“Ngan Chuchugur Ngak Got”

“Mu chuchugurgad ngak Got, me chugur ngomed.”​—James 4:8.

1, 2. (a) Girdi’ e baga’ ni mang e yad ma yog? (b) Mang e fonow nib gel ni pi’ James, ma mang fan nib t’uf e re n’em?

“GOT e bay rodad.” Pi thin ney e kan ta’ ni ngan fal’eg yaan e pow ko boch e nam ma ku kan ta’ nga madan fapi salthaw. Fare bugithin ni “Nge pagan’dad ngak Got” e kan yoloy ko salpiy ni boor ni kan ngongliy ko wasey nge salpiy ni kan ngongliy ko babyor ni yima fanay e ngiyal’ ney. Girdi’ e baga’ ni ma yog ni rib fel’ thilrad Got. Machane, gathi riyul’ ni rogon ni nge fel’ thildad Got e gathi kemus ni ngan weliy murung’agen ara ngan yoloy e thin ni aram rogon nga bang?

² Be dag e Bible nrayog ni nge fel’ thiliy nge Got. Machane ba t’uf ni ngan maruweliy. Mus ko piin Kristiano ko fa bin som’mon e chibog ni kan dugliyrad e ba t’uf ni ngara maruweliyed nge fel’ thilrad Jehovah Got. James ni reb e Kristiano ni ma gafaliy e ulung e susun ni nge ginang boch e girdi’ ni ke war ma yad baadag ni ngar folgad ko tin baadag dowrad ma dar pared nib klin ko tirok Got. U lan e re fonow nem, me yog e thin nib gel ni gaar: “Mu chuchugurgad ngak Got, me chuchugur ngomed.” (James 4:1-12) Fare bugithin ni “ngan chuchugur” ni yog James e be yip’ fan e mang”?

3, 4. (a) Boch e girdi’ ko fa bin som’mon e chibog ni yad ma bieg e thin ni ke yoloy James e gonapan mang e ke puguran ngorad ko fare bugithin ni “ngan chuchugur ngak Got”? (b) Mang fan ni ke mudugil lanin’dad nrayog ni ngan chuchugur ku Got?

³ I fanay James boch e thin ni girdi’ ko ngiyal’ nem ni ma bieg fare babyor rok e manang fan. Fare Motochiyel ni kan pi’ ngak Moses e ke fil ngak fapi prist nib tamilang rogon ni “ngan chuchugur ngak” Jehovah ni fan ko girdi’ rok. (Exodus 19:22) Girdi’ ni ma bieg e babyor rok James ko ngiyal’ nem e susun kan puguran ngorad ni rogon ni ngan chuchugur ngak Jehovah e dab ni lemnag ni aram e n’en dariyfan. Jehovah e ir e en nth’abi tolang e liw rok u palpalthib.

⁴ Maku reb e, rogon ni yog reb e Bible scholar ni, “re fonow ney ni [bay ko James 4:8] e be dag e lem nri be athapeg ban’en.” Manang James ni ma pining Jehovah e girdi’ ni de flont u fithik’ e t’ufeg ni nge chuchugur Ngak. (2 Chronicles 15:2) Maligach rok Jesus e ke bing e kanawo’ ni ngan chuchugur ngak Jehovah ni polo’. (Efesus 3:11, 12) Ngiyal’ ney, ma fare kanawo’ ni ngan chuchugur ngak Got e kan bing ngak e girdi’ ni bokum milyon! Ere, uw rogon me yog ni ngada fanayed e re kanawo’ ney nrib fel’ ni kan bing ngodad? Gad ra weliy dalip e kanawo’ nrayog ni ngad chuchugurgad ngak Jehovah Got riy.

Mu Par ni Yig “Ga Be Fil Nge Yog Ngom e Tamilangan’” Rok Got

5, 6. Uw rogon ma tin ni rin’ Samuel ni kab pagal e be dag e n’en nib l’ag ko “ngan yognag e tamilangan’” rok Got?

⁵ Rogon e thin ni bay ko John 17:3, e yog Jesus ni gaar: “Ireray fan e yafas ni manemus, ni aram e ngar feked nge yog ngorad e tamilangan’ u murung’agem, ni karimmus ni Gur e bin riyul’ e Got, nge Jesus Kristus ni kam l’og ke yib.” Boor e Bible ni re verse ney e kan thiliyeg nib thil boch ko fare New World Translation. Da nog ni “ngan fek nge yog ngorad e tamilangan’ rok Got” ya kemus ni kan yoloy fare bugithin ni “ngan nang Got ara “rogon ni ngan nang” Got. Machane boor e piin ni scholar e kar naabgad ni fare thin ni Greek ni kan fanay u roy e ku be yip’ fan boch ban’en​—ni aram e n’en ni be ulul iyan, nrayog ni nge fel’ thilin bagayad nge bagayad.

⁶ Fare lem ni ngan nang Got nib fel’ rogon e gathi ban’en nib biech u nap’an Jesus. Ni bod ni, thin ni bay ko Hebrew Scriptures e gad ra bieg ni nap’an ni kab pagal Samuel, ma “dawori yog ni nge nang Jehovah.” (1 Samuel 3:7) Be yip’ fan e re n’em ni kaygi buchuw e n’en ni ke nang Samuel u murung’agen e Got rok? Danga’. Gallabthir rok nge fapi prist e susun kara filed ngak boor ban’en. Machane, rogon ni yog reb e scholar, fare thin nu Hebrew ni kan fanay ko re verse nem, e rayog ni ngan fanay ni fan ko tha’ u thiliy nrib chuchugur.” Ngiyal’ nem ma dawori nang Samuel Jehovah nrogon nrib fel’ thilrow, ni bod rogon boch nga m’on u nap’an ni be pigpig ni en tayog e thin rok Jehovah. Nap’an ni be ilal Samuel i yan, me yog ni nge nang Jehovah, ma kari fel’ thilrow.​—1 Samuel 3:19, 20.

7, 8. (a) Mang fan ni susun dabda rusgad ko thin nu Bible nib toar fan? (b) Mang boch e thin riyul’ ko Thin rok Got ni thingarda filed?

⁷ Ga be fil ni nge yog ngom e tamilangan’ rok Jehovah ni fan ni ngari fel’ thilmew? Ga ra yodorom, mab t’uf ni nge “yib lamen” fare ggan nib spiritual ngom ni be pi’ Got. (1 Peter 2:2) Dabmu lemnag ni kam gaman ko tin som’mon e thin ni yima fil ko Bible. Mu athamgil ni ngam fil boch e thin nu Bible nib toar fan. (Hebrews 5:12-14) Ke mulan’um ko pi thin ney ya ga be lemnag ni kaygi mo’maw’ ni ngan nang fan? Faanra aram rogon, dabmu pagtalin ni Jehovah e ir fare “Sensey rodad ni Rib Fel’.” (Isaiah 30:20, NW) Manang rogon ni nge abuweg e thin riyul’ nib toar fan nga laniyan’ e girdi’ ni dawori flont. Ma rayog ni nge flaabnag e maruwel ni ga be ta’ u fithik’ e yul’yul’ nge tamilang e tin ni be fil ngom u wan’um.​—Psalm 25:4.

⁸ Mang fan ni dabmu yaliyem u murung’agen boch e “tirok Got nib toar fan”? (1 Korinth 2:10, NW) Gathi aram e pi kenggin e machib ni ma k’aring e chachalban ni rayog ni piin ni theologian nge fapi tayugang e ngar maluagthingad riy. Aram fapi machib nib fas nrayog ni ngad filed boch ban’en riy u murung’agen e lem nge gum’irchaen e Chitamangidad ni ma t’ufegey. Ni bod ni, fare biyul, nge fa “tin nib mith mab thothup,” nge fapi m’ag nib thilthil ni i fanay Jehovah ni fan ni nge flaabnag e girdi’ rok ma nge lebuguy e tin nib m’agan’ ngay​—e aram e pi kenggin e machib nge ku boor ban’en ni taab rogon ngay ni ma k’aring e falfalan’ ma ba’ fan ni ngan fal’eg i gay ma ngan fil ban’en riy.​—1 Korinth 2:7.

9, 10. (a) Mang fan ni tolangan’ e bay e riya’ riy, ma mang e ra ayuwegdad ni ngad paloggad riy? (b) Murung’agen e tamilangan’ rok Jehovah, ma mang fan ni ngad athamgilgad ni ngad sobut’naged gadad?

⁹ Nap’an ni be yoor i yan e tamilangan’ rom ko thin riyul’ nib toar fan, mu kol ayuw ya bay e riya’ nrayog ni nge sum riy​—ni aram e lem nib tolang. (1 Korinth 8:1) Lem nib tolang e bay e riya’ riy, ya ra k’aring e girdi’ ni nge palog ku Got. (Proverbs 16:5; James 4:6) Dab mu pagtalin, dariy tapgin ni nge uf e girdi’ ko tamilangan’ rok. Rogon ni ngan dag nriyul ni aram rogon, ma ngam mu lemnag fapi thin ni bin som’mon ko fare babyor ni be guy rogon ni nge nang ko ke mon’og e tamilangan’ ko girdien e science ni be gaar: “Nap’an ni ke yoor boch e tin kad filed, ma ra tamilang boch u wan’dad ni kaygi buchuw e tin ni gad manang. . . . Urngin ban’en ni kad filed e kaygi achichig nfaan ran taarebnag ko tin thingarda fal’eged i fil.” Lem ni aram rogon nib sobut’ e ra baudnag lanin’uy. Chiney, murung’agen e th’abi yoor e tamilangan’​—ni aram fare tamilangan’ rok Jehovah Got—​ma ri bay fan ni nge par ni ba sobut’ lanin’dad ni gubin ngiyal’. Mang fan?

¹⁰ Aygum lemnag boch e thin nu Bible u murung’agen Jehovah. “Kaygi toar rogon ni ga ma lemnag ban’en.” (Psalm 92:5, NW) “Gonop rok [Jehovah] e dariy gin ni nge mus riy.” (Psalm 147:5, NW) “Dariy be’ ni manang e lem rok [Jehovah].” (Isaiah 40:28) “Rib toar e gonop rok nge llowan’ rok!” (Roma 11:33) Ba tamilang, ndabda nanged urngin ban’en ni bay rogon ni ngan nang u murung’agen Jehovah. (Eklesiastes 3:11) Ke fil ngodad boor ban’en ni yira ngat ngay, machane gubin ngiyal’ ma ka bay boor ban’en u p’eowchedad ni rayog ni ngad filed boch ban’en riy. Gathi kada pirieged ni ngan athapeg ni ngeb ban’en e ra k’aring ni ngarni tiyan’uy ma ku ra sobut’nag lanin’uy? Ere rogon ni kad filed, ngad fanayed e tamilangan’ rodad ni nge mang def ni nguuda chuchugurgad ngak Jehovah ma ngad ayuweged yugu boch e girdi’ ni ngar yodoromgad​—ma dabda fanayed ni ngad tolangnaged gadad ngak yugu boch e girdi’.​—Matthew 23:12; Luke 9:48.

Mu Dag e T’ufeg Rom Ngak Jehovah u Daken e Ngongol Rom

11, 12. (a) Uw rogon ma fare tamilangan’ ni kad faned u murung’agen Jehovah e ra rin’ ban’en ngodad? (b) Mang e be dag ni rogon ni ba t’uf Got rok be’ e ba riyul’?

¹¹ Ba puluw, ni Paul ni apostal e ke pethuy fare tamilangan’ ko t’ufeg. I yoloy ni gaar: “Ere baaray e meybil ni gu ma ta’ ni gubin ngiyal’ ni ngari gel e t’ufeg romed i yan nib muun ngay e tamilangan’ nib puluw nge gelngin ni ngan nang ban’en ni polo’.” (Filippi 1:9, NW) Urngin e thin riyul’ ni kad filed u murung’agen Jehovah nge tin nib m’agan’ ngay e dabi k’aringdad ni ngad ufgad, ya susun ni nge gelnag e t’ufeg rodad ngak e Chitamangidad nu tharmiy.

¹² Riyul’, ni boor e girdi’ ni ma yog nib t’uf Got rorad ni tin riyul’ riy e danga’. Sana riyul’ ni gum’ircharad e kan suguy ko lem nib gel ni be k’aringrad ni ngara rin’ed boch ban’en. Aram e lem nib fel’, ma kub fel’ ni nga nog boch e thin nib fel’ murung’agen, nfaanra ba puluw e re n’ey ko tamilangan’ nib riyul’. Machane re n’en ney e de taareb rogon ko t’ufeg nib riyul’ ni fan ku Got. Mang fan ni danga’? Mu lemnag uw rogon ni be weliy fare Thin rok Got u murung’agen e re t’ufeg ney ni gaar: “Ya baaray fan ni nge t’uf Got rodad: fan e ngad folgad ko tin ni ke yog ni ngad rin’ed.” (1 John 5:3) Ere t’ufeg ni fan ku Jehovah, e ba riyul’ nfaanra kan dag u daken e ngongol ni ma fol.

13. Uw rogon ma madgun Got e ra ayuwegdad ni ngad daged e t’ufeg rodad ku Jehovah?

¹³ Madgun Got e ra ayuwegdad ni ngad folgad ku Jehovah. Ra ngan fil murung’agen e tamilangan’ rok Jehovah nge murung’agen fapi felngin ni bod ni ir e ba thothup ndariy e gin ni nge mus riy, ma ba flaab, ma ba gel gelngin, ma ba yal’uw, mab gonop, ma ma dag e t’ufeg rok. Madgun Got ni aram rogon e baga’fan ni ngan chuchugurnag ngak. Riyul’, mu tiyan’um ko mang e be yog fare Psalm 25:14 (NW) ni gaar: “Piin ni bay madgun Jehovah u wan’ e ra par nib chuchugur ngak.” Ere faanra gad be rus ni ngad rin’ed e tin nra kireban’nag e Chitamangidad nu tharmiy nib t’uf rodad, ma rayog ni ngad pared ni gad ba chuchugur ngak. Madgun Got e ra ayuwegdad ni ngada folgad ko fare fonow nib gonop ni bay ko Proverbs 3:6 ni gaar: “Nguum lemnag Somol u fithik’ urngin ban’en ni ga be rin’, me dag ngom e bin nib mat’aw e kanawo’.” Mang e be yip’ fan e re n’em?

14, 15. (a) Mang boch ban’en ni thingarda turguyed u gubin e rran? (b) Uw rogon ma rayog ni ngada turguyed ban’en u kanawo’ nra m’ug ni bay madgun Got u wan’dad?

¹⁴ Ba t’uf ni ngam turguy ban’en ni gubin e rran, ni tin baga’ nge tin ba achichig. Ni bod rogon ko mang thin e ga ra yog ngak e piin ni gimed ma maruwel u taabang, nge piin ni gimed nga skul, nge buguli yoror rom? (Luke 6:45) Ga ra maruweliy nib elmirin fare maruwel ni kan pi’ ngom, ara ngam gay e kanawo’ ni nge m’ay e maruwel ni kemus ni buchuw e n’en ngam rin’? (Kolose 3:23) Ga ra chuchugur ngak e piin ni kemus ni buchuw ara dariy e t’ufeg rorad ku Jehovah, ara ngam athamgil ni ngam gelnag e fel’ u thilmed e piin ni ri yad ma lemnag e tirok Got? (Proverbs 13:20) Mang e ga ra rin’ ni fan ni ngam m’oneg fare Gil’ilungun u boch e kanawo’ nib achichig? (Matthew 6:33) Faanra be pow’iyem fapi kenggin e motochiyel u lan e Bible ni kad weliyed u roy u nap’an ni ga be turguy ban’en u gubin e rran, ma aram riyul’ ni ga be lemnag Jehovah ko “urngin e kanawo’ rom.”

¹⁵ Riyul’, ni urngin e tayim ni ngada turguyed ban’en, e thingari pow’iydad e re lem rodad ney ni: ‘Mang e baadag Jehovah ni nggu rin’? Mang kanawo’ e ra falfalan’ag?’ (Proverbs 27:11) Ngan dag ni bay madgun Got u wan’uy ni aram rogon e aram e kanawo’ nrib fel’ ni ngan dag e t’ufeg ngak Jehovah. Madgun Got e ku ra k’aringdad ni ngad pared nib klin​—ko tirok Got, nge gafarig, nge dowef rodad. Dabmu pagtalin, ni fare verse ni ke fonownag James fapi Kristiano riy ni ngar “chuchugurgad ku Got,” e ku ke fonownagrad ni gaar: “Piin tadenen mmalukniged pa’med, ma ngam machalbogniged gum’irchamed, gimed ni be maruwaran’med.”​—James 4:8, NW.

16. Ra ngan pi’ ban’en ngak Jehovah, ma mang e ri dabiyog ni ngad rin’ed, machane mang e n’en nrayog rodad ni ngada rin’ed ni gubin ngiyal’?

¹⁶ Riyul’, nrogon ni ngan dag e t’ufeg rodad ngak Jehovah e ba muun ngay ni ngan palog ko tin kireb. T’ufeg e ku ra k’aringdad ni ngada rin’ed e tin nib mat’aw. Ni bod rogon ni, mang e gad ra rin’ ni bochan ni Jehovah e ir be’ ni ri ba gol ngodad? I yoloy James ni gaar: “Ya urngin e tin nib fel’ ni be pi’ Got ngodad nge urngin e tow’ath nrib manigil ma be yib u tharmiy ngodad, ni be yib rok Got nga but’, ni ir e sunmiy urngin ban’en ni be gal ramaen u lan e lang.” (James 1:17) Riyul’, ni nap’an ni gad ra pi’ ngak Jehovah e tin ni bay rodad, ma dabi fel’ rogon riy. Ya ba par ni ir e fen urngin e chugum ma bay rok urngin e pi n’en nrayog ni ngani fanay. (Psalm 50:12) Ma nap’an ni gad ra pi’ ngak Jehovah e tayim rodad nge gelngidad, ma gathi gad be pi’ ban’en ngak ndabiyog ni nge yog ngak. Ni mus ni faanra dabda machibnaged e thin nib fel’ ko Gil’ilungun Got, ma rayog ni nge gagiyegnag ni nge tolul e pi malang! Ere mang fan ni ngada pied ngak Jehovah e tin ni bay rodad, nge tayim rodad, nge gelngidad? Som’mon, ya bochan gad be dag e t’ufeg rodad ngak u polo’ i gum’irchadad, nge yafas rodad, nge lanin’dad, nge gelngidad.​—Mark 12:29, 30.

17. Mang e ra k’aringdad ni ngad pied ban’en ngak Jehovah u fithik’ e falfalan’?

¹⁷ Nap’an ni gad be pi’ ban’en ngak Jehovah, ma thingarda rin’ed u fithik’ e falfalan’, “yi Got e ba t’uf rok e en ni ma pi’ ban’en u fithik’ e falfalan’.” (2 Korinth 9:7, NW) Fare kenggin e motochiyel ni bay ko Deuteronomy 16:17 e ra ayuwegdad ni ngad pied ban’en u fithik’ e falfalan’ ni gaar: “Ra be’ ma nge pi’ ban’en nrogon nrayog rok ni be yan rogon e n’en ni ke pi’ Jehovah ni Got rom ngom.” Nap’an ni gad ra fal’eg i lemnag ko uw feni gel rogon ni ma gol Jehovah ngodad, ma ra k’aringdad ni ngada pied ban’en ngak u fithik’ e falfalan’. Ngan pi’ ban’en ngak e ra falfalan’nag gum’irchaen, ni ri taareb rogon ko llabthir ni ke falfalan ya ke pi’ e bitir rok ngak reb e taw’ath nib achichig. Ngan dag e t’ufeg rodad ko re wo’ ney e ra ayuwegdad ni ngad chuchugurgad ku Jehovah.

Ngan Chuchugur Ngak u Daken e Meybil

18. Mang fan ni ba baga’fan ni ngad lemnaged rogon ni ngad maruweliyed nge fel’ boch rarogon e meybil rodad?

¹⁸ Gad ra meybil ni goo gadad ma ra mab e kanawo’ ngodad nrib ga’ fan​—ni ngad nonad ngak e Chitamangidad nu tharmiy ni gad ba chuchugur ngak. (Filippi 4:6) Bochan ni meybil e ir reb e kanawo’ nib ga’ fan ni ngan chuchugur riy ngak Got, mab ga’ fan ni ngad talgad boch ma ngad lemnaged ko uwrarogon e meybil ni gad ra ta’. De t’uf ni nga nog e thin nib fel’ nifengin mab yaram, ya susun ni nga nog e thin u fithik’ e yul’yul’ nrogon ni be yib u gum’irchaey. Uw rogon ni ngada mon’oggad me fel’ boch rogon ni gad ma meybil?

19, 20. Mang fan ni ngad fal’eged i lemnag u m’on ni ngad meybilgad, ma mang boch ban’en nib puluw ni ngad tedan’dad ngay u nap’an ni gad be fal’eg i lemnag?

¹⁹ Gad ra guy rogon ni ngad fal’eged i lemnag u m’on ni ngad feked e meybil. Faanra ngada fal’eged i lemnag ko som’mon, ma rayog ni ngada meybilgad nib tamilang ma ba’ fan, ma aram e dab u da sulod u daken e thin nib mom ni ngeb ngan’dad. (Proverbs 15:28, 29) Sana ra ayuwegdad ni ngan fal’eg i lemnag boch ban’en ni i yog Jesus ko meybil ni i fil ngorad ma ngada lemnaged ko uw rogon ni bay rogon e re n’em ngodad. (Matthew 6:9-13) Ni bod ni, sana ngada fithed gadad ko mang e n’en nib achichig ni bang ko maruwel nib l’ag ko tin nib m’agan’ Jehovah ngay u roy u fayleng ni gad be athapeg ni ngad rin’ed. Sana gad ra yog ngak Jehovah ni gad baadag ni ngada rin’ed e tin th’abi fel’ ni fan ngak ma ngad ninged e ayuw ngak ma rayog ni ngada rin’ed urngin e maruwel ni ke pi’ ngodad? Kari magafan’dad ko boch ban’en nib t’uf rodad? Mang denen rodad e ba t’uf ni ngan nagfan, mab t’uf ni ngad n’iged fan e denen rok mini’? Mang skeng e be magawonnagdad, ma gad manang feni gurgur ni susun ni nge ayuwegdad Jehovah riy?

²⁰ Maku reb, rayog ni ngada lemnaged murung’agen e girdi’ ni gad manang ni rib t’uf e ayuw rok Jehovah rorad. (2 Korinth 1:11) Ma ban’en ni dabni pagtalin, e ngan pining e magar. Faanra ngad talgad buchuw ngad lemnaged e re n’eney, ma mmutrug ni rayog ni ngeb ngan’dad boch i fan ni ngan pining e magar ngak Jehovah min pining e sorok ngak u gubin e rran nbochan ni kari dag ni rib fel’ ngak e girdi’. (Deuteronomy 8:10; Luke 10:21) Ran yodor ma ku ra fel’ rogodad riy u reb e kanawo’​—ya ra ayuwegdad ni ngarda lemnaged e tin nib fel’, ma gad ra par ni gad be pining e magar ko yafas.

21. Mang Thin nu Bible e ngad filed me yog ni nge ayuwegdad u nap’an ni ngad meybilgad ngak Jehovah?

²¹ Fol Bible e ku rayog ni nge ayuweg me fel’ boch e meybil rodad. Piin pumoon nge ppin nib yul’yul’ nrogon ni weliy ko Thin rok Got e kara meybilgad nrib fel’. Ni bod ni, faanra bay e magawon nib mo’maw’ ni gad be mada’nag, ma be magafan’dad ngay maku gad be rus ni ngan magawonnag e yafas rodad nge yafas ko piin nib t’uf rodad, rayog ni ngad beeged fare meybil ni fek Jakob u murung’agen fa ngiyal’ ni nge mada’nag Esau ni walagen ni be lemnag ni ri fulweg taban ngak. (Genesis 32:9-12) Ara rayog ni ngada filed rogon e meybil ni fek Asa ni Pilung u nap’an ni keb piyu Ethiopia ni sagonapan taareb e milyon ni yad be k’aring e marus ngak e girdi’ rok Got. (2 Chronicles 14:11, 12) Faanra ke magawon lanin’dad ya bay reb e magawon nrayog ni nge kirebnag fithingan Jehovah nib fel, ma ffel’ ni ngan tiyan’uy ko meybil rok Elijah u p’eowchen e girdi’ ni ma liyor ku Baal u daken fare Burey ni Carmel, ma ku aram e meybil ni fek Nehemiah u murung’agen yu Jerusalem ni be k’aring e kireban’ ya kari gafgow. (1 Kings 18:36, 37; Nehemiah 1:4-11) Ran bieg min fal’eg i lemnag e pi meybil ney me gelnag e michan’ rodad ma gad ra nang feni fel’ ni ngad chuchugur gad ku Jehovah u nap’an ni bay e magawon rodad ni be diliiy lanin’dad.

22. Mang e thin nu Bible ni fan ko duw ni 2003, ma mang e ngad fithed gadad riy ni boor yay u lan fa re duw ni polo’?

²² Ba tamilang, ndariy ban’en ni kab ga’ e tayfan riy, mab tolang ni kab fel’ ni ngan nameg, ko bin baaray ni ngan fol ko fare fonow ni pi’ James ni ngan “chuchugur ku Got.” (James 4:8) Gad ra rin’ e re n’en ney u daken e maruwel ni ngad ted ni ngad mon’oggad ko tamilangan’ rok Got, ma ngad athamgilgad ni nge gel i yan rogon ni gad be dag e t’ufeg rodad ngak, ma ngad athamgilgad ni ngad chuchugurgad ngak u daken e meybil rodad. N’umngin nap’an e duw ni 2003, ma nguuda lemnaged e James 4:8 ni aram e thin nu Bible ko re duw nem, ngada ululgad ni ngada yaliyed gadad ni ngad nanged ko riyul’ ni gad ba chuchugur ku Jehovah. Murung’agen fare bugithin ni bay u tomur ko re verse ney, ma mang e be weliy fan? Uw rogon ni nge “chuchugur Jehovah ngom,” ma mang fapi flaab nra yib ngom riy? Fa bin migid e article e ra weliy e re n’en ney.

Ka Ga Manang?

• Mang fan ni ngan chuchugur ngak Jehovah e aram e n’en nib ga’ fan ni ngan lemnag u fithik’ e yul’yul’?

• Mang boch ban’en ni ngad nameged ni fan ni nge yog ngodad e tamilangan’ rok Jehovah?

• Uw rogon ni ngad daged ni bay e t’ufeg rodad nib riyul’ ni fan ku Jehovah?

• Mang boch e kanawo’ nrayog ni ngad rin’ed u nap’an e meybil rodad ni ngari fel thildad Jehovah?

[Blurb on page 8]

Thin nu Bible ni fan ko duw ni 2003 e: “Mu chuchugur ngak Got, me chuchugur ngom.”​—James 4:8.

[Picture on page 8]

Fare meybil ni ta’ Elijah u daken fare Burey ni Carmel e be dag ngodad ban’en nib fel’