Ngam Felfelan’ ni Ga Be Un i Machibnag fare Thin nib Fel’

Bay ba ngiyal’ ni kam pirieg nib mo’maw’ rogon ni ngam machib, fa? Sana boor i gadad e ra yog ni arrogon. Mang fan? Sana rayog ni ngad lemgad ni aray rogon ni bochan nib ga’ ni gad ma mada’nag e girdi’ ni daburad e machib, ara yad ma togopuluw ngodad, ara reb e gad be rus ni ngad nonad ngak be’ ndad nanged owchen. Riyul’ ni faanra ke buch ban’en ngom ni aray rogon ma rayog ni nge warnag e felfelan’ rom. Machane gad ma pigpig ngak fare Got nib felfelan’ ni baadag ni ngad pigpiggad ngak u fithik’ e felfelan’. (Ps 100:2; 1Ti 1:11) Ere, mang dalip i fan nrayog ni ngad machibgad u fithik’ e felfelan’?

Bin som’on e, gad ma machibnag fare thin nra pi’ e athap ko girdi’. Yugu aram rogon ni ke war e athap ko girdi’ e ngiyal’ ney, machane rayog ni ngad fal’eged lanin’rad ni aram e ngad weliyed fare “thin nib fel’” ngorad. (Isa 52:7) Maku arrogodad ni ku rayog ni nge pi’ e re thin ney ni murung’agen Gil’ilungun Got e felfelan’ ngodad. Ere u m’on ni ngam man ko machib, mag fal’eg i lemnag e pi tow’ath nra yibnag Gil’ilungun Got nga fayleng.

Bin migid e, re thin nib fel’ ney ni gadad be machibnag e rayog ni nge thilyeg e ngongol ko girdi’ maku ra ayuwegrad ko tirok Got ban’en. Re thin ney e rayog ni nge ayuwegrad ni ngar thilyeg pangirad nib kireb me yag e yafos ni manemus ngorad. (Isa 48:17, 18; Ro 1:16) Re maruwel ney ni gad be un ngay e rayog ni ngad susunnaged ni gad be un nga reb e maruwel ni gad be gay e girdi’ nib t’uf ni ngan ayuwegrad. Yugu aram rogon ni bay boch e girdi’ ni dubrad ni ngan ayuwegrad, machane ku gad be ulul i gay e piin ni yad baadag ni ngan ayuwegrad.​—Mt 10:11-14.

Bin dalip i fan ni aram e bin th’abi ga’ i fan ni gad ma machib e bochan e machib ni gad ma tay e ma pining e sorok ngak Jehovah. Ma ireray ban’en nrib ga’ fan u wan’. (Isa 43:10; Heb 6:10) Maku reb e, ma pi’ gelngin nib thothup ngodad ya nge yag ni ngad rin’ed e re maruwel ney. Ere, thingar da ninged e ayuw rok ni nge pi’ e felfelan’ ngodad, ya ireray reb ko fapi wom’engin gelngin Got nib thothup. (Ga 5:22) Nap’an nra ayuwegdad Jehovah ma rayog ni nge war e magafan’ rodad ma gad machib ndab da rusgad. (Ac 4:31) Ere, demtrug ko baadag e girdi’ ni kad mada’naged ni ngar motoyilgad ngodad fa danga’, machane rayog ni ngad machibgad u fithik’ e felfelan’.​—Eze 3:3.

NGAN YALIY FARE VIDEO NI KENGGIN E REGAIN JOY THROUGH STUDY AND MEDITATION, NGEMU’ MIN PI’ E FULWEG KO PI DEER NI BAARAY:

• Mang fan ni ngari ga’ fan u wan’dad e tayim ni gad ma tay ko fol Bible ni yigoo gadad, ni yugu aram rogon ni boor e tayim ni gad ma tay ni fan ko machib u gubin e pul?

• Uw rogon nrayog ni ngad folwokgad rok Mary?

• Mingiyal’ e ga ma fal’eg i lemnag e Thin rok Got?

• Mang boch ban’en ni ma k’aring e felfelan’ ngom u nap’an ni ga be un ko machib?