“Am Sap! Ireray E Got Rodad”

Pi n’en ni kan weliy ko gal article ney ni yira bieg ko ulung e kan fek ko fare babyor ni Draw Close to Jehovah, ni kan wereg u nap’an fapi district convention ni kan ta’ u ga’ngin yang e fayleng ko duw ni 2002/03.

“Am Sap! Ireray e Got rodad. Be l’agan’dad ngak, ni ra ayuwegdad. Re Got ney e Jehovah.”​—ISAIAH 25:9, NW.

1, 2. (a) Uw rogon ni ma pining Jehovah Abraham ni patriarch, ma mang e rayog ni ngad lemnaged u murung’agen? (b) Uw rogon ni be micheg fare Bible ngodad nrayog ni ngari fel’ thildad Got?

“FAGER ROG.” Aram rogon ni pining Jehovah, ni ir e en ke Sunmiy e tharmiy nge fayleng, ngak Abraham ni patriarch. (Isaiah 41:8, NW) Ay gum lemnag​—kemus ni bogi girdi’ e ke mang fager rok Got ni ir e Somol ni Th’abi Tolang u palpalthib! Sana ga ra lemnag ni ngam gaar, ‘Rayog ni nggu par nib chuchugur ku Got ni aram rogon fa?’

² Fare Bible e be micheg ngodad ni rayog ni ngari fel’ thildad Got. Me fel’ e tha’ u thilin Abraham nge Jehovah ya bochan ni “ke mich Jehovah u wan’.” (James 2:23, NW) Maku arrogon e ngiyal’ ney, ni ma chugur Jehovah ngak e “piin nib mat’aw”. (Proverbs 3:32) Fare Bible e be fonownagdad, nrogon ni yog ko James 4:8 ni gaar: “Mu chuchugur ku Got, me chuchugur ngom.” Ba tamilang, nfaan gad ra guy rogon ni ngad chugurgad ngak Jehovah, ma ku ra chugur ngodad. Riyul’ ni ra chuchugur ngodad. Machane pi thin ney ni kan thagthagnag e be yip’ fan ni gadad​—ni gadad e girdi’ ni tadenen, ma daworda flontgad—​e gadad e som’mon ni ngad chuchugurgad ngak? Ri danga’. Rayog ni ngan chuchugur ngak Jehovah ya bochan e Got rodad ni ma t’ufegey e ke rin’ l’agruw ban’en nib ga’ fan.​—Psalm 25:14.

3. Mang l’agruw ban’en ni ke rin’ Jehovah ma rayog ni nge mang fager rodad?

³ Som’mon, ke yarmiy Jehovah Jesus ni “nge pi’ e pogofan rok nge biyuliy boor e girdi’.” (Matthew 20:28) Re biyul nem ni maligach e ke ayuwegdad ni ngada chugurgad ngak Got. Fare Bible e be yog ni gaar: “Ma gadad e gadad ma t’ufegey, ya bochan ni ir e som’mon ni t’ufegdad.” (1 John 4:19, NW) Arrogon, bochan ni Got e ir e “som’mon ni t’ufegdad,” ma aram ir e ke tay e def ni fan ni nge mang fager rodad. Bin l’agruw, e ke dag Jehovah ir ngodad. Demtrug ko mini’ e ke mang fager rodad, ma ra gel e fager rodad ngak nfaanra riyul’ ni gad manang e cha’ nem, ba fel’ u wan’dad ma gad be ta’ fan e ngongol rok nib thil mab fel’. Mu lemnag ko mang fan e re n’en ney. Faanra Jehovah e ir be’ nib mith, ma ir e Got ni dabiyog ni ngan nang, ma aram dabiyog rodad ni ngad chugurgad ngak. Machane, de mithag Jehovah ir rodad, ya baadag ni ngad nanged murung’agen. (Isaiah 45:19) U lan e Thin rok, ni fare Bible, me dag ngodad murung’agen u daken e thin ni rayog ni ngad nanged fan​—ni aram e mich riy ni gathi kemus ni gadad ba t’uf rok ya ku baadag ni ngad nanged ma ngad t’ufeged ni ir e Chitamangidad nu tharmiy.

4. Mang e gad ra nang u murung’agen Jehovah nfaanra ke gel e tamilangan’ rodad u murung’agen boch i felngin?

⁴ Kaam guy reb e bitir nib achichig ni ke yog ngak e pi fager rok murung’agen e chitamangin me yog ngorad u fithik’ e felfelan’ ma ba uf ngay ni be gaar, “Aram e papa’ rog”? Piin ni ma liyor ku Got e ri bay tapgin ni ngar da nanged ni aram rogon u murung’agen Jehovah. Fare Bible e be yiiynag ba ngiyal’ ni girdi’ nib yul’yul’ e bay rogned ni baga’ lamrad ni l’ungurad: “Am Sap! Ireray e Got rodad.” (Isaiah 25:8, 9, NW) Faanra ke yoor e tamilangan’ rom u murung’agen felngin Jehovah, ma ngarda nanged ni bay e Chitamangidad ni th’abi fel’ ma ir e Fager rodad nrib fel’ thildad. Arrogon, gad ra nang fan pi felngin Jehovah ma ra pi’ ngodad boor tapgin ni ngad chugurgad ngak. Ere ngada yaliyed ko uw rogon ni be dag fare Bible felngin Jehovah ni rib ga’ fan ni​—gelngin, nge mat’aw, nge gonop, nge t’ufeg. U lan e re article ney, ma gad ra weliy murung’agen dalip ko fapi felngin.

“Kan Tolangnag ni Bochan Gelngin”

5. Mang fan nib puluw ni kemus ni Jehovah e kan pining ni “Gubin ma Rayog Rok,” ma mang boch e kanawo’ ni ma fanay gelngin ni rib gel?

⁵ Jehovah e kan “tolangnag ni bochan gelngin.” (Job 37:23, NW) Jeremiah 10:6, (NW) e be yog ni gaar: “Ri dariy be’ ni taareb rogomew, O Jehovah. Gur e ani ga’, ma rib gel gelngin fithingam.” De taareb rogon ko n’en ni kan sunmiy, ma gelngin Jehovah e dariy e gin ni mus riy. Ma ireray fan, ni goo ir e yima pining ni Got ni “Gubin ma Rayog Rok.” (Revelation 15:3) Ma fanay Jehovah gelngin nib gel ni nge sunmiy ban’en, ma nge gothey ban’en, ma nge ayuweg ban’en, ma nge sulweg ban’en nga rogon. Mu lemnag ni ri l’agruw ban’en ni ra dag ni riyul’ ni aram rogon​—ni aram e gelngin ni nge sunmiy ban’en nga gelngin nge ayuweg ban’en.

6, 7. Uw feni gel gelngin e yal’, ma mang e tin riyul’ nib ga’ fan ni be micheg?

⁶ Nap’an ni ga bay u wen ni gab sak’iy u reb e rran nib gel e yal’, ma mang e ga ra thamiy u daken e biyach u dowam? Fare gowelngin e yal’. Machane, tin riyul’ riy, e ga be thamiy angin gelngin Jehovah ni sunmiy ban’en. Uw feni gel gelngin e yal’? U lukngun, ma bay gowelngin ni sogonapan 27 milyon degrees Fahrenheit. Faanra rayog ni ngam fek bang u lu lukngun e yal’ ni bod ga’ngin peebugul bochi rosum min ta’ ngaray nga fayleng, ma dabiyog ni ngam sak’iy ni dabi buch ban’en rom ni napan 90 miles palgin nga orel ko chi gi n’em ni be yib gowelngin! Gubin e second, ma fare yal’ e ma pi’ gelngin nge wer ni taareb rogon nga gelngin bokum milyon e donmach ni pil. Yugu aram rogon, ma fare fayleng e be chel ko gin nib fel’ palgin ko fare n’en ni ka nog e thermonuclear furnace ngay ni yira ngat ngay. Yugu ra chuchugur fare yal’ ko fayleng, ma ra yan e aybeb ko ran nge m’ay u fayleng; ma faan yugu ra palog, ma ra garbeb nge el urngin ban’en. Demtrug ko kaygi chuchugur ara kaygi palog ma ra par e fayleng rodad ni dariy e yafas riy.

⁷ Yugu aram rogon ni yafas ko girdi’ e be tor nga daken e yal’, ma boor i yad e darur lemnaged e n’en ni be rin’ e yal’. Ma arfan ni, dar filed e tin ni be fil fare yal’ ngodad. Psalm 74:16 e be yog murung’agen Jehovah ni gaar: “Kam ta’ . . . fare n’en ni ma pi’ e tamilang, ni aram fare yal’.” Arrogon, fare yal’ e ma n’uf Jehovah, “ni ani Sunmiy e tharmiy nge fayleng.” (Psalm 146:6) Yugu demtrug rogon, ma kemus ni ireray reb u fithik’ e pi n’en ni kan sunmiy ni ma fil ngodad murung’agen gelngin Jehovah nib gel. Ra nge yoor e tamilangan’ rodad u murung’agen gelngin Jehovah ni sunmiy ban’en, maku ra gel e ta’ fan rodad ngak.

8, 9. (a) Mang fanathin ni be dag e runguy ma be dag ni ba m’agan’ Jehovah ngay ni nge yoror rodad ma ma pi’ e tin nib t’uf rok e pi tapigpig rok? (b) Uw rogon ni ke ayuweg e en tachugol saf e pi saf rok u nap’an e Bible, ma mang e be fil ngodad u murung’agen e en Ta Chugul saf rodad nib Ga’?

⁸ Maku ma fanay Jehovah gelngin nib gel ni nge ayuweg e pi tapigpig rok me pi’ e tin nib t’uf rorad. Fare Bible e ma fanay boch e fanathin nib tamilang ma ma pug lanin’uy ni fan ni nge dag e tin ni ke micheg Jehovah u rogon ni ma pi’ e ayuw. Ni bod ni, ka mu guy e Isaiah 40:11. U rom e be taareb rogonnag Jehovah ir ko en ta chugul saf ma girdi’ rok e ke taareb rogonnagrad ko fapi saf. Gad ra bieg ni be gaar: “Bay i ayuweg fare ran’ i saf rok ni bod rogon be’ ni ma gafaliy e saf; bayi kunuy fapi pi fak e saf nga taabang, mi i fekrad ni ke chuchugumiyrad; pi chitiningirad e bay i pow’iyrad Somol ni sasaf’og.” Rayog ni ngam susunnag ko mang e be weliy ko re verse ney?

⁹ Buchuw e gamanman ni dabiyog ni ngar ayuweged yad ni bod rogon e saf. En ta chugul saf u nap’an e Bible e thingari dabi rus ma aram e rayog rok ni nge ayuweg e saf rok u nap’an ni ra yib e gamanman ni wolves, nge bears, nge layon ni nge longuyrad. (1 Samuel 17:34-36; John 10:10-13) Machane bay yu ngiyal’ ni rogon ni ngan ayuweg ma yibe pi’ e tin nib t’uf rorad e ma t’uf ni ngan sasaf’og. Ni bod ni, nap’an ni ra gargel reb e saf ko gin nib palog ko fapi saf ni boor, ma mang e ra rin’ e en ta chugul saf ni fan ni nge ayuweg fare fak e saf ni kafin ni gargeleg ni dabiyog ni nge ayuweg ir? Sana ra fek ni boor e rran, “u ngorongoren”​—ni ke ta’ nga bang e mad nib gafgaf u daken e mad rok u lang. Machane, uw rogon ni nge yan fak e saf nga lan ngorongoren e ta chugul saf? Sana fare fak e saf e ra kerker dow nga ay e ta chugul saf. Machane fa cha’ ni ta chugul saf, e ir e ra lumel nga but’ me k’iyag pa’ nge fek fare fak e saf, me sasaf’ognag nge ta’ nga ngorongoren. Reb e fanathin ni be dag ni rib m’agan’ e Ta Chugul saf rodad ni Baga’ ni nge ayuweg me pi’ e tin nib t’uf rok e piin tapigpig rok!

10. Uw rogon ni ma yororiyey Jehovah e ngiyal’ ney, ma mang fan ni rib ga’ fan e ayuw ni aram rogon?

¹⁰ Gathi ke mus ni ke micheg Jehovah ni nge pi’ e ayuw. Nap’an e Bible, me dag u fithik’ e maangang ni rayog rok ni nge “ayuweg e piin ni ma fol rok ko gafgow ni ma yib ngorad.” (2 Peter 2:9) Ma uw rogon e ngiyal’ ney? Gad manang ni der ma fanay gelngin ni nge ayuwegdad ko urngin e gafgow nib gel ni ma yib ngodad e ngiyal’ ney. Machane, ma pi’ ban’en ni kab ga’ fan ngay​—ni aram e ayuw ko tirok Got. Got rodad ni ma t’ufegey e ma ayuwegdad ni dabni kirebnag e tirok ni bay rodad ma aram ma pi’ ngodad e tin nib t’uf rodad ni fan ni ngad kadedan’dad ko pi skeng ni keb ngodad ma ra ayuwegdad ni nge dabi kireb e tha’ u thildad Got. Ni bod ko, Luke 11:13 e be yog ni gaar: “Yugu ereyer fanmed kireb, ma gimed manang rogon ni ngam pied e tin nib fel’ ban’en ngak pi fakmed. Ere en ni Chitamangiy ni bay u tharmiy e ri ra pi’ fare Kan ni Thothup ngak e piin ni yad ra ning ngak!” Re gelngin nib gel nem e rayog ni nge ayuwegdad ni ngad gelgad ko skeng ara magawon ni gad ra mada’nag. (2 Korinth 4:7) Ma arfan ni ma maruweliy Jehovah ni nge ayuweg e yafas rodad, ni gathi kemus ni lan in e duw, ya dariy n’umngin nap’an. Bochan ni gad be lemnag e re athap ney, ma aram e rayog ni ngad lemnaged urngin e gafgow ni ra yib ngodad ko re m’ag ney ni tin nib “achig ma dabi n’uw nap’an me m’ay.” (2 Korinth 4:17) Gathi ra fel’ u wan’dad reb e Got ni be fanay gelngin ni fan ngodad u fithik’ e t’ufeg?

“Baadag Jehovah e Ngongol nib Mat’aw”

11, 12. (a) Mang fan ni felngin Jehovah nib mat’aw e ra k’aringdad ni ngad chugurgad ngak? (b) Ma mang e ke yog David u murug’agen Jehovah, ma uw rogon ni ra fal’eg lanin’dad e pi thin ney ni kan thagthagnag?

¹¹ Ma rin’ Jehovah e tin nib mat’aw, ma ma rin’ e re n’en ney nrogon nib mudugil, ma de laniyan’. Ngongol nib mat’aw rok Got, e gathi ngongol ni ma dariyfannag ban’en, ara bugel ni aram e ngongol ni dubdad, machane ireray e ngongol ni ra k’aringdad ni ngad chugurgad ngak Jehovah. Fare Bible e ba tamilang rogon ni be tamilangnag e re felngin ney ni bay e felfelan’ riy. Ere, ngada weliyed murung’agen dalip e kanawo’ ni ma dag Jehovah felngin ni mat’aw.

¹² Bin som’mon, ma felngin Jehovah nib mat’aw e ke k’aring ni nge dag ni ir e ba yul’yul’ ngak e pi tapigpig rok. David ni psalmist e ke guy ko yafas rok e re felngin Jehovah ney. Bochan e n’en ni ke buch ko yafas rok nge n’en ni ke fil u murung’agen e pi kanawo’ rok Got, ma mang e ke yog David? I yog ni gaar: “Jehovah e ba t’uf rok e tin nib mat’aw, ma der ma pag e piin ni yad ba yul’yul’ ngak. Ma ma yororiyrad ni gubin ngiyal’.” (Psalm 37:28, NW) Ireray e mich riy ni ri ma fal’eg lanin’uy! Got rodad e ri dariy ba ngiyal’ ni nge digey e piin nib yul’yul’ ngak. Ere rayog ni ngad torgad nga daken e chuchugur rok ngodad nge ayuw rok ngodad u fithik’ e t’ufeg. Ra riyul’ e re n’ey nbochan felngin nib mat’aw!​—Proverbs 2:7, 8.

13. Uw rogon ma ngongol rok Jehovah ni ri ma lemnag rogon e gird’ nib gafgow e ke gagiyel ko fare Motochiyel ni ke pi’ ngak piyu Israel?

¹³ Bin l’agruw, felngin Got nib mat’aw e ri manang e tin nib t’uf rok e en nib gafgow. Ke gagiyel ni Jehovah e ri ma lemnag rogon e piin nib gafgow ko fare Motochiyel ni ke pi’ ngak piyu Israel. Ni bod rogon, fare Motochiyel ni ke yarmiy ni ngan pi’ ngak e piin ni dakuriy e galabthir rorad nge piin kem’ figirngiyrad e tin bat’uf rorad. (Deuteronomy 24:17-21) Bochan ni ke naab nga feni mo’maw’ e yafas ko tabinaw ni aram rogon, ma aram fan ni Jehovah e ke mang chitamangirad ni Ta Puf Oloboch miki mang Ta Yoror rorad. (Deuteronomy 10:17, 18) I ginang piyu Israel ni faanra yad ra magawonag e piin ppin nge pi bitir ni dabiyog ni ngara ayuweged yad, ma ra rung’ag e mayor rorad. Me gaar, “Ma ra gel e damumuw rog,” rogon ni yog ko Exodus 22:22-24, NW. Yugu aram rogon ni damumuw e gathi ireray felngin Got ni rib gagiyel, ma ku ra yib e damumuw nib mat’aw ngak nbochan e ngongol ni de mat’aw ni ke rin’ be’ ni lem rok, ni baga’ ni faanra piin ni kan gafgownag nge piin ba meewar.​—Psalm 103:6.

14. Mang e mich riy ni rib gagiyel ni Jehovah e de laniyan’?

¹⁴ Bin dalip, u Deuteronomy 10:17, e be micheg fare Bible ngodad ni Jehovah e “de laniyan’ ma dabi fek e chugum ara salpiy ni ra pi’ be’ ngak ni fan ni nge ayuweg u fithik’ e sasaliyeb.” De taareb rogon ko tin ma rin’ e girdi’ ni bay gelngirad, ma dabi thil e lem rok Jehovah nbochan e chugum ara yaan ni yibe guy nga wuru i dow. Ir e en de laniyan’ ara der ma dag nde taareb rogon e girdi’ u wan’. Reb e mich ni rib lingagil ni de laniyan’ e: Fare kanawo’ ni kan bing ni fan ko girdi’ ni ngar manged e tin riyul’ e tapigpig rok, ma bay e athap ko yafas ni manemus, ni gathi kemus ni fan ko in e girdi’ ni yibe lemnag ni rib fel’. Machane, fare Acts 10:34, 35 e be yog ni gaar: “Ka fin gu nang e chiney nriyul’ ni gubin e girdi’ ma taareb rogorad u wan’ Got. En ni ba’ madgun Got u wan’ ma be rin’ e tin nib mat’aw e ra i par nib fel’ u wan’ Got ndemtrug ko be’ u kun nam.” Re athap ney e fan ko urngin e girdi’ ndemtrug rarogorad, nge ramaen dowrad, ara nam rorad. Gathi ireray e tin nib mat’aw nth’abi fel’? Riyul’, ni gad ra nang fan nib fel’ rogon felngin Jehovah nib mat’aw ma ra k’aringdad ni ngad chugurgad ngak!

“Rib Toar e Gonop rok Got!”

15. Be mang fare gonop, ma uw rogon ni ma dag Jehovah e re n’ey?

¹⁵ Paul ni apostal e kan k’aring ni nge non ni baga’ laman, ni bod ni kan yoloy ko Roma 11:33 ni gaar: “Rib toar e gonop rok nge llowan’ rok!” Arrogon, ra gad ra fal’eg i lemnag e gonop rok Jehovah ni boor mit, ma ra gel e ta’ fan rodad ngak. Machane, uw rogon ni ngad weliyed e re felngin ney? Uw rogon ni ngan fanay e llowan’ ma ireray e n’en ni ka nog e gonop ngay, nge gelngin ni ngan nang fan ban’en, nge tamilangan’ ni fan ni nge sum e tin ni yibe athapeg. Bochan ni ma fanay Jehovah e llowan’ nib ga’ nge tamilangan’ rok nib toar, ma arfan ni rib fel’ rogon ni ma dugliy ban’en, ma lebuguy e pi n’ey u daken e maruwel nrib fel’.

16, 17. Uw rogon ma tin ni ke sunmiy Jehovah e be micheg ni ri boor e gonop rok? Mu dag rogon.

¹⁶ Mang boch e mich riy nib tamilang ko gonop rok Jehovah nib ga’? Psalm 104:24 e be gaar: “Somol, rib pire’ ban’en ni kam sunmeg! Ri gab gonop nga rogon ni mu sunmeg ni gubin! Ke sug e fayleng nga urngin e tin ni kam sunmeg.” Riyul’ ni, faanra ke yoor e n’en ni kad filed u murung’agen e tin ni ke sunmeg Jehovah, ma ra gel e ta’ fan rodad ko gonop rok. Mu lemnag, ni piin scientist e kar filed boor ban’en nbochan kar filed e tin ke sunmeg Jehovah! Bay reb e maruwel ni ka nog e engineering ngay, ni ba’ bang riy ni aram e biomimetics, ni be nameg ni ngan folwok ko tin ni bay u palpalthib.

¹⁷ Ni bod ni, sana kam fal’eg i yaliy reb e tafen e gonow nib fel’ yaan ma kam gin ngay. Riyul’ ni kan ngongliy nrogon ni yira gin ngay. Yu yil’ i gaf riy ni ra ngan guy e gowa ba war ma ra ngan taareb rogonnag ko wasey ma kab gel ngay, ma kab gel nga thilen e bulletproof vest ni kan ngongliy. Ri mang fan e re n’en ney? Mu susunnag reb e tafen e gonow ni kan ga’nag nge ni taareb rogon gaangin ko nug ni yima fanay ko barkow ko fita. Re tafen e gonow ney e rib gel ma rayog ni nge taleg reb e skoki ni ma fek e girdi’ ni be changeg ni rib pey! Arrogon, ke sunmeg Jehovah urngin e pi n’en ney “u fithik’ e gonop.”

18. Uw rogon ma kan guy e gonop rok Jehovah u nap’an ni ke fanay e girdi’ ni ngar yoloyed e Thin rok, ni fare Bible?

¹⁸ Bin nth’abi ga’ e mich ko gonop rok Jehovah e rayog ni ngan pirieg u lan e Thin rok, ni aram e Bible. Fonow ni rayog ni ngan pirieg u langin e riyul’ ni be dag ngodad e kanawo’ ko yafas nrib fel’. (Isaiah 48:17) Machane gonop rok Jehovah ni dabiyog ni ngan taareb rogonnag nga ban’en e ku rayog ni ngan guy ko rogon ni kan yoloy fare Bible. Uw rogon? U fithik’ e gonop rok, me mel’eg Jehovah e girdi’ ni nge yoloy e Thin rok. Faan mange fanay e pi engel ni ngar yoloyed e Thin rok ni kan thagthagnag ma gur ra yan i aw ni ku taareb felngin? Riyul, ni fapi engel e rayog ni ngar weliyed murung’agen Jehovah nbochan e changar rorad ni rib fel’ ma rayog ni ngar weliyed e pigpig rorad ngak. Machane riyul’ ni rayog ni ngad weliyed murung’agen e changar rok e pi engel ni yad ba flont, ni bay e llowan’, nge tin kar filed, nge gelngirad ni kab gel ko tin bay rodad ndabi chuchugur?​—Hebrews 2:6, 7.

19. Mang e n’en ni be dag ni bochan ni kan fanay e girdi’ni ngar yoloyed e Bible ma ke pi’ gelngin ni nge k’aring e girdi’ ni nge fol?

¹⁹ Bochan ni kan fanay e girdi’ ni ngar yoloyed fare Bible, ma aram bay gelngin ni nge fel’ ko girdi’. Girdi’ e kar yoloyed ni bay lem rorad ni bod gadad. Bochan ni yad e girdi’ ndawora flontgad, ma ur mada’naged boch e skeng nge mochuch ni bod e tin ni ma yib ngodad. Yu ngiyal’, ma yad ma yoloy murung’agen e n’en ni kar thamiyed nge athamgil ni kar ted. (2 Korinth 12:7-10) Ere kar yoloyed boch e thin ndariy reb e engel ni rayog ni nge weliy fan. Ni bod ni, ga ra lemnag thin David ni kan yoloy ko Psalm 51. Rogon ni yog ko thin ni bay u daken, e yoloy David e re tang ney u tomren ni ke den’en ni rib ubchiya. I puog gothon gum’irchaen nga but’, me dag ni kari kalngan’ me wenignag ku Got ni nge n’agfan e kireb rok u wan’. Verse ni 2 nge 3 e be gaar: “Mmaluknigeg nge chuw urngin e kireb rog, ma ga chuweg e denen rog ngam machalbognigeg! Kug nang e kireb rog; gubin ni gu manang e denen rog.” Mu ta’ fanam i yan ko verse 5 ni be gaar: “Gub kireb ko ngiyal’ nni gargelnigeg riy ke mada’ ko chiney; chirofen nni gargelnigeg riy e gu ba’ u fithik’ e denen ke mada’ ko chiney.” Miki yog ko verse 17 ni gaar: “Got, maligach rog ngom e kalngan’ ni kug tay; ya be’ ni ke kalngan’ nge fol rom e dab mu n’ag.” Rayog ni ngam thamiy e kireban’ rok e en ta yol fa? Ra dan uneg ngay e girdi’ ni dawori flont, me mini’ e rayog ni nge weliy e lem rok ni aram rogon?

20, 21. (a) Mang fan ni rayog ni nga nog ni yugu aram rogon ni kan fanay e girdi’ ngar yoloyed e Bible, ma ku bay gelngin Jehovah riy? (b) Mang e yira weliy ko bin migid e article?

²⁰ Bochan ke fanay Jehovah e girdi’ ni dawora flontgad, ma kari pi’ ngodad e tin ni rib t’uf rodad​—ni aram e thin ni “Got e ke thagthagnag” machane mom ni nge nang e girdi’ fan. (2 Timothy 3:16) Arrogon, pi cha’ nem ni ta yol e ke pow’iyrad fare kan ni thothup. Ma aram ma kar yoloyed nga but’ e gonop rok Jehovah, gathi birorad. Re gonop nem e ri yima ta’fan. Kab fel’ ko gonop rodad ndabi chuchugur ma arfan ni be fonownagdad Got u fithik’ e t’ufeg ni gaar: “Mu pagan’um ngak Somol u polo’ i lanin’um, ma ri dab mu tor ko tin ga be finey ni ga manang. Nguum lemnag Somol u fithik’ urngin ban’en ni ga be rin’, me dag ngom e bin nib mat’aw e kanawo’.” (Proverbs 3:5, 6) Ra ngada folgad ko re fonow nem nib fel’, ma gad ra chuchugur ku Got rodad nth’abi gonop.

²¹ Felngin Jehovah ni yi baadag ma bin th’abi fel’ e t’ufeg. Rogon ni ke dag Jehovah t’ufeg e yira weliy ko bin migid e article.

Ka Ga Manang?

• Mang boch ban’en ni ke rin’ Jehovah ma rayog ni ngad maruweliyed ni nge mang fager rodad?

• Mang boch ban’en ni be dag gelngin Jehovah ni ma sunmiy urngin ban’en nge gelngin ni ma yororiyey?

• Mang boch e kanawo’ ni ke dag Jehovah e felngin nib mat’aw riy?

• Uw rogon ni kan guy e gonop rok Jehovah ko tin ni ke sunmiy maku arrogon u lan e Bible?

[Picture on page 10]

Bod rogon e tachugol saf ni be fek ba fak e saf nge chuchugumiy nga ngorongoren, ma ma pi’ Jehovah e tin nib t’uf ko pi saf rok ni sasaf’og

[Picture on page 13]

Rayog ni ngan guy e gonop rok Jehovah u rogon ni kan yoloy fare Bible