Mu Gay Rogon ni Ngam Tababnag e Fol Bible ko Girdi’
1. Mang e ba muun ko ngan lebguy fapi thin ni yog Jesus u Matthew 28:19, 20?
1 Ke tay Jesus chilen ni ngad ‘pingeged e girdi’ ngar manged pi gachalpen’ ma gad fil ban’en ngorad. (Matt. 28:19, 20) Ere aram fan nib t’uf ni gubin ngiyal’ ma ngad guyed rogon ni ngad tababnaged e fol Bible ngak be’, ma gathi kemus nu nap’an e ngiyal’ ni kan dugliy ni ngan tababnag e fol Bible ngak e girdi’. Pi thin ni baaray e rayog ni nge ayuwegem.
2. Mini’ e rayog ni ngad ognaged e fol Bible ngak?
2 Mu Ognag e Fol Bible: Faan gad ra ognag e fol Bible ko girdi’, ma dabisiy ni gad ra pirieg be’ nib adag ni nge fil e Bible. (Ekl. 11:6) Ka am fith be’ ko ba adag ni nge fil e Bible fa? Bay reb e ulung u Meriken ni kar athamgilgad ni ngar rin’ed e re n’ey u lan reb e pul. Ma angin ni ke yib riy e 42 e girdi’ ni kar tababgad i fil e Bible ngorad! Dab mu lemnag ni gubin e girdi’ ni gimew ra non e manang ni gad ma fil e Bible ko girdi’. Ere mang ndabi yay ni migid ni kam sul ni ngam guy be’ ma ga ognag e fol Bible ngak? Dariy ban’en nib kireb riy nfaanra ke yog ni dabun ni nge fil e Bible. Ya rayog ni ngam athamgil ngam thilyeg e lem rok ni buchuuw ma buchuuw. Kam fith ngak e en buguli yoror rom, ara girdi’ rom, ara girdi’ u tabon e maruwel rom, ara bitir u skul rom ko yad baadag ni ngam fil e Bible ngorad, fa? Maku reb e rayog ni ngam fith e en ni ga be fil e Bible ngak ko bay boch e fager rok ara girdi’ u tabinaw rok ni yad baadag ni ngar filed e Bible.
3. Mang reb e babyor ni bay rodad nrayog ni nge ayuwegdad ni ngad tababnaged e fol Bible ko girdi’, ma mingiyal’ e rayog ni ngad fanayed?
3 Ban’en Nra Ayuwegey: Reb e ban’en nra ayuwegey ni ngan tabab i fil e Bible ngak be’ e aram fare tract ni Ga Baadag ni Ngam Nang e Tin Nriyul’? Rayog ni ngam pi’ e re gi babyor ney ngak e girdi’ ndemtrug ko yad ma fek e pi babyor rodad fa danga’. Rayog ni ngam wereg ko business territory, ara u nap’an ni yibe machib u kanawo’, ara nap’an ni kam yoloy e babyor ngak be’, ara nap’an ni kam sul ni ngam guy be’. Maku rayog ni ngam tay ko tabinaw ndariy be’ riy. Mang ndab mu fek boch e pi babyor ney u nap’an u nap’an ni ga be un u bus, ara taxi, ara nap’an ni kam man nga kantin, ara nga tabon e maruwel? Fapi thin ni bay u keru’ e be weliy murung’agen e fol Bible ni gad ma tay nge fare ke babyor ni Mang e Ri Be Fil e Bible?
4. Uw rogon ni ngad fanayed fare tract ni Ga Baadag ni Ngam Nang e Tin Nriyul’ ni ngad tababnaged e fol Bible ngak be’?
4 Tomuren ni kam pi’ e gi tract ney ngak be’, ma rayog ni ngam dag ngak fapi deer ni bay u keru’, ma ga fith ni lungum, “Bin ngan e pi deer ney e ga baadag ni ngam nang e fulweg riy?” Ngemu’ ma ga dag e fulweg riy ngak u lan fare tract, mu kum dag e thin ni bay u keru’ ni be weliy murung’agen e fol Bible ni gad ma tay. Ngemu’ ma ga dag ngak e gin ni ku yira pirieg boch e thin riy u lan fare babyor ni Mang e Ri Be Fil e Bible? ni bay rogon ko n’en ni kam weliyew, ma ga pi’ fare babyor ngak, ma ga dugliy ba ngiyal’ ni ngkum sul ngam guy.
5. Mang fan ni ngad gayed rogon ngad tababnaged e fol Bible ngak ko girdi’ u nap’an nra mab e kanawo’ ngodad?
5 Ka bay e girdi’ ko gin ni gad ma machib riy ni yad baadag ni ngar nanged e n’en nri be fil e Bible. Ere faanra ud gayed rogon ni ngad tababnaged e fol Bible ko ngiyal’ ni ke mab e kanawo’ ngodad, ma aram e rayog ni ngad pirieged boch e girdi’ nrayog ni ngad ayuweged nga ranod ko fare kanawo’ ni yan ko yafos.—Matt. 7:13, 14.