Ngan Maruweliy Yalen nib Fel’, Nge Yog Boor e Flaab Riy
1. Mang fan nra fel’ rogom ni ngam yaliy rogon ni ga be maruweliy tirok Got ban’en?
1 Nap’an e ngiyal’ ni kam mang reb e Kristiano, ma dabi siy ni kam athamgil ni ngam maruweliy tirok Got ban’en u gubin e wik ni ba muun ngay e fol Bible, muulung ko Kristiano, machib u mit e tabinaw, nge meybil. Bochan e kam rin’ e pi n’en nem ma ke flaabnag Jehovah e athamgil ni kam tay, ma kam par nib fel’ thilmew Jehovah. Sana chiney ma ke yan in e duw ni ka nap’an e ngiyal’ ni kan taufenagem. Ka ga be maruweliy yalen nib fel’ ni nguum athamgil ko tirok Got ban’en ni bod rogon e ngiyal’ ni kam mang reb e Kristiano?
2. Uw rogon nra fel’ rogodad riy faan gad ra bieg e Bible u gubin e rran?
2 Mu Yaliy Yalen Rom: Ba yalem ni ngam bieg e Thin Rok Got u gubin e rran fa? Ri ra yog e flaab ngodad ni ngad rin’ed! (Josh. 1:8; Ps. 1:2, 3) U yu Israel kakrom, ma ra reb e pilung e susun ni nge bieg fare Motochiyel “u gubin e rran ni ka ba fas.” Mang angin nra yib riy? Bayi par gum’erchaen nib sobut’an’ nge yog ngak ni nge par ni bay madgun Got u wan’ ni nge dabi siy ko pi motochiyel Rok. (Deut. 17:18-20) Ku aram rogon e ngiyal’ ney, ra ngad bieged e Bible u gubin e rran ma ke ayuwegdad ngad pired ni gad mmachalbog ndariy thibngidad u fithik’ e fayleng nib kireb. Maku ra ayuwegdad ngad pired ni gad ba salap ko machib u mit e tabinaw.—Fil. 2:15; 2 Tim. 3:17.
3. Mang e flaab nra yog ngodad faan gad ra un ko urngin e muulung u gubin e wik?
3 Ba yalen rok Jesus ni nge yan nga lan tafen e muulung, ni aram ba yang ni yima weliy e Thin rok Got. (Luke 4:16) Dariy e maruwar riy ni aram e n’en ni ke ayuweg nge par nib gel ko skeng ni ke yib ngak. Ra fel’ rogodad ko tirok Got ban’en ni yima wereg u nap’an e muulung ma ra fel’ rogodad ko michan’ rok yugu girdi’. (Rom. 1:12) Ra ngad muulunggad e pi walagdad u taabang ma ke ayuwegdad nguud k’adedan’dad ko pi magawon ko tin tomren e rran ney. (Heb. 10:24, 25) Aram yalen rom ni mu un ko urngin e muulung fa?
4. Uw rogon nra fel’ rogodad riy ni faan gad ra un ko machib u mit e tabinaw u gubin e wik?
4 Be weliy e thin ni i thagthagnag Got ni ke machibnag e pi apostal fare thin nib fel’ “u lan fare tempel ngu lan e tabinaw rok e girdi’ i yan.” (Acts 5:42) Yugu aram rogon ndabiyog ni ngad uned ko machib u mit e tabinaw u gubin e rran, machane rayog ni ngad fl’eged nge mang yalen rodad ngad uned ko machib u gubin e wik fa? Ra ngad rin’ed, ma dabi siy ni kad salapgad iyan ngad fanayed e Thin Rok Got, ma ra yog e falfalan’ ngodad ko pi n’en nib fel’ nra buch ngodad ko ngiyal’ ni ngad wereged e tin riyul’ nu Bible ngak yugu girdi’.
5. Mang ni baga’fan ni ngan meybil ku Jehovah u gubin e rran?
5 Kan flaabnag Daniel ni profet ya ke pigpig ku Jehovah “u fithik’ e yul’yul’.” Ba muun ngay yalen e meybil ni i tay u gubin e rran ngak Jehovah. (Dan. 6:10, 16, 20) Ere, faan gad ra tay gum’ercha’dad ngak Jehovah ngad meybilgad ngak, ma ra flaabnagdad ko kan ni thothup rok. (Luke 11:9-13) Kab fel’ riy, ra chugur Jehovah ngodad, ma ra falfalan’dad ni gad e pi tafager rok. (Ps. 25:14; Jas. 4:8) Ri aram ba towath nib fel’! Ere, nguuda maruweliyed yalen e tirok Got ban’en u gubin e rran ma ra yog e flaab rok Jehovah ngodad.