Ngan Lemnag e Girdi’​—Min Pining e Magar Ngorad

¹ Ra ngan pining e magar ngak e girdi’ ma yira pi’ e athamgil nga lanin’rad, me k’aringrad ngar rin’ed ban’en, ma aram ma ra falfalan’rad ngay. Ke tamilang u wan’ boor e publisher ni faan yad ra pining e magar ngak e girdi’ ma ma ayuwegrad ngar ted telrad ko machib. Uw rogon nrayog ni ngad pininged e magar ngak e girdi’ ko ngiyal’ ni ngad machibnaged fare thin nib fel’ ngorad?

² Ngan Tiyan’uy Ngay: I guy Jesus Kristus e maruwel nib fel’ ni i tay fa medlip e ulung nu Asia Minor. (Rev. 2:2, 3, 13, 19; 3:8) Ku arrogon e ngiyal’ ney, faan riyul’ ni gad be lemang e girdi’ ni gad be mada’nag ko machib u mit e tabinaw ma ra k’aringdad ni ngad guyed rogon ngad pininged e magar ngorad. Ya pan nib fel’ yaan ni kan ayuweg u lan e yoror, ara reb e gallabthir ni be dag e runguy ngak e bitir rok, ara be’ ni ke siminmin me yog e thin ni ba gol e be pi’ e kanawo’ ngodad ngad pininged e magar ngorad. Ere ga ma tiyan’um ni ngam mog e thin ko ngiyal’ nem fa?

³ Mu Tay Telim Ngak: Nap’an e ngiyal’ ni ngam machibnag e girdi’, ngam fith boch e deer ngorad ngar weliyed e lem rorad. Ngam dag ni ga be tay farad ni ngam tiyan’um ko pi n’en ni yad be yog. (Rom. 12:10) Dabi siy ni ga ra rung’ag ban’en ni ngam pining e magar ngay ma ga tabab ni ngam machibnag ko ban’en ni taab lanin’mew.

⁴ Mu Gonopiy: Mang e susun ni ngad rin’ed ni faanra yog be’ ban’en nde puluw ko tin riyul’ nu Bible? Dab da togopuluwgad ko boch e thin nde puluw, ya ngad pininged e magar ko tafinay rok ma ngad dogned e thin “Ba tamilang ni kam mu fl’eg i lemnag e re n’ey.” (Kol. 4:6) Yugu aram rogon ni be guy be’ rogon ni nge togopuluw ngodad, machane baga’ nrayog ni ngad pininged e magar ngak ni ke tafinaynag. Faan gad ra non u rogon nib sumunguy ma sana ra thiliyeg e lem rok be’ ni be togopuluw ko fare thin nib fel’.​—Prov. 25:15.

⁵ Ra nge yib angin riy, ma thingar da pininged e magar u fithik’ e yul’yul’. Ra pining e sorok ku Jehovah ni faaan gad ra yog e thin ni ma ubing e girdi’ maku ra ayuweg e girdi’ ngar adaged e thin u murung’agen Gil’ilungun Got.