Mu Ayuweg e Piin Ndar Nanged Rogon e Beeg Babyor
1. Mang magawon e gad ma mada’nag yu ngiyal’ u nap’an e machib?
1 Bay yu ngiyal’ ni gad ra yan ko machib ma gad ma mada’nag boch e girdi’ ni gathi ri yad manang e beeg babyor. Ere, uw rogon ni ngad ayuweged yad?
2. Uw rogon ni ngad ted fan e piin ndar nanged rogon e beeg babyor, ma mang fan?
2 Ngan Tay Farad: Jehovah e der yaliy rogon tolngin e skul rok be’ ya n’en ni bay u gum’irchaen e ir e be yaliy. (1 Sam. 16:7; Prov. 21:2) Ere dab uda sapgad nga but’ ko piin ndar nanged rogon e beeg babyor. Ya yad ra adag ni ngad ayuweged yad ni faanra ud sumunguygad ngorad ma gad be tay farad. (1 Pet. 3:15) Rogon ni ngan rin’ e re n’ey e, bod nnap’an ni gimew be beeg reb e paragraph ma dab mu towasariy ni nge mang ir e beeg ni faanra dabun. Ya nap’an nra mon’og ko fol Bible, ma dabisiy nra gay rogon ni nge nang rogon e pow babyor ya nge yog ni i beeg e Bible “ni rran nge nep’.”—Ps. 1:2, 3.
3. Mang boch e kanawo’ nrayog ni ngad ayuweged e piin gad ma fil e Bible ngorad ndar nanged rogon e beeg babyor?
3 Rogon ni Ngad Ayuweged e Piin Gad Ma Fil e Bible Ngorad: Ba fel’ ni ngad fanayed e sasing u lan e pi babyor rodad ngad filed ban’en riy ngak e en ni gad be ayuweg. Rayog ni ngam fith ngak ko uw rogon fare sasing u wan’. Mu lemnag boch e deer ni ngam fith ngak nra ayuweg nge nang fan e n’en ni bay ko fare sasing. Mag beeg boch e thin nu Bible nib puluw ko re sasing nem. Maku rayog ni ngam fanay e re sasing nem u nap’an ni ngam sulow nga daken e n’en ni kam filew. Dabi pag oren ban’en ni ngam filew u biyay e fol Bible. Mu tamilangnag kenggin e thin ko fare guruy ni gimew ra fil mag guy rogon dab mu uneg boch ban’en ngay ndariy rogon ko n’en ni gimew be fil. Mu beeg e Bible ngak mag fith boch e deer nib puluw ko fare thin nu Bible ni kam beeg. Ga ra rin’ ni aray rogon ma dabisiy nra adag ni nge gay rogon nge mon’og ko beeg babyor miki gay rogon ni nga i fol Bible ni goo ir.
4. Uw rogon ni ngad ayuweged e en ni gad be fil e Bible ngak ni nge mon’og ko beeg babyor?
4 Rogon ni Ngan Ayuweg Be’ Nge Nang Rogon e Beeg Babyor: Girdi’ ndar nanged e beeg babyor e ba fel’ rogon nra mit ban’en ngorad. Ra fal’eg e motoyil ngak e en ni be beeg e Wulyang Ntagil’ E Damit u nap’an e muulung me fal’eg i yaliy ko ke rok e babyor fa beeg ni ba’ laman ma rayog ni nge mon’og ko beeg babyor. Maku rayog ni nge yarmiy e piin piilal ni ngan skulnag e girdi’ u rogon e beeg babyor. Gad ra fol ko pi thin ney ma rayog ni ngad ayuweged e piin ndar nanged e beeg babyor ngar nanged e “thin ni bay u lan fare babyor nib thothup,” ni ir e ra yognag e tamilangan’ nge yafas ngorad.—2 Tim. 3:15.