Ba Video ni Ngan Tiyan’uy Ngay
“Re video ney e ra pug e tafinay rom!”
“Ke yan i taw nga gum’ercha’eg!”
“Kari gel e emotion rog!”
1 Aram rogon e tafinay rom u tomren ni kam guy e video ni Young People Ask—How Can I Make Real Friends? In e duw faram, ma ba magawon e par rok reb e walag ni kab fel’ yangaren ni bochan e pi fager rok ni ke mel’eg. Kar pow’iyed ni nge war e michan’ rok ko tin riyul’, me par nde fel’ thilrow Jehovah. Ma aram kan pag e video ni Real Friends. Ke yoloy ni gaar: “In yay ni kug yaliy e video, ma ke yib e lu’ u owcheg. Kug pining e magar ku Jehovah ko ayuw ni ke pi’ ngog ko ngiyal’ ni ba puluw.” Fare video e ke pi’ e athamgil nga laniyan’ ni nge yal’uweg e par rok me gay mit e fager nib fel’. Me yog ni gaar: “Ba tamilang ni gimed be pi’ e ayuw ko tin ni be magawonnag e piin ni fel’ yangaren e ngiyal’ ney.” Piin ni gallabthir nge fel’ yangaren, mang ndab mu yaliyed fare video biyay ko yay ni migid ni ngam fl’eged e fol babyor ko tabinaw romed? Nga mu taleg e video u tomren ra reb e guruy, ma ga weliy e fulweg u fithik’ e yul’yul’ ko pi deer ni baaray.
2 Introduction: Mang e bin riyul’ e fager?—Prov. 18:24.
3 Pi Magawon ko Tafager: Uw rogon ni ngam n’ag e lem ndan piningem ngam un ngay? (Fil. 2:4) Mang fan ni ba t’uf ni ngam par nib m’agan’um ngay ni nge fel’ iyan pangim, ma mini’ e rayog ni nge ayuwegem ngam rin’? Mang e ra ayuwegem nge bing e kanawo’ ni nge yoor e pi tafager rom, ma u uw e ngam piriegrad?—2 Kor. 6:13.
4 Ngam Fagergow Got: Uw rogon ni ngam chugur iyan ku Jehovah, ma mang angin nra yib ngom? (Ps. 34:8) Mini’ e rayog ni nge ayuwegem ngam fagergow Got?
5 Mit e Fager ni De Yal’uw: Mini’ e piin nib kireb ndab mu chag ngak? (1 Kor. 15:33) Uw rogon e pi tafager nde yal’uw e rayog ni ngar kirebnaged be’ ko tirok Got ban’en? Mang e ga be fil ko pi thin nu Bible u murung’agen Dinah?—Gen. 34:1, 2, 7, 19.
6 Ba Magawon ko Ngiyal’ Ney: Mang wenegan ni ke yib ku Tara ni bochan e ke par nib tawreng? Uw rogon laniyan’ Tara me lemnag ni bay rogon ni nge chag ngak e piin ni fel’ yangaren ko fayleng? Mang boch e riya’ ni ke yib ngak ni bocherad? Mang fan nde guy e gallabthir rok e riya’ ni bay rok, machane uw rogon e lem rorow ma kar ayuwegew nge gel ko tirok Got ban’en? Uw rogon ni ke micheg reb e pioneer ni ppin ni riyul’ ni ir e fager rok Tara? Mang fan e susun ni nge fol e piin Kristiano ko Proverbs 13:20 nge Jeremiah 17:9? Mang e ke fil Tara?
7 Bang ni Tomur: Mang boch ban’en ni kan fil ngom ko re video ney? Uw rogon ni ngam fanay ni ngam ayuweg yugu girdi’?—Ps. 71:17