Manang e Bitir Rom e N’en ni Nge Rin’, Fa?
1. Mang fan nib t’uf ko bitir ni yad ma un nga skul ni ngar fal’eged rogorad?
1 Ke chugur ni ngan sul bayay nga skul, ma dariy e maruwar riy ni boor e magawon nra mada’nag e bitir rom ndawori mada’nag bayay, maku boor ban’en nra un towasariy ngay. Machane, boor e kanawo’ nra mab ngorad nrayog ni ngar ‘weliyed murung’agen e tin riyul’’ riy. (John 18:37) Ere, kar fal’eged rogorad, fa?
2. Mang e ba t’uf ni nge nang e bitir rom ni faanra ngar fal’eged rogorad?
2 Manang e bitir rom rogon ma aram e yibe un nga boch e madnom ko nam, nge madnom ni ke sum ko piin ni yad ma meybil nga boch e got ni googsur, nge fan nib kireb ni ngan un ngay, fa? Yad manang ko mang e ngar rin’ed u nap’an ni yira towasariyrad ni ngar uned ko skul nib tolang, nge ngan chag ko pumoon ara ppin, nge chingaw, nge ngan fanay e drug, fa? Kemus ni yad ra yog nre n’em e ba togopuluw ko teliw rorad, fa yad manang rogon ni ngar weliyed e tin ni ke michan’rad ngay?—1 Pet. 3:15.
3. Uw rogon nrayog ni nge ayuweg e gallabthir e bitir rorad ko re n’ey u nap’an e Fol Bible ni Tabinaw?
3 Ngan Rin’ u Nap’an e Fol Bible ni Tabinaw: Riyul’ ni boor ban’en nra t’uf ni ngam weliyed u nap’an ni be yan e bitir rom nga skul. Machane, faan ga ra athamgil ni ngam weliyed e bitir rom murung’agen boch e magawon nrayog ni ngar mada’naged u m’on ni ngar sulod nga skul, ma ra ayuwegrad ni nge pagan’rad. Ere mang ni dab mu tay ba ngiyal’ u nap’an e Fol Bible ni Tabinaw ni ngam weliyed e re n’ey? Rayog ni ngam fith ngorad e n’en ni be magafan’rad ngay u nap’an ni be chugur ko ngiyal’ ni ngar sulod nga skul. Pi n’en ni um weliyed fa binem e duw e rayog ni ngam sulod u daken e chiney ni kar ilalgad boch ma ke yoor ban’en ni kar nanged. (Ps. 119:95) Rayog ni ngam marod u yaan boch ban’en u taabang ni susun e gur e sensey, ara en ni ma ayuweg e bitir ya nge yog nra uned ko skul nib tolang, ara gur reb e bitir nu skul. Mu fil ngak e bitir rom rogon ni nge pi’ e fulweg nib puluw ko Bible. Reb e gallabthir e u ranod pi fak u yaan boch ban’en ya nge yog ni ayuwegrad u rogon ni nga rogned ko sensey rorad ni yad e Pi Mich Rok Jehovah u nap’an nra tabab e skul.
4. Mang e ra rin’ e gallabthir nib gonop?
4 Be gel e “mo’maw’” ko magawon ni ma mada’nag e piin fel’ yangaren ni Kristiano. (2 Tim. 3:1) Faanra ba gonop reb e gallabthir ma ra guy rogon ni nge lemnag e miti magawon nrayog ni nge mada’nag pi fak nge rogon ni nga ranod u fithik’. (Prov. 22:3) Ere u m’on ni nge tabab e skul ma ga rin’ e tin rayog rom ni ngam fal’eg rogon e bitir rom ko pi magawon ni yad ra mada’nag.