Pi Muulung ni Fan ko Machib Nra Ayuwegdad u Rogon ni Ngad Mon’oggad ko Machib

1. Mang fan ni yima tay e muulung ni fan ko machib?

¹ Immoy reb e rran ni mada’ Jesus nge 70 i gachalpen u m’on ni nga ranod ko machib. (Luke 10:1-11) I pi’ Jesus e athamgil nga lanin’rad, ni be puguran ngorad ni bay be’ ni be ayuwegrad me pow’iyrad ni aram Jehovah ni “ir e suwon e woldug”. Miki yog ngorad e n’en ni ngar rin’ed, me yarmiyrad ni nga ranod ni yad “lal’agruw.” Ere, ku arrogon e ngiyal’ ney ni ku taareb rogon fan e pi muulung ni gad ma tay ni fan ko machib. Yima tay e pi muulung ney ni nge pi’ e athamgil nga lanin’dad, miki ayuwegdad ni ngad nanged rogon ni ngad machibgad, miki yag ni nga darod ko machib ni gad ba yaram.

2. Faanra ngan tay e muulung ni fan ko machib, ma susun ni nge uw n’umngin nap’an?

² Ngiyal’ ney e gad ma tay e muulung ko machib u lan 10 i yan ko 15 e minit n’umngin nap’an. Ma n’en ni yima rin’ u nap’an e pi muulung ney e yima yarmiy e piin ni yad ra un ko machib, min dugliy e gin’en ni ngan machib riy, ma aram min meybil. Machane chiney e ke thil e biney e yaram. U nap’an e pul ni April ma susun ni yira tay e re muulung ney ni kemus ni lal i yan ko medlip e minit n’umngin nap’an. Ma faanra yira tay e re muulung ney u tomuren ni kan mu’ u reb e muulung ni yima tay u lan e wik, ma thingari dabi gaman lal e minit n’umngin nap’an ni bochan e ka fini mu’ i weliy boch ban’en ni bay rogon ko tirok Got ban’en. Faan yira ngochnag e pi muulung ney ni fan ko machib ma rayog ni nge yoor e tayim ni fan ko machib. Maku faanra ke yag rok boch e pi walag ni ngar machibgad u m’on ni ngan yarmiy e machib, ma nap’an ni yira yan ni ngan yarmiy e machib ma dabi magawonnag rogon e tayim ni yad be machib riy.

3. Uw rogon ni ngan yarmiy fare muulung ko machib ya nge yag ni yib angin ngak e pi walag?

³ Thingar ni yarmiy e pi muulung ni fan ko machib ya nge yag ni nge ayuweg e pi walag ni ngar machibgad nib fel’ rogon. Ere boor e ulung ni gathi kemus ni taabang e yad ma muulung ngay ni fan ko fare muulung ko machib, ya kar pirieged ni ku boor fel’ngin ni bay ni faan yira tay e pi muulung ney u yu yang nib thilthil. Yira rin’ ni aray rogon ma ra mom ko pi walag ni nga ranod ko gin ni yibe yarmiy e machib riy, ma kub mom ngorad ni nga ranod ko gin ni ngan machib riy. Ku ra mom rok e piin ni yad be yarmiy e machib ni ngar yarmiyed e piin ni nga ranod ko machib min ayuwegrad ko tin nib t’uf rorad. Piin piilal e rayog ni ngar lemnaged rarogon e pi walag mar nanged ko mang e ba puluw ni ngan rin’. U m’on ni ngan meybil u tomuren fare muulung, ma susun ni gubin e girdi’ ma ke nang ko mini’ e en ni nga ranow ko machib u taabang nge gin ni ngan yan ngay.

4. Mang fan ndab da lemnaged nde ga’ fan e muulung ko machib ko tin ni ka bay e muulung?

⁴ Re Muulung Ney e Taarebrogon ko Tin ni Ka Bay e Muulung, Ya Ba Ga’ Fan: Bochan ni kan yarmiy e muulung ko machib ya nge yag ni nge yib angin ngak e piin ni nga ranod ko machib, ere gathi gubin e walag u lan e ulung ni yad ra un ko re muulung ney. Machane, re n’ey e gathi be yip’ fan nde ga’ fan e biney e muulung. Ku bod rogon e tin ni ku bay e muulung ni gad ma un ngay ma re muulung ney e aram reb e kanawo’ ni be ayuwegdad Jehovah riy ni nge yag ni nge bagadad me ayuweg bagadad. (Heb. 10:24, 25) Ere, rib ga’ fan ko faen nra yarmiy e machib ni nge fal’eg rogon e n’en ni nge weliy u m’on riy ya nge yag ni nge weliy nib tamilang me yib angin ngak e pi walag me pining e sorok ngak Jehovah. Maku reb e piin ni yad ra un ko machib e thingar ra uned ko re muulung ney ni faanra rayog rorad.

5. (a) Mang e ba milfan ngak faen ni ir e service overseer ni nge rin’ ni bay rogon ko muulung ni gad ma tay ni fan ko machib? (b) Susun ni uw rogon ni nge yarmiy reb e walag ni ppin e muulung ni fan ko machib?

⁵ N’en ni Nge Rin’ Faen ni Nge Yarmiy e Machib: Faanra nge yag ni nge fal’eg be’ rogon e welthin me pi’ nib tamilang u nap’an e muulung, mab t’uf ni ngan pi’ ngak u m’on riy. Ere ku er rogon e muulung ni fan ko machib. Ba ga’ ni faanra ba thilthil e gin ni yibe tay e muulung ni fan ko machib riy, ma aram e bay be’ nib milfan ngak ni nge yarmiy e piin ni yad ra un ko machib. Machane faanra nge muulung e pi walag ni nga ranod ko machib u taabang, ma en ni ir e service overseer e ra mel’eg be’ ni nge yarmiy e machib. Bay boch e service overseer ni yad ma fal’eg e schedule mar pied ngak e piin ni yad ra yarmiy e machib u reb e rran ngu reb ara ngan tay ko information board. Faen ni ir e service overseer e susun ni nge gonopiy rogon ni be mel’eg e piin ni yad ra yarmiy e machib, ya manang ni faanra manang faen ni nge yarmiy e machib rogon ni nge fil me yarmiy e pi walag ni yad ra un ko machib, ma ra yan e pi muulung ney nib fel’ rogon. Ma faanra dariy reb e piin piilal, ara ministerial servant, ara reb e walag ni pumoon nib taufe, ma rayog ni nge mel’eg faen ni ir e service overseer reb e walag ni ppin nib taufe ni manang ni rayog rok nge yarmiy e machib e rofen nem.​—Mu guy fare article ni kenggin e “Faanra Nge Yarmiy Reb e Walag nib Pin e Muulung ni Fan ko Machib.”

6. Mang fan nib t’uf rok faen ni nge yarmiy e machib ni nge fal’eg rogon u m’on ni nge yarmiy e machib?

⁶ Nap’an ni yira yog ngodad ni bay reb e welthin ni ngad pied ko Theocratic Ministry Skul ara Service Meeting, ma susun ni nge ga’ fan u wan’dad e re n’ey ma ngad fal’eged rogodad nib fel’ rogon. Ere, susun ni ku aram rogon ni ngad lemnaged ni faanra ka nog ngodad ni ngad yarmiyed e machib. Machane bay boch i gadad ni gad ma son nge mada’ ko ngiyal’ ni gad be yan ni ngad uned ko re muulung ney ma fin aram e ngiyal’ ni gad ma lemnag ko mang e ngad weliyed. Ma chiney ni kan ngochnag e re muulung ney e ke t’uf ni ngad fal’eged rogodad u m’on riy, me yag ni ngad yarmiyed e re muulung ney nib fel’ rogon ma dabi sagaal. Maku reb e faanra gad ra fal’eg rogodad nib fel’ rogon, ma susun ni ngad feked e territory ara gin ni ngan machib riy u m’on riy.

7. Mang boch ban’en nrayog ni nge weliy faen nra yarmiy e machib u nap’an nra tay e muulung ni fan ko machib?

⁷ N’en ni Ngan Weliy u Nap’an e Muulung: Bochan ra reb e binaw ma rogon e n’en ni yima rin’ riy, ma aram fan nde weliy fare tapigpig nib yul’yul’ ma ba gonop urngin e n’en ni susun ni ngan rin’ u nap’an e muulung ni fan ko machib. Machane, rayog ni ngan yaliy e pi n’en ni kan weliy ko fare kahol ni kenggin e “Rayog ni Ngam Weliy ara Ngam Rin’ e Pi N’ey u Nap’an fare Muulung ni Fan ko Machib.” Ba ga’ ni yima tay e pi muulung ney ni aram e bay be’ ni be pi’ e welthin ma be fith boch e deer, ma be pi’ e pi walag e fulweg ko pi deer nem. Maku rayog ni ngan dag reb e demonstration ara reb e pi video ni kan fek ko fare website rodad ni jw.org ni bay rogon ko machib. Ere, nap’an ni be fal’eg faen ni nge yarmiy e machib rogon u m’on ko re muulung ney, mab t’uf ni nge lemnag ko mang e ra weliy nrayog ni nge pi’ e athamgil nga laniyan’ e pi walag me fil ngorad rogon ni ngar machibgad e rofen nem.

8. Mang boch ban’en nib fel’ ni ngan weliy u nap’an e muulung ni fan ko machib ko rofen ni Sabado nge Madnom nra yib angin ngak e pi walag?

⁸ Ba ga’ ni yima pi’ Fare Wulyang ko Damit nge fare Awake! u nap’an e Sabado. Ma bay boch i gadad nder ma yan ko machib u lan e wik. Ere, sana ra taw ko rofen Sabado ma kad paged talin e n’en ni kad filed u nap’an e Fol Bible ni Tabinaw ni ir e gad ra weliy u nap’an e machib. Ere, kub ga’ fan ni nge gay faen ni ma yarmiy e machib rogon ni ngan sul u daken boch ban’en nrayog ni nga nog nrogon ni weliy fare babyor rodad ni Machib Ko Gil’ilungun. Ku rayog ni ngan weliy boch ban’en ni bay rogon ko pi n’en ni ka fini buch u lan fare binaw, ara reb e madnom min gay rogon ni ngan puluwnag ko n’en ni be weliy reb e pi babyor rodad. Ara reb e ngan weliy ban’en nrayog ni nga nog ara ngan fith ngak be’ nrayog ni ngan weliy ko yay ni migid ni kan sul ngak. Ma faanra bay boch e pi walag ni ke yag ni ngar pied e re babyor nem ngak be’ u nap’an e machib ma nga nog ngorad ni ngar weliyed rogon ni kar pied e re babyor nem ma ke yib angin. Ku taareb rogon e n’en nrayog ni ngan rin’ ko Madnom ni yibe weliy murung’agen e babyor ni ir e ngan wereg ko re pul nem. Faen ni be yarmiy e machib e rayog ni nge weliy rogon ni ngan pi’ fapi babyor ni kenggin e Thin nib Fel’ ni Yib rok Got! nge Mmotoyil ngak Got me Yog e Yafas ni Manemus Ngom nge Mang e Ri Be Fil e Bible? ma pi babyor ney e ba ga’ ni gad ma pi’ ngak e girdi’.

9. Faanra yira tay reb e campaign ko rofen ni sabado nge madnom, ma mang e rayog ni ngan weliy?

⁹ Faanra yira wereg reb e invitation ara reb e tract ni fan ko reb e campaign ko rofen ni sabado nge madnom, ma rayog ni nge weliy faen ni nge yarmiy e machib rogon ni ngan pi’ fare invitation ara tract nge fare magazine u taabang, nge n’en nrayog ni ngan rin’ ni faanra ke fek be’ fare babyor ara baadag ni nge motoyil ngodad. Maku reb e rayog ni ngan weliy boch ban’en ni kan rin’ kafram ni ke yib angin u nap’an ni kan tay reb e campaign.

10, 11. Faanra yira fal’eg rogoy u m’on ni yira un ko fare muulung ni fan ko machib, ma uw rogon nra yib angin e re n’ey ko fare muulung?

¹⁰ Pi N’en nib Milfan Ngak e Pi Walag: Bay ban’en nib milfan ngak e pi walag ni yad ma un ko fare muulung ni fan ko machib. Ere, faanra ga ma fal’eg rogom u m’on riy u nap’an ni ngam ted chon e tabinaw rom e fol Bible ni tabinaw u taabang, ma rayog ni ngam weliy ban’en nib ga’ fan u nap’an ni gimew be machib reb e walag u taabang. Ra ngan fal’eg rogoy, ma be yip’ fan ni u m’on ko muulung ko machib ma ngan fek e pi babyor ni ir e ba t’uf ni ngan fanay u nap’an e machib, ya nge tomuren ni kan mu’ i yarmiy e machib min yan nib papey.

¹¹ Kub t’uf ni ngan gay rogon ni ngan taw ko gin ni yira tay e muulung ni fan ko machib riy u m’on ni nge tabab, ni bod rogon ni gad ma gay rogon ni ngad tawgad ko pi muulung rodad u lan e wik nib papey. Ya rayog ni nge magawon fare muulung ni yibe tay ni fan ko machib ni faanra kam taw ni gab sagaal. Ni uw rogon? Boor ban’en nib t’uf ni nge tafinaynag faen ni nge yarmiy e machib ni bay rogon ni nge yarmiy e piin ni yad ra un ko machib. Bod ni faanra kemus ni buchuuw e walag ni yad ra un ko machib, ma sana faen ni be yarmiy e machib e nge dugliy ni nge yarmiy ni nga ranod nga bang nib lich e tabinaw riy. Ma faanra dariy e karrow rok boch e girdi’ ma rayog ni nge yarmiy ni nga ranod boch e girdi’ ni bay e karrow rorad u taabang. Fa reb e faanra gin ni ngan machib riy e boor e girdi’ nib kireb riy, ma ra yarmiy ni nge un boch e walag ni pumoon ko pi walag ni ppin ara ngar maruwelgad nib chugur ko gin ni bay fapi walag nib pin riy. Ku rayog ni nge yarmiy ni nge yan e pi walag ni ba mo’maw’ ngorad ni nga ranod u but’ ni ngar machibgad ko gin nib fel’ e kanawo’ riy ara gathi boor e tabinaw nib tolang riy. Maku rayog ni nge tay e piin ni ka fin ra uned ko machib ni ngar maruwelgad e pi tamachib ni yad ba salap u taabang. Ere faanra bay be’ ni ke yib nib sagaal ko muulung, ma faen ni be yarmiy e machib e thingari gay ko mini’ e nge un ngak ko machib. Yu ngiyal’ e ba ga’ fan ni gad ma yib ko muulung nib sagaal. Machane, faanra ke mecham ngodad ni gad ma yib ko muulung nib sagaal, me ere ba t’uf ni ngad fal’eg i lemnag ko mang fan ni gad ma yib nib sagaal. Gur, riyul’ nib ga’ fan e muulung ni fan ko machib u wan’dad ara kemus ni kireb rogon ni gad ma yarmiy e pi n’en ni gad ma rin’ u reb e rran ngu reb?

12. Faanra ba ga’ ni bay be’ ni gimew ma yan ko machib u taabang, ma mang e bfel’ ni ngam lemnag?

¹² Rayog nra reb e walag me dugliy rogon e machib nra tay e rorran nem. Ma faanra ba t’uf ni nge un ngak be’ ma faen ni be yarmiy e machib e rayog ni nge yarmiy be’ ni nga ranow u taabang. Ere, faanra ba ga’ ni bay be’ ni gimew ma yan ko machib u taabang, ma gur, rayog ni ngam t’ar ‘lanin’um’ ni aram e nge m’agan’um ngay ni ngam un ngak be’ nib thil, ma gathi kemus ni faen nib fel’ e thin romew? (2 Kor. 6:11-13) Sana rayog ni ngam mel’eg ni nga marow be’ ni ka fini un ko machib ya nge yag nim ayuweg ni nge mon’og ko machib. (1 Kor. 10:24; 1 Tim. 4:13, 15) Mu fal’eg e motoyil ko n’en ni kan yarmiy ni fan ko machib ya nge tamilang u wan’um e gin ni yira tabab ko machib riy. Ma nap’an ni kan mu’ ko re muulung ney ma dab mu thilyeg rogon ni kan yarmiy e piin ni nga ranod ko machib, mag gay rogon ni nga man ko gin ni ngan machib riy nib papey.

13. Faanra gadad gubin ma gad ma rin’ e n’en nib milfan ngodad ko fare muulung ni fan ko machib, ma mang angin nra yib ngodad?

¹³ Tomuren ni ke sul fa medlip i ragag gachalpen Jesus ko machib ma kar ‘felfelan’gad.’ (Luke 10:17) Ma dariy e maruwar riy ni ke yib angin fare muulung ni kar ted Jesus u taabang u nap’an e machib. Ere, ku er rogon e pi muulung ni gad ma tay ni fan ko machib nra yib angin ko machib ni gad ma tay. Ya faanra gadad gubin ma gad ma rin’ e n’en nib milfan ngodad ko re muulung ney, ma rayog ni nge pi’ e athamgil nga lanin’dad, me fil ngodad rogon ni gad ra machib, me yag ni yaram e machib ni gad ma tay. Ma aram e rayog ni ngad machibnaged fare thin nib fel’ ngak gubin e girdi’ u “gubin yang u fayleng.”​—Matt. 24:14.