Ba Circuit Assembly Nra Ayuwegdad ni nge Dabi War e Michan’ Rodad
1. Mang reb e tow’ath ni ke pi’ Jehovah ngodad ni nge ayuwegdad ngad rin’ed fare maruwel ni ngad machibnaged fare thin nib fel’?
1 Jehovah e rib gol ya ma skulnagdad, maku ma pi’ e athamgil nga lanin’dad. Pi n’ey e ba t’uf rodad ni fan e ngada rin’ed fare maruwel ni ke pi’ ngodad ni ngada machibnaged fare thin nib fel’. (Matt. 24:14; 2 Tim. 4:17) Circuit assembly rodad e aram e kanawo’ ni be pi’ Jehovah e pi n’ey riy ngodad. Kenggin e assembly ko duw ni 2010 e “Mu Ayuw ni nge Dabi War e Michan’ Rom.” Ba puluw e re thin ney ko Roma 8:5 nge Jude 17-19. Ra tabab e re assembly nem u tomren e August 31, 2009.
2. (a) Uw rogon nra ayuwegdad fare circuit assembly? (b) Uw rogon ni ke ayuwegem e thin ni kam rung’ag u boch e assembly ko machib?
2 Rogon Nra Ayuwegdad: Ra ayuwegdad e re assembly nem ni ngad nanged boch ban’en ni bay e riya’ riy ni ma adbey e tayim rodad ma dab kud tedan’dad ko tin nib ga’ fan. Gad ra fil rogon ni ngada togopuluwgad ko lem ko girdi’ ni yugu yad ma rin’ e tin ni yad ba adag. Maku gad ra weliy rarogon e piin nib gel e michan’ rorad. Ku bay boch e welthin ni yira pi’ ni be weliy rogon ni nge gel e michan’ rodad nge tabinaw rorad ya nge yog nda gelgad ko pi togopuluw nge skeng ni ma yib ngodad. Thin ko re assembly nem e ra ayuwegdad ni ngad ayuweged gumir’chadad, mi i par nib gel e michan’ rodad, ma gad be lemnag e pi tow’ath ni be sonnag e piin ni yad ma ayuw ni nge dabi war e michan’ rorad.
3. Wuin e yira tay e bin ni migid e assembly, ma mang e ngam rin’?
3 Ra kam nang e rofen ni bay e bin migid e assembly ma ngam fal’eg rogom ya nge yog nim un ngay. Dab mu pagtalin nra tow’athnag Jehovah e piin ni yad ma tiyan’rad.—Prov. 21:5.
4. Mang e angin e bin migid e circuit assembly ngodad?
4 Riyul’ ni Jehovah e ir e En ni ke pi’ e re tow’ath ney nib fel’. Gubin ban’en ni ke ngongliy fare tapigpig nib yul’yul’ rogon e ra ayuwegdad ko machib. Gad be pining e magar ngak Jehovah ko gubin ban’en ni ke pi’ nra ayuwegdad ni “ngad chichiiyed pa’dad ko re n’en ni ir e ke l’agan’dad ngay ni ir e gadad be weliy murung’agen.”—Heb. 10:23-25; Jas. 1:17.