Ke Bung Rogog ni Nggu Un ko Machib, Fa?
1. Mang fan ndabi mulan’dad ngad lemnaged ndabiyog ni ngad uned ko machib?
1 Faanra kam fith e re deer ngom, ma dabi mulan’um! Ya gathi skul ni kad uned ngay ara salap rodad e ra ayuwegdad ni ngad manged tamachib. Immoy boch i gachalpen Jesus kakrom ni u nog ni “dariy e sukul” rorad. Machane yad ba salap ko machib ni bochan e ur tedan’rad ngaur folwokgad rok Jesus.—Acts 4:13; 1 Peter 2:21.
2. Uw rogon e machib ni i tay Jesus?
2 Rogon ni i Machib Jesus: Ba mom ni ngan nang fan e n’en ni i machibnag Jesus mab tamilang. Deer ni i fith, nge fanathin ni i weliy, nge rogon ni i non e aram e n’en ni k’aring e girdi’ ngar adaged ni ngar motoyilgad ngak. (Matthew 6:26) Maku ma dag ko girdi’ ni baadag ni nge ayuwegrad. (Matthew 14:14) Maku reb e bay gelngin e thin rok mab mich u wan’ e n’en ni i machibnag ya manang ni Jehovah e ir e ke pi’ e re maruwel nem ngak maku ir e ke pi’ gelngin ni nge rin’.—Luke 4:18.
3. Uw rogon ni ma ayuwegdad Jehovah ni ngada rin’ed fare maruwel ni kan pi’ ngodad?
3 Ma Ayuwegdad Jehovah: Ma pi’ Jehovah e ayuw ngodad u daken e Thin rok nge ulung rok ya nge yog nda machibnaged fare thin nib fel’ u rogon nra yib angin. (Isaiah 54:13) Ma bochan ni ke ayuwegdad Jehovah ni ngad nanged rogon e machib ni i tay Jesus, ma aram fan nrayog ni ngad folwokgad u rogon kanawoen e machib ni i tay. Ku ma ayuwegdad Jehovah u daken gelngin nib thothup nge pi muulung ni gad ma un ngay. (John 14:26) Maku reb e ku bay e pi publisher u lan e ulung ni yad ba salap ko machib nrayog ni ngar ayuweged gadad.
4. Mang ni bay fan ni ngad lemnaged ni bay rogodad ni ngad machibnaged e girdi’?
4 Ri bay fan ni ngada lemnaged ni bay rogodad ni ngad machibnaged e girdi’ “ya gelngidad ni ngad maruweliyed ngay e Got e ke pi’ ngodad.” (2 Korinth 3:5) Faan gad ra pagan’dad ngak Jehovah ma gad maruwel ko pi n’en ni ke pi’ ni nge ayuwegdad ma aram e rayog ni ngada pared ni “ke bung rogodad nrayog ni ngada rin’ed urngin mit e ngongol nib fel’.”—2 Timothy 3:17.