Ngaum Lemnag e Tin Kab Beech e Walag ni Pumoon nge Ppin
1. Mang e ba t’uf ni ngad rin’ed mfini yog nda ‘ngongliyed e ngongol nib fel’’ ngak pi walagadad?
1 Gadad e pi tapigpig rok Jehovah ni kad ognaged e yafos rodad ngak e ba milfan ngodad ni ngad “ngongliyed e ngongol nib fel’ ngak urngin e girdi’, machane nge ga’ fadad ngak e piin ni kad manged girdien e tabinaw rok Got.” (Gal. 6:10) Thingar da nanged rarogon pi walagdad mfini yog ni ngad rin’ed e re n’ey. Yugu aram rogon ni boor e maruwel nib milfan ngodad u gubin e rran ni kub muun e tin ni be magafan’dad ngay, mab t’uf ni ngad t’ufeg gubin i walagdad ngki un e piin ni ka yad ba beech ngay ya nge dab ra lemnaged ni dariy farad.—2 Kor. 6:11.
2. Mang fan ni ngaud lemnaged e piin ni ka yad ba beech nge magawonnag ni ma yib ngorad?
2 Susun ni ngaud lemniged e piin ni kab beech nge magawon ni ma yib ngorad. Sana boch i yad e be par u ba tabinaw ni ke ruw raba’ e girdi’ riy, fa be m’oningnagrad ma be gafownagrad girdien e tabinaw rorad. Piin ni ur med ni yad e fager rorad e kar chalgad yad be togopuluw ngorad. Pi n’ey e rayog ni nge mulegan’rad ara k’aring e kireban’ ngorad. Faanra kad nanged e magawon rorad, ma ngad pied e athamgil nga lanin’rad ngar nanged ni yad ba t’uf rodad ma rayog ni ngad ayuweged yad.
3. Tomren ni kad lemnaged fapi thin rok Jesus u Mark 10:29, 30, ma mang boch e deer ni ngad fithed gadad riy?
3 I weliy Jesus murung’agen e piin ni yad be un i fek e mat’ rok ni gaar: “En nra pag e tabinaw rok, ara pi walagen ni pumoon, ara pi walagen ni ppin, ara chitiningin, ara chitamangin, ara pi fak, ara yungi binaw ntafen ni bochag nge bochan e Thin nib Fel’, e ka boor e tin nrayog ngak ko biney e tamilang nra reb ma raay yay e ke mun ngay ni naun, nge pi walagen ni pumoon, nge pi walagen ni ppin, nge pi chitiningin, nge pi fak, nge yungi binaw ntafen.” (Mark 10:29, 30) Ere nge be’ me fith ni nge gaar: Gu ma lemnag gubin e walag u lan e ulung nib muun e piin ni ka yad ba beech ngay nge yog nra nanged ni ku bay boch i walagrad ni pumoon nge ppin, nge chitiningirad nge chitamangirad, nge pi fakrad ni pumoon nge ppin u lan e ulung, fa? Gu ma piningrad nga tabinaw rog ni bod ni gu ma rin’ ngak e girdi’ rog ni gamad nga tabinaw, fa? Ra ke t’uf e ayuw rorad u ban’en ma gu ma ayuwegrad u rogon nrayog rog, fa?
4. Uw rogon ni ngad folwokgad rok Got nge Kristus u rogon ni ngad t’ufeg pi walagdad?
4 Gad manang nde mom ni ngan rin’ gubin e pi n’ey. Machane, thingar dab da paged nge yan i aw ni gadad e yibe rin’ e pi n’ey ngodad. Maku dab da sonnaged be’ ni nge rin’ e re n’ey ya susun e gadad e som’on ni ngad folwokgad rok Got nge Kristus ngad t’ufeged pi walagdad. (1 John 4:19) Ere ngad athamgilgad ngad “golgad ngak e girdi’” ngad fanayed e tayim rodad, gelngidad nge tin bay rodad ban’en ni fan ngorad, ya aram rogon me yib e felfelan’ nib gel ngodad.—Luke 6:38; Acts 20:35.