Reb e Rran ni Ngan Ognag e Fol Bible ko Girdi’
1 Ra tabab ko January, ma ra reb e ulung ma nge dugliy reb e Sabado ara Madnom ni ngan guy rogon ni ngan tababnag e fol Bible riy ko girdi’, nib fel’ nfaanra bin som’on e Sabado ara Madnom u reb e pul. Faanra dabun be’ ni ngan fil e Bible ngak ma rayog ni ngan pi’ fare babyor ni Mang E Ba T’uf ara boch e magazine nib beech ngak. Susun ni nge guy gubin e piilal nge ministerial servant rogon ni ngar uned ko re maruwel ney mar ayuweged e tin ni ka bay e tamachib u rogon ni ngar ognaged e fol Bible ngak e girdi’.
2 Piin piilal e yad ra turguy ko bin ngan e gal rran ney e yira tay u gubin e pul ni fan ko re maruwel ney. Ngaun puguran e re n’ey ko piin ni yad ma un ko machib u lan e ulung nge yog nra fal’eged rogorad u m’on riy ya nap’an ni nga ranod ko machib ma ba’ ni ngar ognaged e fol Bible ko piin ni yad ra mada’nag.
3 Rogon ni Ngan Fl’eg Rogoy: Bay boch e thin ni kan tay ko Machib Ko Gil’ilungun ko September 2007 ko page 6 nrayog ni ayuwegey u rogon ni ngan tababnag e fol Bible ngak e girdi’ ni yibe fanay fare babyor ni Mang E Ba T’uf. Boch e girdi’ e sana yad ra fanay reb e tract ni ngar tababnaged e fol Bible riy ngak be’ ni bod fare tract ni Ga Baadag ni Ngam Nang e Tin Nriyul’? Ra kan mada’nag be’ ma kan pi’ reb e babyor ngak ma rayog ni ngan tababnag e fol Bible ngak u nap’an e yay ni migid ni kan sul ni ngan guy. Pi piilal nge ministerial servant ni kan tayrad ni ngar yarmiyed e muulung ko machib e ngar rin’ed u lan 10 i yan ko 15 e minit. Maku susun ni ngan weliy ara ni dag rogon ni ngan fanay l’agruw e kanawo’ u rogon ni ngan tababnag e fol Bible riy ngak be’.
4 Gad manang ni gathi gubin e girdi’ ni yad ra adag ni ngan fil e Bible ngorad fa ra ululgad ko fol Bible. Machane, dab da paged e re n’ey nge talegdad ndab kud gayed rogon i tababnag e fol Bible ngak e girdi’ ya Jehovah e ir e be pow’iy e piin ni yad baadag e machib ko ulung rok. (John 6:44) Maruwel rodad e gathi kemus ni ngad yunged awochngin e thin nriyul’ nga gum’irchaen e girdi’ ya ku thingar ni rannag ni aram e ngan ayuwegrad nge yan lik’ingin nga fithik’ i lanin’rad. Re n’ey e ba muun ngay ni ngad filed e Bible ngak e piin ni yad baadag e machib. Faan gad ra rin’ ni aray rogon ma aram e gad be maruweliy e maruwel ni ke pi’ Got ngodad.—1 Kor. 3:9.