Ngad Mon’oggad ko Machib—Rogon ni Ngan Pi’ fare Babyor ni Mang e Ri Be Fil e Bible?

Fan nib Ga’ Fan: Fare babyor ni Mang e Ri Be Fil e Bible?, e aram reb e talin e maruwel ni ba ga’ ni gad ma tay nga lan e kabang rodad u nap’an ni nga darod ko machib. Machane u m’on ni ngad fanayed ni ngad filed e Bible ngak be’, ma som’on e ngad pied ngak. Ere, ba t’uf ni nge bagadad me athamgil ni nge mon’og u rogon ni nge pi’ e re babyor ney u nap’an e machib. (Prov. 22:29) Boor kanawoen nrayog ni ngan fanay ni ngan pi’ e re babyor ney, ere ra reb e walag ma nge fanay e kanawo’ nra yib angin ngak.

Rogon ni Ngan Rin’:

Mu fith reb e deer ngak faen ni gimew be non nra adag ni nge nang e fulweg riy ya nge yag ni ngam guyew fare guruy ni ir e bay e fulweg ko fare deer riy. Ra reb e guruy ma bay boch e deer riy, ma aram e rayog ni ngam mel’eg reb ko pi deer nem ni ir e ngam weliy murung’agen. U tomuren ni ke pi’ e fulweg ko fare deer mag beeg reb e thin nu Bible nib puluw ngay, mag dag ngak reb e paragraph ni bay rogon ko n’en ni kam weliyew ma gimew weliy u taabang.
Ku reb nrayog ni ngam rin’ e aram e ngam dag e tin nib m’on e page ngak ko re babyor ni Mang e Ri Be Fil e Bible?, ya nge yag ni pug e tafinay rok, ma aram mag dag ngak fare guruy ni ir e ra pirieg e fulweg ko Bible riy. Ni bod ni rayog ni ngam weliy ngak reb e magawon ni ke buch, mag weliy ngak ni boor e girdi’ ni kar lemnaged ko mang e fulweg ko pi deer nem ni bay ko page 3. Ara rayog ni nga mog ni ga be yan u mit e tabinaw ya nge yag ni ngam weliy murung’agen boch ban’en nra buch boch nga m’on nib fel’. Ma aram mag dag fapi sasing ni bay ko page 4 nge 5 mag fith ngak ni nge lungum, “Bin ngan ko pi n’ey e ga baadag ni ngam guy ni nge lebug?” Ku reb e ban’en ni ku rayog ni ngam rin’ e aram e nga mog ni ga be mada’nag e girdi’ ni ngam ayuwegrad ni ngar pirieged e fulweg ko pi deer nib ga’ fan. Ma aram mag dag fapi deer ngak ni bay u but’ ko page 6, mag fith ngak ko bin ngan e baadag ni nge nang e fulweg riy.
Ra ngan fil e Bible ngak be’, ma rayog ni ngan fith ko baadag ni nge fil e Bible, fa danga’. Sana rayog ni nge lungum: “Gamad be dag e re babyor ney ko girdi’. Bay bayay ni kam guy e re babyor ney? [Mmotoyil ko n’en nra yog.] Faanra bay e tayim rom ma gu baadag ni nggu dag ngom rogon nrayog ni ngam pirieg e fulweg u boch e deer ni ga be fanay e re babyor ney nge ke rom e Bible.”

Mu Gay Rogon ni Ngam Rin’ e Re N’ey u Lan e Re Pul Ney:

Nap’an ni gimed ra tay chon e tabinaw rom e fol Bible ni tabinaw mi gimed yan u yaan rogon ni ngan pi’ e re babyor ney.
Nap’an ni gimew be yan reb e walag ko machib mag weliy ngak e n’en ni kam lemnag ni nga mog u nap’an ni ngam pi’ fare babyor. (Prov. 27:17) Rayog ni ngam thilyeg e n’en ni kam mel’eg ni nga mog ni faanra der yib angin.