Pi Tamachib ni Yad Ba Pasig e Ba T’uf ni Ngaur Fal’eged i Lemnag Ban’en u Fithik’ e Meybil
1. Mang e ke ayuweg Jesus ni nge mon’eg e maruwel rok nrib ga’ fan?
1 Immoy reb e nnep’ ni boor e girdi’ ni yad mm’ar nge piin ni ke ying e moonyan’ ngorad nni fekrad ngak Jesus ni nge golnagrad. Ma nap’an ni pirieg pi gachalpen Jesus ko bin migid e rran me lungurad ngak: “Be gayem urngin e girdi’.” Kar lemnaged ni nge ulul Jesus i golnag e m’ar. Machane, manang Jesus e n’en nib ga’ fan ni nge rin’ ni aram e nge machibnag fare thin nib fel’. Ma aram me fulweg ni gaar: “Thingar darod ko pi binaw nib chugur ngaray, ya ngku gu machib riy, ya er fag ni ku gub.” Mang e ke ayuweg Jesus ni nge tiyan’ ko maruwel rok? Ke od ni kab nep’ ni nge meybil me fal’eg i lemnag boch ban’en. (Mark 1:32-39) Faanra ud meybilgad ma gad be fal’eg i lemnag ban’en ma uw rogon nra ayuwegdad ni ngad machibgad u fithik’ e pasig?
2. Mang e gad ra fal’eg i lemnag ma ra ayuwegdad ni ngad pasiggad ko machib?
2 Mang e Ngad Fal’eged i Lemnag? I guy Jesus ni girdi’ e “kar pired ni ke magafan’rad ndar nanged e n’en ni ngar rin’ed, ya yad bod e saf nde moy rorad e en ni ma gafaliyrad.” (Matt. 9:36) Ku arrogodad nrayog ni ngad lemnaged feni ga’ fan ni ngad ayuweged e girdi’ ngar rung’aged fare thin nib fel’ e ngiyal’ ney ni bochan e daki yoor e tayim ni ke magey. (1 Kor. 7:29) Rayog ni ngad fal’eged i lemnag e pi n’en ni ke sunmiy Jehovah nge pi fel’ngin, nge tow’ath rodad ni gadad e Pi Mich Rok, nge tin riyul’ ni kad filed ko Thin Rok ni dawori tamilang u wan’ e girdi’ ko gin ni gad ma par riy.—Ps. 77:11-13; Isa. 43:10-12; Matt. 13:52.
3. Mingiyal’ e ba fel’ ni ngad fal’eged i lemnag ban’en?
3 Mingiyal’ e Ba Fel’ ni Ngad Fal’eged i Lemnag Ban’en? Boch e girdi’ e yad ma od ni kab nep’ ko ngiyal’ ni dariy lingan ban’en ni fan e ngar fal’eged i lemnag ban’en ni bod ni rin’ Jesus. Ma boch e girdi’ e kar pirieged nib fel’ ni ngar fal’eged i lemnag ban’en u m’on ni ngar molod ni blayal’. (Gen. 24:63) Mus ni faanra boor pa’ u puluwdad, ma rayog ni ngad gayed e ngiyal’ ni ngad fal’eged i lemnag ban’en riy. Boch e girdi’ e yad ma fal’eg i lemnag ban’en u nap’an ni yad be milekag u bus ara taxi. Ma boch e girdi’ e yad ma fal’eg i lemnag ban’en ko ngiyal’ ni yibe toffan u tabon e maruwel ko misiw’. Maku boch e girdi’ e kar pirieged ni faan yad ra fal’eg i lemnag boch ban’en u lan in e minit u m’on ni nga ranod ko machib ma ma ayuwegrad ni ngar machibgad u fithik’ e pasig ndab ra rusgad.
4. Mang fan ni ngaud fal’eged i lemnag ban’en?
4 Faanra ud fal’eged i lemnag ban’en u fithik’ e meybil ma rayog ni ngad adaged ni ngad ululgad ko pigpig ngak Jehovah, mad tedan’dad ko tirok Got ban’en, me yog nda ululgad ko machib. Jesus, ni ir e Bin Th’abi Salap e Tamachib Rok Got, e yib angin ngak e pi n’en ni i fal’eg i lemnag, maku er rogodad.