Ngad Fanayed e Pi Babyor Rodad nib Fel’ Rogon
1. Uw rogon ni ngad folwokgad rok Jesus u rogon ni i tayfan e pi n’en ni ke pi’ Jehovah?
1 Tomren ni ke fal’eg Jesus e maang’ang nge duruw’iy boor e girdi’ me yog ni ngan kunuy e tin ni ke aw e ggan. (Matt. 14:19-21) I tay Jesus fan e n’en ni pi’ Jehovah ma ke dag ngodad rogon ni ‘ngaud pininged e magar ngak Got u lanin’dad’ ngad fanayed e pi n’en ni ma pi’ ngodad u daken fare tapigpig nib yul’yul’.—Kol. 3:15; Matt. 24:45-47; Luke 12:42.
2. Uw rogon ni nge dabi magey e magazine rodad?
2 Pi Magazine: Rayog ni nge yoor e magazine ni bay rodad. Faanra dabiyog ni ngad wereged ni urngin ma susun nga nog ngak faen ni ma pi’ e magazine nge lichnag. Mang e ngan rin’ ko tin ke n’uw nap’an e magazine? Yugu aram rogon ni ke n’uw nap’an ma dabi m’ay fan e thin riy. Faanra boor e magazine ni ke n’uw nap’an ni ka bay rodad ma faen ni service overseer ara yugu reb e piilal e ra yog ko mang e ngad rin’ed ngay.
3, 4. Mang e ngad lemnaged u nap’an ni gad be ning e babyor u Kingdom Hall?
3 Yugu Boch e Babyor: Nap’an nra thil e babyor ni gad ra wereg mag guy ko ka bay boch u tabinaw rom, ma faanra dariy mfin mu fek boch u Kingdom Hall. Ngam guy rogon ni ngam fek e tin nib t’uf rom u reb e wik, ma tomren ni kam wereg ke m’ay, mfin kum fek boch.
4 Faanra ngam fek reb e babyor ni ngam fanay ma kemus ni bin nib t’uf rom e ngam fek, mag yoloy fithingam ngay. Ra aram rogon ma rayog ni nge yaram e babyor rom. Ra kam ayuweg e pi magazine rom ni aray rogon ma dariy fan ni ngkum chumongnag e bound volume ko Watchtower nge Awake!
5. Mang e ngad lemnaged u nap’an ni gad be wereged e babyor?
5 Pi Babyor ni Ngan Wereg: Gad ma guy rogon ni kemus ni ngad pied e babyor ngak e piin ni baadag e machib. Dabda paged talin nib milfan ngodad puluwon e pi babyor ni gad ma wereg. Nap’an ni gad ra pi’ e babyor ku be’ ma dabda magawongad ni nga dogned ngak ni nge pi’ e ayuw.
6. Mang fan ni nthingar da ayuweged e pi babyor rodad, ma mang e ra ayuwegdad ni ngad rin’ed e re n’ey?
6 I fl’eg Jesus e maang’ang nge duruw’iy e girdi’, miki duruw’iyrad ko tirok Got ban’en. I gaar Jesus: “Girdi’ e dabiyog ni yigoo flowa e ra i kay mi i par nib fos, machane urngin bug e thin ni be yog Got e ir e ra i tay e girdi’ nib fos ndabi yim’.” (Matt. 4:4) Pi babyor rodad e ma fil e thin nriyul’ ni bay u Bible nra yognag e yafas ni manemus ko girdi’. (John 17:3) Dab ni adbey e pi babyor rodad ya rib ga’ fan!