Ngan Machib ni Yiba Pasig!
1. Mang e thin rok Paul ni bay fan ko ngiyal’ ney?
1 “Ngam machibnag e thin rok Got ko girdi’ ndemtrug ko kari mab e kanawo’ ngom fa dawor.” (2 Tim. 4:2) Mang nri ba ga’ fan e pi thin rok Paul ney e ngiyal’ ney? Uw rogon nrayog ni nge yib fan e pi thin ney ngodad nge yugu boch e girdi’?
2. Mang fan ni gad ma gay e girdi’ ni dawor rung’aged fare thin nib fel’?
2 Yafos ko Girdi’ e Ba L’ag Ngay: Bokum milyon e girdi’ u ga’ngin e fayleng ni dawora rung’aged fare thin nib fel’ nra thapegrad ngak Got. (Rom. 10:13-15; 1 Tim. 4:16) Yima pirieg boor e girdi’ nib yul’yul’ u lan e binaw ni yibe machib riy u gubin ngiyal’. Faanra gad ra yan u yugu reb e rran fa yugu ba ngiyal’ ma sana gad ra pirieg be’ nib thil. Gad ra gay e girdi’ ma ra fel’ lanin’dad ma gad ra par ni dariy rachaen e girdi’ u pa’dad.—Acts 20:26.
3. Uw rogon nrayog ni ngad fanayed e tayim ni gad be un ko machib nib fel’ rogon?
3 Yugu aram rogon ni un gafgownag e pi Kristiano u nap’an e bin som’on e chibog machane kar ‘machibgad u ga’ngin yang u Jerusalem.’ (Acts 5:28) Ke mudugilan’dad ni ngad “machibnaged ngak e girdi’ fare thin nib fel’”? (Acts 10:42) Nap’an ni gad be un ko machib, gad be fanay e tayim rodad nib fel’ rogon, fa? Faanra gad be sonnag e piin ni kar sulod ni ngar guyed be’, gad ma guy rogon ni ngad nonad ko girdi’ ni be yan u kanawo’?
4. Uw rogon ni gad ra pasig ko machib me ayuwegdad ni nguud tedan’dad?
4 Thingar da Pasiggad: Kari chugur e ngiyal’ ni tomren e re m’ag ney e re thingar da pasiggad. (1 Thess. 5:1-6) Nap’an ni gad ra weliy murung’agen e athap rodad ko Gil’ilungun Got u gubin ngiyal’ ma ngad paged i lemnag e pi n’en ni ma magafan’uy ngay ko re fayleng ney. (Luke 21:34-36) Nap’an ni gad be “sonnag e chirofen nem” ni rran rok Jehovah ma ra k’aringdad ni ngad athamgilgad ko machib.—2 Pet. 3:11, 12.
5. Uw rogon ni gad be tayfan e yafas ko girdi’ u nap’an e machib?
5 Nap’an ni gad ra pasig ko machib, ma aram e gad be tayfan e yafas e girdi’ ni bod Jehovah ya: “Dabun ni nge n’ag be’, ya ba adag ni nge urngin e girdi’ mi yad pi’ keru’rad ko urngin e denen ni yad be rin’.” (2 Pet. 3:9; Ezek. 33:11) Ngad dugliyed ni ngad machibnaged urngin e girdi’ u lan e binaw rodad, ya ngan pining e sorok ngak Jehovah!—Ps. 109:30.