‘Got, Mang Fan ni Kam Pag e Re N’eney Ke Buch?’

KA bay u wan’ Ricardo ni ur moyew e ppin rok, ni Maria, u lan e singgil ni yima son riy ni ngan ni yan ni guy e togta.a Dariy bagayow ni be thog ni nge ni nge bieg rogon angin e bin kafin ni pi’ e skeng rok ko tafalay. Me bing Ricardo fare envelope, mi yow gur nge yan e changar rorow u daken fare thin ni bay ko fare skeng. Mar piriegew fare bugithin ni “cancer,” ma yow tabab ko yor ya kar ri nangew fan e re bugithin nem nge n’en ra buch.

Me yib ngan’ Ricardo ni, “Fare togta e rib gol,” “ba mudugil ni ke nang gelngin e magawon ko re n’eney ya yugu be yog ngomow ni thingar gu pagan’mow ngak Got.”

U m’on ni nge tabab e tafalay ni radiation, me guy e togta rok Maria e ba’ ni mat’aw e rifrif u ay ni yugu be mithmith rok ni gathi Maria e be mithmitheg. Muku ni fal’eg boch e skeng ngak me yan i m’ug ni ke garer e cancer ke taw ko man’ey u lolugen. U tomuren ri taareb e wik ko tafalay ni radiation, min taleg. Ya aram e ke mol Maria ni dakir nang ban’en me l’agruw e pul nga tomur riy me yim’. Me yog Ricardo ni gaar, “Ka gu falfalan’ ni ke m’ay e gafgow rok,” “machane kar gu tawrengnag nib gel ni bayi n’en mu gu won gu pirieg ni gu be athapeg ni ma nga yigi mus e birog e yafas. Boor yay, ni gu ma yor nga lang ku Got ni be lungug: ‘Mang fan ni kam pag e re n’eney ke buch?’”

Nap’an ni Ra Yib e Gafgow nib Gel Riy, Ma Boor e Deer ni Rabi M’ug

Taareb rogon ngak Ricardo, ni boor e girdi’ u gaangin yang e fayleng e kar pirieged feni riyul’ e gafgow. Boor yay, ni bayi n’en ma piin ni dariy e n’en kar bucheged e yad be gafgow. Mu lemnag feni gel e kireban’ ni be k’aring e pi cham ko talin e cham ni dariy e runguy riy ni keb ngak e girdi’. Ara mu lemnag e amith ni be thamiy e girdi’ ni yoor ni yad e piin ni ppin ni yibe kolrad u fithik’ e yargel, nge bitir ni yibe gafgownagrad, nge cham u lan e tabinaw nge ku boch e kireb ni ma rin’ e girdi’. N’umngin nap’an chepin e girdi’ ma ba dake dariy e gini mus e ngongol ni de yal’uw nge amith ni baadag e pumoon nge ppin ni nge bagayad mi i k’aring e gafgow ngak bagayad. (Eklesiastes 4:1-3) Maku ba’ e amith nib gel ko piin ni be yib e tin baaray e gafgow ngorad ni natural disaster ara kireban’ nib gel, nge m’ar ko lem, nge tini m’ar ko dowef. Ere gathi ri gad ra gin ngay ni boor e girdi’ ni ma gaar, “Mang fan ni ke pag Got e tiney e gafgow be yib?”

Ki mada’ko piin ni baaram ni ba’ e michan’ rorad nib gel, ma gafgow nge amith e ri de mom ni ngan sabliy. Ku arrogon gur ni ku ra yog ni nge balyangan’um ko mang e n’en fan ni ba Got ni ma t’ufegey, ma ba th’abi gel gelngin ma kaygi pag e gafgow ngeb ngak e girdi’. Ngan pirieg e fulweg ni ra pagan’uy ngay ma ba riyul’ ko re deer ney ni balyangan’uy ngay e rib ga’ fan ko gapas laniyan’ rodad nga tha’ rodad Got. Fare Bible e ra pi’ e re fulweg nem. Wenig ngom mu lemnag e n’en ba’ ni ra yog ni bod ni ba’ ko bin migid e article.

[Footnote]

[Pictures on page 3]

Fare togta e yug be yog ngomow ni nga ri gu pagew wan’mow ku Got