Pi Muulung ni Fan ko Machib

1. Mang fan ni gad baadag ni nga darod ko machib ni gad ba yaram?

¹ Ke dag Jesus e kanawo’ u rogon ni ngan machibnag murung’agen Gil’ilungun Got nib yaram. Ere ku arrogon e ngiyal’ ney ni piin nib milfan e re maruwel ney ngorad u ga’ngin yang e fayleng e yad baadag ni ngan rin’ e re maruwel ney nib fel’ rogon. Aram fan ni ma tay e pi ulung e muulung ni fan ko machib ya aram reb e kanawo’ ni ngan yarmiy rogon e machib ni ngan tay ya nge yan nib yaram.​—Matt. 24:45-47; 25:21; Luke 10:1-7.

2. Mang e susun ni ngan rin’ u nap’an e muulung ni fan ko machib?

² Ba Yaram nib Fel’. Yima tay e muulung ni fan ko machib ya nge yog nni pi’ e athamgil nga laniyan’ e piin ni nga ranod ko machib, min weliy boch ban’en nrayog ni nge pow’iyey u rogon e machib ni ngan tay. Rayog ni ngan weliy e thin nu Bible ni fan ko binem e rran ni faanra ba m’ag ko machib. Ma yu ngiyal’ e rayog ni ngan weliy boch e thin ni bay ko Machib Ko Gil’ilungun, fa Reasoning ara fare babyor ni Ministry School ya nge yog ni ayuweg e piin ni yad ra yan ko machib. Ku rayog ni ngan dag rogon ni ngan pi’ ba ken e babyor ngak be’. Mu m’on ni ngan meybil ma susun nra be’ ma ke nang ko yow mini’ e ngar machibgow u taabang nge gin ni yira yan ngay ko machib. Re muulung ney e dabi pag 15 e minit n’umngin nap’an, ma tomren ni ke m’ay ma rayog ni ngan yan ko gin ni ngan machib riy.

3. Chon mini’ e ba milfan ngorad ni ngar yarmiyed e pi muulung ni fan ko machib?

³ Uw Rogon ni Kan Yarmiy? En ni service overseer e ir e ba milfan ngak ni nge yarmiy e pi muulung ni fan ko machib. Piin ni kan tayrad ni ngar manged group overseer ara piin ni ma ayuwegrad e ba milfan ngorad ni ngar uned ko piin ni kan tay ni ngar ayuweged yad ko machib u tomren e wik. Rayog ko pi overseer ara ministerial servant ni ngar uned ko machib u lan e wik. Pi group overseer e ngar maruwelgad e service overseer u taabang ya nge yog nra weliyed rogon ni ngan gaman ko binaw ni ngan machib riy.

4-6. (a) Uw rogon nib m’ag e pi muulung ni fan ko machib ko territory ko ulung? (b) Mang boch e deer nrayog ni nge ayuwegey ngan turguy e n’en nib t’uf ko pi muulung ni fan ko machib?

⁴ Rofen nge Gin ni Ngan Tay e Muulung Riy? Rayog ni ngan mada’ nga bang ara nga tafen reb e walag ni bay ko re binaw ni yira machib riy ya nge yog nni mu’nag e territory nib fel’ rogon ko bin ni ngan mada’ nga Kingdom Hall. Machane, ku rayog ni ngan tay e muulung ni fan ko machib u Kingdom Hall. Boor e ulung ni yad ma tay e muulung ni fan ko machib u Kingdom Hall u tomren e muulung ko Madnom. Thingar ni gay rogon ndabi yoor e tayim ni ngan n’ag ni ngan yan ko gin ni ngan machib riy. Ere, susun ni nge yaliy e piin ni ma yarmiy e machib rogon e yaram ni yibe ngongliy ni fan ko machib ya nge yog ni fel’ rogon e maruwel ni ngan tay u gubin e binaw ni yima machib riy.

⁵ Ngiyal’ ni ngan tay e pi muulung ney nge urngin yay ni ngan tay u reb e wik e be yan u rogon e binaw ni yira machib riy.

⁶ Mang territory e ba t’uf e ayuw riy? Mingiyal’ e ba fel’ ni ngan yan ko machib u mit e tabinaw? Bfel’ ni ngan dugliy ba ngiyal’ ko blayal’ ni ngan yan ko machib fa return visit? Susun ni ngan tay ko information board ko ulung e yaram ko muulung ni fan ko machib. Baadag urngin e publisher ni ngar wereged e machib u ga’ngin yang e territory ni kan pi’ ngorad nge mus rogon ya nge yog ni dogned e n’en ni yog apostal Paul ni gaar: ‘Chiney e kug mu’ ko maruwel u lan e yungi nug ney.’​—Rom. 15:23.

7. Mang e ba milfan ngak e en ni ka nog ngak ni nge yarmiy e machib u reb e rran?

⁷ Rogon ni Ngan Yarmiy e Muulung ni Fan ko Machib: Faen nra yarmiy e re muulung ney e nge tay fan e re yaram ney ni aram e nge fal’eg rogon u m’on riy. Susun ni nge tabab e muulung ko ngiyal’ ni kan turguy, min weliy e pi n’en nib ga’ fan u lan 10 fa 15 minit. Faen ni be yarmiy e susun ni nge nang u m’on ko muulung e gin ni ngan yan ngay ko machib. De t’uf ni ngan sonnag e piin ni kar sagaalgad u tomren ni kan mu’ ko muulung ni fan ko machib, machane rayog ni ngan tay e babyor ni be yog e gin ni kan yan ngay. Tomren ni ke m’ay i yarmiy e machib ma susun ni nge yan urngin e girdi’ ko territory. Muulung ko machib ni kan tay nib yaram e ra ayuweg e girdi’ ni ngar uned ko machib nib fel’ rogon ko rorran nem.​—Prov. 11:14.

8. Uw rogon nrayog ko piin ni be un ko muulung ko machib ni ngar folgad ko piin ni be yog e thin?

⁸ Ngan Un ko Muulung ni fan ko Machib: Ba t’uf e fol. (Heb. 13:17) Fa en ni be yog e thin ko muulung e nge ayuweg e piin nib t’uf e ayuw rorad u nap’an e machib. Bfel’ ni nge un e pi publisher nib salap ko machib ya ngar ayuweged e tin kab beech e girdi’. Piin ra un ngak yugu boch e girdi’ e ra yib angin nib fel’ ngorad. (Prov. 27:17; Rom. 15:1, 2) Susun ni nge athamgil urngin e girdi’ ni ngar bad ko ngiyal’ ni kan turguy. Faanra gad ma tay fan e re yaram ney nge piin ni gad ma maruwel u taabang ma ra k’aringdad ni ngad folgad ko re n’ey.​—2 Kor. 6:3, 4; Fil. 2:4.

9. Uw rogon ni nge pi’ e piin pioneer e ayuw ko re yaram ney?

⁹ Nge Pi’ e Piin Pioneer e Ayuw: Ba ga’ fan ni nge pi’ e piin pioneer e ayuw ni fan ko pi muulung ni yima tay ni fan ko machib. Riyul’ ni boor e maruwel ko piin pioneer, ya bay e piin ni yad ma fil e Bible ngorad, nge piin ni yad ma sul nguur guyed, maku dabisiy ni yad ma maruwel, ngki chag ko n’en ni yad ma rin’ ni fan ko tabinaw rorad. Ere de t’uf ni nge un e piin pioneer nga gubin e muulung ni kan yarmiy ni fan ko machib. Machane rayog ni ngar gayed rogon ni ngar uned nga boch e pi muulung ney. Ya pi muulung ni yima tay ni fan ko machib e ba skul ngak e pi tamachib, maku rayog ni nge ayuwegrad ko tirok Got. Ere ba t’uf ni nge pi’ e piin pioneer e ayuw. Piin pioneer e baga’ ni yad ma un ko machib, ere boor ban’en ni yad ba salap riy u rogon e machib. Ere ku rayog ni ngar ayuweged boch e girdi’ ko re n’ey. Ba fel’ ni ngan folwok rorad ni bochan e yad ba pasig ni ngaur pied e ayuw ni fan ko machib nge muulung ko machib. Ma yibe pining e magar ngorad ko ayuw ni yad ma pi’.

10. Mang fan ni nge pi’ urngin e publisher e ayuw ni fan ko re yaram ney?

¹⁰ Gin ga’ yang ko maruwl ni gad ma tay e aram e machib u mit e tabinaw ni bod ni i rin’ Jesus nge pi gachalpen. Pi muulung ni yima tay ni fan ko machib e ma pi’ e athamgil nga lanin’dad ma ma ayuwegdad ko machib. Urngin e publisher ni susun e ngar ayuweged e re yaram ney nrogon nrayog rorad. (Acts 5:42; 20:20) Ngad ted fan e re maruwel ney u polo’ i gum’ircha’dad. Ya faan gad ra rin’ ma ra flaabnagdad Jehovah ma gad ra felfelan’nag e En ni Ma Yog e Thin rodad ni aram Jesus Kristus.​—Matt. 28:19, 20; 25:34-40.