Ba Fel’ Lan Owchem, Fa?
1. Mang e be yip’ fan ni nge par ‘lan owchey nib fel’?
1 N’en ni kad yiluyed e changar rodad ngay e aram e n’en ni ma gagiyegnag e ngongol rodad. Aram fan nib puluw e thin rok Jesus ni gaar: “Faanra bfel’ lan owchem, ma dowam ni polo’ e ba sug ko tamilang.”! (Matt. 6:22) Faanra be par lan owchedad nib “fel’” ma aram e be yip’ fan ni taa ban’en e gad be mon’eg ni aram e tin nib m’agan’ Got ngay. Ku be yip’ fan ni gad be mon’eg Gil’ilungun Got ma darud paged e tin de ga’ fan ni bod e chugum nge ku boch ban’en ni nge magawonnag e machib ni gad be tay.
2. Mang boch ban’en nrayog ni nge kirebnag rogon ni gad ma lem, machane mang e ra ayuwegdad?
2 Ba T’uf ni Ngad Fal’eged i Yaliyed Gadad: Pi n’en ni gad ma guy u tv, ara gad ma rung’ag murung’agen u radio, ara gad ma beeg murung’agen u babyor e rayog ni nge kirebnag rogon ni gad ma lemnag e tin nib t’uf rodad ara tin ni bay rok boch e girdi’. U m’on ni ngad rin’ed ban’en ara ngad chuw’iyed ban’en nib tolang puluwon, fa ra fek boor e tayim rodad, ma ba t’uf ni ngad “tafinaynag rogon puluwon” ma da fithed gadad ni nge lungudad, ‘Ra ayuweg e re n’ey e pigpig ni gu be tay ngak Jehovah fa ra magawonnag?’ (Luke 14:28; Fil. 1:9-11) Kub fel’ ni ngaud lemnaged rogon nrayog ni ngad buchuuwnaged e maruwel u puluwdad ya nge yog ni yoor e tayim nda fanayed ko machib.—2 Kor. 13:5; Efe. 5:10.
3. Mang e kad filed rok reb e walag nib pin ni thilyeg boch ban’en ko par rok ya nge yog ni mon’eg e tirok Got ban’en?
3 Immoy reb e walag nib pin ni un ko pioneer me turguy ndabi tal ko maruwel ni ma un ngay u polo’ e tayim ni yugu aram rogon nra lichnag e tayim ni be maruwel ma dabi gafgow ko salpiy. Faani munmun me gaar: “Dabiyog ni nge pigpig be’ nga l’agruw e masta. Thingar gu pag e tin ni gu baadag ni fan e nggu yognag e tin nib t’uf rog. Kug nang ni chugum nge flaab e ra kireb ma faanra aram e n’en ni nggu lek me gag e gu be gafgownageg.” Ke yog ni nge thiliyeg boch ban’en ko par rok, ma ke thilyeg e maruwel rok, ma aram e ke yog ni nge ulul ko pioneer.
4. Mang nib ga’ fan ni ngad pared ni taab n’en e gad be mon’eg?
4 Gad manang ni gad be par ko tin tomuren e rran ere rib ga’ fan ni ngaud pared ni taab n’en e gad be mon’eg. Gubin e rran ni gad be chugur iyan nga tungun e re m’ag ney. Ma tomur riy e aram fare m’ag rok Got nib biech. (1 Kor. 7:29, 31) Ere faan gad ra tedan’dad ko fare maruwel ni machib, ma aram e rayog ni ngad ayuweged gadad nge piin nra motoyil ngodad.—1 Tim. 4:16.