, maku ra ayuwegdad ni nge fel’ e tha’ u thildad Jehovah.—Jude 20, 21.
4. Mang fan nib ga’ fan ni ngad fal’eged i lemnag e Thin rok Got u gubin e rran?
4 Ba t’uf ni ngad rin’ed e pi n’em me par nib fel’ e tha’ u thildad Jehovah. Ere manga yugu uda athamgilgad ni ngad chugurgad ngak Got u gubin e rran, ya gad manang ni faanra ngad rin’ed ni aram rogon ma ra chugur ngodad. —Ps. 1:2, 3; Efe. 5:15, 16.