Ba Ayuw ni Fan ko Pi Tamachib ni Kristiano
1. Mang yaram nib beech ni kan tababnag ko duw ni 1938 ma mang fan?
1 Ke tabab reb e yaram nib beech ko ulung rok Jehovah ko duw ni 1938. Boch e ulung e kan piningrad ni ngar uned ko muulung ni ka nog e zone assembly ngay kafram, ma chiney e yima yog ni circuit assembly. Mang fan? Bay e fulweg riy u lan e babyor ni Informant (chiney e yima yog e Machib Ko Gil’ilungun Got ngay) ko January 1939 ni gaar: “Pi assembly ney e bang ko Ulung rok Jehovah ni fan ko pigpig ko Gil’ilungun. Pi thin ni yibe weliy e fan ni nge ayuweg be’ nge be’ ngar rin’ed e maruwel ni kan pi’ ngorad nib fel’ rogon.” Gad ra lemnag ni ke yoor e piin ni be wereg e thin ko Gil’ilungun Got ni immoy ni 58,000 ko duw ni 1938 ma ke pag 7,000,000 ko duw ni 2009, ma rib gagiyel ni pi circuit assembly ney e be ayuweg e pi tapigpig ni ngar “rin’ed e maruwel rorad” nib fel’ rogon!
2. Mang kenggin e circuit assembly ko bin migid e duw?
2 Kenggin ko Bin Migid e Duw: Gad ma sap nga m’on ko program nra tabab ko September ma ra pi’ e athamgil nga lanin’dad. Kenggin e “Gathi Gimed e Girdi’ nu Fayleng” ni bay ko John 15:19.
3. Mang angin nrayog ni nge yib ngodad ni faan gad ra un ko circuit assembly?
3 Bay reb e walag ni ppin ni ke tal ko machib me un nga reb e circuit assembly, ma ke yog ni bochan fare assembly ma ke yaliy rarogon, ma ke mudugilan’ ni nge “un ko machib bayay ni dabki tawey nga ban’en!” Dariy e maruwar riy ni bin migid e circuit assembly e ra ayuwegdad ni ngad t’ufeged Jehovah ma gathi fayleng. (1 John 2:15-17) Nge mudugilan’um ni ngam un ngay me yib angin ngom ya ireray e ayuw ni fan ko Kristiano!