Rayog Nim Mang Reb e Tamachib!
1. Mang tow’ath e bay rok e pi tamachib ko Gil’ilungun?
1 Ban’en rib fel’ ko machib ni gad ma tay e fare n’en ni ngan fil e thin riyul’ ngak be’. Ngar da felfelan’gad u nap’an ni ke m’agan’ be’ ngay ni nge motoyil ko fare thin nib fel’ ko Gil’ilungun ma ke adag ni ngan ayuweg nge chugur ngak e En ni Bay Mat’awun ni Nge Gagiyegnag e palpalth’ib. (Jas. 4:8) Gubin e tamachib ko Gil’ilungun nthingar ra athamgilgad ngar machibnaged e piin ni keb e bilig ngorad ko tirok Got nge yog nra thilyeged pangirad nge lem rorad nge ngongol rorad.—Matt. 28:19, 20.
2. Mang e ra k’aring be’ nge dabi fil e Bible ngak be’, ma mang e ra ayuwegrad ngar pithiged e re magawon ney?
2 Mu Taga’ Ngak Jehovah: I maruwaran’ e pi tapigpig nib yul’yul’ kakrom ko rayog ni ngar rin’ed e maruwel ni kan tay chilen ngorad, fa. Taga’ ni tay Moses nge Jeremiah nge Amos nge yugu boch e girdi’ ngak Jehovah e ayuwegrad nge yog nra rin’ed fare maruwel nib ga’ fan ni kan pi’ ngorad. (Ex. 4:10-12; Jer. 1:6, 7; Amos 7:14, 15) Ki mada’ ngak apostal Paul ni athamgil ni nge dabi rus. Ni uw rogon? I tamilangnag ni “Got rodad” e ir e pi’ gelngin. (1 Thess. 2:2) Gad gubin nrayog ni ngad pagedan’dad ngak Jehovah nra ayuwegdad, me pi’ e gonop ngodad nge gelngidad ni ngad filed e Bible ngak e girdi’ mar mon’oggad i yan.—Isa. 41:10; 1 Kor. 1:26, 27; 1 Pet. 4:11.
3, 4. Mang boch ban’en ni kan yarmiy nra ayuwegdad u rogon ni ngad filed e Thin Rok Got ngak e girdi’?
3 Mu Fol ko N’en ni Kam Fil: Jehovah ni fare Sensey nth’abi Fel’ u fithik’ gubin e sensey, e ma skulnagdad ni ngad manged e sensey nib salap u daken e thin rok ni ma pi’ ngodad u gubin e rran. (Isa. 54:13; 2 Tim. 3:16, 17) Ere mu pag ni ngan skulnigem ni aram e ngam yoornag e tamilangan’ rom ko thin nu Bible mag mon’ognag e salap rom u rogon i fil e thin riyul’ u Bible ngak e girdi’. Aray fan ni yima tay fare Theocratic Ministry School nge Service Meeting. Machane gubin e muulung ni yima tay e gad ma fil riy rogon ni ngad filed e Thin Rok Got ngak e girdi’.
4 Mu fil rogon ni nge mom ngom i fil ban’en ku be’ ni ki mada’ ko thin rok Got nib toar fan. Be yog fare babyor ni Ministry School ko page 227 ni gaar: “Thingar mu nang fan e n’en ni ngam weliy mfini yog nim fil ngak be’.” Ra ud pied e fulweg u nap’an e muulung ma ra ayuwegdad ni nge mit boch ban’en ngodad nrayog ni ngad fanayed u ba ngiyal’ u nap’an e machib. Ere faanra mu fl’eg rogom, ma ra gel e pagan’ rom u rogon ni ngam fil e thin rok Got ngak be’.
5. Ku mang boch ban’en nrayog ni nge ayuwegdad ngad mon’oggad i yan ko machib?
5 Dariy e maruwar riy nnap’an ni be machib e Kristiano u taabang ma ra bagayad ma be fil ban’en rok bagayad. (Luke 10:1) Faanra rayog, mab fel’ ni ngam un ngak boch e tamachib ni kar salapgad ko machib, nib muun ngay e piin ni ma machib u polo’ e tayim nge piin piilal nge piin yad ma lekag e ulung ko fare maruwel ni ngan fil e Bible ko girdi’. Mu tiyan’um nga rogon ni yad ma fanay e fanathin nib mom nge boch ban’en u lan e pi babyor rodad ni ngar weliyed fan e thin riyul’ nu Bible. Mu fith ngorad rogon rayog ni ngam mon’og i yan ngam mang reb e tamachib nib salap. (Prov. 1:5; 27:17) Mu fol u gubin e pi n’ey ni yibe fil ngom ni yib rok Got.—2 Kor. 3:5.
6. Mang e ba t’uf rok be’ mfini mang reb e tamachib ko Thin Rok Got?
6 Mu taga’ ngak Jehovah me fel’ rogom ko pi n’en ni be skulnagem riy. Mu um yibilay e pi n’ey ni gubin ngiyal’. (Ps. 25:4, 5) Ya rayog ni ngam ayuweg be’ ngki mang reb e tamachib ko Thin rok Got ni bod gur!
[Deer ni Ngan Pi’ e Fulweg Riy]