Ngam Maruwel nib Elmirin ko Ngiyal’ ni Ga Be Un ko Machib

¹ Bay boor ban’en ni ngan rin’ ko machib ma daki yoor e tayim ni ke magey. (John 4:35; 1 Kor. 7:29) Gad ra fl’eg rogodad u m’on riy ma rayog ni ngad rin’ed boor ban’en ko ngiyal’ ni gad be un ko machib.

² Ngam Fl’eg Rogom: U m’on ni ngam un ko muulung ko machib ma ngam fek e pi babyor nib t’uf ma ngam lemnag e n’en ni ga ra weliy ko machib. Tomren fare muulung ni kan meybil ma ngam marod ko machib. Aram e gimed ra rin’ boor ban’en ko ngiyal’ ni fan ko machib.

³ Faanra kan dugliy ni ngam yarmiy e muulung ko machib, ma ngam tabab ko tayim ni kan dugliy ni ngan tabab riy. Ngan tay fare muulung nib ngoch nap’an​—u thilin 10 nge mada’ ko 15 minit. U m’on ni ngan mu’ ko muulung ma ngam guy rogon nra be’ ma manang e gin ni ra yan ngay nge mini’ nra un ngak.

⁴ Nap’an e Machib: Nap’an ni ke m’ay fare muulung ko machib ma dab mu sagaal ya ngam man ko territory. Faanra thingar mu chuw ko territory nib pay boch, ma ngam yarmiy ni ngam fek e karrow rom ma aram e de t’uf ko tin ni ka bay e girdi’ ngar chuwgad nib pay. Nap’an ni ngam un ko girdi’ ko machib ma ngam lemnagrad ni sana yad be sonnagem ngam mu’ ko sabethin. Ere ngan guy rogon ni ngan chuw ku be’ ni be tugthin fa ngan yarmiy ni ngan sul ngak be’ ni ba adag e machib.​—Matt. 10:11.

⁵ Nap’an ni ngan sul ko girdi’ ma ngam guy urngin e girdi’ ni ga ra sul ngorad u reb e binaw u m’on ni ngam man nga yugu reb. Sana bfel’ ni ngan telefonnag e girdi’ ni ngan nang ni yad bay u tabinaw fa danga’. (Prov. 21:5) Faanra ga manang ni ga ra par nib n’uw boch nap’an u reb e tabinaw ma ngan yarmiy ni nge yan e tin ni ka bay e girdi’ ngar uned ko machib u mit e tabinaw i yan ara ngar sulod ngak boch e girdi’ ni kar mada’naged u bayay e machib.

⁶ Gad be par ko ngiyal’ ni mokun woldug nib spiritual. (Matt. 9:37, 38) Dabki n’uw nap’an ma ra tal e re maruwel ney. Ere susun ni gad ba adag ni ngad fanayed e tayim rodad ko machib nib fel’ rogon.