‘Mu Pigpig ni Gab Pasig Ngay u Lanin’um’

“Mmaruwelgad nib gel, ma dab um malmalgad. Mpigpiggad ngak Somol ni gimed ba pasig ngay u lanin’med.”​—ROM. 12:11.

1. Mang fan ni i pi’ piyu Israel e gamanman nge ku boch ban’en ni maligach kakrom?

BAADAG Jehovah ni nge pi’ e pi tapigpig rok e maligach ni bochan e ba t’uf Got rorad ma yad baadag ni ngar rin’ed e tin nib m’agan’ ngay. Kakrom e i m’agan’ Got nga boor mit e gamanman nge ku boch ban’en ni un pi’ ni maligach ngak. Pi maligach nem e i pi’ piyu Israel nrogon ni bay ko fare motochiyel nni pi’ ngak Moses ni fan ko denen rorad nge ngan og e magar. U lan e ulung ko Kristiano e der lemnag Jehovah ni ngan pi’ e maligach ni bod e tin un pi’ kakrom. Machane, i yog apostal Paul ko guruy ni 12 ko babyor ni pi’ nge yan ngak e pi Kristiano nu Roma, ni ku bay e maligach ni ngad ognaged ngak Got. Ngad guyed rogon ni ngad rin’ed e re n’ey.

Maligach nib Fas

2. (a) Gadad e Kristiano, uw rogon ni nge par e yafas rodad? (b) Mang e ba muun ko re n’ey?

² Mu beeg e Roma 12:1, 2. U tungun e babyor rok Paul e tamilangnag riy ni pi Kristiano ni kan dugliyrad ni piyu Israel nge piin gathi yad piyu Israel e rayog ni ngar mat’awgad u mit Got ni bochan e michan’ rorad ngak ma gathi bochan e tin ni kar rin’ed. (Rom. 1:16; 3:20-24) I weliy Paul ko guruy ni 12 ni piin Kristiano e thingari m’ug ni yad be pining e magar ngak Got ni aram e ngar pied yad ni maligach ngak. Rogon ma gad rin’ e re n’em e thingar da pilyeged lanin’dad ni polo’. Machane, bochan ndawor da flontgad ma ka be gagiyegnagdad e “denen nge yam’.” (Rom. 8:2) Aram fan ni, gum’ircha’dad nge lanin’dad e ‘thingari pig ni polo’ nge beech.’ (Efe. 4:23) Kemus ni Got nge gelngin e rayog ni nge ayuwegdad ngad piggad ni polo’. Kub t’uf ni ngad athamgilgad. Re n’ey e be yip’ fan nthingar da athamgilgad ndab darod u “kanawoen e kireb nu fayleng,” ni ma m’ug ko ngongol ni kireb, nge pi n’en ni ma chuweg e chalban, nge lem ni kireb.​—Efe. 2:1-3.

3. Mang fan ni gad ma un ko pi n’en ni ma rin’ e Kristiano?

³ Ki yog Paul ni ngad fanayed gelngidad ni ngad weliyed fan ban’en ya nge yog nda nanged e “tin nib m’agan’ Got ngay ni tin nib fel’, nib fel’ u wan’ Got ma rib yal’uw.” Mang fan ni gad ma beeg e Bible ni gubin e rran, ma gad fal’eg i lemnag fan, ma gad meybil, ma gad un ko muulung nge machib? Gur, bochan e ke yog e piilal ko ulung ni ngan rin’? Gadad ba felfelan’ ko pi n’en ni be puguran e piilal ngodad. Machane gad ma rin’ e pi n’ey ni bochan e be pow’iydad gelngin Got ni nge t’uf Got rodad. Kub mich u wan’dad ni ireray e n’en nib m’agan’ Got ngay ni ngad rin’ed. (Zek. 4:6; Efe. 5:10) Faan gad ra ngongol nrogon e tin riyul’ e Kristiano ma gad ra felfelan’ ni bochan e rayog ni ngad pared ni gad ba fel’ u wan’ Got.

Ba Thilthil e Tow’ath Rodad

4, 5. Uw rogon ni nge maruwel e piin piilal ko tow’ath ni kan pi’ ngorad?

⁴ Mu beeg e Roma 12:6-8, 11. Ke yog Paul ni gad gubin ni bay e “salap rodad nib thilthil nrogon ni pi’ Got ngodad nib tow’ath.” Boch e pi tow’ath nem ni yog Paul e ba muun ngay ni ngan pi’ e athamgil nga laniyan’ e girdi’, me ga’ lunguy u puluwon girdi’. Gali tow’ath ney e kan pi’ ngak e piin piilal ni Kristiano ni ngar maruwelgad ngay, ya kan tay chilen ngorad ni ngar ‘maruwelgad nib gel.’

⁵ Ki yog Paul ni piin piilal e ngar maruwelgad nib gel ni ngar machibnaged mi yad fil ban’en ngak e girdi’ mi yad “pigpig.” N’en ni be weliy Paul u roy e ba sor fan ko “pigpig” u lan e ulung ara fare ‘dowef.’ (Rom. 12:4, 5) Re pigpig nem e taareb rogon ko bin ke weliy e pi apostal murung’agen ko Acts 6:4, ni gaar: “Ma gamad par nggu yun’uyed e meybil nge maruwel ko machib.” Mang e ba muun ko pigpig ni aray rogon? Piin piilal e yad ma maruwel ko tow’ath ni kan pi’ ngorad ni ngar pied e athamgil nga laniyan’ e girdi’ u lan e ulung. Yad ra maruwel nib gel ni ngar pow’iyed mi yad fonownag e ulung u daken e thin rok Got ni kar fal’eged i fil, ma aram e yad be dag ni yad be pigpig. Piin piilal e thingar ra maruwelgad ko tow’ath ni kan pi’ ngorad nib fel’ rogon mar ayuweged e ulung rok Got “u fithik’ e felfelan’.”​—Rom. 12:7, 8; 1 Pet. 5:1-3.

6. Uw rogon ni ngad folgad ko fare fonow u Roma 12:11 ni bay u tabolngin e re thin ney?

⁶ Ki yog Paul ni gaar: “Mmaruwelgad nib gel, ma dab um malmalgad. Mpigpiggad ngak Somol ni gimed ba pasig ngay u lanin’med.” Faanra kad thamiyed ni kad malmalgad ko pigpig ni gad be tay ma dabisiy ni ke t’uf ni ngad tedan’dad boch ko fol Bible ma gad yibilay gelngin Jehovah ni nge ayuwegdad ni ngkud pasiggad bayay. (Luke 11:9, 13; Rev. 2:4; 3:14, 15, 19) Kakrom e i ayuweg gelngin Got nib thothup e piin Kristiano ni ngar weliyed murung’agen e “pi n’en nib sorok Got ni ke ngongliy.” (Acts 2:4, 11) Re gelngin nem e ir e ku ma ayuwegdad ni ngad pigpiggad ngak Got ‘ni gadad ba pasig ngay u lanin’dad.’

Sobut’an’

7. Mang fan ni ngad pigpiggad u fithik’ e sobut’an’ ma gad nang e gin ni ngad musgad riy?

⁷ Mu beeg e Roma 12:3, 16. Tow’ath ni bay rodad e ke ‘runguydad’ Jehovah ke pi’ ngodad. Ki yog Paul ni gaar: “Gelngimad ni nggu muruwliyed ngay e Got e ke pi’ ngomad.” (2 Kor. 3:5) Ere dab ud guyed rogon ni nga nog e sorok ngodad. Ya thingar da nanged ni faanra yib angin e machib ni gad be tay, ma aram e tow’ath rodad ni ke pi’ Got. (1 Kor. 3:6, 7) Ba puluw e n’en ni yog Paul ni gaar: “Nggog ngomed ni gimed gubin ndab um tolangniged gimed u lanin’med nge pag rogon e lem nsusun e nguum tiyed.” Rayog ni ngad lemnaged ni bay fadad ma gad felfelan’ ko pigpig ni gad be tay ngak Jehovah. Machane, thingar da nanged e gin ni ngad musgad riy, ya nge dab ud fanowan’gad. Thingar ud “lemgad u fithik’ e lem nib sobut’.”

8. Uw rogon ni nge ‘dab ud lemniged ni gadad e llowan’’?

⁸ Gadad ba balyang ni faan gad ra uf ko tin kad rin’ed, ya Got e “be pi’ gelngin e woldug be ga’.” (1 Kor. 3:7) Ke yog Paul nra bagadad u lan e ulung ma “gelngin e michan’ rok” ngak Got. Ere dabi tolangan’dad, ya ngad sapgad ko tin be yog rok boch e girdi’ u lan e ulung nib m’ag nga gelngin e michan’ rorad ngak Got. Ki gaar Paul: “Nge par ni taareb rogon urngin e girdi’ u wun’med.” Ki yog u bang e babyor rok ni gaar: “Dabi suk’ ngan’med ni ngam muruweliyed ban’en ni gimed e ngam m’onod riy ni fan e nga nognimed riy ni gimed e soromed ara bochan e nge yib ufan ngomed; machane nge bigimed me sobut’nagan’, ma dabi finey bigimed ni ir e ba sorok ngak e tin ni ka bay e girdi’.” (Fil. 2:3) Ba t’uf e sobut’an’ nge athamgil ni faanra ngad nanged ni bay boch ban’en nib salap pi walagdad riy ngodad. Sobut’an’ e ra ayuwegdad ni nge ‘dab ud lemniged ni gadad e llowan’.’ Sana bay boch e maruwel u lan e ulung ni ma rin’ boch e girdi’ ni ma lemnag boch e girdi’ ni kab ga’ fan, machane bin nriyul’ riy e rra felfelan’dad ko “maruwel nib sobut’” ndabi guy e girdi’.​—1 Pet. 5:5.

Taareban’ u Lan e Ulung

9. Mang fan ni taarebrogonnag Paul e piin Kristiano ni kan dugliyrad nga ba dowef ni kan chadguy nga taabang?

⁹ Mu beeg e Roma 12:4, 5, 9, 10. I taarebrogonnag Paul e piin Kristiano ni kan dugliyrad nga ba dowef ni kan chadguy nga taabang ni yad be pigpig u tan pa’ Kristus ni ir Lolugrad. (Kol. 1:18) I puguran ngak e piin Kristiano ni kan dugliyrad nga gelngin Got, ni dowef e boor yu yang riy ma urngin e yungi n’em e ra bang ma bay e maruwel rok, ere ku arrogorad ni yugu aram rogon ni yad ba pire’, ‘machane taareb dowrad ni kan puthuy ngak Kristus.’ Ku taareb rogon e n’en ni yog Paul ngak e piin Kristiano ni kan dugliyrad u Efesus ni gaar: “Urngin yang ko re dowef nem ma ke peth nga taabang nrogon ni ke gagiyegnag, ma re dowef nem e be par nib chayem ni urngin e ulul ni kan ta’ ngay e ir e be kol. Ere faanra bayang me maruwel nrogon ni nge maruwel, ma aram mi i ilal fare dowef ma be ga’nag ir i yan u daken e t’ufeg.”​—Efe. 4:15, 16.

10. Mang e thingari nang “yugu boch e saf”?

¹⁰ Boor ban’en nrayog ni nge fil “yugu boch e saf” ko re fanathin ney ni yugu aram rogon ni gathi yad bang u downgin Kristus. (John 10:16) I yog Paul ni “ke tay [Jehovah] urngin ban’en nga tan e rifrif u ay Kristus, ma ke pi’ Jesus ngak e galesiya, ni ir e nge mang Pilung ni ga’ u urngin ban’en.” (Efe. 1:22) Ngiyal’ ney e piin ni yad ba muun nga yugu boch e saf e yad ba muun nga “urngin ban’en” ni ke tay Jehovah nga tan pa’ Fak. Ku yad ba muun ko tin nib “mil fan” ngak Kristus ni ke pag fan ngak fare “tapigpig nib yul’yul’ ma ba gonop.” (Matt. 24:45-47) Aram fan ni piin ni yad be athapeg e par u fayleng e thingar ra nanged ni Kristus Lolugrad ma thingar ra folgad rok fare tapigpig nib yul’yul’ ma ba gonop nge fare Ulung ni Ma Pow’iyey ni ir owcherad nge piin piilal ni kan dugliyrad ni ngar ayuweged e ulung. (Heb. 13:7, 17) Re n’ey e rayog ni nge taarebnag e Kristiano.

11. (a) Mang e def ko taareban’ ni bay rodad? (b) Mang e ki fonownigey Paul riy?

¹¹ T’ufeg e ir e ma “chugumiy urngin ban’en nga taabang” ma aram e def ko taareban’. (Kol. 3:14) Ki tamilangnag Paul e re n’ey ko guruy ni 12 ko Roma. I yog ni t’ufeg rodad e thingari “yan i aw nib riyul’” ma thingari bagadad me “t’uf” bagadad rok nrogon e “walag.” Ireray e n’en ni ma sum e tayfan riy. Ki gaar apostal Paul: “Nge pasigan’med ngay ni nge bigimed mi i ta’ fan bigimed.” Machane, t’ufeg ni aray rogon e der ma upunguy e kireb ni bochan e kan runguy be’, ya thingari par e ulung rodad nib beech. Nap’an ni be fonownigey Paul u murung’agen e t’ufeg miki yog ni gaar: “Mu fanenikayed e tin nib kireb, mi gimed chichiiy pa’med ko tin nib fel’.”

Kanawoen e Gol

12. Mang e gad ra fil rok e pi Kristiano nu Macedonia kakrom u rogon ni kar golgad ngak pi walagrad?

¹² Mu beeg e Roma 12:13. T’ufeg rodad ngak pi walagdad e ra k’aringdad ni ngad ‘pied boch e tin ni ba’ rodad ban’en ngorad ko ngiyal’ ndabisiy ni nge yog ngorad’ nrogon nrayog rodad. Mus ni faanra de yoor ban’en rodad, ma rayog ni ngad pied e tin nrayog rodad. Nap’an ni be yoloy Paul murung’agen e pi Kristiano nu Macedonia, me yog ni gaar: “Ba gel e skeng ni kan ta’ ngorad ko gafgow ni yib ngorad; machane ri ba ga’ e felfelan’ rorad ni boor e tin ni ur pied ban’en, ni yugu aram rogorad nri yad ba gafgow. Nggog ngomed, nra pied urngin e tin nrayog rorad ni ngar pied, ya ra pied nge pag e fol; ni yad e lem rorad nra weniggad ngomad ni ngan pagrad ngar uned i ayuweg e girdi’ rok Got ni yad bay u lan yu Judea.” (2 Kor. 8:2-4) Yugu aram rogon nib gafgow e pi Kristiano nu Macedonia nem, machane yad ba gol. Kar ted nreb e tow’ath ni ngar ayuweged pi walagrad u Judea ni ke t’uf e ayuw rorad.

13. Mang e be yip’ fan fare thin ni “mu gol ngak e girdi’”?

¹³ Fare thin ni gaar, “mi gimed bing e tabinaw romed ngak e milekag [“mu gol ngak e girdi’,” NW]” e kan fek u bbugithin ni Greek ni be yip’ fan ban’en ni ngam rin’ ni gur e lem rom. The New Jerusalem Bible e kan piliyeg e re thin ney riy ni “mu guy rogon ni nguum gol ngak e girdi’.” Ga ra pining be’ ni ngam abichgow ma aram e be m’ug ni gab gol. Machane bin th’abi fel’ e ngam rin’ u fithik’ e t’ufeg. Faanra gadad e som’on ni ngad rin’ed e re n’ey, ma gad ra nang rogon ni ngad golgad u boor e kanawo’. Machane, faanra dabiyog rogodad ni ngad pininged be’ ni ngad abichgad u taabang, ma gad ra pi’ e garbod ngak ni bod e ran ara uchub, ma aram e be m’ug ni gad ba gol.

14. (a) Mang thin e keb fare bugithin ni Greek riy ni kan piliyeg ni “gol”? (b) Uw rogon ni nge m’ug ni gad be lemnag e girdi’ nu bang ni ma par u lan e binaw rodad u nap’an ni gad be machib?

¹⁴ Gol e ba muun ngay rogon ni gad ma lem. Fare bugithin ni Greek ni kan piliyeg ni “gol” e yib u l’agruw bugithin ni be yip’ fan e “t’ufeg” nge “milekag.” Uw rogon e lem rodad ngak e milekag ara girdi’ nu bang ni be par ko binaw rodad? Reb e kanawo’ ni ngad golgad ngak e girdi’ e ngad filed yugu reb e thin ya nge yog ni ngad machibnaged fare thin nib fel’ ngak e girdi’ nu bang ni be par u lan e binaw rodad. Boor i gadad e dabiyog u rogon ni nge fil yugu reb e thin. Machane, rayog ni ngar ayuweged e girdi’ nu bang u daken fare babyor ni Good News for People of All Nations. Yugu aram rogon ni kenggin e thin ko re ke babyor ney e thin ni Meriken, machane boor e thin riy nib puluw ko Bible ni kan piliyeg nga boor mit e thin. Ke yib angin e re ke babyor ney ni kam fanay u nap’an e machib?

Ngam Nang Rarogon Laniyan’ Be’

15. Uw rogon ni i ngongol Jesus nib puluw ko fare fonow u Roma 12:15?

¹⁵ Mu beeg e Roma 12:15. Fonow ni pi’ Paul u roy e be yip’ fan ni ngam nang rarogon laniyan’ be’. Ba t’uf ni ngad nanged fan laniyan’ be’ ma gad thamiy e felfelan’ ara kireban’ ni ke tay. Faanra gad ba pasig ma ra m’ug u dakendad e felfelan’ nge runguy ni gad be tay ngak pi walagdad. Nap’an ni sul fa 70a i gachalpen Jesus ko machib ni kari felfelan’rad ni bochan angin e machib ni kar ted, me suguy gelngin Got nib thothup Jesus ko “felfelan’.” (Luke 10:17-21) Ere ke un Jesus ngorad ko felfelan’. Maku reb, e un Jesus ko ‘meyor ngak e piin nra yorgad’ u nap’an ni yim’ Lazarus ni fager rok.​—John 11:32-35.

16. (a) Uw rogon ni ngad thamiyed e felfelan’ nge kireban’ ni ke tay be’? (b) Ba ga’ ni chon mini’ e ngar folgad ko re fonow ney?

¹⁶ Thingar da folwokgad u rogon ni i nang Jesus fan laniyan’ e girdi’. Nap’an ra felfelan’ reb e walag ni Kristiano, ma ngad uned ngak ko felfelan’. Ma nap’an nra kireban’ ma ngad uned ngak ko kireban’. Ba ga’ nrayog ni ngad fal’eged laniyan’ pi walagdad ni ke kireban’rad ni faan gad ra motoyil u nap’an ni yad be weliy salaprad ngodad. Ma yu ngiyal’ e faanra rriyul’ ni kad nanged fan laniyan’ be’ ni ke kireban’ ma gad ma yor. (1 Pet. 1:22) Ba ga’ nri piin piilal e ngar folgad ko fare fonow ni pi’ Paul ni ngaun nang fan laniyan’ e girdi’.

17. (a) Mang e kad weliyed ko Roma guruy ni 12? (b) Mang e gad ra fil ko bin migid e thin?

¹⁷ Fapi thin ni kad weliyed ko Roma guruy ni 12 e bay e fonow riy ni fan ngodad e Kristiano nge tha’ u thildad pi walagdad. Bin migid e thin e gad ra weliy riy e tin ka bay ko re guruy ney ni be weliy rogon ni ngad ngongolgad ngak e girdi’ nga wuru’ e ulung ni Kristiano nib muun ngay e piin ni yad ma togopuluw nge piin ni yad ma gafgownagdad.

Ngan Sul u Daken

• Uw rogon ni ngad daged nriyul’ ni ‘gad ba pasig’?

• Mang fan ni ngad pigpiggad ngak Got u fithik’ e sobut’an’?

• Mang boch e kanawo’ ni ngad daged riy ni kad nanged fan laniyan’ pi walagdad ma gad be runguyrad?

[Pictures on page 10]

Mang fan ni gad ma un ko pi n’ey ni ma rin’ e Kristiano?

[Picture on page 12]

Uw rogon ni ngad machibnaged e girdi’ nu bang ni ma par u lan e binaw rodad?

[Footnote]