Mu Ulul ni Ngam Dag e T’ufeg Nra Pi’ e Athamgil Nga Lanin’uy

1. Mang ban’en nib ga’ fan ni weliy Jesus murung’agen ko bin tomur e nep’ ni immoy rok pi gachalpen?

NAP’AN e bin tomur e nep’ ni immoy Jesus rok pi gachalpen u m’on ni nge yim’, me weliy murung’agen e t’ufeg ni sogonap’an 30 yay. Ri tamilangnag ngak pi gachalpen nsusun ni nge ‘bagayad me t’uf bagayad rok.’ (John 15:12, 17) Rogon e t’ufeg ni nge m’ug u thilrad e ngari gagiyel nra guy e girdi’ mi yad nang ni yad e tin riyul’ i gachalpen. (John 13:34, 35) Re t’ufeg ney ni weliy Jesus murung’agen e gathi kemus ni ban’en nra un thamiy, ya bay gelngin nrayog ni nge k’aringem ni ngam pag fam u boch ban’en. Ke yog Jesus ni gaar: “Rogon nib th’abi t’uf rok be’ e pi tafager rok e nge pi’ e pogofan rok ni fan ngorad. Ma gimed e pi tafager rog, ni faan gimed ra rin’ e tin ni kug ning chilen ngomed.”​—John 15:13, 14.

2. (a) Mang e n’en ni yimanang u murung’agen e pi tapigpig rok Got e ngiyal’ ney? (b) Mang boch e deer ni gad ra weliy e fulweg riy u lan e re article ney?

² Pi tapigpig rok Jehovah e ngiyal’ ney e yimanangrad ni bochan e yad ma paged farad u rogon ni yad ma dag e t’ufeg ngorad, nge rogon ni bay e taareban’ u thilrad. (1 John 3:10, 11) Gad ba felfelan’ ni bochan e ma m’ug e re t’ufeg ney rodad ni yugu demtrug ko mang nam, ara ganong, ara thin, ara rogon nni chuguliydad! Ere mang fan nrib t’uf ni ngaud daged e t’ufeg e ngiyal’ ney? Uw rogon ni ma pi’ Jehovah nge Jesus e athamgil nga lanin’dad u fithik’ e t’ufeg? Ma uw rogon nrayog ni ngad daged e re t’ufeg ngak e girdi’ ya nge yag ni ngad fal’eged lanin’rad ma gad pi’ gelngirad? ​—1 Kor. 8:1.

FAN NRIB T’UF NI NGAUD DAGED E T’UFEG E NGIYAL’ NEY

3. Mang e be buch rok boch e girdi’ ni bochan e ke “mo’maw’” e par e ngiyal’ ney?

³ Gad be par u ba ngiyal’ ni ke “mo’maw’” e par ya ke yoor e “magafan’ nge gafgow” ni gad be yan u fithik’. (2 Tim. 3:1-5; Ps. 90:10) Ere boor e girdi’ nrib gel e gafgow ni yad be tay, ma aram fan ni ke chuwan’rad ko yafos rorad. Ba pag 800,000 e girdi’ ni yad be lied yad ngar m’ad, ma gonap’an gubin e 40 e second ma bay be’ ni ke li’ ir ke yim’. Ere ba gel e kireban’ riy ni bochan e mus ngak e pi walagdad ma bay boch i yad ni ke chuwan’rad ko yafos rorad kar li’ed yad kar m’ad.

4. Chon mini’ e be weliy e Bible murung’agrad ni bay ba ngiyal’ ni taw ngay ma yad baadag ni ngar m’ad?

⁴ Bay boch e tapigpig rok Got kakrom ni yad ba yul’yul’ ni kar mochuchgad ni bochan e magawon ni yad be yan u fithik’, ma aram fan ni ke chuwan’rad ko yafos rorad ma yad baadag ni ngar m’ad. Bod rogon Job ni amith laniyan’ me gaar: “Ke mulan’ug, ke chuwan’ug ko yafos rog.” (Job 7:16, BT; 14:13) Maku arrogon Jonah ni ki kireban’ ma aram me gaar: “Somol, mu thang e pogofan rog, ya kab fel’ ni gu ra yim’ ko bin ni nggu par ni gub fos.” (Jonah 4:3) Ku arrogon Elijah ni profet ni lemnag ndakuriy e athap rok ma aram me gaar: “Somol, re gafgow ney ni ara’ ga’ngin e dabkiyog rog. Mfek e pogofan rog.” (1 Ki. 19:4) Yugu aram rogon ma kab ga’ fan u wan’ Jehovah e pi tapigpig rok nem ni yad ba yul’yul’, ma baadag ni ngar pared ni yad ba fos. Ere aram fan nde yog nib kireb rogon ni ur lemgad. Ya ayuwegrad ni ngar gelgad ko lem ni kar ted, miki pi’ e athamgil nga lanin’rad u fithik’ e t’ufeg, ya nge yag ni ngar ululgad ngar pigpiggad ngak ni yad ba yul’yul’.

5. Mang fan nib t’uf ni ngad daged e t’ufeg ngak pi walagdad e ngiyal’ ney?

⁵ Ngiyal’ ney e boor pi walagdad ni yad be yan fithik’ boch e magawon ni yad be mochuch riy, ere ba t’uf ni ngad daged e t’ufeg ngorad. Bay boch i yad ni yibe moningnagrad ara yibe gafgownagrad. Ma boch i yad e yad be athamgil u fithik’ e gafgow nge gathibthib ni yibe tay ngorad u taban e maruwel. Ma boch e ke aw parowrad ni bochan e boor e awa ni yad be maruwel riy ara maruwel rorad e be k’aring e mochuch ngorad. Ku bay boch i yad ni be buch boch e magawon nib ga’ u lan e tabinaw rorad. Rayog ni bochan e kar leayed be’ nder ma pigpig ku Jehovah ni gubin ngiyal’ ni be gathibthibnagrad. Bochan e pi magawon ney nge ku boch e towasar, ma aram fan ni boor i yad e yad be lemnag ndakuriy gelngirad ni ngar athamgilgad. Ere kar tababgad ni ngar lemnaged ndakuriy farad. Ere mini’ e rayog ni nge ayuweg e pi walag ney?

T’UFEG ROK JEHOVAH E MA PI’ E ATHAMGIL NGA LANIN’DAD

6. Uw rogon ni ma pi’ Jehovah e athamgil nga laniyan’ e pi tapigpig rok u fithik’ e t’ufeg?

⁶ Ke micheg Jehovah ngak e pi tapigpig rok ni yad ba t’uf rok nra t’ufegrad e chiney i yan nga m’on. Am lemnag laniyan’ piyu Israel u nap’an ni yog Jehovah ngorad ni gaar: “Ri gab fel’ u wun’ug ma bochan e ri gab t’uf rog ma aram e gu be gagiyegnagem nguun tayfam. Dab mu rus, ya gu bay rom!” (Isa. 43:4, 5, BT) Gad manang ni ba ga’ fadad u wan’ Jehovah ni be’ nge be’.a Ya be micheg e Bible ni gaar: “Somol ni Got romed e ra ayuwegmed ni bochan e ba gel gelngin. Bayi felfelan’ Somol ngomed.”​—Zef. 3:16, 17, NW.

7. Uw rogon nib taareb e t’ufeg rok Jehovah ko t’ufeg rok reb e matin ni be dibey fak? (Mu guy e sasing ni bay u tabolngin e re article ney.)

⁷ Ke micheg Jehovah nra pi’ gelngin, me fal’eg laniyan’ e girdi’ rok ndemtrug e magawon ni yad bay u fithik’. Ya yog ni gaar: “Bay mu boded e bbitir ni be tatuthnag e chitiningin, ni be dibey be ayuweg u fithik’ e t’ufeg. Bay gu fal’eg lanin’med u lan yu Jerusalem, ni bod e matin ni be fal’eg laniyan’ fak.” (Isa. 66:12, 13, BT) Mu lemnag rogon laniyan’ reb e bitir nib pagan’ u nap’an ni ke chibiy e chitiningin be fek ara yow be fafel u taabang! Ere ku arrogon Jehovah nri gab t’uf rok, ma baadag ni ngam par nrib pagan’um. Ere dabi maruwar u wan’um nrib ga’ fam u wan’ Jehovah.​—Jer. 31:3.

8, 9. Uw rogon nra gelnagdad e t’ufeg rok Jesus?

⁸ Ku baaray reb i fan ni kad nanged ni gad ba t’uf rok Jehovah. Be yog e Bible ni gaar: “Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.” (John 3:16) Ere re maligach ney ni pi’ Jesus ni fan ngodad e ku be micheg ni ka gad ba t’uf rok, ma re t’ufeg ney e ku rayog ni nge pi’ gelngidad. Be yog e Bible ni mus ko “gafgow” nge “magafan’” ndabi “daregdad u rogon ni gadad ba t’uf rok Got ni ke yog ngodad u daken Kristus Jesus ni ir e Somol rodad.”​—Rom. 8:35, 38, 39.

⁹ Yu ngiyal’ e bay boch e magawon rodad ni ma warnag gelngidad, ara lanin’dad, ara ra k’aringdad ni nge dabkud felfelan’gad ko pigpig ni gad ma tay ngak Jehovah. Machane faan gad ra lemnag rogon feni gad ba t’uf rok Kristus, ma aram e rayog ni nge pi’ gelngidad ni ngad athamgilgad. (Mu beeg e 2 Korinth 5:14, 15.) T’ufeg rok Jesus e ra k’aringdad ni ngad adaged ni ngad pared ni gad ba fos ma gad be pigpig ngak Jehovah. Mus ni faan gad ra gafgow ni bochan boch ban’en ni ma gafgow e girdi’ riy, ara yibe gafgownagdad, ara ke kireban’dad, ara be magafan’dad, ma re t’ufeg ney e ra ayuwegdad ni nge dabi mulan’dad.

BA T’UF NI NGAD DAGED E T’UFEG NGAK PI WALAGDAD

10, 11. Mini’ e ba milfan ngak ni nge pi’ e athamgil nga laniyan’ e pi walag ni ke kireban’rad? Mu weliy rogon.

¹⁰ Ku ma fanay Jehovah e ulung rok ni nge pi’ e athamgil nga lanin’dad u fithik’ e t’ufeg. Bod nnap’an gad ra dag e t’ufeg ngak pi walagdad, ma aram e gad be micheg nib t’uf Jehovah rodad. Ere gad ma rin’ e tin nrayog rodad ni ngad ayuweged pi walagdad ni ngar nanged nib ga’ farad u wan’ Jehovah ma yad ba t’uf rok. (1 John 4:19-21) I yoloy apostal Paul ni gaar: “Nge bigimed mi i pi’ e athamgil nga laniyan’ bigimed, me bigimed mi i ayuweg bigimed, ni bod rogon ni gimed be rin’ e chiney.” (1 Thess. 5:11) Machane gathi kemus ni yigoo piin piilal e rayog ni ngar rin’ed e re n’ey. Ya ra bagadad ma rayog rok ni nge folwok rok Jehovah nge Jesus ni aram e nge fal’eg laniyan’ e pi walag.​—Mu beeg e Roma 15:1, 2.

¹¹ Bay boch e walag ni yad be gafgow ni bochan e ba gel e mochuch ara magafan’ ni yad be tay, ma sana ba t’uf ni nga ranod ngar guyed e togta nge tafalaynagrad. (Luke 5:31) Yugu aram rogon ni manang e piin piilal nge ku boch e walag ni gathi yad boch e togta nrayog ni ngar ayuweged e pi walag ney ko magawon rorad, machane ayuw nge athamgil ni yad ma pi’ e rib ga’ fan. Ere gubin e girdi’ u lan e ulung ma rayog ni ngar ‘pied e athamgil ngak e piin ni yad be rus [“piin ni yad be mochuch,” NW], ma yad ayuweg e piin ni yad mmeewar, mu um pired nib gum’an’med rok urngin e girdi’.’ (1 Thess. 5:14) Gad baadag ni ngad nanged rogon laniyan’ e pi walag. Ere ba t’uf ni ngad gum’an’gad u puluwrad ma gad non ngorad u reb e kanawo’ nra fal’eg lanin’rad u nap’an nra kireban’rad. Ere gur, ga ma gay rogon ni ngam pi’ e athamgil nga laniyan’ e girdi’? Mang e rayog ni ngam rin’ ya nge yag ni ngkum mon’ognag rogon ni ga be fal’eg laniyan’ ara ga be pi’ e athamgil ngak e pi walag?

12. Mu weliy reb e ban’en ni ke buch rok be’ ni ke pi’ e ulung e athamgil nga laniyan’ u fithik’ e t’ufeg.

¹² Bay reb e walag nib pin u Europe ni yog ni gaar: “Yu ngiyal’ e gu ma lemnag ni nggu lieg nggum’, machane bay e girdi’ ni yad ma ayuwegeg. Re ulung ni baaram ni gu bay riy e ir e ke ayuweg e yafos rog. Pi walag ni yad bay u rom e gubin ngiyal’ ni yad be pi’ e athamgil nga lanin’ug ma yad be dag e t’ufeg ngog. Yugu aram rogon ni boch i yad e manang ni ba gel e mochuch ni gu be tay, machane yad gubin ni yad ma ayuwegeg. Bay ba wu’ i mabgol ni yow ma ayuwegeg ko tirok Got ban’en ni kar parew ni gowa kar mangew gallabthir rog. Ya gubin ngiyal’ ni yow ma ayuwegeg nib fel’ rogon.” Bin riyul’ riy e, gathi gad gubin nrayog ni nge taareb rogon e ayuw ni ngad pied, machane ra bagadad ma rayog ni nge rin’ e tin rayog rok ni nge ayuweg e pi walag.b

ROGON NI NGAM PI’ E ATHAMGIL NGA LANIYAN’ E GIRDI’ U FITHIK’ E T’UFEG

13. Mang e ba t’uf ni ngad rin’ed ya nge yag ni ngad fal’eged laniyan’ e girdi’?

¹³ Mmotoyil nib fel’ rogon. (Jas. 1:19) Nap’an ni gad ra motoyil ngak be’, ma aram e be m’ug riy ni gad be gay rogon ni ngad nanged rogon laniyan’, ma gad dag e t’ufeg ngak. Mu fith boch e deer ngak ya nge yag ni ngam nang rogon laniyan’. Rayog ni nge m’ug u owchem ko riyul’ ni ga be lemnag fa danga’. Nap’an ni be non, mag motoyil ngak u fithik’ e gum’an’, mag pag nge weliy laniyan’ ndab mu th’ab e thin rok. Ya faan ga ra motoyil ngak nib fel’ rogon, ma aram e rayog ni ngam nang laniyan’, maku rayog ni nge pagan’ ngom. Faan ga ra rin’ ni aray rogon, ma aram e rayog ni nge mom rok ni nge motoyil ko n’en ni nga mog ngak u nap’an ni ga be guy rogon ni ngam ayuweg. Nap’an ni ga ra dag ni ga be lemnag rarogon e girdi’, ma aram e rayog ni ngam fal’eg lanin’rad.

14. Mang fan ndab ud sapgad nga thibngin e girdi’?

¹⁴ Dab mu sap nga thibngin be’. Ra gel e mochuch ku be’ ni faanra lemnag ni kemus ni gad be sap nga thibngin. Re n’ey e ra mo’maw’nag ngodad ni ngad ayuweged. Aram fan ni be yog e Bible ni gaar: “Marog thin e rayog ni nge maad’ad nga laniyan’ be’ nib toar ni bod bangi sayden, machane thin nnog nib gonop e rayog ni golnagey.” (Prov. 12:18, BT) Yugu aram rogon ndarud lemnaged ni nga dogned ban’en ni nge kirebnag laniyan’ be’ ni ke mochuch, machane rayog ni nge buch e re n’ey ni faanra dab da lemgad u m’on ni ngad nonad. Ere faanra nge pagan’ reb e walag ngodad, ma thingar da guyed rogon ni nge mich u wan’ nriyul’ ni gad be gay rogon ni ngad nanged fan e magawon rok.​—Matt. 7:12.

15. Mang boch ban’en nrayog ni ngad fanayed ni ngad fal’eged laniyan’ e girdi’ ngay?

¹⁵ Mu fanay e Thin rok Got ni ngam fal’eg laniyan’ e girdi’ ngay. (Mu beeg e Roma 15:4, 5.) Bible e ke yib rok fare “Got ni ir e ma yib e gum’an’ nge athamgil laniyan’ rok ngodad.” Ere aram fan ndab da gingad ngay nrayog ni ngad pirieg e thin riy nra pi’ e athamgil nga lanin’dad. Maku reb e, bay fa gal babyor ni Watch Tower Publications Index nge fare Research Guide for Jehovah’s Witnesses ni thin ni Meriken nrayog ni ngan fanay. Kan ngongliy e gal babyor ney ni nge ayuwegdad ni ngad pirieged e thin nu Bible nge boch e babyor nrayog ni ngad fanayed ni ngad fal’eg laniyan’ e pi walag riy, mu kud pied e athamgil nga lanin’rad.

16. Mang l’agruw e fel’ngin nrayog ni nge ayuwegdad u nap’an ni gad ra pi’ e athamgil nga laniyan’ be’ ni ke mulan’?

¹⁶ Mu dag e runguy ngak e pi walag mag non ngorad u fithik’ e sumunguy. Jehovah e ir fare “Got ni Chitamangin e Somol rodad i Jesus Kristus, me ir e Chitamangiy nrib tarunguy e girdi’,” ma ma ‘runguy’ e pi tapigpig rok. (Mu beeg e 2 Korinth 1:3-6, NWc; Luke 1:78; Rom. 15:13) Ke dag Paul e kanawo’ nib fel’ nrayog ni ngad folwokgad riy ni bochan e ke folwok rok Jehovah. I yog ni gaar: “Nggu pired romed ni gamad mmunguy ni bod feni munguy ba matin ngak pi fak ni be ayuwegrad. Bochan e gimed ba t’uf romad ma gamad fal’eg rogomad ni gathi ke mus ni Thin Nib Fel’ ni yib rok Got e nggu bad gu pied ngomed, machane ngkug pied gamad nga pa’med nggu ayuweged gimed. Ya ri gimed ba t’uf romad!” (1 Thess. 2:7, 8) Ere nap’an ni gad ra dag e runguy ngak e pi walag, ma aram e gad be pi’ e athamgil nga lanin’rad ni bod rogon ni rin’ Jehovah!

17. Faanra nge puluw rogon ni ngad lemnaged e pi walag, ma uw rogon nra ayuwegdad e re n’ey u nap’an ni ngad pied e athamgil nga lanin’rad?

¹⁷ Dab mu lemnag ni gubin ban’en nra rin’ e pi walag mab fel’. Ya susun ni nge puluw rogon ni ngam lemnagrad. Faan ga ra lemnag ni gubin ngiyal’ ni ma rin’ e pi walag ban’en nib fel’, ma nap’an ni yad ra oloboch ma re n’ey e ra k’aring e kireban’ ngom. (Ekl. 7:21, 22) Dab da paged talin nder ma yog Jehovah ngodad ni ngad rin’ed boch ban’en ni manang ndabiyog rodad. Ere ba t’uf ni ngad gum’an’gad u puluwdad. (Efe. 4:2, 32) Dubdad ni ngad k’aringed e pi walagdad ni ngar lemnaged nde gaman e tin ni yad be rin’ ara da taareb rogonnaged e pi n’en ni be yag ni ngar rin’ed ko tin ni be rin’ yugu boch e girdi’. Ya ngad pied e athamgil nga lanin’rad ma dogned ngorad e pi n’en ni yad be rin’ nib fel’. Re n’ey e ra ayuwegrad ni ngar pigpiggad ngak Jehovah ni yad ba felfelan’.​—Gal. 6:4.

18. Mang fan ni gad baadag ni ngad pied e athamgil nga lanin’dad u fithik’ e t’ufeg?

¹⁸ Gubin e tapigpig rok Jehovah ma ba ga’ farad u wan’row Jesus. (Gal. 2:20) Rib t’uf e pi walagdad rodad, ere thingar da ngongolgad ngorad u fithik’ e sumunguy nge t’ufeg. Rayog ni ngad rin’ed e re n’ey ni aram e ngad maruweliyed e “pi n’en ni ma fek e gapas i yib, nge pi n’en ni ma gelnagdad.” (Rom. 14:19) Ri gad be athapeg e ngiyal’ ni ke Paradis e fayleng, ma dakuriy ban’en nra k’aring e kireban’ ngodad! Ya ngiyal’ nem e dakuriy e m’ar nge mahl. Ma dabki yim’ e girdi’ ni bochan e denen ni ke af ngorad, ma dab kun gafgownagrad, ara sum e magawon u lan e tabinaw, ara yugu boch e magawon nra k’aring e kireban’ ngorad. Ra yan i tomuren fare biyu’ e duw, ma gubin e girdi’ ni kar flontgad. Ma piin ni yad ra par ni yad ba yul’yul’ u nap’an ni yira pi’ e bin tomur e skeng u tungun fare biyu’ i duw e aram e piin nra pofrad Jehovah ngar manged pi fak ni yad ra par u fayleng, ma aram ma yad un ko “ko flaab rok pi fak.” (Rom. 8:21) Ere manga yigi gad gubin ma ngad daged e t’ufeg nra pi’ e athamgil nga laniyan’ e pi walag, ma gad ayuweged gadad ni ngad thapgad ko bin beech e fayleng rok Got.