Kam Ognag e Fol Bible ngak Be’ ko Yay Nsom’on ni Kam Nonow?

Nap’an ni yira ognag e fol Bible ko girdi’ ma boor i yad e ma yog ni dabun ni nge fil e Bible fa ma fil e Bible u galesiya rok. Yad ma lemnag ni fol Bible ni gad ma tay e taareb rogon ko tin ni ur uned ngay kafram, ere dar nanged ni aram ban’en nrib fel’ ya ra tamilangnag lanin’rad. Ere mang ndab mu tay in e minit ni ngam weliy ngak rogon e fol Bible ni gad ma tay, ko bin ni ngam ognag e fol Bible ngak? Baaray rogon ni ngan susunnag: Dab mog ngak ni gab chag ko lum ma bay mu sul ni kam fek e ggan; ya nga mog ngak ni nge ri’ lamen! Baaray rogon ni ngam rin’ e re n’ey u lan in e minit, nrogon nib puluw ko Machib Rodad Ni Fan Ko Gil’ilungun Got ko page 6 ko September 2005:

“Ga be lemnag nra taw nga ba ngiyal’ me lebug e pi thin ni baaray? [Mu beeg e Isaiah 33:24, ma ga pag ni nge fulweg.] Son nggu dag ban’en ngom u murung’agen e re n’ey.” Mu pi’ fare ke babyor ni Be Fil e Bible ngak, ma ga dag ngak e thin ni bay ko paragraph 22, ko page 40. Mu beeg e deer ngak ni bay nga but’ ko fare page, ma gog ngak ni nge yaliy e fulweg riy u nap’an ni ga be beeg e paragraph. Ngemu’ ma ga fith fare deer bayay, ma ga motoyil ko n’en nra yog. Mu kum beeg reb e thin nu Bible ni bay ko fare paragraph. Ma ga fith reb e deer ni gimew ra weliy e fulweg riy ko yay ni migid ni ga ra sul, ma ga yarmiy ni ngkum sul ngak bayay. Ra aram rogon ma aram e kam tababnag e fol Bible ngak be’!