Ngan Tay Fan E “Pi Pumoon Ni Yad E Taw’ath”

“Ngam tiyed fan e piin ni yad be maruwel u fithik’med . . . mi gimed t’ufegrad ni bochan e maruwel ni yad be rin’.”​—1 THESSALONIKA 5:12, 13.

1. Rogon ni be yog u Acts 20:35, ma uw rogon gelngin e pi’ ban’en ngak be’? Mu weliy boch.

“BA GEL e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.” (Acts 20:35) Ka ga manang e yan tomur ni ke riyul’ ngom e pi thin nem ni yog Jesus? Sana kam pi’ reb e taw’ath ngak be’ nib t’uf rom. Ma kari mu lemnag ko ri mang taw’ath ni ngam pi’, ya ga ba adag ni ngam pi’ ban’en ngak ni ra chaariy. Ma nap’an ni kam guy owchen facha nib t’uf rom ni kari falfalan’​—ma kam falfalan! Pi’ ban’en ngak be’ e be dag e t’ufeg, ma t’ufeg ni nga un dag e bay gelngin ni nge pi’ e falfalan’ ngodad.

2, 3. (a) Mang fan ni rayog ni ngan nog ni dariy be’ ni kab gel e falfalan’ rok ku Jehovah, ma uw rogon nrayog ni nge n’igin nge falfalan’ Jehovah ya ke pi’ e “pi pumoon ni yad e taw’ath”? (b) Mang e dubdad ni ngad rin’ed ko reb e taw’ath ni pi’ Got ngodad?

² Ere mini’ e kab gel e falfalan’ rok ku Jehovah ni ir e an ma pi’ “urngin e tow’ath nrib manigil”? (James 1:17; 1 Timothy 1:11) Gubin e taw’ath ni ma pi’ Got e ma pi’ ni bochan e t’ufeg. (1 John 4:8) Dabi siy ni aram rogon fare taw’ath ni pi’ Got u daken Kristus ngak e ulung​—ni aram e “pi pumoon ni yad e taw’ath.” (Efesus 4:8) Ma t’ufeg Got e girdi’ rok ma aram fan ni ke pi’ e piin piilal ni ngar ayuweged e yu ulung i saf rok. Yibe mel’eg e pi pumoon ney nib fel’ rogon​—ya thingara folgad ko pi motochiyel ko Bible. (1 Timothy 3:1-7; Titus 1:5-9) Yad manang ni thingara “runguyed fare ulung i saf,” ya aram e ra pining e pi saf e magar ni bochan e pi tachugol saf ni ma t’ufegrad. (Acts 20:29; Psalm 100:3) Nap’an ni guy Jehovah ni pi saf rok e be pining e magar ngak, ma aram me ri falfalan’!​—Proverbs 27:11.

³ Dabi siy ni dubdad ni ngad dariy fannaged e taw’ath ni ke pi’ Got ngodad; ma dubdad ni dabda ted fan e taw’ath ni yib rok. Ere bay l’agruw e deer ni sum: Susun uw rogon u wan’ e piin piilal e maruwel rorad u lan e ulung? Ma uw rogon nrayog ni nge dag fare ulung i saf ni yad ma tay fan e “pi pumoon ni yad e taw’ath”?

‘Gadad Be Maruwel u Taabang’

4, 5. (a) Ke taarebnag Paul fare ulung ko mang, ma mang fan nib puluw e re fanathin nem? (b) Mang e be dag fare fanathin rok Paul ko susun uw rogon u wan’dad e girdi’ ko ulung nge uw rogon e ngongol rodad ngak bagadad?

⁴ Ke tay Jehovah nib mil fan ngak e “pi pumoon ni yad e taw’ath” ni ngar ayuweged e ulung. Ma piin piilal e dabra fanayed e liw rorad u rogon nib kireb, ma yad manang ni rib mom ni nge rin’ e girdi’ nde flont e re n’em. Ere susun uw rogon ni yad ra lemnagrad u puluwon fare ulung i saf? Mu lemnag fare fanathin ni yog apostal Paul. Tomren ni ke weliy ko mang fan ni yad e “pi pumoon ni yad e taw’ath” me yoloy Paul ni gaar: “Machane ra ud weliyed e tin nib riyul’ u fithik’ e t’ufeg, ma gadad ra ilal u gubin e kanawo’ ngad boded mam’ungun Kristus, ni ir e llug. Urngin yang ko re dowef nem ma ke gagiyegnag, ma re dowef nem e be par nib chayem ni urngin e ul’ul ni kan ta’ ngay e ir e be kol. Ere faanra bayang me maruwel nrogon ni nge maruwel, ma aram mi i ilal fare dowef ma be ga’nag ir i yan u daken e t’ufeg.” (Efesus 4:15, 16) Ere ke puluwnag Paul fare ulung nge piin piilal, ko ba dowef ko girdi’. Mang fan nib m’ag e re fanathin nem?

⁵ Ba dowef ko girdi’ e bay boor yu yang machane kari mus ni taareb lolugen. Machane dariy bang ko fare dowef​—ni muscle, ara nerve, ara nguchey​—ni dariy fan. Ra bagayad e baga’ fan ma ma ayuweg nge par fare dowef nib fel’ rogon me fel’ yaan. Ku aram rogon fare ulung ni bay boor e girdi’ riy nib thil reb nga reb, machane ra bagayad​—ndemtrug ko fel’ yangaren ara piilal, fa ba gel ara meewar​—ma rayog ni nge rin’ ban’en me par fare ulung nib fel’ rogon ko tirok Got ban’en me fel’ yaan. (1 Korinth 12:14-26) Dariy be’ e susun ni nge lemnag ni dariy fan. Ma dariy be’ e susun ni nge lemnag ni kab ga’ fan ko yugu girdi’, ya gad gubin​—ni pi tachugol saf nge pi saf​—e gad bang ko fare dowef, ma kari mus ni taareb e lolugen, ni aram Kristus. Ere be tamilangnag Paul ni susun ni ra bagadad e nge t’ufeg bagadad me tay fan me ayuweg. Ma aram e ra ayuweg e piin piilal ni ngar nanged ni susun ni ngar rin’ed e maruwel rorad u lan e ulung u fithik’ e sobutan’.

6. Yugu aram rogon ni bay rogon ngak Paul ya ir reb e apostal machane uw rogon ni ke dag ni ba sobut’an’?

⁶ “Pi pumoon ney ni yad e taw’ath” e gathi yad ma guy rogon ni ngar gagiyegnaged e yafas fa michan’ ko girdi’ u lan e ulung. Bay rogon ngak Paul ya ir reb e apostal, machane ke yog ko piyu Korinth u fithik’ e sobutan’ ni gaar: “Gathi gamad be guy rogon ni nggogned ngomed e n’en ni ir e thingari mich u wun’med, ya ke mudugil u wun’med e n’en ni ke michan’med ngay. Machane gadad be maruwel u taabang ni fan ko felfelan’ romed.” (2 Korinth 1:24) De adag Paul ni nge gagiyegnag e michan’ nge par ko pi walagen. Ma de lemnag nib t’uf ni nge rin’ e re n’em ya ke pagan’ ngorad ni yad e piin pumoon nge ppin nib yul’yul’ ni yad bay ko ulung rok Jehovah ni bochan e yad ba adag ni ngar rin’ed e tin mat’aw ban’en. Ere, ke weliy u murung’agen yow Timothy ni yow ma milekag u taabang ni gowa be gaar: ‘Maruwel romow e nggu unew ngomed ngad maruwelgad u taabang ko pigpig ku Got u fithik’ e falfalan’.’ (2 Korinth 1:1) Rib sobut’an’!

7. Mang e manang e piin piilal nib sobut’an’rad u murung’agen e liw rorad u lan e ulung, ma mang fan ni ke pagan’rad ko girdi’ ko ulung ni ngar rin’ed?

⁷ Taareb rogon e maruwel ko “pi pumoon ni yad e taw’ath” ko ngiyal’ ney. Yad ma un ngodad ma ‘gadad be maruwel ni fan ko falfalan’ rodad.’ Piin piilal nib sobut’an’rad e yad manang ni dariy rogon rorad ni ngar turguyed ko uw urngin e maruwel ni susun ni nge tay e girdi’ ni fan ko pigpig ku Got. Ya yad manang ni rayog ni ngar pied e athamgil nga laniyan’ e girdi’ ni ngar mon’oggad iyan ko machib ni yad be tay, machane susun ni nge adag e girdi’ ni ngar yodoromgad. (Mu taarebnag ko 2 Korinth 9:7.) Ke mich u wan’rad ni faanra ba falfalan’ e girdi’, ma yad ra rin’ urngin ban’en nrayog rorad. Ere ri yad ba adag ni ngar ayuweged e pi walagrad ni ngar “pigpiggad ku Jehovah u fithik’ e falfalan’.”​—Psalm 100:2, New World Translation.

Ngan Ayuweg Urngin e Girdi’ Ngar Pigpiggad u Fithik’ e Falfalan’

8. Mang boch e kanawo’ ni rayog ni nge ayuweg e piin piial e pi walagrad ni ngar pigpiggad ku Jehovah u fithik’ e falfalan’?

⁸ Gimed e piin piilal, uw rogon nrayog ni ngam ayuweg e pi walagmed ni ngam pigpiggad ku Got u fithik’ e falfalan’? Rayog ni ngam pi’ e athamgil nga laniyan’ e girdi’ ko kanawo’ ni gimed be dag. (1 Peter 5:3) Ngam dag ni gab pasig ko machib ma gab falfalan’, ma aram e ra pi’ e athamgil nga laniyan’ e yug girdi’ ni ngar folwokgad rom. Ma ngam pining e magar ngak e girdi’ ko athamgil ni yad be tay. (Efesus 4:29) Faanra ran pining e magar ngak e girdi’ ma yad ra lemnag ni bay farad ma yad ba t’uf. Ma aram e ra pi’ e athamgil nga laniyan’ fare ulung i saf ni ngar pigpiggad ku Got nge mus rogorad riy. Ngan siyeg i taaarebnag be’ ngak be’. (Galatia 6:4) Ra mulan’ e girdi’ ni faanra ran taarebnagrad ngak yugu girdi’ u rogon nib kireb ma aram e dabi k’aringrad ni ngar mon’oggad iyan. Ma pi saf rok Jehovah e ba thil reb nga reb​—ba thil rarogorad nge salperad. Bod Paul ma ngam pagan’ ngak e pi walagmed. T’ufeg e ma “michan’ ko urngin ban’en” me ere susun nge mich u wan’dad ni pi walagdad e ma t’ufeg Got ma yad ba adag ni ngar falfalan’naged. (1 Korinth 13:7) Nap’an ni ngam ‘tay fan e yug girdi’’ ma ga be pi’ e athamgil nga lanin’rad ni ngar rin’ed e tin th’abi fel’ nrayog rorad. (Roma 12:10) Nge mich u wan’med ni faanra ran pi’ e athamgil nga laniyan’ fare ulung i saf ma yad ra rin’ urngin ban’en nrayog rorad ko pigpig ku Got, ma yad ra falfalan’ ngay.​—Matthew 11:28-30.

9. Susun uw rogon u wan’ e piin piilal e tin ni ka bay e piin piilal, ma aram e ra ayuwegrad ngar maruwelgad u taabang u fithik’ e falfalan’?

⁹ Faanra ga ra lemnag ni gad be ‘maruwel u taabang’ girdien fare ulung ma ra ayuwegem ni ngam pigpig u fithik’ e falfalan’ ma ngam tay fan felngin e piin ni gimed e piin piilal. Ra reb e piilal ma bay e tin nib salap riy ma tin nib cheg riy nrayog ni nge fanay nge ayuweg e ulung. (1 Peter 4:10) Sana bagayad e ba cheg ni nge skulnag e girdi’. Ma yugu reb e ba cheg i yarmiy rogon boch ban’en. Ma yugu reb e ri ba gol ma ma runguy e girdi’ me ere mom ni ngan non ngak. Dariy reb e piilal ni bay rok urngin e taw’ath mab cheg ko urngin ban’en. Ere aram e baga’ fan reb e piilal ko yugu boch ni bochan ban’en nib cheg riy​—ni sana ba cheg ko machib fa? Ri danga’! (1 Korinth 4:7) Maku dabi fel’ ni ngan awan’ ngak be’ ni bochan e n’en nib cheg riy fa nge lemnag reb e piilal ni ir e dariy fan u nap’an ni kan pining e sorok ngak yugu reb e piilal. Dab mu pag talin, ni bay boch ban’en rom nib taw’ath ni be guy Jehovah. Ma rayog ni nge ayuwegem ngam maruweliy e pi taw’ath nem ni nge yib angin ngak e pi walagmed.​—Filippi 4:13.

‘Mu Pared ni Gimed be Fol ma Gimed be Tay Tanggin’

10. Mang fan nib puluw ni ngad ted fan e “pi pumoon ni yad e taw’ath”?

¹⁰ Nap’an ni kan pi’ e taw’ath ngodad, ma ba puluw ni ngad pininged e magar riy. Kolose 3:15 e be gaar: “Um pininged e magar ngak Got u lanin’med.” Ere uw rogon e “pi pumoon ni yad e taw’ath” ni pi’ Jehovah ngodad? Dabi siy ni gad ma pining e magar ngak Jehovah. Machane uw rogon e “pi pumoon ni yad e taw’ath”? Uw rogon nrayog ni ngad daged ngorad ni gad be tay farad?

11. (a) Uw rogon nrayog ni ngad daged ni gad be tay fan e “pi pumoon ni yad e taw’ath”? (b) Mang fan fagali bugithin ni “ngan fol” ma “ngan tay fan”?

¹¹ Gad be dag ni gad ma tay fan e “pi pumoon ni yad e taw’ath” u nap’an ni gad ma fol ko fonow rorad ni bay ko Bible nge tin ni kar turguyed ni ngad rin’ed. Be weliy e Bible ngodad ni gaar: “Mu folgad ko thin rok e piin ni yad be yog e thin romed mi gimed tay farad. Ya yad be matanagiy lanin’med ndarir talgad, ni bochan e thingar rogned ngak Got rogon e maruwel rok ni ur ngongliyed. Ya faan gimed ra fol rorad ma ra ur ngongliyed e maruwel rorad nib felan’rad ngay; ya fanra dangay ma bay ur ngongliyed nib taganan’rad, ma aram e dabi fel’ rogomed riy.” (Hebrews 13:17) Mu tiyan’um ngay ni gathi ke mus ni thingarda “folgad” rok e piin ni be yog e thin rodad ya ku thingarda “ted farad.” Fare bugithin nu Greek ni “tay fan” e ma sor fan ko “ngam t’ar lanin’um ngam par u tan pa’.” R. C. H. Lenski ni ir e Bible scholar e ke weliy u murung’agen fagali bugithin ni “ngan fol” nge “ngan tay fan” ni gaar: “Ra fol be’ u nap’an ni ke fel’ u wan’ e n’en ni ka nog ngak ni nge rin’, fa kan micheg nga laniyan’ nib mat’aw ni nge rin’ ma ra fel’ rogon riy; ma ra t’ar be’ laniyan’ ni yugu demtrug ni de puluw u wan’ e n’en ni ka nog ngak.” Nap’an ni gad ma nang fan ma ke fel’ u wan’dad e n’en ni yog e piin ni ma yog e thin rodad, ma mom ni ngan fol rorad. Machane nge diin nfaanra dada nanged fan e n’en ni kar turguyed?

12. Mang fan nsusun ni ngad ted fan ara ngad t’ared lanin’dad, ni mus ni faanra dad nanged fan ban’en ni ke turguy e piin piilal?

¹² Aram e ba t’uf ni ngad ted farad, ara ngad t’ared lanin’dad u puluwdad. Mang fan? Ya ba t’uf ni nge pagan’dad ni pi pumoon ney e kan dugliyrad ma yad be lemnag e n’en nra fel’ rogodad riy. Ma goo yad manang ni ba gel e pufthin ni yira tay ngorad ni bochan e pi saf ni kan tay nib mil fan ngorad ni ngar ayuweged yad. (James 3:1) Maku dabda paged talin ni sana bay boch ban’en ni dad nanged ni aram fan ni kar turguyed ban’en ni aram rogon.​—Proverbs 18:13.

13. Mang e ra ayuwegdad ngad ted tanggin e pi n’en ni ke turguy e piin piilal?

¹³ Ma uw rogon ni gad ra tay tanggin e n’en ni ke turguy e piin piilal ni judicial decision? Sana de mom ni ngad folgad riy ni faanra kan turguy ni ngan tharbog ko ulung be’ nib t’uf rodad​—ni reb e girdi’ rodad ara tafager rodad. Ere fel’ ni ngan t’ar lanin’uy min fol ko n’en ni turguy e “pi pumoon ni yad e taw’ath.” Ya rayog ni ngar turguyed ban’en nib puluw, ma boor ban’en ni yad manang ko tin ni gad manang u murung’agen e n’en ni ke buch. Mom’aw ko pi walag ney ni ngar turguyed boch ban’en; ya yad e ‘tapufthin u puluwon Jehovah.’ (2 Kronicles 19:6, NW) Yad ma athamgil ni ngar runguyed e girdi’, ya yad manang ni “ba adag Got ni nge n’ag fan e kireb ko girdi’.” (Psalm 86:5) Machane ku thingara ayuweged e ulung nge par nib klin, ma be yog e Bible ni ngan chuweg ko ulung e piin ni de kalngan’rad ni kar rin’ed e kireb. (1 Korinth 5:11-13) Boor yay ma fa en ni ke rin’ e kireb e ba puluw u wan’ e n’en ni kan turguy. Sana rogon e gechig ni kan tay ngak aram e n’en nib t’uf ni nge thiliyeg e lem rok. Ere faanra piin nib t’uf rok e ra tay tanggin e n’en ni kan turguy, ma rayog ni ngan ayuweg e cha’ nem nge yib angin ngak fare gechig ni kan tay ngak.​—Hebrews 12:11.

“Ngari Mu Ted Farad”

14, 15. (a) Rogon ni yog ko 1 Thessalonika 5:12, 13, ma mang fan ni bay rogon ngak e piin piilal ni ngad lemnaged yad? (b) Mang fan nrayog ni ngan nog ni ‘ba gel e maruwel’ ni be tay e piin piilal u fithik’dad?

¹⁴ Ku rayog ni ngad daged ni gad ma pining e magar ko pi “pumoon ni yad e taw’ath” ni faanra gad ra lemnagrad. Ke yoloy Paul ngak fare ulung nu Thessalonika ni gaar: “Ngam tiyed fan e piin ni yad be maruwel u fithik’med, ni piin ni ke mel’egrad Somol ni ngar pow’iyed gimed mi yad fonownagmed. Ngari mu ted farad mi gimed t’ufegrad ni bochan e ba gel e maruwel ni yad be rin’.” (1 Thessalonika 5:12, 13) “Ba gel e maruwel” rorad​—gathi aram rogon e piin piilal ni ma maruwel ni fan ngodad fa? Mu lemnag gilban nib tomal ni be fek e pi walag ney.

¹⁵ Baga’ ni yad e piin pumoon ni bay e tabinaw rorad ma thingara maruwelgad ni fan ni ngar ayuweged e tabinaw rorad. (1 Timothy 5:8) Faanra bay e bitir rok, ma ba t’uf ni nge ayuwegrad. Ba t’uf ni nge ayuwegrad ko skul rorad, ma nge tay boch e tayim ni ngar fafelgad u taabang. (Eklesiastes 3:1, 4) Ma n’en th’abi ga’ fan e thingari ayuweg e tabinaw rok ko tirok Got ban’en, ma nge fil e Bible ngorad u gubin ngiyal’, ma nga ranod ko machib u taabang, ma ngar uned ko pi muulung ko Kristiano. (Deuteronomy 6:4-7; Efesus 6:4) Dabda paged talin ni ku bay boch ban’en nib mil fan ngak e piin piilal ni ngar rin’ed: thingar fl’eged rogorad ko pi welthin ni yad ra pi’ ko pi muulung, ma ngar guyed girdien e ulung, ma ngar ayuweged e ulung ko tirok Got ban’en, ma ngar pied e pufthin ko ngiyal’ nib t’uf. Ma boch i yad e ku bay e maruwel rorad ni fan ko pi muulung ni circuit assembly nge district convention, nge dimow naun ko Kingdom Hall, nge Hospital Liaison Committee. Rriyul’ ni “ba gel e maruwel” ni be tay e pi walag ney!

16. Mu weliy boch e kanawo’ nrayog ni ngad daged ni ngad ma lemnag e piin piilal.

¹⁶ Uw rogon nrayog ni ngad lemnaged yad? Reb e thin ko Proverb e be gaar: “Rib manigil e thin ni ngan nog ko ngiyal’ nib puluw!” (Proverbs 15:23, NW; 25:11) Faanra gad ra pining e magar ngorad ma gad pi’ e athamgil nga lanin’rad ma aram e gad be dag ni gathi dariy fan u wan’dad e maruwel ni yad be tay. Maku susun ni dabi pag rogon e n’en ni gad be lemnag ni susun ni ngar rin’ed ni fan ngodad. Ya susun ni dabda telgad ni ngad ninged e ayuw rorad. Yu ngiyal’ ma ‘ba amith gum’erchadad’ ma ba t’uf ni ngan pi’ e athamgil nga lanin’dad ko thin ko Bible, ara ngan pow’iydad, fa nge fonownagdad e piin ni “nge yog rorad ni ngar machibnaged” e Thin Rok Got. (Psalm 55:4; 1 Timothy 3:2) Maku dabda paged talin nib mutrug oren e tayim ni rayog ni nge pi’ e piin piilal ngodad, ya ku thingari ayuweg e tabinaw rok nge yugu boch e girdi’ u lan e ulung. Ere susun ni ngad “runguyed” e pi walag ney ni yad be maruwel nib elmirin, me ere dabda lemnaged ni ngar rin’ed boch ban’en ni fan ngodad nib pag rogon. (1 Peter 3:8) Ya ngad pininged e magar ngorad ko tayim nge ayuw ni rayog ni ngar pied ngodad.​—Filippi 4:5.

17, 18. Uw rogon ma piin leengin e piin piilal e yad ma pag farad, ma uw rogon nrayog ni ngad daged ni gad be tay fan e pi ppin ney ni yad ba yul’yul’?

¹⁷ Ma uw rogon e piin leengin e piin piilal? Gathi ku bay rogorad ni ngad lemnaged yad fa? Ya yad be pag e pi figirngiyrad ngar ayuweged e ulung. Yad ma pag farad. Yu ngiyal’ ma thingari par e piin piilal ni balayal’ ma yad be rin’ boch ban’en ni fan ko ulung ma aram e dabiyog ni ngar pared u taabang e tabinaw rorad. U lan boor e ulung ma bay e pi Kristiano ni ppin ni yad ba yul’yul’ me m’agan’rad ngay ni ngar paged farad ya ngar paged e pi figirngiyrad ngar ayuweged e pi saf rok Jehovah.​—Mu taarebnag ko 2 Korinth 12:15.

¹⁸ Uw rogon nrayog ni ngad daged ni gad ma tay fan e pi ppin ney ni Kristiano ni yad ba yul’yul’? Dabda ninged e ayuw rok e pi figirngiyrad nib pag rogon. Maku dabda paged talin ni ngad pininged e magar ngorad. Proverbs 16:24 e be gaar: “Pi thin nib manigil e bod e t’ay e ngul, ya ba athibthib, ma ma golnag e yil.” Mu lemnag reb e experience. Tomren reb e muulung ko Kristiano, ma ba wu’ i mabgol e kar ningew ku reb e piilal ni ngar weliyed u murung’agen e bitir rorow ni ba pagal ni fel’ yangaren. Ma nap’an ni be non fare piilal ko fa wu’ i mabgol, ma be son e ppin rok. Ma nap’an ni kar mu’gad ko non, ma fa en chitingin e ke yog ku fare ppin rok fare piilal ni gaar: “Gu ba adag ni nggu pining e magar ngom ko tayim ni ke par e pumoon rom ni nge ayuweg e tabinaw rog.” Pi thin nem nib mom, mab manigil ni be pining e magar ma ke taw nga gum’erchaen fare ppin rok fare piilal.

19. (a) Mang boch ban’en ni be rin’ e piin piilal u fithik’ e yul’yul’? (b) Susun mang e nge mudugilan’dad ngay ni ngad rin’ed?

¹⁹ Reb e ‘taw’athi nib manigil’ ni pi’ Jehovah aram e pi piilal ni ngar ayuweged e pi saf. (James 1:17) Danga’, pi pumoon ney e gathi yad ba flont; ya yad bod gadad ma yad ma oloboch. (1 Kings 8:46) Machane pi piilal u lan e pi ulung u ga’ngin e fayleng e yad ba yul’yul’ ma yad be rin’ e n’en ni ba adag Jehovah ni ngar rin’ed​—ni aram e ngar yalu’weged e ulung, mar ubunged, ma ngar ayuweged ngar pared ni kar taab girdi’gad, ma ngar ayuweged yad ko riya’. Ere susun ni nge mudugilan’ ra reb e piilal ni ngii ayuweg e pi saf rok Jehovah u fithik’ e t’ufeg, ma aram me micheg ni ir ba taw’ath, ara flaab ni fan ko pi walagen. Ma ngad dugliyed ni ngad daged ni gad be tay fan e “pi pumoon ney ni yad e taw’ath” ma ngad folgad rorad, ma ngad ted farad, ma ngad ted fan e maruwel ni yad ma tay. Ri gad ma pining e magar ku Jehovah ya ke pi e pi pumoon ni gowa yad be yog ko pi saf rok ni gaar: ‘Maruwel romad e nggu ayuweged gimed ngam pigpiggad ku Got u fithik’ e falfalan’’!

Uw Rogon ni Ga Ra Fulweg?

◻ Mang fan nib puluw ni ngan taarebnag fare ulung nga reb e dowef ko girdi’?

◻ Uw rogon nrayog ni nge ayuweg e piin piilal e pi walagrad ngar pigpiggad ku Jehovah u fithik’ e falfalan’?

◻ Susun mang fan ni ngad folgad rok e piin ni be yog e thin rodad maku ngad ted farad?

◻ Mang boch e kanawo’ nrayog ni ngad daged ni gad ma lemnag e piin piilal?

[Sasing ko page 14]

Gimed e piin piilal, ngam mu pininged e magar ngak e girdi’ ko athamgil ni yad be tay nge mus rogorad riy

[Sasing ko page 15]

Pi piilal e ma dag e kanawo’ ya yad ba pasig ko machib, ma aram e rayog ni ngar ayuweged e tabinaw rorad nge yugu boch e girdi’ ngar pigpiggad ku Got u fithik’ e falfalan’

[Sasing ko page 16]

Gad ma tay fan e pi piilal rodad!