Pi Kristiano E Ma Bing E Tabinaw Rorad Ngak E Milekag U Fithik’ E Fayleng Ni Byoor Raba
“Ere gadad e piin ni girdien Kristus e thingarda binged e tabinaw rodad ngak e pi girdi’ nem, ni aram e kad uned ko maruwel ni yad be ngongliy ni fan ko tin riyul’.”—3 JOHN 8.
1. Mang taw’ath ni rib fel’ ni pi’ e An Tasunumiy ngak e girdi’?
“GIRDI’ e dariy ban’en u tan e yal’ nib fel’ boch ni yima falfalan’ ngay ni bod e abich nge garbod ni yib ko angin e maruwel rorad nib gel u nap’an e yafas rorad ni pi’ e bin riyul’ e Got ngorad u tan e yal’.” (Eklesiastes 8:15) Cha’ ni yoloy e pi thin nem kakrom e be’ nu Hebrew ma be weliy ni gathi ke mus ni ba adag Jehovah Got ni nge par e tin ni ke sunumiy nib falfalan’ ya ku ma ayuwegrad ni nge yog e re n’em ngorad. Kakrom iyib ngaray ma girdi’ u gubin yang e yad ba adag ni ngar pared nib falfalan’ ko fafel ni yad ma ta’.
2. (a) Uw rogon ni ke rin’ e girdi’ nib pag rogon e n’en ke m’agan’ Jehovah ngay ni fan ngorad? (b) Mang wenegan ni ke yib riy?
2 Ngiyal’ ney ma goo fafel e yibe lemnag ma ma lek e girdi’ e tin nrayog e falfalan’ riy ngorad. Kan yiiynag u lan e Bible ni bayi par e girdi’ ni “ke mus ni yad be lemnagrad, . . . ma ba t’uf e fafel rorad me tomur Got u wan’rad.” (2 Timothy 3:1-4) Ma gathi aram rogon ni ke m’agan’ Jehovah Got ngay. Faanra kari mus ni yibe lek e fafel fa goo yibe nameg e n’en nra yibnag e falfalan’ ma aram e dariy e bin riyul’ e falfalan’ ma ra aw ni ‘mm’ay fan e par ma bod ni yibe l’ol’og e nifeng ni ngan kol.” (Eklesiastes 1:14; 2:11) Ma wenegan ni ke yib riy e ke yoor e girdi’ ni ke kireban’rad ya yad ma par ni goo yad ma boor e girdi’ e ke chachalbarad ma aram me sum boor e magawon riy. (Proverbs 18:1) Dakuriy e pagan’ ko girdi’ me yoor raba’ e girdi’ nib thilthil e nam rorad nge raen dowrad nge tolngirad nge rogon e par rorad.
3. Uw rogon nrayog e bin riyul’ e falfalan’ ngodad?
3 Faan go manga ke folwok e girdi’ rok Jehovah ma kari thil rarogon e fayleng—ya ran gol ngak e girdi’ min ayuwegrad min bing e tabinaw ngorad! I tamilangnag ni rogon ni nge yog e bin riyul’ e falfalan’ e gathi ngan lek e tin ni yiba adag. Ya ereray e n’en nra yibnag e falfalan’: “Ba gel e falfalan’ ni ma yib ko pi’ ban’en ngak be’ ko bin ni be’ e nge pi’ ban’en ngom.” (Acts 20:35) Ni nge yog e bin riyul’ e falfalan’ ngodad ma thingarda gelgad ko pi n’en ni ma ruw rabanagey nge pi n’en ni ma yororiydad. Ma thingarda ayuweged e piin ni gad be maruwel u taabang ko pigpig ku Jehovah. Baga’ fan ni ngad folgad ko pi thin ney ni gaar: “Ere gadad e piin ni girdien Kristus e thingarda binged e tabinaw rodad ngak e pi girdi’ nem, ni aram e kad uned ko maruwel ni yad be ngongliy ni fan ko tin riyul’.” (3 John 8) Gad ra bing e tabinaw rodad ngak e piin ni bay rogon ngorad ma ra yib angin ngodad u l’agruw e kanawo’—ya ra yib angin ngak e piin ni ur pied e ayuw nge ngak e piin ni kan ayuwegrad. Ere mini’ e piin ni bay rogorad ni susun ni ngad binged e tabinaw rodad ngorad?
“Ngan Ayuweg e Bitir Ndariy e Gallabthir Rorad nge Piin Ppin ni Ke Yim’ Figirngirad”
4. Uw rogon ni ke thil rogon e tabinaw ni mus ko girdi’ rok Jehovah?
4 Ke buch uw e tabinaw ni kab mudugil nge mabgol nib falfalan’ ko ngiyal’ ney. Ma ke yoor e mabgol ni be dar nge piin ni ppin ni bay e bitir rorad ma dariy figirngiyrad u ga’ngin e fayleng me ere ke thil rogon e tabinaw. Ma boor e girdi’ ni kar uned ko Pi Mich Rok Jehovah ko ngiyal’ ney e ke dar e tabinaw rorad. Sana kar dargad ko ani mabgol rorad fa yad ma par ko tabinaw ni ke mus ni taareb e llabthir riy. Miki yiiynag Jesus ni boor e tabinaw e ra ruw raba ni bochan e thin riyul’.—Matthew 10:34-37; Luke 12:51-53.
5. Mang e yog Jesus ni ma pi’ e athamgil nga laniyan’ e piin ni ma par u lan e tabinaw ni kan dar?
5 Ri gad ba falfalan’ ni ngad guyed e piin ni ka fin ra uned ko machib mar pared nib mudugil lanin’rad ko thin riyul’, ma gad ma pi’ e athamgil nga lanin’rad ko pi thin rok Jesus ney ni gaar: “Baara’ ban’en ni nggog ngomed: en nra pag e tabinaw rok, ara pi walagen ni pumoon, ara pi walagen ni ppin, ara chitiningin, ara chitamangin, ara pi fak, ara yungi binaw ntafen ni bochag nge bochan e thin nib fel’ e ka boor e tin nrayog ngak ko biney e tamilang nra reb ma raay yay e ke mun ngay ni naun, nge pi walagen ni pumoon, nge pi walagen ni ppin, nge pi chitiningin, nge pi fak, nge yungi binaw ntafen, ma ku er rogon e togopluw ni bay i tay e girdi’ ngak; ma bin ni bay yib e tamilang e bay yog e yafos riy ngak ndariy n’umngin nap’an.”—Mark 10:29, 30.
6. Uw rogon nrayog ni ngad manged e ‘pi walag ni pumoon nge pi walag ni ppin nge pi chitiningin nge pi fak’ ngak e “bitir ni dariy e gallabthir rorad nge piin ppin ni ke yim’ figirngirad” ni bay u fithik’dad?
6 Mini’ e piin ni ‘pi walagen ni pumoon nge pi walagen ni ppin nge pi chitiningin nge pi fak’? Ya gathi ke mus ni ngam guy boor e girdi’ u lan e Kingdom Hall, ni yu raay nge boch ma yad be piningrad pi walagen ni pumoon nge pi walagen ni ppin ma aram ma ra lemnag be’ ni pi girdi’ ney e ri yad pi walagen ni pumoon nge pi walagen ni ppin nge pi fak. Mu lemnag e re n’ey: James ni gachalpen Jesus e yog ni ra nge felan’ Jehovah ko liyor rodad ma thingarda ‘ayuweged e bitir ndariy e gallabthir rorad nge piin ni ppin ni ke yim’ figirngirad ma yad be gafgow, ma nga un ayuwegey nge dabi kirebnigey e kireb nu fayleng.’ (James 1:27) Ere thingari dabda paged e lem ko fayleng ni tolangan’ ni bochan e fel’ rogon nge tolangan’ ko yu thal e girdi’ nge talegdad ndabda runguyed e “bitir ni ndariy e gallabthir rorad nge piin ni ppin ni ke yim’ figirngiyrad.” Ya thingarda rin’ed ban’en ngan ayuwegrad ngan m’ag fager ngorad ma ngan bing e tabinaw ngorad.
7. (a) Ri uw rogon ni ran bing e tabinaw ngak e “bitir ni dariy e gallabthir rorad nge piin ppin ni ke yim’ figirngirad”? (b) Ku mini’ e rayog ni nge bing e tabinaw rok ngak e girdi’?
7 Rogon ni ngan ayuweg e “bitir ndariy e gallabthir rorad nge piin ppin ni ke yim’ figirngiyrad” e gathi ke mus ni ngan ayuwegrad ko chugum fa tin dariy rorad. Ya gathi gubin e tabinaw ni goo taareb e gallabthir riy e yad ba magawon ko salpiy ku arrogon e pi tabinaw ni ke ruw raba ni bochan e teliw. Ya pi n’en nib baga’ fan e ngan chag u taabang, min par ni bod ba tabinaw, min chag ko piin nib thilthil yangarad, ma ngan ayuwegey ko tirok Got ban’en. Ere mus ko “bitir ni dariy e gallabthir rorad nge piin ppin ni ke yim’ figirngiyrad” e ku rayog ni ngar binged e tabinaw rorad ngak e pi Kristiano ya n’en nib baga’ fan riy e gathi ngan fl’eg ban’en ni be dag e fel’ rogon ya n’en ni ka baga’ fan e rogon e t’ufeg nge taareban’uy ni nge m’ug riy!—Mu taarebnag ko 1 Kings 17:8-16.
Bay e Girdi’ nu Bang u Fithik’dad?
8. Uw rogon ni ke thil boch e ulung ko Pi Mich Rok Jehovah?
8 Ngiyal’ ney ma boor e girdi’ e be chuw ko binaw rorad ngar pared u yugu bang. Fare babyor ni World Press Review e begaar: “Ke pag 100 milyon e girdi’ u gangin e fayleng ni be par u boch e nam ni gathi ir e nam rorad ma 23 milyon e girdi’ e thingara chuwgad ko tabinaw rorad.” Me ere boor e ulung ko girdi’ rok Jehovah kafaram e goo yad girdien taareb e nam ma ke chiney ma ke un e girdi’ nu yu yang u fayleng nib thilthil ngay. Sana aram rogon ko binaw rom. Ere susun uw rogon u wan’dad e “wasol” ara “ngabchey” ni yad ba thil ngodad ko thin rorad nge yalen rorad nge rogon e par rorad?
9. Mang lem ni rayog ni nge n’igin ngad awgad ko wup ma uw rogon u wan’dad e “wasol” nge “ngabchey” ko ulung ko Kristiano?
9 Thingar dabda lemnaged ni ba sorodad ngak boch e girdi’ nu bang ya kad nanged fare thin riyul’; ma susun dabda lemnaged ni pi girdi’ ney nu bang e dariy rogorad ni ngar fanayed e Kingdom Hall fa yugu boch ban’en. Yog apostal Paul ko pi Kristiano ni Jew u nap’an e bin som’on e chibog ni dariy be’ nib sorok; ma kari mus ni bochan e taw’ath rok Got nge bochan e runguy rok ngak e girdi’, ma aram e rayog ni ngan thap ngak. (Roma 3:9-12, 23, 24) Susun ni gad ra falfalan’ ya bochan e runguy rok Got ma boor e girdi’ e be rung’ag fare thin nib fel’ e chiney. (1 Timothy 2:4) Uw rogon ni ngad daged ngorad ni rriyul’ ni yad ba t’uf rodad?
10. Uw rogon nrayog ni ngad daged ni ke m’agan’dad ngay ni ngad binged e tabinaw rodad ngak e “girdi’ nu bang” ni be par rodad?
10 Ngad folwokgad ko n’en ni yog Paul ni gaar: “Um pired nra bigimed ma ba t’uf rok bigimed, ni bod ni be par Kristus ni gimed ba t’uf rok, ni fan e nga nog e sorok ngak Got.” (Roma 15:7) Ngad lemnaged e girdi’ nu bang ni yad ba gafgow me ere susun ngad golgad ngorad ma ngad ayuweged yad nrogon nrayog rodad. Susun ni ngad pininged e magar ngorad ma gad par u taabang ma ngad ngongolgad ngorad ni bod rogon e “ngongol rodad ngak e girdi’ rodad” ma “ngar t’ufgad rodad ni bod fadad t’uf rodad.” (Levitikus 19:34) Sana gathi rib mom ni ngan yodorom machane rayog rodad nfaanra gad ra fol ko pi thin ni baaray ni gaar: “Dab mu folgad ko ngongol ni yibe rin’ u roy u fayleng, machane mpied gimed ngak Got nge piliyegmed, ni aram e kari piliyeg lanin’med ni polo’. Ma aram e rayog ni ngam nanged e tin nib m’agan’ Got ngay—ni tin nib fel’, nib fel’ u wan’ Got ma rib yal’uw.”—Roma 12:2.
Ngan Gol Ngak e Piin ni Yad Ba Thothup
11, 12. Mang e kan tay chilen ko boch e tapigpig rok Jehovah u (a) Israel kakrom (b) nge nap’an e bin som’on e chibog?
11 Pi Kristiano nib ilal ma ba gel e maruwel ni yad be tay ko tirok Got ban’en e ri bay rogorad ni ngad lemnaged yad ma ngad binged e tabinaw rodad ngorad. U Israel kakrom e i tay Jehovah chilen boch ban’en ni ngan ayuweg e pi prist nge yu Levi riy. (Numbers 18:25-29) U nap’an e bin som’on e chibog ma kan ta’ chilen ko pi Kristiano ni ngar ayuweged e piin ni be pigpig ni fan ngorad. Fare thin ni bay ko 3 John 5-8 e ma tamilangnag rogon fene fel’ thilrad e tin som’on e Kristiano ma ra bagayad ma ba t’uf rok bagayad.
12 Kari pining apostal John e magar ku Gayus ya ke gol me bing e tabinaw rok ngak e pi walag ni ma lekag e ulung mar bad ngaram. Pi walag ney nib muun Demetrius ngay e yad e ur feked iyan e thin ni ke yoloy John mar wereged ma goo de nang Gayus owcherad faram. Machane ke bing e tabinaw rok ngorad ya “ra milekaggad ni yad be maruweliy e maruwel u daken fithingan Got.” Ma begaar John: “Ere thingarda binged e tabinaw rodad ngak e pi girdi’ nem, ni aram e kad uned ko maruwel ni yad be ngongliy ni fan ko tin riyul’.”—3 John 1, 7, 8.
13. Mini’ ko ngiyal’ ney e bay rogorad ni ngan ‘bing e tabinaw ngorad’?
13 U lan e ulung rok Jehovah ko ngiyal’ ney ma bay boor e girdi’ ni yad be athamgil nib elmirin ni fan ko pi walag u gangin e fayleng. Yad e piin ni ma lekag e ulung ma boor e tayim nge athamgil ni yad ma tay u gubin e wik ni ngar ubunged e pi ulung; maku bay e pi missionary, ni kar chuwgad ko tabinaw rorad nge pi fager rorad ni fan ni ngar wereged e machib u yugu boch e binaw; ma bay e piin ni be maruwel ko pi naun u Bethel nge pi ofis ni branch ni kar ognaged yad ni ngar ayuweged e machib u polo’ e fayleng; ma bay e piin ni yad e pioneer ma boor e tayim nge athamgil ni yad ma tay ko machib. Yad gubin e ba gel e maruwel ni yad ma tay ma gathi fan ni ngan nog e sorok ngorad fa nge fel’ rogorad riy, ya yad ma rin’ ni bochan ni ba t’uf rorad e pi walag ni Kristiano ma ba t’uf Jehovah rorad. Bay rogon ni ngad folwokgad rorad ya kar ognaged yad ko maruwel rodad ma bay rogorad ni ngad ‘binged e tabinaw rodad ngorad.’
14. (a) Uw rogon ni kad manged Kristiano nib fel’ u nap’an ni gad ma bing e tabinaw rodad ngak e piin nib yul’yul’? (b) Mang fan ni yog Jesus ni i mel’eg Maria e “bin nib fel’ ban’en”?
14 Yog apostal John ni nap’an ni gad ma “bing e tabinaw rodad ngak e pi girdi’ nem” ma aram e “kad uned ko maruwel ni yad be ngongliy ni fan ko tin riyul’.” Ma wenegan riy e kad manged pi Kristiano nib fel’. Aram rogon ya pi n’en ni ma maruweliy e Kristiano e ba muun ngay ni ngan rin’ e tin nib fel’ ngak e pi walag. (Proverbs 3:27, 28; 1 John 3:18) Ku bay boch e flaab ni ma yib riy. Nap’an ni yib Jesus nga tafen Maria nge Martha ma ba adag Martha ni nge fl’eg rogon “boor bogi ban’en” ni fan ku Jesus. Ma Maria e yugu ba reb rogon ni ke bing e tabinaw rok. Ya ke “par nga but’ u tooben e rifrif u ay Somol ngi i motoyil ko machib rok” ma ke pining Jesus e sorok ngak ya ke “mel’eg e bin nib fel’ ban’en.” (Luke 10:38-42) Ngiyal’ ni ran un ko sabethin ni balayal’ ko piin ni ke yoor e duw ni kar uned ko machib ma aram reb e n’en nib ga’ fan.—Roma 1:11, 12.
Ngiyal’ ko Madenom
15. Mang yugu boch e madenom ni ma falfalan’ e girdi’ rok Jehovah ngay?
15 Piin Kristiano e dabra uned ko madenom ni ma tay e fayleng nge boch ban’en nib l’ag ko yalen ko girdi’ machane bay yu ngiyal’ ni yad ma par u taabang ni ngar falfalan’gad. Bay biyay ni yan Jesus ko reb e madenom ko mabgol u Cana me fl’eg e bin som’on e maangang ni ngongliy u rom ma aram boch e falfalan’ ngorad. (John 2:1-11) Ku arrogon e ngiyal’ ney ma girdi’ rok Jehovah e yad ma par u taabang yu ngiyal’ mi yad tay boch e madenom ma yad falfalan’ ko boch ban’en ni yima rin’ riy nib puluw. Ma be mang e pi n’en nib puluw ni ngan rin’?
16. Mang e ma pow’iydad ngad nanged e ngongol nib puluw ko ngiyal’ ni ran madenomnag ban’en?
16 Gad ma fil u lan e Bible e ngongol nib puluw ko Kristiano ma gad ma folwok riy u gubin ngiyal’. (Roma 13:12-14; Galatia 5:19-21; Efesus 5:3-5) Ngiyal’ ni gad ma chag u taabang ko madenom ko mabgol fa yugu boch ban’en ma gathi aram e rayog ni ngad digeyed e motochiyel ko Kristiano fa ngad rin’ed ban’en ni dabda rin’ed yugu ba ngiyal’; ma gathi thingarda folgad ko yalen ko binaw ni gad ma par riy. Ya baga’ ni pi n’em e ma sum ko machib ni googsur fa boch ban’en nib machmach ma yugu boch e ba l’ag ko ngongol nde puluw ko Kristiano.—1 Peter 4:3, 4.
17. (a) Mang boch ban’en ni ma dag ni fare m’ag pa’ u Cana e kan yarmiy ma kan gagiyegnag nib fel’ rogon? (b) Mang e ma tamilangnag ni ke felan’ Jesus ko re madenom nem?
17 John 2:1-11, e be weliy morngaagen ba madenom ni kan ngongliy nib fel’ rogon ma boor e girdi’ e un ngay. Kan “dibachnag” Jesus nge pi gachalpen; ma gathi yugura uned ngay ndan piningrad. Maku bay e piin ni “yad ma pigpig” nge reb e moon ni “ir e be gagiyegnag e re madenom ney” ma ma yog e pi n’en ni ngan rin’. Pi n’ey ni gubin e ma tamilangnag ni re madenom nem e kan yarmiy nib fel’ rogon ma kan dugliy e pi n’en ni nga un rin’ riy. Kan museg e thin u morngaagen e re n’em ko n’en ni rin’ Jesus ko re madenom nem ni ke “dag gelngin ni yog ngak u tharmiy.” Ra rin’ e re n’em ko ba madenom nib gel e wagey riy ma dan gagiyegnag nib fel’ rogon fa? Ba mudugil ni danga’.
18. Mang e susun ni ngan lemnag u nap’an ni ran tay reb e mur fa madenom?
18 Me ere uw rogon e pi madenom ni gad ma tay? Dabda paged talin ni fan ni ngan bing e tabinaw rom ko girdi’ e “ngad uned ko maruwel ni yad be ngongliy ni fan ko tin riyul’.” Ere dabi gaman ni ngan nog nga reb e madenom ni aram ban’en ni fl’eg e “Pi Mich.” Ya ran fith, Rriyul’ ni be pi’ e mich ko gad mini’ nge n’en ni ke mich u wan’dad fa? Susun ndabda lemnaged ni ngiyal’ nem e rayog ni ngad folwokgad ko pi n’en ni ma rin’ e fayleng, ma gad un ko “tin nib tagan ban’en ni ma ar’arnag e dowef ni tin nra guy e girdi’ ma yad ba adag ni nge yog ngorad, nge urngin ban’en ni bay u roy u fayleng.” (1 John 2:15, 16) Ya pi madenom ney e thingari micheg ni gad e Pi Mich Rok Jehovah ma ngad guyed rogon ni ngad n’ufed Jehovah ma gad tay fan ko ngongol rodad.—Matthew 5:16; 1 Korinth 10:31-33.
‘Mbinged e Tabinaw Romed Ngomed, Ndab Um Gun’gun’gad’
19. Mang fan ni ba t’uf ni ngad “binged e tabinaw rodad ngodad ma dabda gun’gun’gad”?
19 Be kireb iyan rarogon e fayleng ma be yoor raba’ e girdi’, ere thingarda rin’ed urngin ban’en nrayog rodad ni ngad gelnaged fare t’ufeg ni bay ko tin riyul’ e Kristiano. (Kolosse 3:14) Ere be yog Peter ngodad ni “thingarda pared ni ngari bagadad me t’uf rok bagadad.” Miki gaar: “Mbinged e tabinaw romed ngomed, ndab um gun’gun’gad.” (1 Peter 4:7-9) Ke m’agan’dad ngay ni ngad binged e tabinaw rodad ngak e pi walagdad ma gad pag fadad ma ngad golgad ngorad ma gad ayuwegrad fa? Fa gad ma gun’gun’ u nap’an ni kan nog ni ngad rin’ed ban’en? Faanra arrogon ma aram e dariy e falfalan’ riy ma sana dabni taw’athnagdad ko falfalan’ ko ngongol nib fel’ ni kan rin’.—Proverbs 3:27; Acts 20:35.
20. Mang boch e flaab ni rayog ngodad ni faanra ngad binged e tabinaw rodad ngak e girdi’ ko ngiyal’ ney ni ke yoor raba’ e fayleng?
20 Ngan maruwel u taabang ko pi Kristiano ma ngan gol ngorad ma ngan bing e tabinaw ngorad ma aram e ra fek iyib e flaab ni boor. (Matthew 10:40-42) Ke micheg Jehovah ko girdi’ ni ma yodorom ni ra “yororiyrad ko tento rok ndabi buch ban’en rorad. Gathi bay ki yib e bilig ara belel ngorad biid.” Ngan par u lan e tento rok Jehovah e be yip’ fan ni ran ayuwegem ndabi buch ban’en ngom ma ra bing e tabinaw rok ngom. (Revelation 7:15, 16; Isaiah 25:6) Arrogon, dabki n’uw nap’an nga m’on ma yira par nib falfalan’ ya ke bing Jehovah e tabinaw rok ndariy n’umngin nap’an.—Psalm 27:4; 61:3, 4.
Rayog ni Mu Weliy?
◻ Mang e dabda paged talin ni faanra gad ba adag ni ngad patgad ko fa bin riyul’ e falfalan’ nge gapas laniyan’?
◻ Mini’ e piin ni “bitir ni dariy e gallabthir rorad nge piin ni ppin ni ke yim’ figirngiyrad,” ma uw rogon ni susun ni ngad “ayuweged yad”?
◻ Susun uw rogon u wan’dad e “girdi’ nu bang” nge “piin ni ngabchey” ni bay u fithik’dad?
◻ Mini’ ko ngiyal’ ney e bay rogorad ni ngan tay farad?
◻ Susun uw rogon nra m’ug e bin riyul’ e ngongol ni ngan bing e tabinaw ngak e girdi’ ko yu ngiyal’ nib baga’ fan?
[Sasing ko page 27]
Ngiyal’ ni bay e madenom ma rayog ni ngad binged e tabinaw rodad ngak e girdi’ nu bang, nge ngak e pi bitir ni dariy e gallabthir rorad, nge ngak e piin ni be pigpig nib full-time, nge ngak yugu boch e girdi’