“Pi Pumoon Ni Yad E Taw’ath” Ni Fan Ni Ngar Ayuweged E Pi Saf Rok Jehovah

“Faani yan nga lang ko gin nth’abi tolang ma boor e girdi’ ni fekrad ni ngar uned ngak ni bod rogon e girdi’ nni kol ko mahl; ke pi’ e girdi’ ni yad e tow’ath.”​—EFESUS 4:8.

1. Mang e yog reb e walag ni ppin ni Kristiano u murung’agen e pi piilal u lan e ulung rok?

“KAMMAGARGAD ya kam ayuweged gamad. Rogon ni kam siminmingad, nge ngongol romed nib gol, nge rogon ni kam lemnaged gamad e be dag ni gimed ba yul’yul’. Gubin ngiyal’ ma gimed ma motoyil ko girdi’ ma gimed ma weliy e thin ko Bible ni ma pi’ e athamgil nga lanin’mad. Gu ma yibilay ni dab gu dariy fannagmed.” Aram e n’en ni yoloy reb e walag ni ppin ni Kristiano ngak e pi piilal ko ulung rok. Rib tamilang ni ke taw e machib nga gum’erchaen u rogon ni ke ayuwegrad e pi tachugol saf ko Kristiano.​—1 Peter 5:2, 3.

2, 3. (a) Rogon ni yog u Isaiah 32:1, 2, ma uw rogon ni ma ayuweg e piin piilal fare ulung i saf rok Jehovah u fithik’ e runguy? (b) Nge diin ma rayog ni ngan nog ni be’ nib piilal e ir reb e taw’ath?

² Pi’ Jehovah e pi piilal ni ngar ayuweged e yu ulung i saf rok. (Luke 12:32; John 10:16) Pi saf rok Jehovah e ri yad ba t’uf rok​—ri aram rogon me ere ke chuw’iyrad me pi’ rachaen Jesus ni puluwrad. Ere dabni gin ngay ni ke felan’ Jehovah u nap’an ni ke ayuweg e pi piilal e yu ulung i saf rok u fithik’ e t’ufeg. (Acts 20:28, 29) Mu lemnag e n’en ni kan yiiynag u murung’agen e pi piilal ney ni yad e “pi fak e pilung” ni gaar: “Ra bagayad ma bayi par ni bod ba manaf ni ngan naf ngay ko nifeng nge yoko’. Yad ra bod e yu pa’ i lul’ ni bay u daken bangi ted nder tugul ban’en riy, ma yad bod e tagalul’ u ba war ni ba ga’ ni ba ga’ ni bay u daken bangi ted nder tugul ban’en riy.” (Isaiah 32:1, 2) Arrogon, thingara ayuweged, mar pied e toffan, mar fl’eged laniyan’ e yu ran’ i saf rok. Pi piilal ni ma ayuweg e yu ran’ i saf u fithik’ e t’ufeg e yad be athamgil ni ngar rin’ed e tin nib m’agan’ Got ngay.

³ Pi piilal ni aram rogon e be yog e Bible ni yad e “pi pumoon ni yad e taw’ath.” (Efesus 4:8) Faanra ga ra lemnag e taw’ath, ma ga be lemnag ban’en ni kan pi’ ngak be’ ya ba t’uf rok ma ra felan’ ngay. Rayog ni ngan lemnag be’ ni piilal ni ir e taw’ath ya ma maruwel ni fan ni nge ayuweg e girdi’ ma nge yog e falfalan’ ko fare ulung i saf. Uw rogon nrayog ni nge rin’ e re n’ey? Bay e fulweg ko pi thin ni yog Paul u Efesus 4:7-16, ni be n’uf Jehovah ya fare ulung i saf rok e ri yad ba t’uf rok.

“Pi Pumoon ni Yad e Taw’ath”​—Uw e Kar Bad Riy?

4. Rogon ni kan yiiynag ko Psalm 68:18, ma uw rogon ni ke yan Jehovah ‘ko gin nib tolang,’ ma mini’ e “pi taw’ath ni yad e girdi’”?

⁴ Nap’an ni yog Paul e pi thin ney ni “pi pumoon ni yad e taw’ath” ma be weliy e thin ni yog David ni Pilung, ni ke yog u murung’agen Jehovah ni gaar: “Kam man ko gin nib tolang; kam fek e girdi’ ni bod e girdi’ nni kol ko mahl; ma kam fek boch e taw’ath ni yad e girdi’.” (Psalm 68:18) Tomren in e duw ni i par yu Israel u lan fare Binaw ni Kan Micheg ngorad, ma gowa ke “yan Jehovah nga lang” nga daken fare Burey ni Zion ma ke dugliy Jerusalem ni nge mang tagil’ e tochuch ko fare nam nu Israel ma David e pilung rorad. Machane mini’ e pi cha’ ney ni yad e “pi pumoon ni yad e taw’ath”? Yad e girdi’ ni kan fekrad nib kalbus u nap’an ni kan yan nga lan fare binaw. Boch e pi girdi’ ney e munmun ma kar ayuweged yu Levi ko maruwel u lan fare tabernacle.​—Ezra 8:20.

5. (a) Uw rogon ni ma tamilangnag Paul ni ke lebug e pi thin ko Psalm 68:18 ko ulung ko Kristiano? (b) Uw rogon ni ke yan Jesus ko ‘gin nib tolang’?

⁵ U lan e babyor ni yoloy Paul ngak piyu Efesus, ma ke tamilangnag Paul ni ka bay ba ngiyal’ nga m’on ni ra lebug e pi thin ko Psalm ni fan ko ulung ko Kristiano. I yoloy Paul e thin ni bay ko Psalm 68:18 ni gaar: “Ra bagadad ma kan pi’ e tow’ath rok ni aram e n’en nib salap faanem riy, ni bod rogon ni be yog e babyor nib thothup ni be gaar: “Faani yan nga lang ko gin nth’abi tolang, ma boor e girdi’ ni fekrad ni ngar uned ngak ni bod rogon e girdi’ nni kol ko mahl; ke pi’ e tow’ath ni yad e girdi’.’” (Efesus 4:7, 8) Re thin ney ko Psalm e ke puluwnag Paul ku Jesus ni ir faanem ni owchen Got. I “gel [Jesus] ko fayleng” ya ke par nib yul’yul’. (John 16:33) Ma ke faseg Got Jesus ko yam’ ma aram miki gel ko yam’ nge Satan. (Acts 2:24; Hebrews 2:14) Nap’an e 33 C.E., ma ke yan Jesus nga lang “nge pag urngin e tharmiy”​—ni kab tolang ko urngin e pi engel u tharmiy. (Efesus 4:9, 10; Filippi 2:9-11) Ma ke gel Jesus ere ke fek boch e girdi’ ni bod rogon e “girdi’ nni kol ko mahl”. Uw rogon e re n’ey?

6. Ka nap’an e Pentekost ko 33 C.E., ma uw rogon ni ke tabab Jesus ni nge kirebnag e naun rok Satan, ma mang e ke rin’ ko piin ni ke fek ni “bod rogon e girdi’ nni kol ko mahl”?

⁶ Nap’an ni immoy u fayleng, me dag Jesus gelngin ngak Satan ya ke pithig e girdi’ ni be par ni ke kolrad e pi moonyan’. Gowa ke yan Jesus nga lan e naun rok Satan, me fek e tirok ban’en. (Matthew 12:22-29) Mu lemnag, nap’an ni kan faseg Jesus ko yam’ ma kan ‘pag fan urngin ban’en ngak u tharmiy ngu but’,’ ma aram e boor ban’en nrayog ni nge kol Jesus! (Matthew 28:18) Ka nap’an e Pentekost 33 C.E., ma Jesus ni ke yan nga lang me ir owchen Got, e ke tabab ni nge kirebnag e naun rok Satan ya ke ‘fek e girdi’ ni bod rogon e girdi’ nni kol ko mahl’’​—ni yad e pi pumoon ni kar pared ni yad e sib ko denen nge yam’ ma yad bay u tan pa’ Satan. Pi girdi’ ney ni kan “kolrad” e kar manged e “sib rok Kristus” mar rin’ed “u polo’ i lanin’rad e tin nib m’agan’ Got ngay.” (Efesus 6:6) Ere gowa ke fekrad Jesus ndakura moyed u tan pa’ Satan, ma ke pi’rad ngak fare ulung ni yad e “pi pumoon ni yad e taw’ath” ni pi’ Jehovah. Mu lemnag uw fene damumuw Satan ya kan fekrad rok!

7. (a) Uw rogon e pigpig ni ma tay e “pi pumoon ni yad e taw’ath” u lan e pi ulung? (b) Mang e ke pi’ Jehovah ngak ra reb e pumoon ni be pigpig ni ir e piilal?

⁷ Ga be pirieg e “pi pumoon ni yad e taw’ath” u lan e ulung ko ngiyal’ ney fa? Ri arrogon! Yad ma pigpig ni yad e piin piilal, ma ba gel e maruwel ni yad ma tay ni yad ma wereg fare thin nib fel’, ma yad e pi tachugol saf ko ulung, ma yad e sensey u lan e pi ulung ni boor ko 87,000 ko girdi’ rok Got u ga’ngin e fayleng. (Efesus 4:11) Ri ba adag Satan ni ngar ngongliyed e ngongol nib kireb ngak girdien e ulung. Machane gathi aram fan ni ke pi’rad Got u daken Kristus ngak fare ulung. Ke pi’ Jehovah e pi pumoon ney ni fan ni ngan ayuweg e ulung, ma thingara rogned ngak Got rogon e maruwel ni ur ngongliyed ngak e ulung i saf ni kan tay nib mil fan ngorad. (Hebrews 13:17) Faanra ga be pigpig ni gur reb e piilal, ma ke taw’athnagem Jehovah ni ngam micheg ni gur reb e taw’ath ni rib manigil, ara gur e flaab ni fan ko pi walagmed. Rayog ni ngam dag e re n’em nfaanra ngam lebuguy e tin nib mil fan ngom.

Nap’an nib T’uf ni Ngan “Yal’uweg” Ban’en”

8. Uw rogon nib t’uf ni ngan yal’uwegdad yu ngiyal’?

⁸ Som’on ma “pi pumoon ney ni yad e taw’ath” e kan pi’rad ni fan ni ngar “yal’uweged urngin e piin nib thothup,” aram e n’en ni yog Paul. (Efesus 4:12, New World Translation) Fare bugithin nu Greek ni kan piliyeg ni “yal’uweg” e be sor fan ko “ngan sulweg ban’en nga rogon nge k’iy.” Gad e girdi’ nde flont, me ere gad gubin mab t’uf ni ngan yal’uwegdad yu ngiyal’​—ba t’uf ni ngan yal’uweg e lem rodad, nge tafinay rodad, nge ngongol rodad, nge “sul nga rogon nib k’iy” me puluw ko lem rok Got nge tin nib m’agan’ ngay. I pi’ Jehovah e “pi pumoon ney ni yad e taw’ath” ni ngar ayuweged gadad ngad rin’ed e n’en nib t’uf ni ngad yal’uwgad. Uw rogon ni yad ma rin’ e re n’ey?

9. Uw rogon nrayog ni nge ayuweg e piilal reb e saf ni ke oloboch?

⁹ Yu ngiyal’ ma ran pining reb e piilal ni nge ayuweg be’ ni ke oloboch, ni sana ke “rin’ ban’en nib kireb ma dawori tamilang u wan’.’ Uw rogon nrayog ni nge pi’ e piilal e ayuw ngak? Galatia 6:1 e be gaar: “Ngam guyed rogon faanem nge sul nga rogon nge par ni ke mat’aw bayay; machane thingar mu rin’ed u fithik’ e sumunguy.” Ere nap’an ni ra pi’ e piilal e fonow ku be’ ma dabi puwan’ ngak, me yog e thin nib gel. Ya susun ni nge pi’ e fonow ni ra pi’ e athamgil nga laniyan’ facha, ma gathi ra n’igin nge “rus.” (2 Korinth 10:9; mu taarebnag ko Job 33:7.) Sana ke tamra’ facha, me ere pi tachugol saf ni ma t’ufegey e dabi n’igin nge mulan’. Nap’an ni ran pi’ e fonow nib mudugil u fithik’ e t’ufeg, ma dabi siy ni ra yal’uweg e lem nge ngongol ku facha’ ni ke oloboch, ma ra sul nga rogon.​—2 Timothy 4:2.

10. Mang e ba l’ag ngay ni ngan yal’uweg e girdi’?

¹⁰ Ke pi’ Jehovah e “pi pumoon ni yad e taw’ath” ni fan ni ngan ayuwegdad, ma ba adag Jehovah ni nge par e piin piilal ni yad be pi’ e ayuw ko tirok Got ban’en mi yad par ni bay rogon ni ngan folwok rorad. (1 Korinth 16:17, 18; Filippi 3:17) Rogon ni ngan ayuweg e girdi’ e gathi ke mus ni ngan yal’uweg e piin ni be sor iyan ko kanawo’ nib kireb ya ku ba t’uf ni ngan ayuweg e piin nib yul’yul’ ni ngar pared ko kanawo’ nib mat’aw.a Ngiyal’ ney ma bay boor e magawon ni rayog ni nge kirebnag laniyan’ e girdi’ me ere boor e girdi’ nib t’uf ni ngan pi’ e athamgil nga lanin’rad ni ngar chichiiyed pa’rad. Boch e girdi’ e ba t’uf ni ngan ayuwegrad nge puluw e lem rorad ko lem rok Got. Susun, boch e Kristiano nib yul’yul’ e yad ma lemnag ni dariy farad fa dariy rogorad. Pi girdi’ ni aram rogon ni ke “mulan’rad” e yad ma lemnag ni dabiyog ni nge t’ufegrad Jehovah ma dabi felan’ ko athamgil ni yad ma tay nib elmirin ni ngar pigpiggad ngak. (1 Thessalonika 5:14) Machane re lem nem e de puluw uw rogon ni ma lemnag Got e piin ni ma liyor ngak.

11. Mang e rayog ni nge rin’ e piin piilal ni ngar ayuweged e girdi’ ni be lemnag ni dariy farad?

¹¹ Piin piilal, mang e rayog ni ngam rin’ed ni ngam ayuweg e girdi’ ni aram rogon? Mu weliy boch e thin ko Bible ngorad ni be dag ni ma t’ufeg Jehovah ra reb e tapigpig rok ma ga pi’ e athamgil nga lanin’rad ni pi thin nem ko Bible e bpuluw ngorad ni ra bagayad. (Luke 12:6, 7, 24) Mu ayuwegrad ni ngar nanged ni ke ‘piningrad’ Jehovah ni ngar pigpiggad ngak, ere dabi siy ni yad ba t’uf rok. (John 6:44) Mu weliy ngorad ni gathi goo yad e aram rogon e lem rorad​—ya boor e tapigpig rok Jehovah e ku aram rogon e lem rorad faram. Bay biyay ni ke mulan’ Elijah ma ba adag ni nge yim’. (1 Kings 19:1-4) Boch e Kristiano ni kan dugliyrad ko kan ni thothup u nap’an e bin som’on e chibog e ke ‘yog lanin’rad ngorad ni yad ba kireb.’. (1 John 3:20) Rayog ni nge fal’eg lanin’dad ni ngad nanged ni boch e girdi’ nib yul’yul’ u lan e Bible e “ku bod gadad e tiney e girdi’.” (James 5:17) Rayog ni ngam sul nga daken e pi thin u lan e babyor ni Wulyang Ntagil’ e Damit nge Awake! ngam weliy ko piin ni ke mulan’rad. Dabi siy ni ra guy Got e athamgil ni ngam tay ni ngam ayuweg e girdi’ ni aram rogon ya ir e ke dugliyem ni gur e “taw’ath” ko girdi’.​—Hebrews 6:10.

Ngan “Ubing” Girdien e Yu Ulung i Saf Ngar “Ilalgad I yan”

12. Mang fan fare thin ni ngan “ubing girdien e dowef rok Kristus ngar ilalgad i yan,” ma mang ban’en nib baga’ fan ni ngan ubing e yu ulung i saf?

¹² Bin l’agruw ma “pi pumoon ni yad e taw’ath” e kan pi’rad ni ngar “ubinged girdien e dowef rok Kristus ngar ilalgad i yan.” (Efesus 4:12) I fanay Paul reb e thin ni be sor fan ko yugu ban’en. Fare bugithin ni “ubing” e ma sor fan ko dimow naun, ma fare “dowef rok Kristus” e sor fan ko girdi’​—ni aram girdien fachi ulung ni yad e Kristiano ni kan dugliyrad. (1 Korinth 12:27; Efesus 5:23, 29, 30) Ba t’uf ko piin piilal ni ngar ayuweged e pi walagrad ni ngar ilalgad ko tirok Got ban’en mar gelgad. Yad be nameg ni ngar ‘gelnaged ma gathi ngar warnaged fare ulung i saf. (2 Korinth 10:8) Ma n’en nra ayuwegrad ngar ubunged fare ulung i saf e t’ufeg, ya ‘rogon ni nge be’ me t’uf be’ rok e ra ubing be’.”​—1 Korinth 8:1, NW.

13. Uw rogon ni ngan runguy e girdi’, ma mang fan ni baga’ fan ko piin piilal ni ngar runguyed e girdi’?

¹³ Rogon e t’ufeg ni ra ayuweg e piin piilal ni ngar ubinged girdien yu ulung i saf e ngar runguyed yad. Rogon ni ngan runguy be’ e ngan lemnag ban’en ni bod facha ma ga lemnag ko uw rogon ban’en u wan’ nge gin ni ma mus riy. (1 Peter 3:8) Mang fan ni baga’ fan ni nge nang fan e piin piilal e yugu girdi’? Ya Jehovah​—ni ir e pi’ e “pi pumoon ni yad e taw’ath”​—e ir ba Got ni aram rogon. Nap’an ni be gafgow e pi tapigpig rok ara yad ba amith, ma ma runguyrad. (Exodus 3:7; Isaiah 63:9) Ma ma lemnag e gin ni yad ma mus riy. (Psalm 103:14) Ere uw rogon nrayog ni nge dag e piin piilal e runguy?

14. Uw rogon nrayog ni nge dag e piin piilal e runguy ngak e girdi’?

¹⁴ Nap’an ni ke mulan’ be’ ma yad ra motoyil ngak u fithik’ e runguy. Yad ma athamgil ni ngar nanged fan e pi walagrad ni lem rorad nge pangirad, nge salperad. Ma nap’an ra pi’ e piin piilal e ayuw ko girdi’ u daken e thin ko Bible, ma ra mom ko piin ni yad e saf ni ngar folgad riy ni bochan e be runguyrad e pi tachugol saf ma yad ma nang fan salperad. (Proverbs 16:23) Ku ma lemnag e piin piilal e gin ni ma mus e girdi’ riy nge rogon lanin’rad ni bochan. Susun, boch e Kristiano e ke kireban’rad ni bochan e dabiyog ni nge yoor boch e pigpig ni yad ma tay ku Got, ni sana bochan e kan pillibthir ara m’ar. Ma boch e girdi’ e ba t’uf ni ngan pi’ e athamgil nga lanin’rad ni ngar mon’oggad ko machib ni yad be tay. (Hebrews 5:12; 6:1) Runguy e ra ayuweg e piin piilal ni nga rogned e “thin nib manigil” ni ra ubing e girdi’. (Eklesiastes 12:10) Ma nap’an ni kan ubing e pi saf rok Jehovah ma kan k’aring lanin’rad, ma rogon nib t’uf Got rorad e ra mithmithegrad ni ngar pigpiggad ku Got nge mus rogorad!

Pi Pumoon ni ma Ayuwegdad Ngad Taab Girdi’gad

15. Mang fan fare thin ni “ngad taab girdi’gad u daken e michan’ rodad”?

¹⁵ Bin dalip, ma “pi pumoon ni yad e taw’ath” e yad ma ayuwegdad ni “ngad taab girdi’gad u daken e michan’ rodad ngak Fak Got nge murung’agen ni kad nanged.” (Efesus 4:13) Fare thin ni “ngad taab girdi’gad u daken e michan’ rodad” e ma sor fan ko taareban’uy ko machib nge girdi’ ni ke michan’rad ngay. Ku aram fan ni ke pi’ Got ngodad e “pi pumoon ni yad e taw’ath”​—ni ngar ayuweged e girdi’ rok ngar taab girdi’gad. Uw rogon ni yad ma rin’ e re n’ey?

16. Mang fan ni baga’ fan ko piin piilal ni ngar pared nib taareb lanin’rad?

¹⁶ Som’on ma piin piilal e thingara pared ni ke taareb lanin’rad. Ya faanra ke ruw raba’ e pi tachugol saf, ma ra gafgow e pi saf. Faanra yad ra tay boor e tayim ko muulung nge luagthin u murung’agen boch ban’en nde ga’ fan ma yad be n’ag e tayim ni rayog ni ngan gafaliy fare ulung i saf. (1 Timothy 2:8) Gathi gubin ban’en ni goo ra taareban’ e piin piilal ngay, ya yad e girdi’ ni ra bagayad mab thil pangin ngak bagayad. Ma gathi dabiyog ni ngar weliyed e lem rorad nib thil reb nga reb fa ngan puruynag ban’en nib puf rogon. Ma athamgil e piin piilal ni ngar pired nib taareban’rad ma ra bagayad e ra tay fan bagayad ma yad ra motoyil ma dabra turguyed ban’en u lanin’rad. Ma faanra gathi yibe th’ab e motochiyel ko Bible, ma susun ni nge bagayad me t’ar laniyan’ ma ra tay fan e n’en ni ke turguy fare ulung ko piin piilal. Faanra aram rogon ma yad be dag ni be pow’iyrad fare “gonop ni yib u tharmiy” ni aram e gonop ni ma “fal’eg thiliy nge aw e gapas riy, ma ma sumunguynigey.”​—James 3:17, 18.

17. Uw rogon nrayog ni nge ayuweg e piin piilal e ulung ngar pared ni kar taab girdi’gad?

¹⁷ Piin piilal e ma athamgil ni ngar ayuweged e ulung ngar taab girdi’gad. Nap’an nra sum e pi n’en ni ma ruw raba’nigey​—ni bod e piin ni ma nonon mi yad weliy e thin nib kireb murung’agen e girdi’, fa bay e girdi’ nib tatogopuluw​—ni pi n’en ni ra kirebnag e gapas, ma yad ma pi’ e fonow ni ra ayuwegrad. (Filippi 2:2, 3) Susun, sana manang e piin piilal ni bay e girdi’ ni ma lemnag thibngin e yugu girdi’ fa yad ma lemnag boch ban’en ni dariy rogorad ko yugu girdi’. (1 Timothy 5:13; 1 Peter 4:15) Piin piilal e ra guy rogon ni ngar ayuweged e girdi’ ni aram rogon mi yad nang ni kanawo’ rorad e ba togopuluw ko n’en ni ke fil Got ngodad ma ra be’ ma “ba gilban ni be fek.” (Galatia 6:5, 7; 1 Thessalonika 4:9-12) Yad ma fanay e thin ko Bible mi yad weliy ni boor ban’en ni ma pag Jehovah ni ngad turguyed ni ngad rin’ed, ni ra be’ ma rogon laniyan’, me ere susun ndabda turguyed e kireb ko girdi’ ni bochan. (Matthew 7:1, 2; James 4:10-12) Thingari par e ulung ni ra bagayad ma be pagan’ ngak bagayad ma be tay fan bagayad, ma aram e rayog ni ngar pigpiggad u taabang. Pi piilal ney ni yad e “pi pumoon ni yad e taw’ath” e yad ma pi’ e fonow u daken e thin ko Bible ma araam rogon ni yad ma ayuwegdad ngad pared ni kad taab girdi’gad.​—Roma 14:19.

Ngan Ayuweg fare Ulung i Saf

18, 19. (a) “Pi pumoon ni yad e taw’ath” e ma ayuwegdad rok mini’? (b) Ku mang riya nib t’uf ni ngan ayuweg e pi saf riy, ma uw rogon ni ma ayuweg e piin piilal e pi saf?

¹⁸ Bin aningeg, ma ke pi’ Jehovah e “pi pumoon ni yad e taw’ath” ni ngar ayuweged gadad ndabi “fekdad e nifeng i yan ni gubin yay nra n’ag e nifeng gil’, ni aram e machib rok e girdi’ ni yad be bannag e girdi’, ni piin ni yad be pow’iy boch e girdi’ ko tin ni gathi ir ko ban ni kar ngongliyed rogon.” (Efesus 4:14) Fare bugithin ni Greek ni “ban” e be sor fan ko “sabanban ko nochi malang ni ngan nin’ nga but’” ara “rogon nib salap be’ ni nge yin’ nochi malang nga but’.” Aram rogon e piin ni apostate fa? Yad ba salap ko luluag thin, ma yad ma fanay e thin ko Bible mi yad weliy boch ban’en riy ni ngar wawliyed e tin riyul’ e Kristiano ngar digeyed e michan’ rorad. Thingar par e piin piilal ni yad be tiyan’ ko pi girdi’ nem ni yad e “wolf nib damumuw”!​—Acts 20:29, 30.

¹⁹ Ka bay boch ban’en ni thingarni ayuweg e pi saf rok Jehovah riy. I ayuweg David e yu ran’ i saf rok e chitamangin ko pi gamanman ni be guy rogon ni nge longuyrad. (1 Samuel 17:34-36) Ku arrogon e ngiyal’ ney ma yu ngiyal’ ma ba t’uf ko pi tachugol saf ni Kristiano ni ngar ayuweged e yu ran’ i saf rok ko piin ni be guy rogon ni ngar kirebnaged e yu ran’ i saf rok Jehovah. Ra chuweg e piin piilal e girdi’ ko ulung ni yad ma denen nib pumon ma yad ma bannag e girdi’ ma yad ba sasalap ma yad be guy rogon ni ngar wereged e kireb rorad u lan e ulung.b​—1 Korinth 5:9-13; mu taarebnag ko Psalm 101:7.

20. Mang fan nrayog ni nge pagan’dad ngak e “pi pumoon ni yad e taw’ath”?

²⁰ Ri gad ma pining e magar ko “pi pumoon ney ni yad e taw’ath”! Yad ma runguydad ere gad ma par nib pagan’, ma yad ma pi’ e fonow ngodad u fithik’ e t’ufeg, ma yad ma ayuwegdad ngad pared nib taareb lanin’dad, ma dar rusgad ni ngar ayuweged gadad ko riya’. Machane susun uw rogon u wan’ e “pi pumoon ney ni yad ba taw’ath” ni bochan e liw rorad u lan e ulung? Ma uw rogon nrayog ni ngad daged ni gad ma tay farad? Aram e pi deer ni ran weliy ko bin migid e thin.

[Boch e Thin nra Tamilangnag Murung’agens]

Ka Ga Manang?

◻ Mini’ e “pi pumoon ni yad e taw’ath,” ma mang fan ni ke pi’rad Got ngak e ulung u daken Kristus?

◻ Uw rogon ni ma lubeg e piin piilal e tin nib mil fan ngorad ni ngar yal’uweged fare ulung i saf?

◻ Mang e rayog ni nge rin’ e piin piilal ngar ubinged e pi walagrad?

◻ Uw rogon nrayog ni nge ayuweg e piin piilal e ulung ngar pired ni kar taab girdi’gad?

[Sasing ko page 8]

Runguy e ma ayuweg e piin piilal ni ngar pied e athamgil nga laniyan’ e piin ni ke mulan’rad

[Sasing ko page 8]

Faanra par e piin piilal nib taareb lanin’rad, ma ra ayuweg e ulung ngar taab girdi’gad