Rogon ni Ngan Ayuweg e Piin Ndar Nanged e Beeg Babyor

1. Mang boch e magawon ni ma sum u nap’an ni gad ra guy rogon ni ngad filed e Bible ngak boch e girdi’ ndar nanged e beeg babyor?

¹ Rayog ni ngad mada’naged boch e girdi’ u nap’an e machib ni yad baadag e tirok Got ban’en, machane yad be tamra’ ni ngar beeged e Bible nge ku boch e babyor. Ere, nap’an ni gad ra pi’ fare ke babyor ngorad ni Mang e Ri Be Fil e Bible? ko yay nsom’on ni kad mada’gad, ma sana dabi yib angin. Ere, uw rogon ni ngad ayuweged e pi girdi’ ney ko tirok Got ban’en? Kan fith boch e walag u boor ko 20 e nam u fayleng e n’en ni kar rin’ed, ma baaray e n’en ni ka rogned aray u but’.

2. Mang boch e babyor nrayog ni ngan fanay ni ngan ayuweg be’ ni gathi ri manang rogon e beeg babyor?

² Faanra gathi ri manang ara ri de nang facha’ rogon e beeg babyor, ma rayog ni ngam tabab i fil e Bible ngak ni ga be fanay fare brochure ni Listen to God ara fare brochure ni kenggin e Mmotoyil ngak Got me Yog e Yafas ni Manemus Ngom. Immoy reb e pioneer u Meriken ni dag ngak be’ e gal brochure ney me fith ngak ko bin ngan e baadag ni nge fil. Ki yog e branch ofis u Kenya ni kub ga’ angin e gal brochure ney ni yima fanay u rom ni bochan e girdi’ nu Africa e ba ga’ ni yima fil ban’en ngorad u daken e pi chep ni yima weliy ngorad, mab ga’ ni gathi ri yad ma beeg boch ban’en ni kan yoloy nga but’ nge deer mi yad gay e fulweg riy. Be’ nib skul e ra adag ni ngan fil e Bible ngak ni aray rogon, machane be’ nde skul e danga’. Maku reb e, faanra manang facha’ buchuuw e beeg babyor, ma bay boch e walag ni kar pirieged nib fel’ ni ngar fanayed fapi brochure ni kenggin e Thin nib Fel’ ni Yib rok Got! ara Rayog ni Ngam Mang Fager Rok Got! ara fare ke babyor ni kenggin e, Babyor Rog Ni Chep Nu Bible.

3. Mang e gad ra nang u murung’agen e piin ndar nanged e beeg babyor ma rayog ni nge ayuwegdad ni ngad filed ban’en ngorad?

³ Mog ngak Boch Ban’en nib Fel’ ni Ke Rin’: Pi girdi’ nem ndar nanged rogon e beeg babyor e rayog ni ngaur tamra’gad ara ra lemnaged ndariy farad. Ere, ba ga’ nib fel’ ni ngad ayuweged yad ni nge dab kur tamra’gad ya nge yag nda filed e tin riyul’ ngorad. Yooren e girdi’ ndar nanged e beeg babyor e ba fel’ lolugrad ma rayog ni ngar filed ban’en. Ere, ngam tay farad. (1 Pet. 3:15) Ya faan ga ra rin’ ni aray rogon ma yad ra adag ni ngar ululgad i fil e Bible ni faanra yad be guy nib ga’ angin e athamgil ni yad be tay ma yad be mon’og ko tirok Got ban’en. Ere, nga u mog e tin nib fel’ ni kar rin’ed.

4. Uw rogon ni ngad pied e athamgil nga laniyan’ e piin ni gad be fil e Bible ngorad ni gathi ri yad manang e beeg babyor ni ngar fal’eged rogorad ni fan ko fol Bible ni gad ma tay?

⁴ Mus ni faanra gathi ri manang facha’ e beeg babyor, ma ngam pi’ e athamgil nga laniyan’ ni nga i fal’eg rogon u m’on ko fol Bible ni gimew ma tay. Bay boch e walag u South Africa ni yad ma pi’ e athamgil nga laniyan’ e piin ni yad ma fil e Bible ngorad ni nga rogned ngak be’ u tabinaw rorad ara reb e fager rorad ni manang e beeg babyor ni nge ayuwegrad. Ku bay reb e walag u Britain ni ma pi’ e athamgil nga laniyan’ e piin ni ma fil e Bible ngorad ni ngar fal’eged rogorad u m’on ko fol Bible ni yad ma tay. Rogon ni ma rin’ e aram e nap’an ni yow be beeg facha’ in e paragraph u nap’an e fol Bible ni yow be tay, ma aram me pi’ e ke rok e babyor ngak facha’ ni nge yaliy ya nge yag ni nang feni mom ni nge pirieg e fulweg ko deer ni bay ko fare babyor ni faanra fil u m’on riy. Ku bay reb e walag u India ni ma pi’ e athamgil nga laniyan’ e piin ni ma fil e Bible ngorad ni ngar yaliyed e pi sasing u lan e bin migid e guruy ni yad ra fil ngemu’ mi yad fal’eg i lemnag u m’on riy.

5. Uw rogon ni ngad gum’an’niged gadad u nap’an ni gad be fil e Bible ngak be’?

⁵ Mu Gum’an’nigem: Demtrug e re ke babyor ni ga be fanay, ma ngam tiyan’um ko n’en nib ga’ fan ni ngam fil ngak facha’, mag ayuweg ni nge nang fan nib fel’ rogon. Som’on e sana ba fel’ ni kemus ni 10 i yan ko 15 e minit ni ngam filew e Bible riy. Dab mu filew nge pag urngin, ya rayog ni kemus ni ngam filew in e paragraph. Mu gum’an’nigem ni faanra be beeg e babyor nib sagaal. Ya ra munmun u nap’an ni ke ga’ fan Jehovah u wan’ ma rayog nra lemnag rogon ni nge mon’og u rogon e beeg babyor ni ma tay. Ere, rayog ni ngaum pining ni nge un ko muulung ya nge yag ni mon’og ko tirok Got ban’en.

6. Uw rogon ni ngad ayuweged boch e girdi’ ni ngar nanged rogon e beeg babyor?

⁶ Faanra nang be’ rogon e beeg babyor, mab papey nra mon’og ko tirok Got ban’en. (Ps. 1:1-3) Boor e walag ni yad ma fanay fare ke babyor ni Apply Yourself to Reading and Writing (Mu Fil Rogon e Yol nge Beeg Babyor) u lan in e minit u tomuren e fol Bible ni kar ted e en ni yad be fil e Bible ngak ya nge yag nra ayuweged facha’ ni nge nang rogon e beeg babyor. Faanra ke mulan’ faen ni ga be fil e Bible ngak, ma sana rayog ni ngam weliy ngak boch ban’en ni ke yag ni nge rin’. Mog ngak nra tow’athnag Jehovah ko athamgil ni be tay. (Prov. 16:3; 1 John 5:14, 15) Bay boch e walag u Britain ni yad ma pi’ e athamgil nga laniyan’ e piin ni yad ma fil e Bible ngorad ni ngar nameged boch ban’en nra ayuwegrad ni ngar mon’oggad. Bod ni sana som’on e rayog ni ngar filed e abc, ngemu’ mi yad fil rogon ni ngar gayed boch e thin nu Bible mi yad beeg, ngemu’ mi yad beeg boch e babyor ni bay e thin nu Bible riy nib mom i beeg. Ra ngan ayuweg be’ ni nge nang rogon e beeg babyor, mab muun ngay ni ngan ayuweg ni nge adag e beeg babyor, ma gathi kemus ni ngan fil ngak rogon ni nge rin’.

7. Mang fan nsusun e dab da talgad ndab da weliyed e tin riyul’ ngak e piin ndar nanged e beeg babyor?

⁷ Der ma darifannag Jehovah e piin ndariy e skul rorad. (Job 34:19) Ya Jehovah e ma fal’eg i yaliy gum’irchaen e girdi’. (1 Kron. 28:9) Ere, dab mu tal ndab mu weliy e tin riyul’ ngak e piin ndar nanged e beeg babyor. Ya boor ban’en nrayog ni ngam fanay ni ngam ayuweg be’ ni aray rogon. Ma ra munmun ma rayog ni ngam filew facha’ fare ke babyor ni Mang e Ri Be Fil e Bible?, mag ayuweg ni nge tamilang e thin nu Bible u wan’.