Ireray e Ngiyal’ Nrib T’uf ni Ngaud Golgad Ngodad!

1. Mang boch e magawon ni i mada’nag e pi Kristiano ko bin som’on e chibog?

BA NGIYAL’ u thilin e duw ni 62 nge 64 C.E., me yol apostal Peter ngak e piin ni ur pared taaboch ngiyal’ “ko nug nu Pontus, ngu Galatia, ngu Kappadocia, ngu Asia, ngu Bithynia.” (1 Pet. 1:1) Pi walag ko pi ulung nem u Asia Minor e kar bad u boch e binaw nib thilthil, mab t’uf ni ngan pi’ e athamgil nga lanin’rad min pow’iyrad. Ba gel e togopuluw ni yibe tay ngorad maku yibe yog e thin nib kireb ngorad. Kub gel e ‘gafgow’ ni un tay ngorad, maku ur moyed u ba ngiyal’ ni ke mo’maw’ e par riy. I yoloy Peter ni gaar: “Ke chugur nga tungun urngin ban’en.” Arrogon, dabki gaman ragag e duw nga tomuren, ma aram e yira gothey fare mach nu Jerusalem. Ere, mang e rayog ni nge ayuweg e piin Kristiano ni ngar athamgilgad ko ngiyal’ nem ni ur moyed riy ni kari mo’maw’ e par?​—1 Pet. 4:4, 7, 12.

2, 3. Mang fan ni pi’ Peter e athamgil nga laniyan’ e pi walagen ni ngaur golgad ngorad? (Mu guy e sasing ni bay u tabolngin e re article ney.)

² Reb ko pi n’en ni pi’ Peter e athamgil riy nga laniyan’ e pi walag e aram e gaar ngorad: “Mbinged e tabinaw romed ngomed” ara um golgad ngomed. (1 Pet. 4:9) Fare bugithin ni ‘gol’ ko thin ni Greek e be yip’ fan ni “ngan t’ufeg ara ngan gol ngak e milekag.” Machane, mu tay fanam i yan riy ni yog Peter ngak e pi walag ni Kristiano ni ngar golgad ‘ngorad,’ ara ngar golgad ngak e piin ni yad manang ara yad ma chag ngorad. Faan yad ra rin’ e re n’ey, ma uw rogon nra ayuwegrad?

³ Ra chugurnagrad nga taabang. Am lemnag e n’en ni ke buch rom. Ba’ bayay ni ke piningem be’ nga tafen, fa? Gathi bay boch ban’en nim rin’ed u tafen e cha’nem ni kam felfelan’ ngay ma ke par u lanin’um? Nap’an ni kam pining boch e walag u lan e ulung nga tafenam, ma gathi ke gel e chugur ko tha’ u thilmed? Faanra ud pininged pi walagdad nga tafedad, ma aram e rayog ni ngad nanged yad nib fel’ rogon. Pi Kristiano u nap’an Peter e ba t’uf ni ngar chugurgad nga taabang ni bochan e be gel e mo’maw’ ko par e ngiyal’ nem. Ku arrogon e n’en nib t’uf ni nge rin’ e pi Kristiano e ngiyal’ ney ko “tin tomren e rran.”​—2 Tim. 3:1.

4. Mang boch e deer ni gad ra weliy ko re article ney?

⁴ Mang boch e kanawo’ nrayog ni ngad golgad riy ‘ngodad’? Uw rogon ni ngad gelgad nga boch ban’en ni ma talegdad ndab da golgad ngak pi walagdad? Ma mang boch ban’en ni gad ra rin’ ma ra m’ug riy ni gad be tayfan e en ni ke piningdad nga tafen?

BOCH E KANAWO’ NRAYOG NI NGAD GOLGAD RIY

5. Uw rogon ni ngad golgad ko girdi’ u nap’an e muulung?

⁵ Nap’an e muulung: Jehovah nge ulung rok e ir e ke piningdad ni ngaud uned ko muulung. Ere, gad baadag ni nge felfelan’ urngin e piin ni yad ma un ko muulung rodad, nib ga’ ni piin ni ka yad bbeech. (Rom. 15:7) Pi girdi’ ney e Jehovah e ke piningrad. Ere ba t’uf ni ngad ngongolgad ngorad u reb e kanawo’ nra k’aringrad ni ngar adaged ni kar bad ko muulung ni yugu demtrug rogon e munmad ni kar ted ara rogon yaarad. (Jas. 2:1-4) Faanra kam guy ni bay be’ ni kab beech ni keb ko muulung ni goo ir, ma mang ndab mu pining nge par nga toobem? Sana ra felfelan’ ni faan ga ra ayuweg ni nge nang e n’en ni yibe rin’ u nap’an e muulung ara mu ayuweg ni nge pirieg e pi thin nu Bible ni yibe beeg. Ireray reb e kanawo’ nib fel’ nrayog ni “ngad golgad ngak e milekag.”​—Rom. 12:13, NW.

6. Mini’ e piin nib ga’ nsusun e ngaud pininged yad nga tafedad?

⁶ Ke piningdad be’ nga tafen ko abich: Kakrom e faanra ngam gol ngak be’, mab muun ngay ni ngam pining nga tafenam ko abich. (Gen. 18:1-8; Judg. 13:15; Luke 24:28-30) Faanra piningem be’ nga tafen ko abich, ma aram e be dag ni baadag ni ngam fagergow me aw e gapas u thilmew. Ere, mini’ e piin nib ga’ nsusun e ngaud pininged yad nga tafedad? Aram e pi walagdad u lan e ulung. Chiney ni be gel e mo’maw’ ko par rodad i yan e ba t’uf ni ngaud taga’gad ngak pi walagdad me par nib fel’ e tha’ u thildad. Nap’an e duw ni 2011, ma aram me thilyeg fare Ulung ni Ma Pow’iyey e ngiyal’ ni ma tay e pi walag u Bethel u Meriken e Fol Wulyang ko Damit riy. Som’on e un tay ko 6:45 ni blayal’, ma aram min thilyeg nge par ko 6:15 ni blayal’. Mang fan? Nog ni faanra m’ay e muulung ni kab kamningel’, ma aram e ra mom ngorad ni nge bagayad me nang salapen bagayad ara rrin’ed boch ban’en u taabang. Ku aray e n’en ni ke rin’ yugu boch e branch. Re n’ey e ke ayuweg e pi walag u Bethel ni ngari chugur thilrad.

7, 8. Uw rogon ni ngad golgad ngak e pi walag ni yad ma yib u bang ko ulung rodad ni ngar pied e welthin?

⁷ Bay yu ngiyal’ ni ma yib boch e walag u yugu reb e ulung, ara pi walag ni yad ma lekag e ulung, ara pi walag ko branch ni ngar pied e welthin ko ulung rodad. Ireray yu ngiyal’ nrayog ni ngad golgad ko pi walag ney ni kar bad ko ulung rodad. (Mu beeg e 3 John 5-8.) Reb e kanawo’ nrayog ni ngad rin’ed e re n’ey riy e aram e ngad pininged e pi walag ney nga tafedad ko abich. Rayog ni ngam rin’ e re n’ey, fa?

⁸ I yog reb e walag nib pin ni ma par u Meriken ni gaar: “Kab kafram i yib ni gamow ma pining e pumoon rog e pi walag nge ppin rorad ni yad ma yib ko ulung romow nga tabinaw romow. Gubin yay ni kug piningew e pi walag ney nga tabinaw romow, ma ke yag ni ngar gelnaged e michan’ romow maku gamad ma felfelan’ u taabang. Da gur kalgow ngan’mow riy.”

9, 10. (a) Mini’ e piin nib t’uf ni ngar pared rodad nib n’uw boch nap’an? (b) Rayog ni nge pi’ e piin ni yad ma par u boch e naun nib achig ara gathi rib fel’ e ayuw, fa? Mu weliy ban’en ni ke buch.

⁹ Boch e girdi’ ni kar bad ni yad ra par nib n’uw nap’an: Kakrom e faanra ngan gol ngak be’, mab muun ngay ni ngan pi’ bang ngak e piin ni kar bad u yugu boch e binaw ni ngar pared riy. (Job 31:32; Filem. 22) Ku arrogon e ngiyal’ ney nib t’uf ni ngan rin’ e re n’ey. Pi walag ni yad ma lekag e ulung e ba ga’ nnap’an ni yad ra yib ni ngar lekaged e ulung, mab t’uf bang ni ngar pared riy. Pi walag ni ka ranod nga yugu reb e binaw ni ngar uned nga boch e skul ni ma tay e ulung rodad, nge pi walag ni kar ognaged yad ni ngar pied e ayuw nga boch e naun rodad ni yibe toy e kub t’uf bang ni ngar pared riy. Ku arrogon e pi walag ni ke kireb e naun rorad u nap’an e yoko’, ara durru’, ara boch ban’en ni ma yib ni yima gafgow riy nib t’uf bang ni ngar pared riy nge taw ko ngiyal’ ni kan ngongliy e naun rorad bayay. Susun e dab da lemnaged ni yigoo piin nib fel’ e naun rorad e rayog ni ngar pied e ayuw. Bin riyul’ riy e, rayog ni ke yoor yay ni kar rin’ed e re n’ey. Ere gur, rayog ni ngam fek be’ nge par rom ni yugu aram rogon nib achig e naun rom ara gathi rib fel’?

¹⁰ Reb e walag ni pumoon u South Korea e yib ngan’ e ngiyal’ ni i par boch e walag rok ni kar bad e ngaram ni fan nga boch e skul ni ma tay e ulung rodad. I yoloy ni gaar: “Som’on e gathi rug baadag ni nggu rin’ e re n’ey ni bochan e ka fin gu mabgolgow e ppin rog mab achig e naun romow. Machane, rib gel e felfelan’ nug tew u nap’an ni par e pi walag nem romow. Bochan ni ka fin gu mabgolgow, ma aram me yag ni ngguyew rogon gelngin e felfelan’ nrayog ni nge tay ba wu’ e mabgol ni faan yow ra pigpig ngak Jehovah mar namegew boch ban’en ni fan ko tirok ban’en u taabang.”

11. Mang fan nib t’uf ni ngam gol ngak e piin ni ka fin ra bad ra uned ko ulung rom?

¹¹ Pi walag ni ka fin ra bad ra uned ko ulung rodad: Bay boch e walag ara tabinaw nrayog ni ngar bad ra pared ko binaw ni ga ma par riy. Bay boch e pi walag ney nsana kar bad ni ngar pied e ayuw ko gin nib t’uf e ayuw riy ko machib. Ku rayog ni ngan pi’ boch e pioneer ko ulung rom ni ngar pied e ayuw. Ere, ri boor ban’en ni ke thil u rogon e par rorad, ya thingar ra mechamgad nga reb e binaw, nge ulung, nge thin, ara yalen nib beech. Ere, faan ga ra piningrad nga tafenam ni ngam abichgad u taabang, ara ngam marod nga bang ni ngam rin’ed boch ban’en ni ngam felfelan’gad ngay u taabang, ma aram e ga be ayuwegrad ni ngar pirieged boch e fager nib beech me yag ni ngar mechamgad ko pi n’en ni ke thil u rogon e par rorad.

12. Mang ban’en ni buch ni be dag nra ngan gol ngak be’, ma de t’uf ni ngan rin’ boor ban’en ni fan ngak?

¹² Ra ngan gol ngak be’, ma de t’uf ni ngan rin’ boor ban’en ni fan ngak. (Mu beeg e Luke 10:41, 42.) Bay reb e walag ni pumoon ni weliy murung’agen e ngiyal’ ni ka fini tabab ko pigpig ni ir reb e missionary ni gaar: “Ka gamow bbitir, ma gathi ri boor ban’en ni gamow manang, ma kug tawrengnagew chon e tabinaw nge pi fager romow. Ere, immoy reb e blayal’ ni i par e ppin rog nrib kireban’, ma aram mug guy rogon ni nggu fal’eg laniyan’, ma de yib angin. Faani bang ko 7:30 ni blayal’, ma aram me yib be’ i tugtuguy e mab romow. Nap’an nug bingew e mab ma be’ nib pin ni ma fil e Bible e ir e ba sak’iy u langan e mab ni ke fek dalip i gurgur. Ke yib ni nge nang salpen e gal nib beech e missionary. Ere gu piningew nga naun ma gamow pi’ boch e ran i unum, ma aram mug ngongliyed e tea nge chocolate nib gowel ni nggu unumed. Ngiyal’ nem e dawor gu nangew e thin nu Swahili, maku arrogon ir nde nang e thin ni Meriken. Machane, re n’ey ni buch e ir e ayuwegmow ni nge fel’ e tha’ u thilmad e pi walag u lan e ulung.”

NGAD GELGAD NGA BOCH BAN’EN NI MA TALEGDAD NDAB DA GOLGAD

13. Mang angin nra yib ngodad ni faanra ud golgad ngak pi walagdad?

¹³ Bay ba ngiyal’ ni ke t’uf ni ngam gol ngak be’ ma dam rin’ ni bochan e ga be magagawon, fa? Faanra bay, ma dabisiy ni aram ba ngiyal’ nde yag ni ngam felfelan’gad boch e walag u taabang mag yognag boch e fager nra par ndariy n’umngin nap’an. Faanra ud golgad ngak pi walagdad, ma aram reb e ban’en nrib fel’ nra ayuwegdad ni nge dabki kireban’dad ni bochan e yigoo gadad. Machane sana rayog ni nge lungum u wan’um, ‘Mang fan nra dabuy be’ ni nge gol ngak boch e walag?’ Baaray boch i fan.

14. Mang e rayog ni ngad rin’ed ni faanra buchuuw e tayim rodad ara ke aw parowdad ndabkiyog ni nga darod nga tafen be’ ni ke piningdad ara da pininged be’ nga tafedad?

¹⁴ Tayim rodad nge gelngidad: Pi tapigpig rok Jehovah e boor pa’ u puluwrad ma boor ban’en nib milfan ngorad ni ngar rin’ed. Bay boch e walag ni yad ma lemnag ndariy e tayim rorad ara ke aw parowrad ndabkiyog ni ngar golgad ngak be’. Faanra arrogon e n’en ni be buch rom, ma rayog nsana ba t’uf ni ngam yaliy rogon e pi n’en ni ga ma rin’ nge urngin e tayim ni ga be fanay ngay. Gur, rayog ni ngam thilyeg boch ban’en ko schedule rom ya nge yag nim man nga tafen be’ ni ke piningem ara mu pining be’ nga tafenam? Be pi’ e Bible e athamgil nga laniyan’ e piin Kristiano ni ngaur golgad ngak pi walagrad. (Heb. 13:2) De kireb ni ngad ted e tayim ni fan ko re n’ey, ya bin riyul’ riy e ireray e n’en nib fel’ ni ngad rin’ed. Machane faanra ngad rin’ed e re n’ey, ma sana ba t’uf ni nge m’agan’dad ngay ni ngad buchuuwnaged e tayim rodad ni fan nga boch ban’en nde ga’ fan.

15. Mang fan nrayog ni nge lemnag boch e walag ndabiyog ni ngar pininged be’ nga taferad?

¹⁵ Rogon ni ga ma lemnag rarogom: Gur, bay ba ngiyal’ ni ga baadag ni ngam pining be’ nga tafenam, machane ga be lemnag ndabiyog? Bay boch e walag ni yad ba tamra’, ere yad be magar nri yib e girdi’ nga taferad me chalbarad. Ku bay boch e walag ni buchuuw e salpiy rorad ma yad be lemnag ndabiyog ni ngar pied ngak e pi walag boch ban’en nrayog ni nge pi’ yugu boch e walag u lan e ulung. Machane, dab mu pagtalin nde t’uf ni ngari fel’ yaan e naun rom, ya n’en nib ga’ fan e nge beech me yaram langgin, mag gol ko piin ni kar bad nga tabinaw rom.

16, 17. Mang e rayog ni ngam rin’ ni faanra ga be magar ni ngam pining boch e walag nga tabinaw rom?

¹⁶ Faanra ga be magar ni ngam pining boch e walag nga tabinaw rom, ma gathi kemus ni yigoo gur e ga ma lem ni aray rogon. I yog reb e piilal u Britain ni gaar: “Rayog ni nge rus be’ u nap’an ni be fal’eg rogon ni nge yib boch e girdi’ nga tafen. Machane gubin ban’en ni gad ma rin’ ni fan ko pigpig rodad ngak Jehovah e ka boor angin ni ma yib ngodad nge felfelan’ ni gad ma tay riy ko magafan’ ni ma k’aring ngodad. Gu ma felfelan’ ni yugu aram rogon ni kemus ni kug pining boch e walag nga tabinaw rog ni nggu unumed e coffee ma gamad sabethin.” Dab mu pagtalin nib fel’ ni ngam dag ngak e piin ni kar bad nga tafenam ni ga be lemnagrad. (Fil. 2:4) Yooren e girdi’ e yad baadag ni yad ma weliy boch ban’en ni ke buch u lan e yafos rorad. Nap’an ni gad ra muulung boch e girdi’ nga taabang, ma sana kemus e ngiyal’ nrayog ni nge yog boch i yad ngodad ni ngad weliyed boch ban’en ni ke buch rodad. Ki yoloy reb e piilal ni gaar: “Nap’an ni gu ra pining boch e walag u lan e ulung nga tabinaw rog, ma ma ayuwegeg e re n’ey ni nggu nang rarogorad nib fel’ rogon mug nang boch ban’en u murung’agrad, ni bod rogon ni kar bad ko tin riyul’.” Faan ga ra dag ko piin ni kar bad nga tafenam ni ga be lemnagrad, mab mudugil ni yad ra felfelan’ ni kar bad ma kag ra felfelan’ ni kam piningrad.

¹⁷ Reb e walag nib pin nib ga’ ni ma par boch e walag rok ni kar bad ko binaw rok ni fan nga boch e skul ni ma tay e ulung rodad e yog ni gaar: “Som’on e i magafan’ug ni bochan e gathi rib fel’ e gin ni gu ma par riy, ma chiya nge tebel nge boch ban’en u naun rog e bogi ban’en ni ke n’uw nap’an. Machane, bay ban’en ni yog e ppin rok reb e walag ni i pi’ boch e pi skul nem nri warnag e magafan’ rog. I yog nnap’an ni ur lekagew e pumoon rok boch e ulung, ma pi wik nrib gel e felfelan’ ni yow ma tay riy e aram e ngiyal’ ni yow ma par rok boch e walag nde yoor ban’en rorad, machane ku yad be m’oneg e n’en ni yow be m’oneg ni aram e ngar pigpiggad ngak Jehovah mar momnaged e par rorad. Re n’ey e ma puguran ngog e n’en ni ma yog e chitinag ngomad e piin bitir. Ma gaar: ‘Kab fel’ ni ngam kay e yasay ni goo yasay u bang ni bay e t’ufeg riy.’” (Prov. 15:17, NW) Ere dariy rogon ni nge magafan’um, ya n’en nib ga’ fan e ngam dag e t’ufeg ngak e piin ni kam piningrad nga tabinaw rom.

18, 19. Faan gad ra gol ngak pi walagdad, ma uw rogon nra ayuwegdad ni nge dab kud lemnaged boch ban’en nde puluw u murung’agen boch e walag?

¹⁸ Rogon ni ga ma lemnag yugu boch e girdi’: Gur, bay be’ u lan e ulung rom ni gathi ri ga baadag daken? Faanra dab mu guy rogon ni ngam thilyeg e lem rom u murung’agen e cha’ney, mab mudugil ndariy e ngiyal’ nra thil. Sana rayog ni ngam dabuy ni ngam pining be’ nga tafenam ni faanra bay ban’en u rarogon ndabum. Fa reb e sana bay be’ ni ke rin’ ban’en ngom kafram ni ke kirebnag lanin’um, mab mo’maw’ ni nge chuw u lanin’um.

¹⁹ Be yog e Bible ni faanra nge fel’ e tha’ u thildad yugu boch e girdi’ ni kub muun e pi toogor rodad ngay, mab t’uf ni ngad golgad ngorad. (Mu beeg e Proverbs 25:21, 22.) Faan gad ra pining be’ nga tafedad, ma rayog ni nge ayuwegdad ni nge dab kud lemnaged boch ban’en u rarogon facha’ nde puluw, me yag ni nge aw e gapas u thildad. Ku rayog ni nge ayuwegdad e re n’ey ni ngad guyed boch ban’en nib fel’ u rarogon facha’, ni aram e pi fel’ngin ni guy Jehovah u nap’an ni pow’iy facha’ ni nge yib ko tin riyul’. (John 6:44) Faanra k’aringem e t’ufeg ni ngam pining be’ nga tafenam nder lemnag ni ga ra pining, ma rayog ni nge fel’ thilmew mi gimew par ni kam mangew l’agruw e fager nrib pach e thin romew. Uw rogon ni ngam guy rogon ni nge yan i aw ni ga be pining walagem nga tafenam ni bochan e riyul’ nib t’uf rom? Reb e kanawo’ e aram e ngam fol ko fare fonow ni bay ko Filippi 2:3 ni be gaar: “Dabi finey bigimed ni ir e ba sorok ngak e tin ni ka bay e girdi’.” Susun e ngad lemnaged ni ka bay boch i fel’ngirad nib fel’ ngodad. Sana rayog ni ngad filed ban’en ko michan’ rorad, ara rogon e athamgil ni yad be tay, nge ku boch i fel’ngin e Kristiano ni bay rorad. Faan gad ra lemnag pi fel’ngirad, ma aram e ra gel e t’ufeg rodad ngorad me mom ni ngad golgad ngorad.

ROGON NI NGE M’UG NI GAD BE TAYFAN E EN KE PININGDAD NGA TAFEN

20. Mang fan nsusun e ngad ted e thin rodad u gil’ u nap’an ni ke m’agan’dad ngay ni nga darod nga tafen be’ ni ke piningdad? Uw rogon ni ngad rin’ed e re n’ey?

²⁰ I fith David ni fare psalmist ni gaar: “Somol, mini’ e rayog ni nge par u lan e tempel rom?” (Ps. 15:1) Tomuren ni fith David e re deer ney, ma aram me weliy boch i fel’ngin e piin ni baadag Got ni ngar pared u lan e tempel rok. Reb e pi fel’ngin nem e aram e ir be’ ni ma tay e thin rok u gil’. I gaar: “Gubin ngiyal’ ni ma rin’ e tin ni ke micheg ngak be’ nra rin’, ndemturug gelngin e gafgow nra tay riy.” (Ps. 15:4) Faanra ke piningdad be’ nga tafen ma gad yog ni gad ra yan, ma susun e dab da thilyeged e thin rodad. Ra ngad thilyeged ma bochan ban’en nrib ga’ fan. Sana rayog ni ke fal’eg facha’ rogon boch ban’en ni fan ngodad. Ere faan gad ra yog ndab ku darod ni bochan ban’en nde ga’ fan, ma ra m’ay fan e magar ni ke tay. (Matt. 5:37) Bay boch e walag ni ke m’agan’rad ngay ni nga ranod nga tafen be’ ni ke piningrad, me boch nga tomuren mar thilyeged e thin rorad ni bochan e yad baadag ni nga ranod nga tafen yugu be’ ni ka fini yib i piningrad ya yad be lemnag ni aram e bin nib fel’. Faan gad ra rin’ ban’en ni aray rogon, ma gur, aram e gad be dag e t’ufeg nge tayfan? Susun e ngad felfelan’gad ngay ni ke piningdad be’ nga tafen ni yugu demtrug rogon e pi n’en ni ke ognag ngodad. (Luke 10:7) Faanra dabkiyog ni nga darod ni bochan ban’en nib ga’ fan, ma ra m’ug nib t’uf facha’ rodad ma gad be lemnag ni faan gad ra guy rogon ni nge nang nib papey.

21. Faanra ud ted fan e yalen ko gin ni gad ma par riy, ma uw rogon nra ayuwegdad ni ngad ted fan e en ni ke piningdad nga tafen?

²¹ Kub ga’ fan ni ngad ted fan e yalen ko gin ni gad ma par riy. Rogon e yalen u boch e nam e faanra ka yugu mman nga tafen be’ ndan piningem ma dariy ban’en nib kireb riy, ma boch e nam e thingar mu guy rogon ni ngan nang u m’on ni ngam man nga tafen be’. Boch e nam e faen ni ke pining e girdi’ nga tafen e ma pi’ e tin th’abi fel’ e ggan ko girdi’ ni kar bad nga tabinaw, mfini migid chon e tabinaw. Ma boch e nam e gubin e girdi’ ni yad ma kay fapi ggan ni taareb rogon. Ku bay boch e nam ni faanra kan pining be’ nga reb e abich, mab ga’ ni ma fek ban’en i yib, ma boch e nam e der ma lemnag e en ni ke piningem ni ngam fek ban’en. Ku rogon e yalen u boch e nam e ba ga’ ni ma siyeg faen ni kan pining ndabi yan ko yay nsom’on ara yay ni l’agruw ngay ni ke pining be’, ma boch e yalen e faan ga ra siyeg mab kireb. Ere, ngad rin’ed e tin rayog rodad ya nge felfelan’ e piin ni kar pininged gadad.

22. Mang nrib ga’ fan ni ‘ngaud golgad ngodad’?

²² Chiney e kari “chugur nga tungun urngin ban’en.” (1 Pet. 4:7) Kari chugur fare gafgow nib ga’ ndariy reb e gafgow ni kaa yib nga fayleng ni taareb rogon ngay. Chiney nri be gel e mo’maw’ ko par i yan e ba t’uf ni ngari gel e t’ufeg u thildad pi walagdad. Ri ireray e ngiyal’ nib puluw ni ngan fol ko fare fonow ni pi’ Peter ngak e pi Kristiano ni be gaar: “Mbinged e tabinaw romed [ara “um golgad,” NW] ngomed.” (1 Pet. 4:9) Arrogon, faanra ud golgad ngodad mab gel e felfelan’ ni gad ra tay, maku ban’en nib ga’ fan ni ngad rin’ed e chiney i yan ngaram.