Ngam Ayuweg e Pi Bible Study Rom u ‘Polo’ i Gum’irchaem’
1. Mang e ba t’uf ni faanra ngad ayuweged e piin ni gad be fil e Bible ngorad?
1 Ra ngam ayuweg reb e Bible study ni nge mon’og me ognag ir ngak Got, ma gathi ke mus nib t’uf ni ngan fil e Bible ngak. I yog apostal Paul ni i par nib munguy ni bod feni munguy ba matin ngak pi fak. Ku aram rogodad ni gad baadag ni ngad pied gadad nga pa’rad ngad ayuweged e piin ni gad be fil e Bible ngorad ngar ilalgad ko tirok Got ban’en.—1 Thess. 2:7-9.
2. Mang fan ni ngaud lemnaged e Bible study rodad, ma mang e rayog ni ngad rin’ed?
2 Mu Dag ni Ga Be Lemnag: Nap’an ni be fil be’ e Bible ma ra fol ko pi n’en ni kan fil ngak, ma nangan’ rok e ra pow’iy ni nge dabi cheg ngak e girdi’ nder ma fol ko Bible. (1 Pet. 4:4) Sana girdien e tabinaw rok e yad ra togopuluw ngak. (Matt. 10:34-36) Rayog ni ngad ayuweged ni ngad daged ngak ni gad be lemnag. Ke yog reb e missionary ni gaar: “Dab mu gur ni ngam chuw u tomren ni kam filew e Bible. Rayog ni ngam par ngam sabethingow buuchuw.” Ngam fal’eg rogom ngam par ya nge yog ni ngam ayuweg ko ngiyal’ nib t’uf e ayuw rok. Rayog ni ngam dengwanag ara ngam man mu guy nga tabinaw rok ko ngiyal’ nib m’ar, fa? Rayog ni ngam par u tooben u nap’an e muulung, ngam ayuweg e pi fak, fa?
3. Uw rogon ni ngad ayuweged e Bible study rodad nge yog ni pi’ e ulung e athamgil ngorad?
3 Ayuw ni Ma Yib ko Ulung: Faanra ga be machib u mit e tabinaw nib chugur nga tafen e study rom, mang ni dab man nga tafen nge mada’nag fare walag ni gimew be yan ko machib? Faanra rayog, ma rib fel’ nra bayay me un yugu reb e walag fa reb e piilal ngom. Maku, rayog ni ngam pi’ e athamgil nga laniyan’ nge un ko muulung nga Kingdom Hall. Aram rogon ni ga ra ayuweg nge yog e felfelan’ ngak me chag ngak girdien e ulung.—Mark 10:29, 30; Heb. 10:24, 25.
4. Uw rogon ni kan tow’athnagdad ko athamgil ni kad ted?
4 Kari gel e felfelan’ rok e gallabthir ni kar athamgilgow kar ayuwegew pi fakrow ko tirok Got ban’en ma yad be pigpig ku Jehovah. (3 John 4) Ku ra yog e felfelan’ ngodad ko ngiyal’ ni gad be athamgil ni ngad ayuweged e pi Bible study rodad.