Mu Fil Ngak e Pi Bitir Rom Rogon ni Ngar Manged Boch e Tamachib
1. Mang e be yog e Psalm 148:12, 13 ngak e pi gallabthir ni Kristiano ni ngar rin’ed?
1 Be pining Jehovah e piin ni bitir ni ngar pininged e sorok ngak. (Ps. 148:12, 13) Ere pi gallabthir ni Kristiano e gathi ke mus ni ngar filed e tin riyul’ nu Bible nge pi motochiyel rok Got ngak pi fakrad. Ya ku thingar ra filed ngorad rogon ni ngar manged e pi tamachib ko fare thin nib fel’. Uw rogon ni ngar rin’ed e re n’ey?
2. Faanra dag e gallabthir e kanawo’ nib fel’ ngak e bititr ma mang angin nra yib riy?
2 Mu Dag e Kanawo’ nib Fel’: I yog Gideon ngak 300 e girdi’ rok ni gaar: “Nguum yaliyed gag.” (Judg. 7:17) Ba ga’ ni ma yaliy e pi bitir e gallabthir rorad ma yad ma folwok rorad. Reb e matam e ma maruwel nnep’, ma susun ni nge mol ko ngiyal’ nra yib nga tabinaw ko Sabado ni kakadbul. Machane ma fek e bitir rok nga ranod ko machib ni yugu aram rogon ni kari magar. Yugu aram rogon ni dariy ban’en ni be yog, machane be dag ngorad nrib ga’ fan e machib. (Matt. 6:33) Ma guy e pi bitir rom ni ga ma felfelan’ nga boch e liyor ni ga ma tay ni bod rogon e meybil, nge beeg Bible, nge boch e fulweg ni ga ma pi’ u nap’an e muulung, nge machib ni ga ma un ngay, fa? Dabisiy ni dabiyog ni ngam rin’ ngari yan i aw nrib fel’ rogon. Machane ra guy e bitir rom ni ga be pigpig ngak Jehovah ni gab pasig ngay ma ra mom ni ngar folgad rom.—Deut. 6:6, 7; Rom. 2:21, 22.
3. Mang boch ban’en ni nge ayuweg e gallabthir pi fakrad ngar nameged?
3 Ngaun Nameg Boch Ban’en ni ngan Mon’og Riy: Pi gallabthir e gubin ngiyal’ ni yad ma fil ko bitir rorad rogon ni nga u ranod, nge rogon ni nga ur nonad, nge rogon e munmad rorad, nge ku boch ban’en. Nap’an ni yad ra ilal ma yima tay boch ban’en ni ngaur nameged. Faanra pi gallibthir e Kristiano ma yad ma ayuweg pi fakrad ngar nameged boch ban’en ni fan ko tirok Got ban’en nrogon nib m’ag ko duw rorad nge tin rayog rorad. (1 Kor. 9:26) Gimed ma fil ngak pi fakmed rogon ni ngar pied e fulweg ni thin rorad mar fal’eged e welthin rorad u nap’an e Theocratic Ministry Skul, fa? (Ps. 35:18) Gimed ma fil ngorad ni ngar uned nga boch ban’en ni fan ko machib, fa? Gimed ma ayuwegrad ni ngar nameged e taufe nge pioneer, fa? Gimed ma ayuwegrad ni ngaur chaggad ngak boch e tamachib nib pasig ya nge yog nni pi’ e athamgil nga lanin’rad ngar mon’oggad i yan, fa?—Prov. 13:20.
4. Uw rogon nra yib angin ngak e piin bitir ni faanra tabab e gallabthir i fil ngorad rogon ni ngar manged tamachib u nap’an ni ka yad bbitir?
4 I yog fa en ni yoloy e psalm ni gaar: “Ku gub bitir ma ga tabab i fonownigeg, ma ku gu be weliy feni manigil e ngongol rom.” (Ps. 71:17, BT) Ngam tababgad i fil ngak pi fakmed rogon ni ngaur machibgad u nap’an ni ka yad bbitir. Rogon ni gimed ra ayuwegrad e dabisiy nra fel’ rogorad riy ko ngiyal’ ni kar ilalgad.—Prov. 22:6.