Fel’rogon ni Fan Ngak e Piin ni Kar M’ad ko Gafgow

KE bokum miriay e duw, ni fare deer ni mang fan ni ke pag Got e gafgow be yib e ke magawonnag e lem ko tayu llowan’ nge girdi’ ni ma fil murung’agen Got. Boch i yad e kar lemnaged ni faanra Got e ba th’abi gel, ma aram e ir e be k’aring e gafgow. Fa cha’ ni yoloy fare The Clementine Homilies, ban’en nni yoloy ko bin l’agruw e chibog ni dariy e mich riy kemus ni un sananag, i yog ni Got e be gagiyegnag e fayleng nga l’agruw raba’ i pa’. Baan ni “gil’ay i pa’,” e fare moonyan’, ni aram e be k’aring e gafgow nge amith, ma ba’ ni “mat’aw i pa’,” e Jesus, ni aram e ir e be pi’ e ayuw ma be pi’ e towath nge falfalan’.

Ma boch e girdi, e der yog ni nge fel’ u wan’rad ni rayog ni nga i pag Got e gafgow nga i yib, ni kuyu gu ra gathi ir e be k’aring ere ka ra mel’eged ni ngar lemnaged ni dariy e gafgow nge amith. “Kireb e kemus ni yibe susunnag yaan u lanin’uy, ma dariy kenggin nib riyul’,” aray rogon ni yoloy Mary Baker Eddy. “Faanra denen, nge m’ar, nge yam’ e kan nang fan ni dariy rogon, ma aram e bay ra chuwgad.”​—Science and Health With Key to the Scriptures.

Ma angin ni ke yib ko pi n’en nib gel e gafgow riy ni buch u nap’an e chep, e rib ga’ u nap’an e bin som’mon e mahl ko fayleng nge mada’ ko tirodad ney e rran, boor e girdi’ e ke mudugilan’rad ni Got e ke mudugil ni dabiyog ni nge taleg e gafgow nge amith.

Machane, pi n’en ni yibe yog ni yibe dugliy ni Got e ku ma k’aring boch e gafgow, ni dabiyog ni nge taleg, ara gafgow nge amith e kemus ni ban’en ni yibe susunnag, ma de gaman ni nge pi’ e pagan’ ngak e piin ni yad be gafgow. Ma n’en nib ga’ fan, e pi michan’ nem e ba togopuluw ko fare Got ni ba mat’aw, ma ba gel gelngin ma ba ta ayuweg e girdi’ ni fa’enem ni kan dag u lan fare Bible. (Job 34:10, 12; Jeremiah 32:17; 1 John 4:8) Ere, mang e be yog e Bible u fan ni kan pag e gafgow be yib?

Uw Rogon Tabolngin e Gafgow?

Got e de sunmiy e girdi’ ni nga i gafgow. N’en ni rib thil riy e, tow’athnag e gali ni som’mon e girdi’, Adam nge Efa, ko dowef rorow nge lem rorow nib flont, me fal’eg bangi milay’ nib fel’ yaan ni nge mang taferow, me pi’ e maruwel ngorow ni ri bay fan, ma bay felngin. (Genesis 1:27, 28, 31; 2:8) Machane, falfalan’ rorow ni nga i ulul i yan e be yan u rogon ni ra ur fol gow ko gagiyeg rok Got nge mat’awun ni nga i dugliy e tin nib fel’ nge tin nib kireb.

Rib gel e kireban’ riy, ya Adam nge Efa e de yog ni ngar fol gow ku Got. Reb e kan nib tatogopuluw ni, Satan ni fare Moonyan’, e micheg ngak Efa ni nge kay “fare gek’iy ni ma tamilangnagan’uy ko tin ni fel’ nge tin nib kireb.” (Genesis 2:17) Lem ko puf rogon e pingegan’ Efa nge kay fare wom’engin e gek’iy ni kan falownag ni dabni kay, ma de n’uw nap’an miki yodorom Adam.

Bochan ni ra pagew e gagiyeg rok Got, ma aram me tharbog Got Adam nge Efa u Paradis ma aram e bay i gagiyegnagrow e m’ar, nge amith, nge pillibthir, nge yam’. Ma gafgow e ke mang bang e par ko girdi’.​—Genesis 5:29.

Ngan Yal’weg fare N’em

Rayog ni nge deeriy be’ ni gaar, ‘dabiyog ni nga yigi fek Got owchen ko denen rok Adam nge Efa?’ Danga’, ya bochan ni ra warnag e ta’fan nga gelngin, ma sana ku ra k’aring boch e togopuluw miki k’aring boch e gafgow ni ke gel boch. (Eklesiastes 8:11) Maku reb e, faanra nge fek owchen ko binem e togopuluw nib dake yugu dariy fan me ere ra yan i aw ni Got e be un i n’uf e kireb. Faanra nge yul’yul’ ngak, ma thingari pag Adam nge Efa ngar gafgow gow ni angin ni dar folgow.

Mang fan ni de thang Got ni ka ngiyal’ nem e gal ni som’mon e girdi’ u taabang nge Satan, ni faanem ni danir guy ni ir e k’aring ngar togopuluw gow? Ba’ gelngin ni nge rin’ ni aram rogon. Me Adam nge Efa e dabi sum pi fak row ni ke ab e gafgow nge yam’ ngorad. Machane, binem e ngongol ni ngan dag u rogon gelngin Got e dabi micheg ni bay mat’awun Got u daken e pi n’en ni yad ba gonop ni ke sunmiyrad. Maku reb e, faan ma nga yim’ Adam nge Efa ni dariy pi fak row, ma ra yan i aw ni de yog fare n’en nib magan’ Got ngay ni nge suguy pi fak Adam nge Efa ni yad ba flont u fayleng. (Genesis 1:28) Me “Got e de taareb rogon ngak e girdi’ . . . Demtrug e n’en ni ke micheg, ma ra rin’; ma n’en ni ke yog, e ra rin’.”​—Numbers 23:19, Today’s English Version.

Gonop rok nib flont, e dugliy Jehovah Got riy u wan’ ni nge pag e togopuluw i yan ni ba mudugil n’umngin nap’an. Piin ni yad be togopuluw e nge yib e tayim rorad nib fel’ rogon ni ngar pirieged angin e par ni yib dar rok Got. Chepin e fayleng e ke dag ni rib tamilang feni t’uf ko girdi’ e fonow rok Got nge feni tolang e gagiyeg rok Got ko tirok e girdi’ ara Satan.

Tomuren e Gafgow

Kan siyeg mat’awun Got ma ke k’aring e gafgow ni dabiyog i weliy. Ere rib puluw, ni thingari fana’ Got mat’awun u reb e kanawo’ nib thil ni nge taleg e gafgow ko girdi’ me rin’ e tin ni m’agan’ ngay ko som’mon ni fan ko fayleng. I weliy Jesus e re n’eney ni ra rin’ Got ni faani fil ngak pi gachalpen rogon ni nguur meybilgad ni gaar: “Chitamangimad ni ga bay u tharmiy, . . . ngeb gil’ilungun ngomad. Ngan rin’ e tin ni m’agan’um ngay u roy u but’, ni bod u tharmiy.”​—Matthew 6:9, 10, New World Translation.

Ngal’an ni ke pag Got e girdi’ ni ngar gayed rogon ni nguur gagiyegnaged yad e kari chugur ni nge mus. Rogon ni be lebug e yiiy nu Bible, e gagiyeg rok e ke tabab u tharmiy ko duw ni 1914 ni Jesus Kristus e Pilung riy. Dabki n’uw nap’an, ma bay kirebnag me museg urngin mit e am ko girdi’.​—Daniel 2:44.

Nap’an e machib ni i tay Jesus u fayleng ni de n’uw nap’an, me dag yaan e pi towath u nap’an ni yira fulweg e gagiyeg rok Got nga rogon ni ra yib angin ko girdi’. Fapi Gospel e dag e mich riy ni ri ma runguy Jesus e girdi’ ni yad be gafgow. I golnag e m’ar, me duruwiy e piin kar k’iygad, me faseg e yam’. Ki mada’ nga gelngin e pi n’en ni ka ma par u fayleng ni ur folgad u lungun. (Matthew 11:5; Mark 4:37-39; Luke 9:11-16) Ere ayugu mu lemnag e n’en ra rin’ Jesus ni dabki n’uw nap’an! Fare Bible e be micheg ni bochan e gagiyeg rok Kristus, me Got “e bayi n’ag urngin e lu’ u owchen e [girdi’], ma aram e dab ku unim’, ma dab ki i kireban’uy, ma dab ku un yor, ma dab ku un amith.”​—Revelation 21:4.

Fel’ Rogon ni Fan Ngak e Piin ni Yad Be Gafgow

Uw feni ra pi’ e athamgil nga lanin’dad ni gadad ra nang ni Got rodad ni, Jehovah, nib ta runguyey ma ba th’abi gel gelngin e ra ayuwegdad ni dabki n’uw nap’an ma bayi fek i yib e fel’ rogon ngak e girdi’! Nge pagan’um ngay ni fapi towath ko Gagiyeg rok Got e kari chugur ngom faan ga ra fol ko fare fonow ko Bible ni aram e: “Mu gayiy Jehovah . . . ko ngiyal’ ni rayog i pirieg. Mu pining ko ngiyal’ ni be micheg ni kab chugur.”​—Isaiah 55:6, NW.

Ra ngan ayuwegem ngam rin’ e re n’eney, ma aram e nga um bieg ma ga be tayan’um i fil e Thin rok Got nge mang reb e n’en nib ga’ fan ko yafas rom. Ngam nang Got nge en ke pi’ ke yib, ni Jesus Kristus. Ngam athamgiliy ni nga um par ni ga be fol ko pi motochiyel rok Got ma aram e ga be dag ni ga baadag ni ngam m’ing nga tan e gagiyeg rok ni ir e th’abi tolang. Kanawo’ ni aram rogon e ra fek i yib ngom e falfalan’ nib gel e chiney ni demtrug ko mang skeng e ra yib ngom. Ma boch ngaram, ma angin ni ra yib e ga ra falfalan’ ko yafas u reb e fayleng ni dariy e gafgow riy.​—John 17:3.

[Picture on page 5]

Adam nge Efa e ra siyegew e motochiyel rok Got