Ngad Mon’oggad ko Machib—Ngan Dag Rogon ni Ngan Fil e Bible Ngak Be’ ni Yibe Fanay fare Ke Babyor ni Mang e Ri Be Fil e Bible?

Fan nib Ga’ Fan: Yooren e girdi’ e darur nanged fan e fol Bible ni gadad ma yog ngorad ni ngar uned ngay ndariy puluwon. Yad ma lemnag ni bay ba ulung i girdi’ ni ngar uned ngorad ara ngar uned nga ban’en ni bod e skul. Ere, ba fel’ ni ngam dag rogon ni ngam rin’ ko bin ni nga mog ni nge un ko fol Bible. Nap’an ni kam mada’gow be’ u tabinaw rok ma u lan in e minit ma rayog ni ngam dag rogon ngak feni mom ni ngan fil e Bible.

Rogon ni Ngan Rin’:

Tomuren ni ka mog fithingam ngak faen ni kam mada’gow, mag fith ngak ko ma lemnag e pi n’en ni bay nga m’on.
Mu weliy ngak ni boor e girdi’ ni ku yad ma lemnag boch ban’en ni aram rogon, mag dag ngak e pi n’en ni bay u lan fare ke babyor ni Mang e Ri Be Fil e Bible? Mu weliy ngak ni re ke babyor ney e bay pi guruy riy nib mom ni ngan nang fan, ma pi guruy nem e be dag e n’en ni be fil e Bible u murung’agen e pi n’en nra buch boch nga m’on nge ku boch ban’en. Mag fith ngak ko bin ngan e guruy e baadag ni nge nang murung’agen.
Mu pi’ baken fare babyor ngak ma gog ngak ni nge yaliy fare guruy ni ir e ke mel’eg. Mu weliy ngak ni pi deer ni bay u m’on ko fare guruy e bay e fulweg riy ko fapi paragraph ni yira beeg.
Faanra baadag facha’ ma gog ngak ni nge beeg e bin som’on e paragraph. Ngemu’ ma ga beeg e deer ko re paragraph nem me gimew weliy e fulweg riy. Mu gay mag weliy e pi thin nu Bible nra pi’ e fulweg ko fare deer. Mu dag ngak rogon ni kam underlinenag e fulweg ko ke rom e babyor.
Mu weliyew e bin migid e paragraph, ma gog ngak facha’ ni nge gay rogon ni nge pirieg e fulweg riy me pi’ ni thin rok.
Mu pining e magar ngak, ma ga yarmiy ni ngam sul ngak ma gimew weliy e tin ka bay ko re guruy nem.
Faanra rayog mag pi’ e athamgil ngak ni nge yaliy fare video ni bay ko jw.org ni kenggin e Mang e Yima Rin’ u Nap’an e Fol Bible?

Mu Gay Rogon ni Ngam Rin’ e Re N’ey u Lan e Re Pul Ney:

Mu meybil ngak Jehovah ni nge ayuwegem ni ngam tababnag e fol Bible ngak be’.—Fil. 2:13.
Mu gay rogon ni ngam tababnag e fol Bible ngak be’ ni ga be fanay fare ke babyor ni Mang e Ri Be Fil e Bible? ara mu dag fare video ni kenggin e Mang e Yima Rin’ u Nap’an e Fol Bible? Mu guy rogon ni ngam rin’ e re n’ey ni gathi kemus ni taab yay u nap’an e machib.