Ngan Nameg ni Ngan Ayuweg e Girdi’ ni Ngar Manged Boch i Gachalpen Jesus
1. Mang e ba t’uf ni ngad rin’ed ya nge yag ni ngad ayuweged e yafos ko girdi’?
1 Fare service report ko duw ni 2014 e be tamilangnag feni rib pasig e girdi’ rok Got ma kub mudugil lanin’rad ni ngar machibnaged fare thin nib fel’ ni murung’agen Gil’ilungun Got. (Matt. 24:14) Bochan ni gad be machib u mit e tabinaw i yan, maku gad be wereg e pi tract nge invitation ni fan ko special campaign rodad, nge machib ni yibe tay u fithik’ e girdi’ ni yoor, ma aram fan ni be yag ni ngad weliyed fare thin nib fel’ ngak e girdi’ u ga’ngin yang e fayleng e ngiyal’ ney. Machane, faanra ngad ayuweged e yafos ko girdi’, ma thingar da ayuweged yad u daken e fol Bible ni ngar manged boch i gachalpen Jesus.—1 Tim. 2:4.
2. Mang boch e deer ni ngad fithed gadad riy ya nge yag ni ngad athamgilgad ngad filed e Bible ngak be’?
2 Ngaum Athamgil Ngam Ognag e Fol Bible Ngak Be’: Nap’an ni ga ra mada’nag be’ ni baadag e fol Bible, ma gur, ga ma guy rogon ni ngam nang e gin ni ma par riy nge telefon rok, ya nge yag ni ngam sul ngak nib papey ngam tababnigew e fol Bible? Mingiyal’ e tomur ni kam guy rogon ni ngam ognag e fol Bible ngak be’ ni kam mada’nag u nap’an ni ga be yan ko machib? Maku mingiyal’ e tomur ni kam ognag e fol Bible ngak e piin ni ga ma sul ni ngam pi’ e babyor ngorad? Kaam pag fare video ni kenggin e Mang Fan ni Ngam Fil e Bible? nge Mang e Yima Rin’ u Nap’an e Fol Bible? ngak e piin ni gimed nga maruwel, ara piin ni gimed nga skul, ara buguliyoror romed, ara girdien e tabinaw romed, ara ku boch e girdi’ ni ga manang? Nap’an ni ga ra fanay e cart ara tebel ni bay e babyor riy, ma gur, ga ma athamgil ni nga mog ngak e piin ni yad ma fek fapi babyor rodad nrayog ni ngan fil e Bible ngorad ndariy puluwon?
3. Mang e ba t’uf ni ngad rin’ed ni faanra ngad filed e tin riyul’ ngak e girdi’ nib fel’ rogon?
3 Ayuw Nra Pi’ Jehovah nge Jesus: Nap’an ni yog Jesus fare thin nu Bible ni ngan ‘pingeg e girdi’ ngar manged pi gachalpeg,’ ma som’on e fanay fare bugithin ni “mmarod,” ma re n’ey e be tamilangnag Jesus riy nib t’uf ni ngad athamgilgad. Machane, de pagdad ni ngad rin’ed e re maruwel ney ni yigoo gadad, ya ke micheg nra ayuwegdad. (Matt. 28:19, 20) Ki pi’ Jehovah gelngin nib thothup ni kub muun ngay e pi talin e maruwel nib t’uf rodad ni ngad rin’ed e re maruwel ney, miki skulnagdad u rogon ni ngad rin’ed. (Zek. 4:6; 2 Kor. 4:7) Rayog ni ngad meybilgad ngak Jehovah ni nge ‘pingeg lanin’dad ni nge m’agan’dad ngay’ ni ngad uned i rin’ e re maruwel ney nrib ga’ fan.—Fil. 2:13.
4. Mang fan ni ngad nameged ni ngad ayuweged e girdi’ ni ngar manged boch i gachalpen Jesus?
4 Rib gel e felfelan’ ni gadad ma tay u nap’an ni gad ra machibnag fare thin nib fel’ ngak e girdi’. Machane, ku ra gel e felfelan’ rodad ni faan gad ra fil e tin riyul’ ngak be’, mi gad ayuweg ni nga darod ko fare “kanawo’” ni yan ko yafos u taabang. (Matt. 7:14; 1 Thess. 2:19, 20) Maku bin th’abi ga’ fan riy e faan gad ra nameg ni ngad ayuweged e girdi’ ni ngar manged boch i gachalpen Jesus, ma gad ra felfelan’nag Jehovah ni “dabun ni nge n’ag be’, ya ba adag ni nge urngin e girdi’ mi yad pi’ keru’rad ko urngin e denen ni yad be rin’.”—2 Pet. 3:9.