“Ra Chuchugur Ngomed”

“[Got] e dariy bagadad ni mal’af rok nga orel.”​—ACTS 17:27, NW.

1, 2. (a) Nap’an ni gadad ra sap nga lang ko t’uf ni boor ni boor u lan e lang, ma mang e deer e susun ngad deeriyed u murung’agen e en Ta Sunmiy? (b) Uw rogon ni be micheg e Bible ngodad ni girdi’ e dagathi dariy farad u p’eowchen Jehovah?

KAAYUGUM sap nga lang ko t’uf nib sug u lan e lang u reb e nep’ ni dariy e manileng mi ri balyangan’um ni kam falfalan’? Pi t’uf nem ni bokum nge fene ga’ lan e lang e yira ngat ngay. U lan e re palpalthib ney nib ga’, ma fayleng e ri bochi yang i n’en ni rib achig. Ere re n’eney e be yip’ fan ni en tasunmiy, “ni ir e Th’abi Tolang u fayleng ni ga’ngin,” e kaygi tolang ni nga i lemnag e girdi’ ara kaygi mal’af ni dabiyog ni ngan nang fan fa ngan gay?​—Psalm 83:18.

² Be micheg e Bible ngodad ni girdi’ e de achig ferad u p’eowchen Jehovah. Rriyul’, ya Thin rok Got e be pi’ e athamgil nga lanin’dad ni ngad gaweged, ni be gaar: “Dariy bagadad nib mal’af Got rok nga orel.” (Acts 17:27; 1 Chronicles 28:9) Ba mudugil, ni faan gad ra guy rogon ni ngada chuchugurgad ku Got, ma ra fulweg labgen e maruwel rodad. Ko mang kanawo’? Fare thin ko Bible ni fan ko duw ni 2003 e ra pi’ e re fulweg ney ni ra falfalan’ gum’irchaey ngay ni gaar: “Ra chuchugur ngomed.” (James 4:8) Ngad weliyed boch fapi towath ni yira ngat ngay ni pi’ Jehovah ni ra puog nga daken e piin ni yad ba chuchugur ngak.

Towath Rok Be’ nge Be’ ni Yib Rok Jehovah

3. Mang towath e ra pi’ Jehovah ko piin ba aram ni yad ra chuchugur ngak?

³ Som’mon, e pi tapigpig rok Jehovah e bay e towath ni ferad ni rib tolang puluwon ni ke chaariy ni fen e girdi’ rok. Gubin i gelngiy, nge chugum ni totolang puluwon, nge skul ni ma pi’ e biney e m’ag e dabiyog ni nge yognag e biney e towath. Ba towath ni ra be’ ma birok, ban’en ni kemus ni ma pi’ Jehovah ngak e piin ni yad ba chuchugur ngak. Be mang? Thin rok Got e fulweg ni gaar: “Faan . . . ga ra pi’ lungum nge yan ni fan ko tamilang, faanra um gaweg ni bod e silver, ni bod rogon ba machaf ni kan mithag ni ga be par ma ga be gay, ma ra aram rogon ma ga ra nang fan madgun Jehovah, ma ri ga ra pirieg fare tamilangan’ rok Got. Ya Jehovah e ir e ma pi’ e gonop.” (Proverbs 2:3-6, NW) Ayugu mu lemnag e girdi’ ni da ra flontgad ni nge yog ni ngar pirieged “fare tamilangan’ rok Got”! Re towath nem​—fare tamilangan’ ni kan pirieg ko Thin rok Got—​e kan taarebnag ko “machaf ni kan mithag.” Mang fan?

4, 5. Mang fan ni “fare tamilangan’ u murung’agen Got” e rayog ni ngan taarebnag ko “machaf ni kan mithag”? Mu fal’eg i weliy.

⁴ Reb e ban’en, e fare tamilangan’ u murung’agen Got e rib ga’ fan. Reb e pi towath riy ni th’abi fel’ e fare athap ko yafas ni manemus. (John 17:3) Machane re tamilangan’ nem e be gelnag e fel’ ko yafas rodad ni ki mada’ko chiney. Ni bod rogon, ni bochan angin ni gadad be tayan’dad i fil fare Thin rok Got, ma ke yog ni ngad nanged e fulweg u boch e deer nib ga’ fan ni bod rogon e: Mini’ fithingan Got? (Psalm 83:18) Mang e tin riyul’ u rogon e yam’? (Eklesiastes 9:5, 10) Mang e ba m’agan’ Got ngay ni fan ko fayleng nge girdi’? (Isaiah 45:18) Maku ke yog ni ngad nanged ni kanawoen e par nib th’abi manigil e nga un fanay e fonow nib gonop nu Bible. (Isaiah 30:20, 21; 48:17, 18) Arfan, ni gadad e bay e n’en ni be pow’iydad nib fel’ ma ba mat’aw ni be ayuwegdad nge yog ni nga ud i pired u fithik’ e pi magafan’ nge marus ko pi n’en be buch ko par ma gadad be lek reb e kanawoen e yafas ni ra mon’ognag e falfalan’ nib polo’. Ma bin th’abi ga’ fan, e bochan ni kad filed e Thin rok Got ma ke yog ni ngad nanged pi felngin Jehovah ni rib pag rogon felngin ma kad chuchugurgad ngak. Mang e n’en ka ba’ ni gomanga kab ga’ fan nge migid e tha’ nib chugur ku Jehovah ni yib u daken “fare tamilangan’ u murung’agen Got”?

⁵ Ku bay reb i fan ni tamilangan’ u murung’agen Got e rayog ni ngan taarebnag ko “machaf ni kan mithag.” Taareb rogon nga boch e machaf, nib ga’ ni tinib mo’maw’ ko re fayleng ney. Girdi’ ni ba’ u fayleng ni yad nel’ bilyon, ma gonapan nel’ e milyon e yad e girdi’ ni yad ma liyor ngak Jehovah, ara gonapan taa be’ u reb e biyu’, e girdi’ e ke pirieg “fare tamilangan’ u murung’agen Got.” Ra ngan weliy ma rib ga’fan ni ngan nang e tin riyul’ ko Thin rok Got, ma ngan lemnag taareb e deer ni gaar: Mang e ma buch ko girdi’ ko ngiyal’ ni kar m’ad? Gadad manang ko Bible ni ma yim’ e yaal ma yam’ e dariy ban’en ni ki yad manang ma dakuriy e thamtham rorad. (Ezekiel 18:4) Machane, re michan’ nem ni de puluw ni ba’ ban’en u fithik’ be’ ni ma par nib fas u tomuren ni ke yim’ e ban’en ni kar mich u wan’ boor raba’ e teliw u fayleng. I ir bang i kenggin e teliw ni Christendom. Ku ba’ ko Buddhism, nge Hinduism, nge Islam, nge Jainism, nge Judaism, nge Shinto, nge Sikhism, nge Taoism. Ayugu mu lemnag​—bilyon e girdi’ ni kan bannagrad ko biney e machib ni googsur!

6, 7. (a) Kemus ni mini’ e ra pirieg “fare tamilangan’ u murung’agen Got”? (b) Mang reb e n’en ni be dag ni ke tow’athnagdad Jehovah ko tamilangan’ ni de yog ngak e piin ni yad “ba llowan’ ma yad ba skul”?

⁶ Mang fan ni de yoor e girdi’ ni kar pirieged “fare tamilangan’ u murung’agen Got”? Ya bochan ni dabiyog ni ngari nang be’ fan e Thin rok Got ni faanra dariy e ayuw rok Got riy. Ngam lemnag, ni re tamilangan’ ney e ba towath. Kemus ni ma pi’ Jehovah ngak e piin ni yad baadag ni ngar gayed e Thin rok u fithik’ e yul’yul’ nge sobut’an. Pi cha’nem e dagathi yad ba “llowan’ ni bod e llowan’ ko girdi’.” (1 Korinth 1:26, NW) Boor u fithik’rad e sana yima nang ni “dariy e skul rok ku yugu taareb rogon ko yu girdi’” aram rogon ni ma lemnag e fayleng. (Acts 4:13) Machane, dariy fan e binem. Ya ke tow’athnagdad Jehovah ko “fare tamilangan’ rok Got” ni bochan e pi felngin ni ke pirieg u gum’irchadad.

⁷ Mu lemnag reb e ban’en. Boor e girdi’ ko Christendom nib tolang e skul rorad ni ka rogned boor e thin ni murung’agen e Bible. Pi thin nem e rayog ni be weliy chepin nge rarogon, nge fan e yu bugithin ni Hebrew nge Greek, nge ku boch ban’en. Ere aram oren e pi n’en kar filed, e re pi girdi’ ni llowan’ nem e kari pirieged “fare tamilangan’ u murung’agen Got”? Ma, ba tamilang rogon ni yad be nang fan fare kenggin e Bible​—nge rogon ni ngan tamilangnag feni tolang nge feni gel gelngin Jehovah ni bochan e Gagiyeg rok u tharmiy? Gur yad manang ni Jehovah Got e gathi bayang ko Trinitas? Gadad e gadad manang ni gadad ba thil ngorad ya bay e tamilangan’ rodad nib puluw ko re n’enem. Mang fan? Ya ke towath nagdad Jehovah ko tamilangan’ nga fithik’ e tirok Got nib riyul’ ni de yog ngak boor e girdi’ ni yad ba “llowan’ ma yad ba skul.” (Matthew 11:25) Aram feni fel’ rogon ni ma tow’athnag Jehovah e piin ni yad ba chuchugur ngak!

“Jehovah e Be Matanagiy    Urngin e Piin Ni Yad Be T’ufeg”

8, 9. (a) Uw rogon ni weliy David reb e towath ni fan ko piin ni yad ba chugur ngak Jehovah? (b) Mang fan ni pi Kristiano ni riyul’ e ba t’uf e ayuw rok Got rorad?

⁸ Piin ni yad ba chuchugur ngak Jehovah e ku yad ma falan’ nga reb e towath​—ni aram e ayuw rok Got. Fare psalmist ni David, ni be’ ni gathi de mecham ko gafgow nge magawon e yoloy, ni gaar: “Jehovah e ba chugur ngak urngin e piin ni yad ma pining, urngin e piin ni yad ma pining u fithik’ e yul’yul’. Pi n’en nib adag e piin ni bay madgun rorad e ra rin’, yad ra yornag e ayuw ma ra rung’ag, ma ra ayuwegrad. Jehovah e be matanagiy urngin e piin ni yad be t’ufeg.” (Psalm 145:18-20, NW) Arrogon, Jehovah e ba chuchugur ngak e piin ni ba t’uf rorad ma arfan nib papey ni ra fulweg taban e mayor rorad ni fan ko ayuw.

⁹ Mang fan nib t’uf e ayuw rok Got rodad? N’en ni kub chag nga angin e pi n’en ni gadad be thamiy ko par ko re ngiyal’ n’ey “ni ke mo’maw’ e par riy,” e tin riyul’ e Kristiano e yad e th’abi be namegrad e ani th’abi ga’ ko Toogor rok Jehovah, ni Satan ni fare Moonyan’. (2 Timothy 3:1) Re toogor nem nib salap ni ke dugliy u wan’ ni “nge longuydad”. (1 Peter 5:8) Satan e be adawnag, ma be diliiy lanin’dad, ma be wawliydad ko kireb. Maku be sap nga rarogon e lem nge gum’ircha’ ni nge guy rogon nge suguy ko kireb. Bay ban’en ni be nameg ni nge rin’ ni aram e: nge warnag e michan’ rodad me kirebnagdad ko tirok Got ban’en. (Revelation 12:12, 17) Bochan ni bay e togopuluw rodad ni rib gel ni gadad be cham ngak, ma gathi ba pagan’dad ni gad manang ni “Jehovah e be matanagiy urngin e piin nib t’uf rorad”?

10. (a) Uw rogon ni ma ayuweg Jehovah e girdi’ rok? (b) Mang e re miti ayuw ni th’abi ga’ fan, ma mang fan?

¹⁰ Machane, uw rogon, ni ma matanagiy Jehovah e girdi’ rok? Ayuw rok ni ke micheg e der micheg ngodad e yafas ni dariy e magawon riy u lan e re m’ag ney; maku gathi fan e ke micheg ni nga i fal’eg e maangang ni fan ngodad. Machane, Jehovah e ma pi’ ayuw ko girdi’ rok ni bod reb e ulung. Ya ri dabi pag fare Moonyan’ ni nge thang mit e piin nriyul’ ni yad ma liyor ngak u fayleng! (2 Peter 2:9) N’en ni th’abi ga’fan e Jehovah e ma ayuwegdad ko tirok Got ban’en. Ke fal’eg rogodad ko pi n’en nib t’uf rodad ni nge yog ni da athamgilgad u fithik’ e pi magawon ma gadad ayuweg e tha’ u thildad. Ma tomur riy, e ayuw rok Got e aram e tin th’abi ga’ fan e ayuw. Mang fan? N’umngin nap’an ni bay e tha’ u thildad Jehovah, ma dariy​—ban’en ni ki mus ko yam’—​ni rayog ni nge maadadnagdad ni manemus.​—Matthew 10:28.

11. Mang yaram e ke fal’eg Jehovah u rogon ni ngan ayuweg e girdi’ rok ko tirok Got ban’en?

¹¹ Jehovah e boor ni boor rogon ni ke yarmiy ni fan ni nga i ayuweg e piin ni yad ba chugur ngak ko tirok Got ban’en. U daken e Thin rok, ni fare Bible, e ke pi’ e gonop ngodad ni fan ni nga i yog ni u darod u fithik’ e pi magawon. (James 1:2-5) Faan gad ra fanay nib fel’ rogon e pi fonow ni bay u Bible ma ba’ e ayuw riy. Kub muun ngay, ni ma pi’ Jehovah e “kan ni thothup ko piin ni yad be ning ngak.” (Luke 11:13) Re kan nem e ir e th’abi gel gelngin u tan e palpalthib, rib mudugil ni rayog ni nge fal’eg rogodad nib fel’ rogon ni nge yog ni darod u fithik’ e pi magawon ara skeng ni gadad ra mada’nag. U daken Kristus, e pi’ Jehovah riy boch e “pumoon ni towath.” (Efesus 4:8, NW) Pi girdi’ ney ni ke bung rogorad ko tirok Got ban’en e ri yad be athamgiliy ni ngar daged rogon feni gel e runguy rok Jehovah ni ma ayuweg e piin yad ma liyor ku Got.​—James 5:14, 15.

12, 13. (a) Uw rogon ni ma pi’ Jehovah ngodad e ggan nib spiritual ko ngiyal’ ni ngan pi’ riy? (b) Uw rogon e lem rom nga rogon e yaram rok Jehovah ni fan ngodad ko tirok Got ban’en?

¹² Jehovah e ki pi’ ban’en ni nge ayuweg i matanagiydad ni aram e: ggan nib spiritual ko ngiyal’ ni ngan pi’ riy. (Matthew 24:45) Ni aram e pi babyor ni yibe yoloy ngan fal’eg rogon, nib muun ngay e pi babyor ni Fare Wulyang Ntagil’ E Damit nge Awake!, ku arrogon e pi muulung, assemblies, nge conventions, Jehovah e ma pi’ ngodad e pi n’en ba t’uf rodad ko ngiyal’ nib t’uf riy. Rayog ni ku ra yib ngan’um ba ngiyal’ ni mu rung’ag ban’en u reb e muulung ko Kristiano, fa reb e assembly, ara reb e convention ni ri mithmith gum’irchaem riy me pi’ gelngin ara pi’ e pagan’ ngom? Kaa yugu mu bieg reb e thin ko fa yuke babyor ni kad weliyed ko som’mon ma ga lemnag ni kan yoloy ni fan ngom?

¹³ Reb e talin e cham rok Satan nib th’abi manging e nge mulan’uy u ban’en, ma gathi ban’en ni dabib angin ngodad. Ri manang ni ra n’uw nap’an ni mulan’uy, ma rayog ni nge warnagdad ma ku ra momnagdad ko riya. (Proverbs 24:10) Ma bochan ni Satan e baadag ni nga i fanay e ngiyal’ ni ke mulan’dad, ma arfan nib t’uf e ayuw rodad. Fa yu ke babyor ni Wulyang Ntagil’ E Damit nge Awake! e munmun min yoloy boch ban’en ngay ni ra ayuwegdad ngad chamgad ko meewar laniyan’. Bay reb e pi thin nem, ni reb e Kristiano ni ppin e yoloy ni gaar: “Gu ma bieg fare thin nib chugur i urngin e rran, ma yug be map’ e lu’ u owcheg. Gu ma tay u tooben e bet rog ni bochan ni nge yog ni gu fek ko ngiyal’ ni ke kireban’ug. U daken e pi thin ni aray rogon ney, ma gu be thamiy pa’ Jehovah ni ke longobiyeg be ayuwegeg.”a Ere gathi gadad ba falfalan’ ngak Jehovah ni bochan ni be pi ngodad e ggan nib spiritual ko ngiyal’ ni ngan pi’ riy? Mu lemnag, e yaram rok ko ti nib spiritual nib fel’ ngodad ni aram e mich riy nib chugur ngodad ma ke taydad nga tan e ayuw rok ni be matanagiydad.

Kanawoey Ngak Facha’ ni Ma “Motoyil ko Meybil”

14, 15. (a) Mang towath rok Jehovah e ke pi’ ngak e piin ni yad ba chuchugur ngak? (b) Mang fan ni kan pi’ kanawoey ngak Jehovah ni dariy puluwon u fithik’ e meybil e reb e towath nib fel’?

¹⁴ Kaam guy ni nap’an ni ra yib gelngin be’ nge mat’awun, ma baga’ ni gathi ri ki yad ma non ko piin yad ba sobut ngorad? Machane, uw rogon, Jehovah Got? Kaygi palog nga orel ni nge adag e n’en ni ma yog e yu girdi’ ngak? Rib thil! Fare towath ko meybil e ku reb e towath ni ma pi’ Jehovah ngak e piin ni yad ba chugur ngak. Bochan ni ke pi’ mat’awuy ni dariy puluwon ngak e eni ma “Motoyil ko meybil” ma aram e rriyul’ ni ba towath ni rib fel’. (Psalm 65:2) Mang fan?

¹⁵ Ngan fal’eg i weliy nge tamilang: Fare chief executive u reb e corporation nib ga’ e bay e maruwel rok ni boor. Ir e ma dugliy e tin ir e nga i rin’ nge tin ni nge yog ngak boch e girdi’ ngar rin’ed. Ri ku arrogon, fa eni ma Gagiyeg ni Th’abi Tolang ko palpalthib e ba’ mat’awun ni nge dugliy ko tin ngan ban’en e ra un ngay ma tin ngan e nge pi’ ku be’. Mu lemnag urngin e tin ni ke pi’ ngak Fak nib t’uf rok, i Jesus. Fa en Fak e kan pi’ ngak “mat’awun ni nge pufthin.” (John 5:27) Pi engel e “kan tayrad nga tan pa’.” (1 Peter 3:22) Kan ni thothup rok Jehovah nib gel gelngin e ba’ ni nge pi’ e ayuw ngak Jesus ni nge ayuweg i pow’iy pi gachalpen u fayleng. (John 15:26; 16:7) Ere rayog ni nge gaar: “Kan pag fan urngin ban’en ngog u tharmiy ngu but’.” (Matthew 28:18) Machane, faanra yib ko meybil rodad, ma ke dugliy Jehovah ni nge uneg ir ngay. Arfan ni fare Bible e be pow’iydad ni goo Jehovah e ngad meybilgad ngak, ngada rin’ed ni aram rogon u daken fithingan Jesus.​—Psalm 69:13; John 14:6, 13.

16. Mang fan ni rayog ni nge pagan’dad ni ri ma motoyil Jehovah ko meybil rodad?

¹⁶ Rriyul’ ni ma motoyil Jehovah ko meybil rodad? Faan ma nga dariy fan u wan’, ma dabi ta’ chilen ngodad ni nga “ud meybilgad ni gubin ngiyal’” ara ngad paged fan e tin be tomalnagdad nge magafan’ rodad ngak. (Roma 12:12; Psalm 55:22; 1 Peter 5:7) Pi tapigpig nib yul’yul’ u nap’an e Bible e rib pagan’rad ni ma motoyil Jehovah ko meybil. (1 John 5:14) Arfan, ni fare psalmist i David e yog ni gaar: “[Jehovah] mu rung’ag lungug.” (Psalm 55:17, NW) Ku arrogodad ni ba’ fan ni ngad pagedan’dad ni Jehovah e ba chuchugur, ni be par ni nge motoyil nga urngin e tini gadad be lemnag nge magafan rodad.

Jehovah e Ma Pi’ Puluwon e Pi Tapigpig Rok

17, 18. (a) Uw rogon ni ma lemnag Jehovah rogon e maruwel ko piin ni sunmiyrad ni yad llowan’? (b) Mu weliy rogon ni be dag e Proverbs 19:17 ni ngongol rodad u fithik’ e runguy e der ma yan ni der guy Jehovah.

¹⁷ Liw rok Jehovah ni ir e Th’abi Tolang u palpalthib e dabi yib angin e pi n’en ma rin’ e girdi’ ngak ara tin ni yad be siyeg ni ngar rin’ed. Machane, Jehovah e ba Got ni ma fel’ u wan’ e maruwel nib fel’. Ri ma lemnag ban’en​—ni riyul’, ya ma chaariy u wan’—​e pi maruwel rok e piin nib yul’yul’ ma yad ba llowan’ ni sunmiyrad. (Psalm 147:11) Re n’ey, e ku reb e felngin ni ma falfalan’nag e piin ni yad ba chuchugur ku Jehovah: Ma pi’ puluwon e pi tapigpig rok.​—Hebrews 11:6.

¹⁸ Fare Bible e be dag ni rib tamilang ni Jehovah e bay fan u wan’ e n’en ni ma rin’ e piin ni yad ma liyor ngak. Ni bod rogon, ni gad ra bieg ni gaar: “Cha’ ni be ayuweg e piin nib sobut e be pi’ ngak Jehovah, ma ngongol rok nib fel’ ni be rin’ e ku ra pi’ puluwon ngak.” (Proverbs 19:17, NW) Rogon ni ma runguy Jehovah e piin ni yad ba sobut e ki i m’ug ko fare motochiyel rok Moses. (Leviticus 14:21; 19:15) Uw rogon ni ra lemnag Jehovah ni faan ka gad ra folwok ko runguy rok ngak e piin ni ba sobut? Faan gad ra pi’ ban’en ngak e piin ni ba sobut, ma dabda lemnaged ni ngan fulweg taban, ma aram e be changar Jehovah ko re n’eney ni ir e kan pi’ ngak ni ba’ nap’an me fulweg taban. Jehovah e be micheg ni ku ra fulweg puluwon e re malfith nem ni aram e ke fel’ u wan’ nge towath. (Proverbs 10:22; Matthew 6:3, 4; Luke 14:12-14) Arrogon, nap’an ni gad ra dag ni gad be runguy be’ ni ma liyor ni ke t’uf ban’en rok, ma ma bit nga gum’irchaen Jehovah. Uw gelngin fedad falfalan’ ni gadad manang ni ngongol rodad u fithik’ e runguy e der yan ni aw ni der guy e Chitamangidad nu tharmiy!​—Matthew 5:7.

19. (a) Mang fan ni rayog ni nge mich u wan’dad ni Jehovah e ma fel’ u wan’ e n’en ni gadad ma rin’ ko machib nge fare maruwel ni ngan pingeg e girdi’? (b) Uw rogon ni ma pi’ Jehovah puluwon fare ngongol ko pigpig ni ngan ayuweg Gil’ilungun?

¹⁹ Jehovah e rib ga’ fan u wan’ e n’en ni gadad be rin’ ni fan nga Gil’ilungun. Nap’an ni gad ra chuchugur ngak Jehovah, ma aram e ba rogon ngay ni kad adaged ni ngad fanayed e tayim rodad, nge gelngidad, nge tin ba’ rodad ni ngad uned nib musmus rogon ni rayog rodad ko fare maruwel ni machib ko Gil’ilungun nge ngan pingeg e girdi’ nge mang pi gachalpen. (Matthew 28:19, 20) Yu ngiyal’, ma rayog ni ngad lemnaged nib lich e tini gadad be mu’nag. Gum’irchadad ni de flont e ku rayog ni nge k’aringdad nga i maruwaran’dad ko be falan’ Jehovah ko maruwel rodad fa danga’. (1 John 3:19, 20) Machane Jehovah e ma chaariy urngin e towath​—ni demtrug feni achig​—ni yib u ba gum’ircha’ ni bochan e t’ufeg. (Mark 12:41-44) Be micheg e Bible ngodad ni gaar: “Got e gathi de mat’aw ni nge pagtalin e maruwel romed nge t’ufeg ni gimed be dag nga fithingan.” (Hebrews 6:10, NW) Rib mudugil, ni Jehovah e bay u wan’ ma ra pi’ puluwon ni mada’ko bin th’abi achichig e maruwel ni kan rin’ ni fan ni ngan ayuweg Gil’ilungun. N’en ni kub chag ko towath nib fel’ rogon ko tirok Got ban’en e chiney, e rayog ni ngad sapgad nga m’on ko pi falfalan’ ko yafas u lan fa bin nib biech e fayleng ni bay yib, ko gini bayi pithig Jehovah pa’ riy u fithik’ e gol nge gamaneg e tin nib mat’aw nib adag urngin e piin ni yad ba chuchugur ngak!​—Psalm 145:16; 2 Peter 3:13.

20. N’umngin nap’an e duw ni 2003, ma uw rogon me yog ni par u wan’dad e thin nu Bible ni fan ko re duw nem, ma mang angin ni ra yib?

²⁰ N’umngin nap’an fare duw ni 2003, ma ngad fithed gadad ko gadad be par ni gadad be maruweliy ni ngad chuchugurgad ko Chitamangidad nu tharmiy fa. Ya faanra gadad be rin’, ma rayog ni nge mich u wan’dad ni ra rin’ ni bod rogon ni ke micheg. Ya “Got . . . e der ma ban.” (Titus 1:2, NW) Faan ga ra chuchugur ngak, me chuchugur ngom. (James 4:8) Me ere mang angin? Rayog e flaab ni boor e chiney nge tin ka bay nga m’on ni yira chuchugur boch ngak Jehovah ni dariy n’umngin nap’an!

[Footnote]

Ka Be Yib Ngan’um?

• Mang towath e ma pi’ Jehovah ko piin ni ba chuchugur ngak?

• Mang yaram e ke fal’eg Jehovah u rogon ni ngan ayuweg e girdi’ rok ko tirok Got ban’en?

• Mang fan ni kanawoey ngak Jehovah ni kan pi’ ni dariy puluwon u fithik’ e meybil e reb e towath?

• Uw rogon ni be dag e Bible ni ma falan’ Jehovah ko pigpig nib yul’yul’ ni ma ta’ e piin ni sunmiyrad ni yad ba llowan’?

[Pictures on page 12, 13]

Ma pi’ Jehovah e ayuw ni fan ko tirok Got ban’en