Ngad Daged nib Ga’ Fan u Wan’dad
Puguran ni Yira Tay ko April 17
1. Mang e yog faen ni yoloy e Psalm nib puluw ko Puguran?
1 Bochan ni ke gin faen ni yoloy e Psalm ko runguy rok Jehovah nge rogon ni ma ayuweg e girdi’ rok, ma aram me fith ni gaar: “Be mang e rayog ni gu pi’ ngak Somol nge yan nga puluwon gubin e pi n’en nib fel’ ni ke rin’ ngog?” (Ps. 116:12, BT) Ngiyal’ ney e boor fan ni nge pining e pi tapigpig rok Got e magar ngak. Boor e chibog nga tomren ni kan yoloy e pi thin ney, ma aram me pi’ Jehovah e bin th’abi fel’ e tow’ath ni aram fare biyul. Ere boor fan ni ngad pininged e magar u nap’an ni gad be fal’eg rogodad ni ngad madnomnaged e yam’ ni tay Kristus ko April 17.—Kol. 3:15.
2. Mang boch i fan nib ga’ fan fare biyul u wan’dad?
2 Pi Tow’ath nra Yibnag fare Biyul: Bochan fare biyul ma rayog ni nge “n’ag Got fan e denen rodad.” (Kol. 1:13, 14) Re n’ey e ke bing e kanawo’ ngodad ni nge yog nda liyorgad ngak Jehovah me par e nangan’ rodad nib fel’. (Heb. 9:13, 14) Piin ni ke michan’rad ko fare biyul e rayog ni nge yog e yafos ni manemus ngorad.—John 3:16.
3. Uw rogon ni nge m’ug ni gad be pining e magar ngak Jehovah ni bochan fare biyul?
3 Ngad Daged nib Ga’ Fan u Wan’dad: Reb e kanawo’ ni ngad daged nib ga’ fan e re n’ey u wan’dad e aram e ngad beeged e pi thin nu Bible ni kan dugliy ni ngan beeg u m’on ko puguran ma gad fal’eg i lemnag. Maku rayog ni nga dogned ngak Jehovah u daken e meybil feni ga’ fan fare biyul u wan’dad. (1 Thess. 5:17, 18) Faan gad ra un ko re madnom ney nrogon ni tay Jesus chilen ni ngaun rin’ ma aram e be m’ug ni gad be pining e magar ni bochan. (1 Kor. 11:24, 25) Maku rayog ni ngad folwokgad rok Jehovah u rogon ni ma t’ufeg e girdi’, ma gad pining e girdi’ ni ngar uned ko re madnom ney.—Isa. 55:1-3.
4. Mang e susun ni nge mudugil u wan’dad?
4 Pi tapigpig rok Jehovah nib ga’ fan fare biyul u wan’rad e dab ra lemnaged ni fare Puguran e taareb rogon ko yug muulung ni gad ma tay. Ya aram e bin th’abi ga’ fan e muulung ni gad ma tay u gubin e duw! Chiney ni be chugur fare Puguran e manga yigi mudugil lanin’dad ni bod faen ni yoloy e Psalm ni gaar: “Lanin’ug mu pining e sorok ngak Somol, ma dab mu pagtalin feni gol.”—Ps. 103:2.