Kam Fal’eg Rogom ko Skul?
1. Mang e rayog ni ngam rin’ u nap’an nra tabab e skul?
1 Faanra gur reb e bitir ni nga fin mu un nga skul fa gur reb e fel’ yangaren ni ngam sul nga skul, ma dabisiy ni boor e magawon ni ga ra mada’nag u skul. Machane ku ireray e kanawo’ nrayog ni ngam “weliy murung’agen e tin riyul’.” (John 18:37) Ere, kam fal’eg rogom ni ngam rin’ e re n’ey, fa?
2. Uw rogon ni kam fal’eg rogom ko skul?
2 Jehovah nge gallabthir rom nge fare tapigpig nib yul’yul’ mab gonop e boor ban’en ni yad be fil ngom ni fan e ngar ayuweged gur u gubin ban’en nra um mada’nag u lan e yafas rom. (Prov. 1:8; 6:20; 23:23-25; Efe. 6:1-4; 2 Tim. 3:16, 17) Dabisiy ni ga manang boch e magawon ni ga ra mada’nag u nap’an ni ga ra yan nga skul. Ere, ngam fal’eg rogom nrayog ni ngam weliy e tin riyul’ ya kan skulnagem ko tirok Got ban’en ma ga manang rarogon e girdi’ u skul. (Prov. 22:3) Mu fal’eg i lemnag e pi thin nu Bible ni bay ko fagal ke babyor ni “Young People Ask” nge yu ken e Awake! nrayog ni nge ayuwegem.
3. Mang boch e kanawo’ nrayog ni ngam weliy e tin riyul’ ko girdi’?
3 Skul e aram bang nrayog ni ngam machib riy u boor e kanawo’. Faanra guy e girdi’ feni yalen e munmad ni ga ma tay nge rogon yaam, nge rogon e ngongol nge thin rom, nge rogon ni ga ma tayfan e piin ni gimed nga skul nge sensey rom, nge grade rom u skul, ma yad ma guy ni ke mudugil u wan’um e n’en ni ngam rin’ ko yafos rom, ma sana boch i yad e ra fithem ni gaar, “Mang fan nri gab thil?” (Mal. 3:18; John 15:19) Faan yira fith ngom ban’en ni aram rogon ma aram reb e kanawo’ nrayog ni ngam machib riy, mag weliy e tin ni ke michan’um ngay. (1 Tim. 2:9, 10) N’umngin nap’an e skul ndabisiy ni ga ra mada’nag e magawon nib l’ag rogon nga boch e madnom ko am nge yug madnom ni ma tay e girdi’ nu fayleng. Faan yira fithem ko mang fan ni damur un ko pi madnom nem, ma gur ga ra gaar, “Ba togopuluw ko teliw rog, ya gag reb e Mich Rok Jehovah,” fa ga ra weliy murung’agen Jehovah ni Chitamam nu tharmiy? Ga ra fal’eg rogom u m’on riy ma rayog ni ngam weliy e tin riyul’ ngak boch e bitir ni gimed nga skul, nge sensey rom, nge yugu boch e girdi’.—1 Pet. 3:15.
4. Mang fan nib pagan’um ngay nrayog ni nge fel’ rogon e skul ni ga ra tay?
4 Yugu aram rogon ni sana dabum ni ngam man nga skul, machane dab mu pagtalin ni boor e girdi’ ni yad baadag ni ngar ayuweged gur ni nge fel’ rogon e skul ni ga ra tay. Maku gamad be felfelan’ ya boor e girdi’ nrayog ni ngam weliy e tin riyul’ ngorad ko territory rom. Ere dab mu rus mag fal’eg rogom ko skul!