Piin ni Fel’ Yangaren ni Yad Be Gal Ramaerad ni Bod e Tamilang
1. Mang e be yog e Bible nga rogon ni ngan poy e pi Kristiano, ma uw rogon ni ba m’ag e pi thin nem ko piin ni fel’ yangaren ni Kristiano e ngiyal’ ney?
1 Yog Jesus ngak pi gachalpen ni gaar: “Gimed bod e tamilang ngak e girdi’ nu fayleng ni polo’.” (Matt. 5:14, 16) Yira poyrad ni yad bod e mach ni bay u daken e burey ni be gal ramaen u tan e yal’. Ngiyal’ ney ma boor e piin ni fel’ yangaren ni Kristiano e be “gal ramaerad ni bod e t’uf ni be gal’ lan e lang” ko ngongol nib yal’uw rorad nge machib ni yad be pasig ngay.—Fil. 2:15; Mal. 3:18.
2. Uw rogon nrayog ni ngam machibnag e pi sensey nge yugu boch e bitir u skul?
2 U Skul: Uw rogon ni ngam wereg e machib u skul? Boch e piin ni fel’ yangaren e ke rin’ ko ngiyal’ ni ngan pi’ e report u murung’agen e drug, nge machib ko evolution, nge Holocaust. Ke wereg reb e walag ni ppin e machib u murung’agen Gil’ilungun Got me weliy ni aram e athap nib riyul’ ko urngin e girdi’ u fayleng ko ngiyal’ nthingari fl’eg reb e report u murung’agen terrorism. Ke fel’an fare sensey ko re report nem, ma aram rogon ni ke bing e kanawo’ ni nge machibnag.
3. Uw rogon ni nge gal ramaem ni bod e tamilang u skul ni bochan e ngongol rom?
3 Yugu reb e kanawo’ ni nge gal ramaem ni bod e tamilang e aram e ngongol rom, nge munmad, nge piyan’ lolugem. (1 Kor. 4:9; 1 Tim. 2:9) Faanra guy e sensey nge pi bitir u skul ni gur be’ nib thil, ma sana yad ra adag e thin nriyul’ ni bochan e ngongol rom ma aram ma rayog ni ngam weliy boch e thin ko Bible ngorad. (1 Pet. 2:12; 3:1, 2) Sana de mom ni ngam dag e ngongol ko Kristiano, machane ra flaabnagem Jehovah. (1 Pet. 3:16, 17; 4:14) Faan ga ra bieg e babyor ko Bible fa ngam tay u bang nra guy e girdi’ u nap’an e ngiyal’ ko toffan ma aram e rayog ni ngam pug e tafinay rok e girdi’.
4. Uw rogon nra fel’ rogom riy ni ngam weliy murung’agen e tin ni ke mich u wan’um u skul?
4 Ra nge gal ramaem ni bod e tamilang u skul ma ke gelnag e michan’ rom me ayuwegem ngam par nib mudugil ni ngam pigpig ku Jehovah. (Jer. 9:24) Aram mit e ayuw rom. Yog reb e walag ni ppin ni gaar, “Ban’en ni ke fel’ rogog riy ni nggu weliy u murung’agen e tin ni ke mich u wan’ug e dabi guy e pi bitir rogon ni nge diliiy lanin’ug nggu rin’ ban’en nde puluw ko machib ni bay u Bible.”
5. (a) Uw rogon ni be yoor boch e piin ni fel’ yangaren e machib ni yad be tay? (b) Mang e ga be nameg ko tirok Got ban’en?
5 Machib nib Yoor: Yugu reb e kanawo’ nrayog ni nge gal e piin ni fel’ yangaren ramaerad ni bod e tamilang e nge yoor e machib ni yad ra tay. Tomren ni ke mu’ reb e walag ko high skul, ke chur nga bang nib t’uf boch e ayuw riy ko pi tamachib ko Gil’ilungun Got. Ke un ko reb e ulung ni ba achig ni goo taareb e piilal riy. Ke yol ngak reb e fager rok ni gaar: “Kari falalan’ug ko par rog e chiney. Ri ma fl’eg lanin’ug e machib ni gu be tay! Gonap’an 20 e minit ni gu ma machignag e girdi’ u langan e mab ya yad baadag ni ngar rung’aged gubin ban’en ni gu ra weliy ngorad.” Ma aram me gaar: “Gu be athapeg ni gubin e bitir e rayog ni ngar rin’ed ntaareb rogog me par nib fel’ lanin’rad ni bod gag. Dariy ban’en ni kab fel’ ko pigpig ku Jehovah ni mus rogodad riy.”
6. Mang boch fel’ngin e piin ni fel’ yangaren ko ulung rom?
6 Kari fel’ u wan’mad e piin ni fel’ yangaren ni be gal ramaerad ni bod e tamilang u fayleng! (1 Thess. 2:20) Faan ga ra pigpig ku Jehovah u polo’ i gum’erchaem, yafos rom, lanin’um, nge gelngim, ma aram ma “ka boor e tin nrayog ngom ko biney e tamilang nra reb ma raay yay e ke mun ngay . . . ma bin ni bay yib e tamilang e bay yog e yafos riy ngom ndariy n’umngin nap’an.”—Mark 10:29, 30; 12:30.