Rogon ni Ngan Fal’eg Rogoy u M’on ko Service Meeting
1. Mang fan fare Service Meeting? (b) Uw rogon nra yib angin ngodad?
1 Fare Service Meeting e ma ayuwegdad ni ngad salapgad ko machib me yib angin e machib ni gad ma tay. Pi n’en yima weliy riy e rogon ni ngan machibnag fare thin nib fel’, nge rogon ni ngan ayuweg e girdi’ ngar manged pi gachalpen Jesus, nge murung’agen e pufthin ni yira tay ngak e girdi’ nib kireb. (Matthew 28:20; Mark 13:10; 2 Peter 3:7) Ra yib angin e re muulung ney ngodad ni faan gad ra fal’eg rogodad u m’on riy ma gad un ko pi n’en ni yima rin’ u nap’an e re muulung nem.
2. Uw rogon ni ngad fal’eged rogodad ni fan ko pi welthin ni yima pi’ u nap’an e Service Meeting?
2 Welthin: Fare Machib ko Gil’ilungun e bay riy e gin ni kan fek e welthin riy ni yima pi’ u nap’an e re muulung nem. Ere rayog ni ngam beeg e pi thin nem nge thin nu Bible ni bay riy ma ga lemnag rogon ni ngam fanay u nap’an e machib.
3. Uw rogon ni ngad fal’eged rogodad ni fan ko pi welthin ni yima fith boch e deer riy?
3 Deer nge Fulweg min Weliy Fan: Re n’ey e bod rogon e Fol Wulyang Ntagil’ E Damit ni gad ma tay. Bay buchuuw e thin ni yima yog u m’on ngu tomren ni kan fith fapi deer. Ere mu gay e fulweg ko pi paragraph ni yira weliy mag ngongliy rogon boch e thin ni ngam weliy nra pi’ e athamgil nga laniyan’ e girdi’.
4. Uw rogon ni ngad fal’eged rogodad ni fan ko pi welthin ni ma yog e girdi’ u lan e ulung boch ban’en riy?
4 Nge Yog e Girdi’ u Lan e Ulung Boch Ban’en: Re n’ey e yira pi’ nib welthin, machane en ni be pi’ e re welthin ney e ku ra fith boch e deer ko girdi’ u lan e ulung. Faanra mu beeg e babyor rom u m’on ko muulung mag tay e pow ko yungi n’en ni bay boch e thin riy nib ga’ fan mu kum beeg e pi thin nu Bible ni bay riy, ma aram e rayog ni ngam pi’ e fulweg ko pi deer ni yira fith. En nra pi’ e re welthin ney e ra guy rogon ni nge pi’ e tayim ko girdi’ u lan e ulung ni ngar weliyed boch ban’en u nap’an ni be weliy boch ban’en nib ga’ fan ko welthin rok.
5. Uw rogon me yib angin ngodad e pi n’en ni yima dag rogon u nap’an e muulung ni ngan rin’?
5 Ngan Dag Rogon ni Ngan Rin’ Boch Ban’en: Boch e welthin e yima dag riy rogon ni ngan fanay e n’en ni kan weliy u nap’an e machib. Reb e piilal fa reb e publisher nib salap ko machib fa pioneer e ra dag rogon e re n’ey. U m’on ko muulung ma ga lemnag rogon ni yira weliy e re n’em. Ma nap’an ni yibe dag rogon ni ngan rin’ fare n’em, ma ga lemnag ko uw rogon nrayog ni fanay u nap’an e machib. Ngam fek e pi babyor ni yira fanay u nap’an ni yibe dag rogon e machib. Nap’an ni gimed be fil girdien e tabinaw e Bible u taabang ma rayog ni ngam sulod u daken fapi n’en ni kan yan u yaan u nap’an e muulung.
6. Mang fan ni ngad filed e thin ni yira weliy u m’on ko muulung?
6 Gad ra fal’eg rogodad u m’on ko muulung ma dabi chalbadad u nap’an e muulung ya gad manang ko mang e yibe weliy. Gad ra rin’ ni aray rogon ma rayog ni ngad pied e athamgil nga laniyan’ boch e girdi’. (Roma 1:11, 12) Faan gad ra tay ba ngiyal’ u m’on ko muulung ni ngad fal’eged rogodad ma ra bung rogodad ni ngad rin’ed fare maruwel ni kan pi’ ngodad.—2 Timothy 3:17.